Utshovঅধ্যায় 34
34.1
জনমেজয় উবাচ
পূর্বমেব যদা রামস্তস্মিন্যুদ্ধ উপস্থিতে
আমন্ত্র্য কেশবং যাতো বৃষ্ণিভিঃ সহিতঃ প্রভুঃ
34.2
সাহায্যং ধার্তরাষ্ট্রস্য ন চ কর্তাস্মি কেশব
ন চৈব পাণ্ডুপুত্রাণাং গমিষ্যামি যথাগতম্
34.3
এবমুক্ত্বা তদা রামো যাতঃ শত্রুনিবর্হণঃ
তস্য চাগমনং ভূয়ো ব্রহ্মঞ্শংসিতুমর্হসি
34.4
আখ্যাহি মে বিস্তরতঃ কথং রাম উপস্থিতঃ
কথং চ দৃষ্টবান্যুদ্ধং কুশলো হ্যসি সত্তম
34.5
বৈশংপায়ন উবাচ
উপপ্লব্যে নিবিষ্টেষু পাণ্ডবেষু মহাত্মসু
প্রেষিতো ধৃতরাষ্ট্রস্য সমীপং মধুসূদনঃ
শমং প্রতি মহাবাহো হিতার্থং সর্বদেহিনাম্
34.6
স গত্বা হাস্তিনপুরং ধৃতরাষ্ট্রং সমেত্য চ
উক্তবান্বচনং তথ্যং হিতং চৈব বিশেষতঃ
ন চ তত্কৃতবান্রাজা যথাখ্যাতং হি তে পুরা
34.7
অনবাপ্য শমং তত্র কৃষ্ণঃ পুরুষসত্তমঃ
আগচ্ছত মহাবাহুরুপপ্লব্যং জনাধিপ
34.8
ততঃ প্রত্যাগতঃ কৃষ্ণো ধার্তরাষ্ট্রবিসর্জিতঃ
অক্রিয়ায়াং নরব্যাঘ্র পাণ্ডবানিদমব্রবীৎ
34.9
ন কুর্বন্তি বচো মহ্যং কুরবঃ কালচোদিতাঃ
নির্গচ্ছধ্বং পাণ্ডবেয়াঃ পুষ্যেণ সহিতা ময়া
34.10
ততো বিভজ্যমানেষু বলেষু বলিনাং বরঃ
প্রোবাচ ভ্রাতরং কৃষ্ণং রৌহিণেয়ো মহামনাঃ
34.11
তেষামপি মহাবাহো সাহায্যং মধুসূদন
ক্রিয়তামিতি তত্কৃষ্ণো নাস্য চক্রে বচস্তদা
34.12
ততো মন্যুপরীতাত্মা জগাম যদুনন্দনঃ
তীর্থয়াত্রাং হলধরঃ সরস্বত্যাং মহায়শাঃ
মৈত্রে নক্ষত্রয়োগে স্ম সহিতঃ সর্বয়াদবৈঃ
34.13
আশ্রয়ামাস ভোজস্তু দুর্যোধনমরিংদমঃ
যুয়ুধানেন সহিতো বাসুদেবস্তু পাণ্ডবান্
34.14
রৌহিণেয়ে গতে শূরে পুষ্যেণ মধুসূদনঃ
পাণ্ডবেয়ান্পুরস্কৃত্য যয়াবভিমুখঃ কুরূন্
34.15
গচ্ছন্নেব পথিস্থস্তু রামঃ প্রেষ্যানুবাচ হ
সংভারাংস্তীর্থয়াত্রায়াং সর্বোপকরণানি চ
আনয়ধ্বং দ্বারকায়া অগ্নীন্বৈ যাজকাংস্তথা
34.16
সুবর্ণং রজতং চৈব ধেনূর্বাসাংসি বাজিনঃ
কুঞ্জরাংশ্চ রথাংশ্চৈব খরোষ্ট্রং বাহনানি চ
