Utshovঅধ্যায় 31
31.1
ধৃতরাষ্ট্র উবাচ
এবং সংতর্জ্যমানস্তু মম পুত্রো মহীপতিঃ
প্রকৃত্যা মন্যুমান্বীরঃ কথমাসীত্পরংতপঃ
31.2
ন হি সংতর্জনা তেন শ্রুতপূর্বা কদাচন
রাজভাবেন মান্যশ্চ সর্বলোকস্য সোঽভবৎ
31.3
ইয়ং চ পৃথিবী সর্বা সম্লেচ্ছাটবিকা ভৃশম্
প্রসাদাদ্ধ্রিয়তে যস্য প্রত্যক্ষং তব সংজয়
31.4
স তথা তর্জ্যমানস্তু পাণ্ডুপুত্রৈর্বিশেষতঃ
বিহীনশ্চ স্বকৈর্ভৃত্যৈর্নির্জনে চাবৃতো ভৃশম্
31.5
শ্রুত্বা স কটুকা বাচো জয়য়ুক্তাঃ পুনঃ পুনঃ
কিমব্রবীত্পাণ্ডবেয়াংস্তন্মমাচক্ষ্ব সংজয়
31.6
সংজয় উবাচ
তর্জ্যমানস্তদা রাজন্নুদকস্থস্তবাত্মজঃ
যুধিষ্ঠিরেণ রাজেন্দ্র ভ্রাতৃভিঃ সহিতেন হ
31.7
শ্রুত্বা স কটুকা বাচো বিষমস্থো জনাধিপঃ
দীর্ঘমুষ্ণং চ নিঃশ্বস্য সলিলস্থঃ পুনঃ পুনঃ
31.8
সলিলান্তর্গতো রাজা ধুন্বন্হস্তৌ পুনঃ পুনঃ
মনশ্চকার যুদ্ধায় রাজানং চাভ্যভাষত
31.9
যূয়ং সসুহৃদঃ পার্থাঃ সর্বে সরথবাহনাঃ
অহমেকঃ পরিদ্যূনো বিরথো হতবাহনঃ
31.10
আত্তশস্ত্রৈ রথগতৈর্বহুভিঃ পরিবারিতঃ
কথমেকঃ পদাতিঃ সন্নশস্ত্রো যোদ্ধুমুত্সহে
31.11
একৈকেন তু মাং যূয়ং যোধয়ধ্বং যুধিষ্ঠির
ন হ্যেকো বহুভির্বীরৈর্ন্যায্যং যোধয়িতুং যুধি
31.12
বিশেষতো বিকবচঃ শ্রান্তশ্চাপঃ সমাশ্রিতঃ
ভৃশং বিক্ষতগাত্রশ্চ শ্রান্তবাহনসৈনিকঃ
31.13
ন মে ত্বত্তো ভয়ং রাজন্ন চ পার্থাদ্বৃকোদরাৎ
ফল্গুনাদ্বাসুদেবাদ্বা পাঞ্চালেভ্যোঽথ বা পুনঃ
31.14
যমাভ্যাং যুয়ুধানাদ্বা যে চান্যে তব সৈনিকাঃ
একঃ সর্বানহং ক্রুদ্ধো ন তান্যোদ্ধুমিহোত্সহে
31.15
ধর্মমূলা সতাং কীর্তির্মনুষ্যাণাং জনাধিপ
ধর্মং চৈবেহ কীর্তিং চ পালয়ন্প্রব্রবীম্যহম্
31.16
অহমুত্থায় বঃ সর্বান্প্রতিয়োত্স্যামি সংয়ুগে
অন্বংশাভ্যাগতান্সর্বানৃতূন্সংবত্সরো যথা
31.17
অদ্য বঃ সরথান্সাশ্বানশস্ত্রো বিরথোঽপি সন্
নক্ষত্রাণীব সর্বাণি সবিতা রাত্রিসংক্ষয়ে
তেজসা নাশয়িষ্যামি স্থিরীভবত পাণ্ডবাঃ
31.18
অদ্যানৃণ্যং গমিষ্যামি ক্ষত্রিয়াণাং যশস্বিনাম্
বাহ্লীকদ্রোণভীষ্মাণাং কর্ণস্য চ মহাত্মনঃ
31.19
জয়দ্রথস্য শূরস্য ভগদত্তস্য চোভয়োঃ
মদ্ররাজস্য শল্যস্য ভূরিশ্রবস এব চ
31.20
পুত্রাণাং ভরতশ্রেষ্ঠ শকুনেঃ সৌবলস্য চ
মিত্রাণাং সুহৃদাং চৈব বান্ধবানাং তথৈব চ
31.21
আনৃণ্যমদ্য গচ্ছামি হত্বা ত্বাং ভ্রাতৃভিঃ সহ
