Utshovঅধ্যায় 30
30.1
সংজয় উবাচ
ততস্তেষ্বপয়াতেষু রথেষু ত্রিষু পাণ্ডবাঃ
তং হ্রদং প্রত্যপদ্যন্ত যত্র দুর্যোধনোঽভবৎ
30.2
আসাদ্য চ কুরুশ্রেষ্ঠ তদা দ্বৈপায়নহ্রদম্
স্তম্ভিতং ধার্তরাষ্ট্রেণ দৃষ্ট্বা তং সলিলাশয়ম্
বাসুদেবমিদং বাক্যমব্রবীত্কুরুনন্দনঃ
30.3
পশ্যেমাং ধার্তরাষ্ট্রেণ মায়ামপ্সু প্রয়োজিতাম্
বিষ্টভ্য সলিলং শেতে নাস্য মানুষতো ভয়ম্
30.4
দৈবীং মায়ামিমাং কৃত্বা সলিলান্তর্গতো হ্যয়ম্
নিকৃত্যা নিকৃতিপ্রজ্ঞো ন মে জীবন্বিমোক্ষ্যতে
30.5
যদ্যস্য সমরে সাহ্যং কুরুতে বজ্রভৃত্স্বয়ম্
তথাপ্যেনং হতং যুদ্ধে লোকো দ্রক্ষ্যতি মাধব
30.6
শ্রীবাসুদেব উবাচ
মায়াবিন ইমাং মায়াং মায়য়া জহি ভারত
মায়াবী মায়য়া বধ্যঃ সত্যমেতদ্যুধিষ্ঠির
30.7
ক্রিয়াভ্যুপায়ৈর্বহুলৈর্মায়ামপ্সু প্রয়োজ্য হ
জহি ত্বং ভরতশ্রেষ্ঠ পাপাত্মানং সুয়োধনম্
30.8
ক্রিয়াভ্যুপায়ৈরিন্দ্রেণ নিহতা দৈত্যদানবাঃ
ক্রিয়াভ্যুপায়ৈর্বহুভির্বলির্বদ্ধো মহাত্মনা
30.9
ক্রিয়াভ্যুপায়ৈঃ পূর্বং হি হিরণ্যাক্ষো মহাসুরঃ
হিরণ্যকশিপুশ্চৈব ক্রিয়য়ৈব নিষূদিতৌ
বৃত্রশ্চ নিহতো রাজন্ক্রিয়য়ৈব ন সংশয়ঃ
30.10
তথা পৌলস্ত্যতনয়ো রাবণো নাম রাক্ষসঃ
রামেণ নিহতো রাজন্সানুবন্ধঃ সহানুগঃ
ক্রিয়য়া যোগমাস্থায় তথা ত্বমপি বিক্রম
30.11
ক্রিয়াভ্যুপায়ৈর্নিহতো ময়া রাজন্পুরাতনে
তারকশ্চ মহাদৈত্যো বিপ্রচিত্তিশ্চ বীর্যবান্
30.12
বাতাপিরিল্বলশ্চৈব ত্রিশিরাশ্চ তথা বিভো
সুন্দোপসুন্দাবসুরৌ ক্রিয়য়ৈব নিষূদিতৌ
30.13
ক্রিয়াভ্যুপায়ৈরিন্দ্রেণ ত্রিদিবং ভুজ্যতে বিভো
ক্রিয়া বলবতী রাজন্নান্যত্কিংচিদ্যুধিষ্ঠির
30.14
দৈত্যাশ্চ দানবাশ্চৈব রাক্ষসাঃ পার্থিবাস্তথা
ক্রিয়াভ্যুপায়ৈর্নিহতাঃ ক্রিয়াং তস্মাত্সমাচর
30.15
সংজয় উবাচ
ইত্যুক্তো বাসুদেবেন পাণ্ডবঃ সংশিতব্রতঃ
জলস্থং তং মহারাজ তব পুত্রং মহাবলম্
অভ্যভাষত কৌন্তেয়ঃ প্রহসন্নিব ভারত
30.16
সুয়োধন কিমর্থোঽয়মারম্ভোঽপ্সু কৃতস্ত্বয়া
