Utshovঅধ্যায় 29
29.1
ধৃতরাষ্ট্র উবাচ
হতেষু সর্বসৈন্যেষু পাণ্ডুপুত্রৈ রণাজিরে
মম সৈন্যাবশিষ্টাস্তে কিমকুর্বত সংজয়
29.2
কৃতবর্মা কৃপশ্চৈব দ্রোণপুত্রশ্চ বীর্যবান্
দুর্যোধনশ্চ মন্দাত্মা রাজা কিমকরোত্তদা
29.3
সংজয় উবাচ
সংপ্রাদ্রবত্সু দারেষু ক্ষত্রিয়াণাং মহাত্মনাম্
বিদ্রুতে শিবিরে শূন্যে ভৃশোদ্বিগ্নাস্ত্রয়ো রথাঃ
29.4
নিশম্য পাণ্ডুপুত্রাণাং তদা বিজয়িনাং স্বনম্
বিদ্রুতং শিবিরং দৃষ্ট্বা সায়াহ্নে রাজগৃদ্ধিনঃ
স্থানং নারোচয়ংস্তত্র ততস্তে হ্রদমভ্যয়ুঃ
29.5
যুধিষ্ঠিরোঽপি ধর্মাত্মা ভ্রাতৃভিঃ সহিতো রণে
হৃষ্টঃ পর্যপতদ্রাজন্দুর্যোধনবধেপ্সয়া
29.6
মার্গমাণাস্তু সংক্রুদ্ধাস্তব পুত্রং জয়ৈষিণঃ
যত্নতোঽন্বেষমাণাস্তু নৈবাপশ্যঞ্জনাধিপম্
29.7
স হি তীব্রেণ বেগেন গদাপাণিরপাক্রমৎ
তং হ্রদং প্রাবিশচ্চাপি বিষ্টভ্যাপঃ স্বমায়য়া
29.8
যদা তু পাণ্ডবাঃ সর্বে সুপরিশ্রান্তবাহনাঃ
ততঃ স্বশিবিরং প্রাপ্য ব্যতিষ্ঠন্সহসৈনিকাঃ
29.9
ততঃ কৃপশ্চ দ্রৌণিশ্চ কৃতবর্মা চ সাত্বতঃ
সংনিবিষ্টেষু পার্থেষু প্রয়াতাস্তং হ্রদং শনৈঃ
29.10
তে তং হ্রদং সমাসাদ্য যত্র শেতে জনাধিপঃ
অভ্যভাষন্ত দুর্ধর্ষং রাজানং সুপ্তমম্ভসি
29.11
রাজন্নুত্তিষ্ঠ যুধ্যস্ব সহাস্মাভির্যুধিষ্ঠিরম্
জিত্বা বা পৃথিবীং ভুঙ্ক্ষ্ব হতো বা স্বর্গমাপ্নুহি
29.12
তেষামপি বলং সর্বং হতং দুর্যোধন ত্বয়া
প্রতিরব্ধাশ্চ ভূয়িষ্ঠং যে শিষ্টাস্তত্র সৈনিকাঃ
29.13
ন তে বেগং বিষহিতুং শক্তাস্তব বিশাং পতে
অস্মাভিরভিগুপ্তস্য তস্মাদুত্তিষ্ঠ ভারত
29.14
দুর্যোধন উবাচ
দিষ্ট্যা পশ্যামি বো মুক্তানীদৃশাত্পুরুষক্ষয়াৎ
পাণ্ডুকৌরবসংমর্দাজ্জীবমানান্নরর্ষভান্
29.15
বিজেষ্যামো বয়ং সর্বে বিশ্রান্তা বিগতক্লমাঃ
ভবন্তশ্চ পরিশ্রান্তা বয়ং চ ভৃশবিক্ষতাঃ
উদীর্ণং চ বলং তেষাং তেন যুদ্ধং ন রোচয়ে
29.16
ন ত্বেতদদ্ভুতং বীরা যদ্বো মহদিদং মনঃ