ক্ষিপ্রমানীয়তাং সর্বং তীর্থহেতোঃ পরিচ্ছদম্
34.17
প্রতিস্রোতঃ সরস্বত্যা গচ্ছধ্বং শীঘ্রগামিনঃ
ঋত্বিজশ্চানয়ধ্বং বৈ শতশশ্চ দ্বিজর্ষভান্
34.18
এবং সংদিশ্য তু প্রেষ্যান্বলদেবো মহাবলঃ
তীর্থয়াত্রাং যয়ৌ রাজন্কুরূণাং বৈশসে তদা
সরস্বতীং প্রতিস্রোতঃ সমুদ্রাদভিজগ্মিবান্
34.19
ঋত্বিগ্ভিশ্চ সুহৃদ্ভিশ্চ তথান্যৈর্দ্বিজসত্তমৈঃ
রথৈর্গজৈস্তথাশ্বৈশ্চ প্রেষ্যৈশ্চ ভরতর্ষভ
গোখরোষ্ট্রপ্রয়ুক্তৈশ্চ যানৈশ্চ বহুভির্বৃতঃ
34.20
শ্রান্তানাং ক্লান্তবপুষাং শিশূনাং বিপুলায়ুষাম্
তানি যানানি দেশেষু প্রতীক্ষ্যন্তে স্ম ভারত
বুভুক্ষিতানামর্থায় কৢপ্তমন্নং সমন্ততঃ
34.21
যো যো যত্র দ্বিজো ভোক্তুং কামং কাময়তে তদা
তস্য তস্য তু তত্রৈবমুপজহ্রুস্তদা নৃপ
34.22
তত্র স্থিতা নরা রাজন্রৌহিণেয়স্য শাসনাৎ
ভক্ষ্যপেয়স্য কুর্বন্তি রাশীংস্তত্র সমন্ততঃ
34.23
বাসাংসি চ মহার্হাণি পর্যঙ্কাস্তরণানি চ
পূজার্থং তত্র কৢপ্তানি বিপ্রাণাং সুখমিচ্ছতাম্
34.24
যত্র যঃ স্বপতে বিপ্রঃ ক্ষত্রিয়ো বাপি ভারত
তত্র তত্র তু তস্যৈব সর্বং কৢপ্তমদৃশ্যত
34.25
যথাসুখং জনঃ সর্বস্তিষ্ঠতে যাতি বা তদা
যাতুকামস্য যানানি পানানি তৃষিতস্য চ
34.26
বুভুক্ষিতস্য চান্নানি স্বাদূনি ভরতর্ষভ
উপজহ্রুর্নরাস্তত্র বস্ত্রাণ্যাভরণানি চ
34.27
স পন্থাঃ প্রবভৌ রাজন্সর্বস্যৈব সুখাবহঃ
স্বর্গোপমস্তদা বীর নরাণাং তত্র গচ্ছতাম্
34.28
নিত্যপ্রমুদিতোপেতঃ স্বাদুভক্ষঃ শুভান্বিতঃ
বিপণ্যাপণপণ্যানাং নানাজনশতৈর্বৃতঃ
নানাদ্রুমলতোপেতো নানারত্নবিভূষিতঃ
34.29
ততো মহাত্মা নিয়মে স্থিতাত্মা; পুণ্যেষু তীর্থেষু বসূনি রাজন্
দদৌ দ্বিজেভ্যঃ ক্রতুদক্ষিণাশ্চ; যদুপ্রবীরো হলভৃত্প্রতীতঃ
34.30
দোগ্ধ্রীশ্চ ধেনূশ্চ সহস্রশো বৈ; সুবাসসঃ কাঞ্চনবদ্ধশৃঙ্গীঃ
হয়াংশ্চ নানাবিধদেশজাতা;ন্যানানি দাসীশ্চ তথা দ্বিজেভ্যঃ
34.31
রত্নানি মুক্তামণিবিদ্রুমং চ; শৃঙ্গীসুবর্ণং রজতং চ শুভ্রম্