সর্বং ক্ষত্রং ঘাতয়িত্বা স্বকুলং চ বিশাং পতে
30.17
জলাশয়ং প্রবিষ্টোঽদ্য বাঞ্ছঞ্জীবিতমাত্মনঃ
উত্তিষ্ঠ রাজন্যুধ্যস্ব সহাস্মাভিঃ সুয়োধন
30.18
স চ দর্পো নরশ্রেষ্ঠ স চ মানঃ ক্ব তে গতঃ
যস্ত্বং সংস্তভ্য সলিলং ভীতো রাজন্ব্যবস্থিতঃ
30.19
সর্বে ত্বাং শূর ইত্যেব জনা জল্পন্তি সংসদি
ব্যর্থং তদ্ভবতো মন্যে শৌর্যং সলিলশায়িনঃ
30.20
উত্তিষ্ঠ রাজন্যুধ্যস্ব ক্ষত্রিয়োঽসি কুলোদ্ভবঃ
কৌরবেয়ো বিশেষেণ কুলে জন্ম চ সংস্মর
30.21
স কথং কৌরবে বংশে প্রশংসঞ্জন্ম চাত্মনঃ
যুদ্ধাদ্ভীতস্ততস্তোয়ং প্রবিশ্য প্রতিতিষ্ঠসি
30.22
অয়ুদ্ধমব্যবস্থানং নৈষ ধর্মঃ সনাতনঃ
অনার্যজুষ্টমস্বর্গ্যং রণে রাজন্পলায়নম্
30.23
কথং পারমগত্বা হি যুদ্ধে ত্বং বৈ জিজীবিষুঃ
ইমান্নিপতিতান্দৃষ্ট্বা পুত্রান্ভ্রাতৄন্পিতৄংস্তথা
30.24
সংবন্ধিনো বয়স্যাংশ্চ মাতুলান্বান্ধবাংস্তথা
ঘাতয়িত্বা কথং তাত হ্রদে তিষ্ঠসি সাংপ্রতম্
30.25
শূরমানী ন শূরস্ত্বং মিথ্যা বদসি ভারত
শূরোঽহমিতি দুর্বুদ্ধে সর্বলোকস্য শৃণ্বতঃ
30.26
ন হি শূরাঃ পলায়ন্তে শত্রূন্দৃষ্ট্বা কথংচন
ব্রূহি বা ত্বং যয়া ধৃত্যা শূর ত্যজসি সংগরম্
30.27
স ত্বমুত্তিষ্ঠ যুধ্যস্ব বিনীয় ভয়মাত্মনঃ
ঘাতয়িত্বা সর্বসৈন্যং ভ্রাতৄংশ্চৈব সুয়োধন
30.28
নেদানীং জীবিতে বুদ্ধিঃ কার্যা ধর্মচিকীর্ষয়া
ক্ষত্রধর্মমপাশ্রিত্য ত্বদ্বিধেন সুয়োধন
30.29
যত্তত্কর্ণমুপাশ্রিত্য শকুনিং চাপি সৌবলম্
অমর্ত্য ইব সংমোহাত্ত্বমাত্মানং ন বুদ্ধবান্
30.30
তত্পাপং সুমহত্কৃত্বা প্রতিয়ুধ্যস্ব ভারত
কথং হি ত্বদ্বিধো মোহাদ্রোচয়েত পলায়নম্
30.31
ক্ব তে তত্পৌরুষং যাতং ক্ব চ মানঃ সুয়োধন
ক্ব চ বিক্রান্ততা যাতা ক্ব চ বিস্ফূর্জিতং মহৎ
30.32
ক্ব তে কৃতাস্ত্রতা যাতা কিং চ শেষে জলাশয়ে
স ত্বমুত্তিষ্ঠ যুধ্যস্ব ক্ষত্রধর্মেণ ভারত
30.33
অস্মান্বা ত্বং পরাজিত্য প্রশাধি পৃথিবীমিমাম্
অথ বা নিহতোঽস্মাভির্ভূমৌ স্বপ্স্যসি ভারত
30.34
এষ তে প্রথমো ধর্মঃ সৃষ্টো ধাত্রা মহাত্মনা