অস্মাসু চ পরা ভক্তির্ন তু কালঃ পরাক্রমে
29.17
বিশ্রম্যৈকাং নিশামদ্য ভবদ্ভিঃ সহিতো রণে
প্রতিয়োত্স্যাম্যহং শত্রূঞ্শ্বো ন মেঽস্ত্যত্র সংশয়ঃ
29.18
সংজয় উবাচ
এবমুক্তোঽব্রবীদ্দ্রৌণী রাজানং যুদ্ধদুর্মদম্
উত্তিষ্ঠ রাজন্ভদ্রং তে বিজেষ্যামো রণে পরান্
29.19
ইষ্টাপূর্তেন দানেন সত্যেন চ জপেন চ
শপে রাজন্যথা হ্যদ্য নিহনিষ্যামি সোমকান্
29.20
মা স্ম যজ্ঞকৃতাং প্রীতিং প্রাপ্নুয়াং সজ্জনোচিতাম্
যদীমাং রজনীং ব্যুষ্টাং ন নিহন্মি পরান্রণে
29.21
নাহত্বা সর্বপাঞ্চালান্বিমোক্ষ্যে কবচং বিভো
ইতি সত্যং ব্রবীম্যেতত্তন্মে শৃণু জনাধিপ
29.22
তেষু সংভাষমাণেষু ব্যাধাস্তং দেশমায়য়ুঃ
মাংসভারপরিশ্রান্তাঃ পানীয়ার্থং যদৃচ্ছয়া
29.23
তে হি নিত্যং মহারাজ ভীমসেনস্য লুব্ধকাঃ
মাংসভারানুপাজহ্রুর্ভক্ত্যা পরময়া বিভো
29.24
তে তত্র বিষ্ঠিতাস্তেষাং সর্বং তদ্বচনং রহঃ
দুর্যোধনবচশ্চৈব শুশ্রুবুঃ সংগতা মিথঃ
29.25
তেঽপি সর্বে মহেষ্বাসা অয়ুদ্ধার্থিনি কৌরবে
নির্বন্ধং পরমং চক্রুস্তদা বৈ যুদ্ধকাঙ্ক্ষিণঃ
29.26
তাংস্তথা সমুদীক্ষ্যাথ কৌরবাণাং মহারথান্
অয়ুদ্ধমনসং চৈব রাজানং স্থিতমম্ভসি
29.27
তেষাং শ্রুত্বা চ সংবাদং রাজ্ঞশ্চ সলিলে সতঃ
ব্যাধাভ্যজানন্রাজেন্দ্র সলিলস্থং সুয়োধনম্
29.28
তে পূর্বং পাণ্ডুপুত্রেণ পৃষ্টা হ্যাসন্সুতং তব
যদৃচ্ছোপগতাস্তত্র রাজানং পরিমার্গিতাঃ
29.29
ততস্তে পাণ্ডুপুত্রস্য স্মৃত্বা তদ্ভাষিতং তদা
অন্যোন্যমব্রুবন্রাজন্মৃগব্যাধাঃ শনৈরিদম্
29.30
দুর্যোধনং খ্যাপয়ামো ধনং দাস্যতি পাণ্ডবঃ
সুব্যক্তমিতি নঃ খ্যাতো হ্রদে দুর্যোধনো নৃপঃ
29.31
তস্মাদ্গচ্ছামহে সর্বে যত্র রাজা যুধিষ্ঠিরঃ
আখ্যাতুং সলিলে সুপ্তং দুর্যোধনমমর্ষণম্
29.32
ধৃতরাষ্ট্রাত্মজং তস্মৈ ভীমসেনায় ধীমতে
শয়ানং সলিলে সর্বে কথয়ামো ধনুর্ভৃতে
29.33
স নো দাস্যতি সুপ্রীতো ধনানি বহুলান্যুত