অয়স্ময়ং তাম্রময়ং চ ভাণ্ডং; দদৌ দ্বিজাতিপ্রবরেষু রামঃ
34.32
এবং স বিত্তং প্রদদৌ মহাত্মা; সরস্বতীতীর্থবরেষু ভূরি
যয়ৌ ক্রমেণাপ্রতিমপ্রভাব;স্ততঃ কুরুক্ষেত্রমুদারবৃত্তঃ
34.33
জনমেজয় উবাচ
সারস্বতানাং তীর্থানাং গুণোত্পত্তিং বদস্ব মে
ফলং চ দ্বিপদাং শ্রেষ্ঠ কর্মনির্বৃত্তিমেব চ
34.34
যথাক্রমং চ ভগবংস্তীর্থানামনুপূর্বশঃ
ব্রহ্মন্ব্রহ্মবিদাং শ্রেষ্ঠ পরং কৌতূহলং হি মে
34.35
বৈশংপায়ন উবাচ
তীর্থানাং বিস্তরং রাজন্গুণোত্পত্তিং চ সর্বশঃ
ময়োচ্যমানাং শৃণু বৈ পুণ্যাং রাজেন্দ্র কৃত্স্নশঃ
34.36
পূর্বং মহারাজ যদুপ্রবীর; ঋত্বিক্সুহৃদ্বিপ্রগণৈশ্চ সার্ধম্
পুণ্যং প্রভাসং সমুপাজগাম; যত্রোডুরাড্যক্ষ্মণা ক্লিশ্যমানঃ
34.37
বিমুক্তশাপঃ পুনরাপ্য তেজঃ; সর্বং জগদ্ভাসয়তে নরেন্দ্র
এবং তু তীর্থপ্রবরং পৃথিব্যাং; প্রভাসনাত্তস্য ততঃ প্রভাসঃ
34.38
জনমেজয় উবাচ
কিমর্থং ভগবান্সোমো যক্ষ্মণা সমগৃহ্যত
কথং চ তীর্থপ্রবরে তস্মিংশ্চন্দ্রো ন্যমজ্জত
34.39
কথমাপ্লুত্য তস্মিংস্তু পুনরাপ্যায়িতঃ শশী
এতন্মে সর্বমাচক্ষ্ব বিস্তরেণ মহামুনে
34.40
বৈশংপায়ন উবাচ
দক্ষস্য তনয়া যাস্তাঃ প্রাদুরাসন্বিশাং পতে
স সপ্তবিংশতিং কন্যা দক্ষঃ সোমায় বৈ দদৌ
34.41
নক্ষত্রয়োগনিরতাঃ সংখ্যানার্থং চ ভারত
পত্ন্যো বৈ তস্য রাজেন্দ্র সোমস্য শুভলক্ষণাঃ
34.42
তাস্তু সর্বা বিশালাক্ষ্যো রূপেণাপ্রতিমা ভুবি
অত্যরিচ্যত তাসাং তু রোহিণী রূপসংপদা
34.43
ততস্তস্যাং স ভগবান্প্রীতিং চক্রে নিশাকরঃ
সাস্য হৃদ্যা বভূবাথ তস্মাত্তাং বুভুজে সদা
34.44
পুরা হি সোমো রাজেন্দ্র রোহিণ্যামবসচ্চিরম্
ততোঽস্য কুপিতান্যাসন্নক্ষত্রাণি মহাত্মনঃ
34.45
তা গত্বা পিতরং প্রাহুঃ প্রজাপতিমতন্দ্রিতাঃ
সোমো বসতি নাস্মাসু রোহিণীং ভজতে সদা
34.46
তা বয়ং সহিতাঃ সর্বাস্ত্বত্সকাশে প্রজেশ্বর
বত্স্যামো নিয়তাহারাস্তপশ্চরণতত্পরাঃ
34.47
শ্রুত্বা তাসাং তু বচনং দক্ষঃ সোমমথাব্রবীৎ
