Utshovঅধ্যায় 32
32.1
সংজয় উবাচ
এবং দুর্যোধনে রাজন্গর্জমানে মুহুর্মুহুঃ
যুধিষ্ঠিরস্য সংক্রুদ্ধো বাসুদেবোঽব্রবীদিদম্
32.2
যদি নাম হ্যয়ং যুদ্ধে বরয়েত্ত্বাং যুধিষ্ঠির
অর্জুনং নকুলং বাপি সহদেবমথাপি বা
32.3
কিমিদং সাহসং রাজংস্ত্বয়া ব্যাহৃতমীদৃশম্
একমেব নিহত্যাজৌ ভব রাজা কুরুষ্বিতি
32.4
এতেন হি কৃতা যোগ্যা বর্ষাণীহ ত্রয়োদশ
আয়সে পুরুষে রাজন্ভীমসেনজিঘাংসয়া
32.5
কথং নাম ভবেত্কার্যমস্মাভির্ভরতর্ষভ
সাহসং কৃতবাংস্ত্বং তু হ্যনুক্রোশান্নৃপোত্তম
32.6
নান্যমস্যানুপশ্যামি প্রতিয়োদ্ধারমাহবে
ঋতে বৃকোদরাত্পার্থাত্স চ নাতিকৃতশ্রমঃ
32.7
তদিদং দ্যূতমারব্ধং পুনরেব যথা পুরা
বিষমং শকুনেশ্চৈব তব চৈব বিশাং পতে
32.8
বলী ভীমঃ সমর্থশ্চ কৃতী রাজা সুয়োধনঃ
বলবান্বা কৃতী বেতি কৃতী রাজন্বিশিষ্যতে
32.9
সোঽয়ং রাজংস্ত্বয়া শত্রুঃ সমে পথি নিবেশিতঃ
ন্যস্তশ্চাত্মা সুবিষমে কৃচ্ছ্রমাপাদিতা বয়ম্
32.10
কো নু সর্বান্বিনির্জিত্য শত্রূনেকেন বৈরিণা
পণিত্বা চৈকপাণেন রোচয়েদেবমাহবম্
32.11
ন হি পশ্যামি তং লোকে গদাহস্তং নরোত্তমম্
যুধ্যেদ্দুর্যোধনং সংখ্যে কৃতিত্বাদ্ধি বিশেষয়েৎ
32.12
ফল্গুনং বা ভবন্তং বা মাদ্রীপুত্রাবথাপি বা
ন সমর্থানহং মন্যে গদাহস্তস্য সংয়ুগে
32.13
স কথং বদসে শত্রুং যুধ্যস্ব গদয়েতি হ
একং চ নো নিহত্যাজৌ ভব রাজেতি ভারত
32.14
বৃকোদরং সমাসাদ্য সংশয়ো বিজয়ে হি নঃ
ন্যায়তো যুধ্যমানানাং কৃতী হ্যেষ মহাবলঃ
32.15
ভীম উবাচ
মধুসূদন মা কার্ষীর্বিষাদং যদুনন্দন
অদ্য পারং গমিষ্যামি বৈরস্য ভৃশদুর্গমম্
32.16
অহং সুয়োধনং সংখ্যে হনিষ্যামি ন সংশয়ঃ
বিজয়ো বৈ ধ্রুবং কৃষ্ণ ধর্মরাজস্য দৃশ্যতে
32.17
অধ্যর্ধেন গুণেনেয়ং গদা গুরুতরী মম
ন তথা ধার্তরাষ্ট্রস্য মা কার্ষীর্মাধব ব্যথাম্
32.18
সামরানপি লোকাংস্ত্রীন্নানাশস্ত্রধরান্যুধি