কিং নো মাংসেন শুষ্কেণ পরিক্লিষ্টেন শোষিণা
29.34
এবমুক্ত্বা ততো ব্যাধাঃ সংপ্রহৃষ্টা ধনার্থিনঃ
মাংসভারানুপাদায় প্রয়য়ুঃ শিবিরং প্রতি
29.35
পাণ্ডবাশ্চ মহারাজ লব্ধলক্ষাঃ প্রহারিণঃ
অপশ্যমানাঃ সমরে দুর্যোধনমবস্থিতম্
29.36
নিকৃতেস্তস্য পাপস্য তে পারং গমনেপ্সবঃ
চারান্সংপ্রেষয়ামাসুঃ সমন্তাত্তদ্রণাজিরম্
29.37
আগম্য তু ততঃ সর্বে নষ্টং দুর্যোধনং নৃপম্
ন্যবেদয়ন্ত সহিতা ধর্মরাজস্য সৈনিকাঃ
29.38
তেষাং তদ্বচনং শ্রুত্বা চারাণাং ভরতর্ষভ
চিন্তামভ্যগমত্তীব্রাং নিশশ্বাস চ পার্থিবঃ
29.39
অথ স্থিতানাং পাণ্ডূনাং দীনানাং ভরতর্ষভ
তস্মাদ্দেশাদপক্রম্য ত্বরিতা লুব্ধকা বিভো
29.40
আজগ্মুঃ শিবিরং হৃষ্টা দৃষ্ট্বা দুর্যোধনং নৃপম্
বার্যমাণাঃ প্রবিষ্টাশ্চ ভীমসেনস্য পশ্যতঃ
29.41
তে তু পাণ্ডবমাসাদ্য ভীমসেনং মহাবলম্
তস্মৈ তত্সর্বমাচখ্যুর্যদ্বৃত্তং যচ্চ বৈ শ্রুতম্
29.42
ততো বৃকোদরো রাজন্দত্ত্বা তেষাং ধনং বহু
ধর্মরাজায় তত্সর্বমাচচক্ষে পরংতপঃ
29.43
অসৌ দুর্যোধনো রাজন্বিজ্ঞাতো মম লুব্ধকৈঃ
সংস্তভ্য সলিলং শেতে যস্যার্থে পরিতপ্যসে
29.44
তদ্বচো ভীমসেনস্য প্রিয়ং শ্রুত্বা বিশাং পতে
অজাতশত্রুঃ কৌন্তেয়ো হৃষ্টোঽভূত্সহ সোদরৈঃ
29.45
তং চ শ্রুত্বা মহেষ্বাসং প্রবিষ্টং সলিলহ্রদম্
ক্ষিপ্রমেব ততোঽগচ্ছত্পুরস্কৃত্য জনার্দনম্
29.46
ততঃ কিলকিলাশব্দঃ প্রাদুরাসীদ্বিশাং পতে
পাণ্ডবানাং প্রহৃষ্টানাং পাঞ্চালানাং চ সর্বশঃ
29.47
সিংহনাদাংস্ততশ্চক্রুঃ ক্ষ্বেডাংশ্চ ভরতর্ষভ
ত্বরিতাঃ ক্ষত্রিয়া রাজঞ্জগ্মুর্দ্বৈপায়নং হ্রদম্
29.48
জ্ঞাতঃ পাপো ধার্তরাষ্ট্রো দৃষ্টশ্চেত্যসকৃদ্রণে
প্রাক্রোশন্সোমকাস্তত্র হৃষ্টরূপাঃ সমন্ততঃ
29.49
তেষামাশু প্রয়াতানাং রথানাং তত্র বেগিনাম্
বভূব তুমুলঃ শব্দো দিবস্পৃক্পৃথিবীপতে
29.50
দুর্যোধনং পরীপ্সন্তস্তত্র তত্র যুধিষ্ঠিরম্