এতাবদুক্ত্বা বচনং বিররাম জনাধিপঃ
31.22
যুধিষ্ঠির উবাচ
দিষ্ট্যা ত্বমপি জানীষে ক্ষত্রধর্মং সুয়োধন
দিষ্ট্যা তে বর্ততে বুদ্ধির্যুদ্ধায়ৈব মহাভুজ
31.23
দিষ্ট্যা শূরোঽসি কৌরব্য দিষ্ট্যা জানাসি সংগরম্
যস্ত্বমেকো হি নঃ সর্বান্সংয়ুগে যোদ্ধুমিচ্ছসি
31.24
এক একেন সংগম্য যত্তে সংমতমায়ুধম্
তত্ত্বমাদায় যুধ্যস্ব প্রেক্ষকাস্তে বয়ং স্থিতাঃ
31.25
অয়মিষ্টং চ তে কামং বীর ভূয়ো দদাম্যহম্
হত্বৈকং ভবতো রাজ্যং হতো বা স্বর্গমাপ্নুহি
31.26
দুর্যোধন উবাচ
একশ্চেদ্যোদ্ধুমাক্রন্দে বরোঽদ্য মম দীয়তে
আয়ুধানামিয়ং চাপি বৃতা ত্বত্সংমতে গদা
31.27
ভ্রাতৄণাং ভবতামেকঃ শক্যং মাং যোঽভিমন্যতে
পদাতির্গদয়া সংখ্যে স যুধ্যতু ময়া সহ
31.28
বৃত্তানি রথয়ুদ্ধানি বিচিত্রাণি পদে পদে
ইদমেকং গদায়ুদ্ধং ভবত্বদ্যাদ্ভুতং মহৎ
31.29
অন্নানামপি পর্যায়ং কর্তুমিচ্ছন্তি মানবাঃ
যুদ্ধানামপি পর্যায়ো ভবত্বনুমতে তব
31.30
গদয়া ত্বাং মহাবাহো বিজেষ্যামি সহানুজম্
পাঞ্চালান্সৃঞ্জয়াংশ্চৈব যে চান্যে তব সৈনিকাঃ
31.31
যুধিষ্ঠির উবাচ
উত্তিষ্ঠোত্তিষ্ঠ গান্ধারে মাং যোধয় সুয়োধন
এক একেন সংগম্য সংয়ুগে গদয়া বলী
31.32
পুরুষো ভব গান্ধারে যুধ্যস্ব সুসমাহিতঃ
অদ্য তে জীবিতং নাস্তি যদ্যপি ত্বং মনোজবঃ
31.33
সংজয় উবাচ
এতত্স নরশার্দূলো নামৃষ্যত তবাত্মজঃ
সলিলান্তর্গতঃ শ্বভ্রে মহানাগ ইব শ্বসন্
31.34
তথাসৌ বাক্প্রতোদেন তুদ্যমানঃ পুনঃ পুনঃ
বাচং ন মমৃষে ধীমানুত্তমাশ্বঃ কশামিব
31.35
সংক্ষোভ্য সলিলং বেগাদ্গদামাদায় বীর্যবান্
অদ্রিসারময়ীং গুর্বীং কাঞ্চনাঙ্গদভূষণাম্
অন্তর্জলাত্সমুত্তস্থৌ নাগেন্দ্র ইব নিঃশ্বসন্
31.36
স ভিত্ত্বা স্তম্ভিতং তোয়ং স্কন্ধে কৃত্বায়সীং গদাম্
উদতিষ্ঠত পুত্রস্তে প্রতপন্রশ্মিমানিব
31.37
ততঃ শৈক্যায়সীং গুর্বীং জাতরূপপরিষ্কৃতাম্
গদাং পরামৃশদ্ধীমান্ধার্তরাষ্ট্রো মহাবলঃ
31.38
গদাহস্তং তু তং দৃষ্ট্বা সশৃঙ্গমিব পর্বতম্
প্রজানামিব সংক্রুদ্ধং শূলপাণিমবস্থিতম্
সগদো ভারতো ভাতি প্রতপন্ভাস্করো যথা
31.39
তমুত্তীর্ণং মহাবাহুং গদাহস্তমরিংদমম্
মেনিরে সর্বভূতানি দণ্ডহস্তমিবান্তকম্
31.40
বজ্রহস্তং যথা শক্রং শূলহস্তং যথা হরম্
দদৃশুঃ সর্বপাঞ্চালাঃ পুত্রং তব জনাধিপ
31.41