যোধয়েয়ং রণে হৃষ্টঃ কিমুতাদ্য সুয়োধনম্
32.19
সংজয় উবাচ
তথা সংভাষমাণং তু বাসুদেবো বৃকোদরম্
হৃষ্টঃ সংপূজয়ামাস বচনং চেদমব্রবীৎ
32.20
ত্বামাশ্রিত্য মহাবাহো ধর্মরাজো যুধিষ্ঠিরঃ
নিহতারিঃ স্বকাং দীপ্তাং শ্রিয়ং প্রাপ্তো ন সংশয়ঃ
32.21
ত্বয়া বিনিহতাঃ সর্বে ধৃতরাষ্ট্রসুতা রণে
রাজানো রাজপুত্রাশ্চ নাগাশ্চ বিনিপাতিতাঃ
32.22
কলিঙ্গা মাগধাঃ প্রাচ্যা গান্ধারাঃ কুরবস্তথা
ত্বামাসাদ্য মহায়ুদ্ধে নিহতাঃ পাণ্ডুনন্দন
32.23
হত্বা দুর্যোধনং চাপি প্রয়চ্ছোর্বীং সসাগরাম্
ধর্মরাজায় কৌন্তেয় যথা বিষ্ণুঃ শচীপতেঃ
32.24
ত্বাং চ প্রাপ্য রণে পাপো ধার্তরাষ্ট্রো বিনঙ্ক্ষ্যতি
ত্বমস্য সক্থিনী ভঙ্ক্ত্বা প্রতিজ্ঞাং পারয়িষ্যসি
32.25
যত্নেন তু সদা পার্থ যোদ্ধব্যো ধৃতরাষ্ট্রজঃ
কৃতী চ বলবাংশ্চৈব যুদ্ধশৌণ্ডশ্চ নিত্যদা
32.26
ততস্তু সাত্যকী রাজন্পূজয়ামাস পাণ্ডবম্
বিবিধাভিশ্চ তাং বাগ্ভিঃ পূজয়ামাস মাধবঃ
32.27
পাঞ্চালাঃ পাণ্ডবেয়াশ্চ ধর্মরাজপুরোগমাঃ
তদ্বচো ভীমসেনস্য সর্ব এবাভ্যপূজয়ন্
32.28
ততো ভীমবলো ভীমো যুধিষ্ঠিরমথাব্রবীৎ
সৃঞ্জয়ৈঃ সহ তিষ্ঠন্তং তপন্তমিব ভাস্করম্
32.29
অহমেতেন সংগম্য সংয়ুগে যোদ্ধুমুত্সহে
ন হি শক্তো রণে জেতুং মামেষ পুরুষাধমঃ
32.30
অদ্য ক্রোধং বিমোক্ষ্যামি নিহিতং হৃদয়ে ভৃশম্
সুয়োধনে ধার্তরাষ্ট্রে খাণ্ডবেঽগ্নিমিবার্জুনঃ
32.31
শল্যমদ্যোদ্ধরিষ্যামি তব পাণ্ডব হৃচ্ছয়ম্
নিহত্য গদয়া পাপমদ্য রাজন্সুখী ভব
32.32
অদ্য কীর্তিময়ীং মালাং প্রতিমোক্ষ্যে তবানঘ
প্রাণাঞ্শ্রিয়ং চ রাজ্যং চ মোক্ষ্যতেঽদ্য সুয়োধনঃ
32.33
রাজা চ ধৃতরাষ্ট্রোঽদ্য শ্রুত্বা পুত্রং ময়া হতম্
স্মরিষ্যত্যশুভং কর্ম যত্তচ্ছকুনিবুদ্ধিজম্
32.34
ইত্যুক্ত্বা ভরতশ্রেষ্ঠো গদামুদ্যম্য বীর্যবান্
উদতিষ্ঠত যুদ্ধায় শক্রো বৃত্রমিবাহ্বয়ন্
32.35
তমেকাকিনমাসাদ্য ধার্তরাষ্ট্রং মহাবলম্