অন্বয়ুস্ত্বরিতাস্তে বৈ রাজানং শ্রান্তবাহনাঃ
29.51
অর্জুনো ভীমসেনশ্চ মাদ্রীপুত্রৌ চ পাণ্ডবৌ
ধৃষ্টদ্যুম্নশ্চ পাঞ্চাল্যঃ শিখণ্ডী চাপরাজিতঃ
29.52
উত্তমৌজা যুধামন্যুঃ সাত্যকিশ্চাপরাজিতঃ
পাঞ্চালানাং চ যে শিষ্টা দ্রৌপদেয়াশ্চ ভারত
হয়াশ্চ সর্বে নাগাশ্চ শতশশ্চ পদাতয়ঃ
29.53
ততঃ প্রাপ্তো মহারাজ ধর্মপুত্রো যুধিষ্ঠিরঃ
দ্বৈপায়নহ্রদং খ্যাতং যত্র দুর্যোধনোঽভবৎ
29.54
শীতামলজলং হৃদ্যং দ্বিতীয়মিব সাগরম্
মায়য়া সলিলং স্তভ্য যত্রাভূত্তে সুতঃ স্থিতঃ
29.55
অত্যদ্ভুতেন বিধিনা দৈবয়োগেন ভারত
সলিলান্তর্গতঃ শেতে দুর্দর্শঃ কস্যচিত্প্রভো
মানুষস্য মনুষ্যেন্দ্র গদাহস্তো জনাধিপঃ
29.56
ততো দুর্যোধনো রাজা সলিতান্তর্গতো বসন্
শুশ্রুবে তুমুলং শব্দং জলদোপমনিঃস্বনম্
29.57
যুধিষ্ঠিরস্তু রাজেন্দ্র হ্রদং তং সহ সোদরৈঃ
আজগাম মহারাজ তব পুত্রবধায় বৈ
29.58
মহতা শঙ্খনাদেন রথনেমিস্বনেন চ
উদ্ধুন্বংশ্চ মহারেণুং কম্পয়ংশ্চাপি মেদিনীম্
29.59
যৌধিষ্ঠিরস্য সৈন্যস্য শ্রুত্বা শব্দং মহারথাঃ
কৃতবর্মা কৃপো দ্রৌণী রাজানমিদমব্রুবন্
29.60
ইমে হ্যায়ান্তি সংহৃষ্টাঃ পাণ্ডবা জিতকাশিনঃ
অপয়াস্যামহে তাবদনুজানাতু নো ভবান্
29.61
দুর্যোধনস্তু তচ্ছ্রুত্বা তেষাং তত্র যশস্বিনাম্
তথেত্যুক্ত্বা হ্রদং তং বৈ মায়য়াস্তম্ভয়ত্প্রভো
29.62
তে ত্বনুজ্ঞাপ্য রাজানং ভৃশং শোকপরায়ণাঃ
জগ্মুর্দূরং মহারাজ কৃপপ্রভৃতয়ো রথাঃ
29.63
তে গত্বা দূরমধ্বানং ন্যগ্রোধং প্রেক্ষ্য মারিষ
ন্যবিশন্ত ভৃশং শ্রান্তাশ্চিন্তয়ন্তো নৃপং প্রতি
29.64
বিষ্টভ্য সলিলং সুপ্তো ধার্তরাষ্ট্রো মহাবলঃ
পাণ্ডবাশ্চাপি সংপ্রাপ্তাস্তং দেশং যুদ্ধমীপ্সবঃ
29.65
কথং নু যুদ্ধং ভবিতা কথং রাজা ভবিষ্যতি
কথং নু পাণ্ডবা রাজন্প্রতিপত্স্যন্তি কৌরবম্
29.66
ইত্যেবং চিন্তয়ন্তস্তে রথেভ্যোঽশ্বান্বিমুচ্য হ
তত্রাসাং চক্রিরে রাজন্কৃপপ্রভৃতয়ো রথাঃ