তমুত্তীর্ণং তু সংপ্রেক্ষ্য সমহৃষ্যন্ত সর্বশঃ
পাঞ্চালাঃ পাণ্ডবেয়াশ্চ তেঽন্যোন্যস্য তলান্দদুঃ
31.42
অবহাসং তু তং মত্বা পুত্রো দুর্যোধনস্তব
উদ্বৃত্য নয়নে ক্রুদ্ধো দিধক্ষুরিব পাণ্ডবান্
31.43
ত্রিশিখাং ভ্রুকুটীং কৃত্বা সংদষ্টদশনচ্ছদঃ
প্রত্যুবাচ ততস্তান্বৈ পাণ্ডবান্সহকেশবান্
31.44
অবহাসস্য বোঽস্যাদ্য প্রতিবক্তাস্মি পাণ্ডবাঃ
গমিষ্যথ হতাঃ সদ্যঃ সপাঞ্চালা যমক্ষয়ম্
31.45
উত্থিতস্তু জলাত্তস্মাত্পুত্রো দুর্যোধনস্তব
অতিষ্ঠত গদাপাণী রুধিরেণ সমুক্ষিতঃ
31.46
তস্য শোণিতদিগ্ধস্য সলিলেন সমুক্ষিতম্
শরীরং স্ম তদা ভাতি স্রবন্নিব মহীধরঃ
31.47
তমুদ্যতগদং বীরং মেনিরে তত্র পাণ্ডবাঃ
বৈবস্বতমিব ক্রুদ্ধং কিংকরোদ্যতপাণিনম্
31.48
স মেঘনিনদো হর্ষান্নদন্নিব চ গোবৃষঃ
আজুহাব ততঃ পার্থান্গদয়া যুধি বীর্যবান্
31.49
দুর্যোধন উবাচ
একৈকেন চ মাং যূয়মাসীদত যুধিষ্ঠির
ন হ্যেকো বহুভির্ন্যায্যো বীর যোধয়িতুং যুধি
31.50
ন্যস্তবর্মা বিশেষেণ শ্রান্তশ্চাপ্সু পরিপ্লুতঃ
ভৃশং বিক্ষতগাত্রশ্চ হতবাহনসৈনিকঃ
31.51
যুধিষ্ঠির উবাচ
নাভূদিয়ং তব প্রজ্ঞা কথমেবং সুয়োধন
যদাভিমন্যুং বহবো জঘ্নুর্যুধি মহারথাঃ
31.52
আমুঞ্চ কবচং বীর মূর্ধজান্যময়স্ব চ
যচ্চান্যদপি তে নাস্তি তদপ্যাদত্স্ব ভারত
ইমমেকং চ তে কামং বীর ভূয়ো দদাম্যহম্
31.53
পঞ্চানাং পাণ্ডবেয়ানাং যেন যোদ্ধুমিহেচ্ছসি
তং হত্বা বৈ ভবান্রাজা হতো বা স্বর্গমাপ্নুহি
ঋতে চ জীবিতাদ্বীর যুদ্ধে কিং কুর্ম তে প্রিয়ম্
31.54
সংজয় উবাচ
ততস্তব সুতো রাজন্বর্ম জগ্রাহ কাঞ্চনম্
বিচিত্রং চ শিরস্ত্রাণং জাম্বূনদপরিষ্কৃতম্
31.55
সোঽববদ্ধশিরস্ত্রাণঃ শুভকাঞ্চনবর্মভৃৎ
ররাজ রাজন্পুত্রস্তে কাঞ্চনঃ শৈলরাডিব
31.56
সংনদ্ধঃ স গদী রাজন্সজ্জঃ সংগ্রামমূর্ধনি
অব্রবীত্পাণ্ডবান্সর্বান্পুত্রো দুর্যোধনস্তব
31.57
ভ্রাতৄণাং ভবতামেকো যুধ্যতাং গদয়া ময়া
সহদেবেন বা যোত্স্যে ভীমেন নকুলেন বা
31.58
অথ বা ফল্গুনেনাদ্য ত্বয়া বা ভরতর্ষভ
যোত্স্যেঽহং সংগরং প্রাপ্য বিজেষ্যে চ রণাজিরে
31.59
অহমদ্য গমিষ্যামি বৈরস্যান্তং সুদুর্গমম্
গদয়া পুরুষব্যাঘ্র হেমপট্টবিনদ্ধয়া
31.60
গদায়ুদ্ধে ন মে কশ্চিত্সদৃশোঽস্তীতি চিন্তয়
গদয়া বো হনিষ্যামি সর্বানেব সমাগতান্
গৃহ্ণাতু স গদাং যো বৈ যুধ্যতেঽদ্য ময়া সহ