নির্যূথমিব মাতঙ্গং সমহৃষ্যন্ত পাণ্ডবাঃ
32.36
তমুদ্যতগদং দৃষ্ট্বা কৈলাসমিব শৃঙ্গিণম্
ভীমসেনস্তদা রাজন্দুর্যোধনমথাব্রবীৎ
32.37
রাজ্ঞাপি ধৃতরাষ্ট্রেণ ত্বয়া চাস্মাসু যত্কৃতম্
স্মর তদ্দুষ্কৃতং কর্ম যদ্বৃত্তং বারণাবতে
32.38
দ্রৌপদী চ পরিক্লিষ্টা সভামধ্যে রজস্বলা
দ্যূতে যদ্বিজিতো রাজা শকুনের্বুদ্ধিনিশ্চয়াৎ
32.39
যানি চান্যানি দুষ্টাত্মন্পাপানি কৃতবানসি
অনাগঃসু চ পার্থেষু তস্য পশ্য মহত্ফলম্
32.40
ত্বত্কৃতে নিহতঃ শেতে শরতল্পে মহায়শাঃ
গাঙ্গেয়ো ভরতশ্রেষ্ঠঃ সর্বেষাং নঃ পিতামহঃ
32.41
হতো দ্রোণশ্চ কর্ণশ্চ হতঃ শল্যঃ প্রতাপবান্
বৈরস্য চাদিকর্তাসৌ শকুনির্নিহতো যুধি
32.42
ভ্রাতরস্তে হতাঃ শূরাঃ পুত্রাশ্চ সহসৈনিকাঃ
রাজানশ্চ হতাঃ শূরাঃ সমরেষ্বনিবর্তিনঃ
32.43
এতে চান্যে চ নিহতা বহবঃ ক্ষত্রিয়র্ষভাঃ
প্রাতিকামী তথা পাপো দ্রৌপদ্যাঃ ক্লেশকৃদ্ধতঃ
32.44
অবশিষ্টস্ত্বমেবৈকঃ কুলঘ্নোঽধমপূরুষঃ
ত্বামপ্যদ্য হনিষ্যামি গদয়া নাত্র সংশয়ঃ
32.45
অদ্য তেঽহং রণে দর্পং সর্বং নাশয়িতা নৃপ
রাজ্যাশাং বিপুলাং রাজন্পাণ্ডবেষু চ দুষ্কৃতম্
32.46
দুর্যোধন উবাচ
কিং কত্থিতেন বহুধা যুধ্যস্বাদ্য ময়া সহ
অদ্য তেঽহং বিনেষ্যামি যুদ্ধশ্রদ্ধাং বৃকোদর
32.47
কিং ন পশ্যসি মাং পাপ গদায়ুদ্ধে ব্যবস্থিতম্
হিমবচ্ছিখরাকারাং প্রগৃহ্য মহতীং গদাম্
32.48
গদিনং কোঽদ্য মাং পাপ জেতুমুত্সহতে রিপুঃ
ন্যায়তো যুধ্যমানস্য দেবেষ্বপি পুরংদরঃ
32.49
মা বৃথা গর্জ কৌন্তেয় শারদাভ্রমিবাজলম্
দর্শয়স্ব বলং যুদ্ধে যাবত্তত্তেঽদ্য বিদ্যতে
32.50
তস্য তদ্বচনং শ্রুত্বা পাঞ্চালাঃ সহসৃঞ্জয়াঃ
সর্বে সংপূজয়ামাসুস্তদ্বচো বিজিগীষবঃ
32.51
তং মত্তমিব মাতঙ্গং তলশব্দেন মানবাঃ
ভূয়ঃ সংহর্ষয়ামাসূ রাজন্দুর্যোধনং নৃপম্
32.52
বৃংহন্তি কুঞ্জরাস্তত্র হয়া হেষন্তি চাসকৃৎ
শস্ত্রাণি সংপ্রদীপ্যন্তে পাণ্ডবানাং জয়ৈষিণাম্