সমং বর্তস্ব ভার্যাসু মা ত্বাধর্মো মহান্স্পৃশেৎ
34.48
তাশ্চ সর্বাব্রবীদ্দক্ষো গচ্ছধ্বং সোমমন্তিকাৎ
সমং বত্স্যতি সর্বাসু চন্দ্রমা মম শাসনাৎ
34.49
বিসৃষ্টাস্তাস্তদা জগ্মুঃ শীতাংশুভবনং তদা
তথাপি সোমো ভগবান্পুনরেব মহীপতে
রোহিণীং নিবসত্যেব প্রীয়মাণো মুহুর্মুহুঃ
34.50
ততস্তাঃ সহিতাঃ সর্বা ভূয়ঃ পিতরমব্রুবন্
তব শুশ্রূষণে যুক্তা বত্স্যামো হি তবাশ্রমে
সোমো বসতি নাস্মাসু নাকরোদ্বচনং তব
34.51
তাসাং তদ্বচনং শ্রুত্বা দক্ষঃ সোমমথাব্রবীৎ
সমং বর্তস্ব ভার্যাসু মা ত্বাং শপ্স্যে বিরোচন
34.52
অনাদৃত্য তু তদ্বাক্যং দক্ষস্য ভগবাঞ্শশী
রোহিণ্যা সার্ধমবসত্ততস্তাঃ কুপিতাঃ পুনঃ
34.53
গত্বা চ পিতরং প্রাহুঃ প্রণম্য শিরসা তদা
সোমো বসতি নাস্মাসু তস্মান্নঃ শরণং ভব
34.54
রোহিণ্যামেব ভগবন্সদা বসতি চন্দ্রমাঃ
তস্মান্নস্ত্রাহি সর্বা বৈ যথা নঃ সোম আবিশেৎ
34.55
তচ্ছ্রুত্বা ভগবান্ক্রুদ্ধো যক্ষ্মাণং পৃথিবীপতে
সসর্জ রোষাত্সোমায় স চোডুপতিমাবিশৎ
34.56
স যক্ষ্মণাভিভূতাত্মাক্ষীয়তাহরহঃ শশী
যত্নং চাপ্যকরোদ্রাজন্মোক্ষার্থং তস্য যক্ষ্মণঃ
34.57
ইষ্ট্বেষ্টিভির্মহারাজ বিবিধাভির্নিশাকরঃ
ন চামুচ্যত শাপাদ্বৈ ক্ষয়ং চৈবাভ্যগচ্ছত
34.58
ক্ষীয়মাণে ততঃ সোমে ওষধ্যো ন প্রজজ্ঞিরে
নিরাস্বাদরসাঃ সর্বা হতবীর্যাশ্চ সর্বশঃ
34.59
ওষধীনাং ক্ষয়ে জাতে প্রাণিনামপি সংক্ষয়ঃ
কৃশাশ্চাসন্প্রজাঃ সর্বাঃ ক্ষীয়মাণে নিশাকরে
34.60
ততো দেবাঃ সমাগম্য সোমমূচুর্মহীপতে
কিমিদং ভবতো রূপমীদৃশং ন প্রকাশতে
34.61
কারণং ব্রূহি নঃ সর্বং যেনেদং তে মহদ্ভয়ম্
শ্রুত্বা তু বচনং ত্বত্তো বিধাস্যামস্ততো বয়ম্
34.62
এবমুক্তঃ প্রত্যুবাচ সর্বাংস্তাঞ্শশলক্ষণঃ
শাপং চ কারণং চৈব যক্ষ্মাণং চ তথাত্মনঃ
34.63
দেবাস্তস্য বচঃ শ্রুত্বা গত্বা দক্ষমথাব্রুবন্
প্রসীদ ভগবন্সোমে শাপশ্চৈষ নিবর্ত্যতাম্
34.64
অসৌ হি চন্দ্রমাঃ ক্ষীণঃ কিংচিচ্ছেষো হি লক্ষ্যতে