তং কুরুষ্ব যথাতথ্যং রাজা ভব মহারথ
30.35
দুর্যোধন উবাচ
নৈতচ্চিত্রং মহারাজ যদ্ভীঃ প্রাণিনমাবিশেৎ
ন চ প্রাণভয়াদ্ভীতো ব্যপয়াতোঽস্মি ভারত
30.36
অরথশ্চানিষঙ্গী চ নিহতঃ পার্ষ্ণিসারথিঃ
একশ্চাপ্যগণঃ সংখ্যে প্রত্যাশ্বাসমরোচয়ম্
30.37
ন প্রাণহেতোর্ন ভয়ান্ন বিষাদাদ্বিশাং পতে
ইদমম্ভঃ প্রবিষ্টোঽস্মি শ্রমাত্ত্বিদমনুষ্ঠিতম্
30.38
ত্বং চাশ্বসিহি কৌন্তেয় যে চাপ্যনুগতাস্তব
অহমুত্থায় বঃ সর্বান্প্রতিয়োত্স্যামি সংয়ুগে
30.39
যুধিষ্ঠির উবাচ
আশ্বস্তা এব সর্বে স্ম চিরং ত্বাং মৃগয়ামহে
তদিদানীং সমুত্তিষ্ঠ যুধ্যস্বেহ সুয়োধন
30.40
হত্বা বা সমরে পার্থান্স্ফীতং রাজ্যমবাপ্নুহি
নিহতো বা রণেঽস্মাভির্বীরলোকমবাপ্স্যসি
30.41
দুর্যোধন উবাচ
যদর্থং রাজ্যমিচ্ছামি কুরূণাং কুরুনন্দন
ত ইমে নিহতাঃ সর্বে ভ্রাতরো মে জনেশ্বর
30.42
ক্ষীণরত্নাং চ পৃথিবীং হতক্ষত্রিয়পুংগবাম্
নাভ্যুত্সহাম্যহং ভোক্তুং বিধবামিব যোষিতম্
30.43
অদ্যাপি ত্বহমাশংসে ত্বাং বিজেতুং যুধিষ্ঠির
ভঙ্ক্ত্বা পাঞ্চালপাণ্ডূনামুত্সাহং ভরতর্ষভ
30.44
ন ত্বিদানীমহং মন্যে কার্যং যুদ্ধেন কর্হিচিৎ
দ্রোণে কর্ণে চ সংশান্তে নিহতে চ পিতামহে
30.45
অস্ত্বিদানীমিয়ং রাজন্কেবলা পৃথিবী তব
অসহায়ো হি কো রাজা রাজ্যমিচ্ছেত্প্রশাসিতুম্
30.46
সুহৃদস্তাদৃশান্হিত্বা পুত্রান্ভ্রাতৄন্পিতৄনপি
ভবদ্ভিশ্চ হৃতে রাজ্যে কো নু জীবেত মাদৃশঃ
30.47
অহং বনং গমিষ্যামি হ্যজিনৈঃ প্রতিবাসিতঃ
রতির্হি নাস্তি মে রাজ্যে হতপক্ষস্য ভারত
30.48
হতবান্ধবভূয়িষ্ঠা হতাশ্বা হতকুঞ্জরা
এষা তে পৃথিবী রাজন্ভুঙ্ক্ষ্বৈনাং বিগতজ্বরঃ
30.49
বনমেব গমিষ্যামি বসানো মৃগচর্মণী
ন হি মে নির্জিতস্যাস্তি জীবিতেঽদ্য স্পৃহা বিভো
30.50
গচ্ছ ত্বং ভুঙ্ক্ষ্ব রাজেন্দ্র পৃথিবীং নিহতেশ্বরাম্
হতয়োধাং নষ্টরত্নাং ক্ষীণবপ্রাং যথাসুখম্
30.51
যুধিষ্ঠির উবাচ
আর্তপ্রলাপান্মা তাত সলিলস্থঃ প্রভাষথাঃ
নৈতন্মনসি মে রাজন্বাশিতং শকুনেরিব
30.52
