অধ্যায় 33

33.1

সংজয় উবাচ
তস্মিন্যুদ্ধে মহারাজ সংপ্রবৃত্তে সুদারুণে
উপবিষ্টেষু সর্বেষু পাণ্ডবেষু মহাত্মসু

ততস্তালধ্বজো রামস্তয়োর্যুদ্ধ উপস্থিতে
শ্রুত্বা তচ্ছিষ্যয়ো রাজন্নাজগাম হলায়ুধঃ

তং দৃষ্ট্বা পরমপ্রীতাঃ পূজয়িত্বা নরাধিপাঃ
শিষ্যয়োঃ কৌশলং যুদ্ধে পশ্য রামেতি চাব্রুবন্

অব্রবীচ্চ তদা রামো দৃষ্ট্বা কৃষ্ণং চ পাণ্ডবম্
দুর্যোধনং চ কৌরব্যং গদাপাণিমবস্থিতম্

চত্বারিংশদহান্যদ্য দ্বে চ মে নিঃসৃতস্য বৈ
পুষ্যেণ সংপ্রয়াতোঽস্মি শ্রবণে পুনরাগতঃ
শিষ্যয়োর্বৈ গদায়ুদ্ধং দ্রষ্টুকামোঽস্মি মাধব

ততো যুধিষ্ঠিরো রাজা পরিষ্বজ্য হলায়ুধম্
স্বাগতং কুশলং চাস্মৈ পর্যপৃচ্ছদ্যথাতথম্

কৃষ্ণৌ চাপি মহেষ্বাসাবভিবাদ্য হলায়ুধম্
সস্বজাতে পরিপ্রীতৌ প্রিয়মাণৌ যশস্বিনৌ

মাদ্রীপুত্রৌ তথা শূরৌ দ্রৌপদ্যাঃ পঞ্চ চাত্মজাঃ
অভিবাদ্য স্থিতা রাজন্রৌহিণেয়ং মহাবলম্

ভীমসেনোঽথ বলবান্পুত্রস্তব জনাধিপ
তথৈব চোদ্যতগদৌ পূজয়ামাসতুর্বলম্

স্বাগতেন চ তে তত্র প্রতিপূজ্য পুনঃ পুনঃ
পশ্য যুদ্ধং মহাবাহো ইতি তে রামমব্রুবন্
এবমূচুর্মহাত্মানং রৌহিণেয়ং নরাধিপাঃ

পরিষ্বজ্য তদা রামঃ পাণ্ডবান্সৃঞ্জয়ানপি
অপৃচ্ছত্কুশলং সর্বান্পাণ্ডবাংশ্চামিতৌজসঃ
তথৈব তে সমাসাদ্য পপ্রচ্ছুস্তমনাময়ম্

প্রত্যভ্যর্চ্য হলী সর্বান্ক্ষত্রিয়াংশ্চ মহামনাঃ
কৃত্বা কুশলসংয়ুক্তাং সংবিদং চ যথাবয়ঃ

জনার্দনং সাত্যকিং চ প্রেম্ণা স পরিষস্বজে
মূর্ধ্নি চৈতাবুপাঘ্রায় কুশলং পর্যপৃচ্ছত

তৌ চৈনং বিধিবদ্রাজন্পূজয়ামাসতুর্গুরুম্
ব্রহ্মাণমিব দেবেশমিন্দ্রোপেন্দ্রৌ মুদা যুতৌ

ততোঽব্রবীদ্ধর্মসুতো রৌহিণেয়মরিংদমম্
ইদং ভ্রাত্রোর্মহায়ুদ্ধং পশ্য রামেতি ভারত

তেষাং মধ্যে মহাবাহুঃ শ্রীমান্কেশবপূর্বজঃ
ন্যবিশত্পরমপ্রীতঃ পূজ্যমানো মহারথৈঃ

স বভৌ রাজমধ্যস্থো নীলবাসাঃ সিতপ্রভঃ
দিবীব নক্ষত্রগণৈঃ পরিকীর্ণো নিশাকরঃ

ততস্তয়োঃ সংনিপাতস্তুমুলো রোমহর্ষণঃ
আসীদন্তকরো রাজন্বৈরস্য তব পুত্রয়োঃ