ক্ষয়াচ্চৈবাস্য দেবেশ প্রজাশ্চাপি গতাঃ ক্ষয়ম্
34.65
বীরুদোষধয়শ্চৈব বীজানি বিবিধানি চ
তথা বয়ং লোকগুরো প্রসাদং কর্তুমর্হসি
34.66
এবমুক্তস্তদা চিন্ত্য প্রাহ বাক্যং প্রজাপতিঃ
নৈতচ্ছক্যং মম বচো ব্যাবর্তয়িতুমন্যথা
হেতুনা তু মহাভাগা নিবর্তিষ্যতি কেনচিৎ
34.67
সমং বর্ততু সর্বাসু শশী ভার্যাসু নিত্যশঃ
সরস্বত্যা বরে তীর্থে উন্মজ্জঞ্শশলক্ষণঃ
পুনর্বর্ধিষ্যতে দেবাস্তদ্বৈ সত্যং বচো মম
34.68
মাসার্ধং চ ক্ষয়ং সোমো নিত্যমেব গমিষ্যতি
মাসার্ধং চ সদা বৃদ্ধিং সত্যমেতদ্বচো মম
34.69
সরস্বতীং ততঃ সোমো জগাম ঋষিশাসনাৎ
প্রভাসং পরমং তীর্থং সরস্বত্যা জগাম হ
34.70
অমাবাস্যাং মহাতেজাস্তত্রোন্মজ্জন্মহাদ্যুতিঃ
লোকান্প্রভাসয়ামাস শীতাংশুত্বমবাপ চ
34.71
দেবাশ্চ সর্বে রাজেন্দ্র প্রভাসং প্রাপ্য পুষ্কলম্
সোমেন সহিতা ভূত্বা দক্ষস্য প্রমুখেঽভবন্
34.72
ততঃ প্রজাপতিঃ সর্বা বিসসর্জাথ দেবতাঃ
সোমং চ ভগবান্প্রীতো ভূয়ো বচনমব্রবীৎ
34.73
মাবমংস্থাঃ স্ত্রিয়ঃ পুত্র মা চ বিপ্রান্কদাচন
গচ্ছ যুক্তঃ সদা ভূত্বা কুরু বৈ শাসনং মম
34.74
স বিসৃষ্টো মহারাজ জগামাথ স্বমালয়ম্
প্রজাশ্চ মুদিতা ভূত্বা ভোজনে চ যথা পুরা
34.75
এতত্তে সর্বমাখ্যাতং যথা শপ্তো নিশাকরঃ
প্রভাসং চ যথা তীর্থং তীর্থানাং প্রবরং হ্যভূৎ
34.76
অমাবাস্যাং মহারাজ নিত্যশঃ শশলক্ষণঃ
স্নাত্বা হ্যাপ্যায়তে শ্রীমান্প্রভাসে তীর্থ উত্তমে
34.77
অতশ্চৈনং প্রজানন্তি প্রভাসমিতি ভূমিপ
প্রভাং হি পরমাং লেভে তস্মিন্নুন্মজ্জ্য চন্দ্রমাঃ
34.78
ততস্তু চমসোদ্ভেদমচ্যুতস্ত্বগমদ্বলী
চমসোদ্ভেদ ইত্যেবং যং জনাঃ কথয়ন্ত্যুত
34.79
তত্র দত্ত্বা চ দানানি বিশিষ্টানি হলায়ুধঃ
উষিত্বা রজনীমেকাং স্নাত্বা চ বিধিবত্তদা
34.80
উদপানমথাগচ্ছত্ত্বরাবান্কেশবাগ্রজঃ
আদ্যং স্বস্ত্যয়নং চৈব তত্রাবাপ্য মহত্ফলম্
34.81
স্নিগ্ধত্বাদোষধীনাং চ ভূমেশ্চ জনমেজয়
জানন্তি সিদ্ধা রাজেন্দ্র নষ্টামপি সরস্বতীম্