যদি চাপি সমর্থঃ স্যাস্ত্বং দানায় সুয়োধন
নাহমিচ্ছেয়মবনিং ত্বয়া দত্তাং প্রশাসিতুম্
30.53
অধর্মেণ ন গৃহ্ণীয়াং ত্বয়া দত্তাং মহীমিমাম্
ন হি ধর্মঃ স্মৃতো রাজন্ক্ষত্রিয়স্য প্রতিগ্রহঃ
30.54
ত্বয়া দত্তাং ন চেচ্ছেয়ং পৃথিবীমখিলামহম্
ত্বাং তু যুদ্ধে বিনির্জিত্য ভোক্তাস্মি বসুধামিমাম্
30.55
অনীশ্বরশ্চ পৃথিবীং কথং ত্বং দাতুমিচ্ছসি
ত্বয়েয়ং পৃথিবী রাজন্কিং ন দত্তা তদৈব হি
30.56
ধর্মতো যাচমানানাং শমার্থং চ কুলস্য নঃ
বার্ষ্ণেয়ং প্রথমং রাজন্প্রত্যাখ্যায় মহাবলম্
30.57
কিমিদানীং দদাসি ত্বং কো হি তে চিত্তবিভ্রমঃ
অভিয়ুক্তস্তু কো রাজা দাতুমিচ্ছেদ্ধি মেদিনীম্
30.58
ন ত্বমদ্য মহীং দাতুমীশঃ কৌরবনন্দন
আচ্ছেত্তুং বা বলাদ্রাজন্স কথং দাতুমিচ্ছসি
মাং তু নির্জিত্য সংগ্রামে পালয়েমাং বসুংধরাম্
30.59
সূচ্যগ্রেণাপি যদ্ভূমেরপি ধ্রীয়েত ভারত
তন্মাত্রমপি নো মহ্যং ন দদাতি পুরা ভবান্
30.60
স কথং পৃথিবীমেতাং প্রদদাসি বিশাং পতে
সূচ্যগ্রং নাত্যজঃ পূর্বং স কথং ত্যজসি ক্ষিতিম্
30.61
এবমৈশ্বর্যমাসাদ্য প্রশাস্য পৃথিবীমিমাম্
কো হি মূঢো ব্যবস্যেত শত্রোর্দাতুং বসুংধরাম্
30.62
ত্বং তু কেবলমৌর্খ্যেণ বিমূঢো নাববুধ্যসে
পৃথিবীং দাতুকামোঽপি জীবিতেনাদ্য মোক্ষ্যসে
30.63
অস্মান্বা ত্বং পরাজিত্য প্রশাধি পৃথিবীমিমাম্
অথ বা নিহতোঽস্মাভির্ব্রজ লোকাননুত্তমান্
30.64
আবয়োর্জীবতো রাজন্ময়ি চ ত্বয়ি চ ধ্রুবম্
সংশয়ঃ সর্বভূতানাং বিজয়ে নো ভবিষ্যতি
30.65
জীবিতং তব দুষ্প্রজ্ঞ ময়ি সংপ্রতি বর্ততে
জীবয়েয়ং ত্বহং কামং ন তু ত্বং জীবিতুং ক্ষমঃ
30.66
দহনে হি কৃতো যত্নস্ত্বয়াস্মাসু বিশেষতঃ
আশীবিষৈর্বিষৈশ্চাপি জলে চাপি প্রবেশনৈঃ
ত্বয়া বিনিকৃতা রাজন্রাজ্যস্য হরণেন চ
30.67
এতস্মাত্কারণাত্পাপ জীবিতং তে ন বিদ্যতে
উত্তিষ্ঠোত্তিষ্ঠ যুধ্যস্ব তত্তে শ্রেয়ো ভবিষ্যতি
30.68
সংজয় উবাচ
এবং তু বিবিধা বাচো জয়য়ুক্তাঃ পুনঃ পুনঃ
কীর্তয়ন্তি স্ম তে বীরাস্তত্র তত্র জনাধিপ