Utshovঅধ্যায় 28
28.1
সংজয় উবাচ
ততঃ ক্রুদ্ধা মহারাজ সৌবলস্য পদানুগাঃ
ত্যক্ত্বা জীবিতমাক্রন্দে পাণ্ডবান্পর্যবারয়ন্
28.2
তানর্জুনঃ প্রত্যগৃহ্ণাত্সহদেবজয়ে ধৃতঃ
ভীমসেনশ্চ তেজস্বী ক্রুদ্ধাশীবিষদর্শনঃ
28.3
শক্ত্যৃষ্টিপ্রাসহস্তানাং সহদেবং জিঘাংসতাম্
সংকল্পমকরোন্মোঘং গাণ্ডীবেন ধনংজয়ঃ
28.4
প্রগৃহীতায়ুধান্বাহূন্যোধানামভিধাবতাম্
ভল্লৈশ্চিচ্ছেদ বীভত্সুঃ শিরাংস্যপি হয়ানপি
28.5
তে হতাঃ প্রত্যপদ্যন্ত বসুধাং বিগতাসবঃ
ত্বরিতা লোকবীরেণ প্রহতাঃ সব্যসাচিনা
28.6
ততো দুর্যোধনো রাজা দৃষ্ট্বা স্ববলসংক্ষয়ম্
হতশেষান্সমানীয় ক্রুদ্ধো রথশতান্বিভো
28.7
কুঞ্জরাংশ্চ হয়াংশ্চৈব পাদাতাংশ্চ পরংতপ
উবাচ সহিতান্সর্বান্ধার্তরাষ্ট্র ইদং বচঃ
28.8
সমাসাদ্য রণে সর্বান্পাণ্ডবান্সসুহৃদ্গণান্
পাঞ্চাল্যং চাপি সবলং হত্বা শীঘ্রং নিবর্তত
28.9
তস্য তে শিরসা গৃহ্য বচনং যুদ্ধদুর্মদাঃ
প্রত্যুদ্যয়ূ রণে পার্থাংস্তব পুত্রস্য শাসনাৎ
28.10
তানভ্যাপততঃ শীঘ্রং হতশেষান্মহারণে
শরৈরাশীবিষাকারৈঃ পাণ্ডবাঃ সমবাকিরন্
28.11
তত্সৈন্যং ভরতশ্রেষ্ঠ মুহূর্তেন মহাত্মভিঃ
অবধ্যত রণং প্রাপ্য ত্রাতারং নাভ্যবিন্দত
প্রতিষ্ঠমানং তু ভয়ান্নাবতিষ্ঠত দংশিতম্
28.12
অশ্বৈর্বিপরিধাবদ্ভিঃ সৈন্যেন রজসা বৃতে
ন প্রাজ্ঞায়ন্ত সমরে দিশশ্চ প্রদিশস্তথা
28.13
ততস্তু পাণ্ডবানীকান্নিঃসৃত্য বহবো জনাঃ
অভ্যঘ্নংস্তাবকান্যুদ্ধে মুহূর্তাদিব ভারত
ততো নিঃশেষমভবত্তত্সৈন্যং তব ভারত
28.14
অক্ষৌহিণ্যঃ সমেতাস্তু তব পুত্রস্য ভারত
একাদশ হতা যুদ্ধে তাঃ প্রভো পাণ্ডুসৃঞ্জয়ৈঃ
28.15
তেষু রাজসহস্রেষু তাবকেষু মহাত্মসু
একো দুর্যোধনো রাজন্নদৃশ্যত ভৃশং ক্ষতঃ
28.16
ততো বীক্ষ্য দিশঃ সর্বা দৃষ্ট্বা শূন্যাং চ মেদিনীম্
বিহীনঃ সর্বয়োধৈশ্চ পাণ্ডবান্বীক্ষ্য সংয়ুগে
28.17
মুদিতান্সর্বসিদ্ধার্থান্নর্দমানান্সমন্ততঃ
বাণশব্দরবাংশ্চৈব শ্রুত্বা তেষাং মহাত্মনাম্
28.18
দুর্যোধনো মহারাজ কশ্মলেনাভিসংবৃতঃ
অপয়ানে মনশ্চক্রে বিহীনবলবাহনঃ
28.19
ধৃতরাষ্ট্র উবাচ
নিহতে মামকে সৈন্যে নিঃশেষে শিবিরে কৃতে
পাণ্ডবানাং বলং সূত কিং নু শেষমভূত্তদা
এতন্মে পৃচ্ছতো ব্রূহি কুশলো হ্যসি সংজয়
28.20
যচ্চ দুর্যোধনো মন্দঃ কৃতবাংস্তনয়ো মম
বলক্ষয়ং তথা দৃষ্ট্বা স একঃ পৃথিবীপতিঃ
28.21
সংজয় উবাচ
রথানাং দ্বে সহস্রে তু সপ্ত নাগশতানি চ
পঞ্চ চাশ্বসহস্রাণি পত্তীনাং চ শতং শতাঃ
28.22
এতচ্ছেষমভূদ্রাজন্পাণ্ডবানাং মহদ্বলম্
পরিগৃহ্য হি যদ্যুদ্ধে ধৃষ্টদ্যুম্নো ব্যবস্থিতঃ
28.23
একাকী ভরতশ্রেষ্ঠ ততো দুর্যোধনো নৃপঃ
নাপশ্যত্সমরে কংচিত্সহায়ং রথিনাং বরঃ
28.24
নর্দমানান্পরাংশ্চৈব স্ববলস্য চ সংক্ষয়ম্
হতং স্বহয়মুত্সৃজ্য প্রাঙ্মুখঃ প্রাদ্রবদ্ভয়াৎ
28.25
একাদশচমূভর্তা পুত্রো দুর্যোধনস্তব
গদামাদায় তেজস্বী পদাতিঃ প্রস্থিতো হ্রদম্
28.26
নাতিদূরং ততো গত্বা পদ্ভ্যামেব নরাধিপঃ
সস্মার বচনং ক্ষত্তুর্ধর্মশীলস্য ধীমতঃ
28.27
ইদং নূনং মহাপ্রাজ্ঞো বিদুরো দৃষ্টবান্পুরা
মহদ্বৈশসমস্মাকং ক্ষত্রিয়াণাং চ সংয়ুগে
28.28
এবং বিচিন্তয়ানস্তু প্রবিবিক্ষুর্হ্রদং নৃপঃ
দুঃখসংতপ্তহৃদয়ো দৃষ্ট্বা রাজন্বলক্ষয়ম্
28.29
পাণ্ডবাশ্চ মহারাজ ধৃষ্টদ্যুম্নপুরোগমাঃ
অভ্যধাবন্ত সংক্রুদ্ধাস্তব রাজন্বলং প্রতি
28.30
শক্ত্যৃষ্টিপ্রাসহস্তানাং বলানামভিগর্জতাম্
সংকল্পমকরোন্মোঘং গাণ্ডীবেন ধনংজয়ঃ
28.31
তান্হত্বা নিশিতৈর্বাণৈঃ সামাত্যান্সহ বন্ধুভিঃ
রথে শ্বেতহয়ে তিষ্ঠন্নর্জুনো বহ্বশোভত
28.32
সুবলস্য হতে পুত্রে সবাজিরথকুঞ্জরে
মহাবনমিব ছিন্নমভবত্তাবকং বলম্
28.33
অনেকশতসাহস্রে বলে দুর্যোধনস্য হ
নান্যো মহারথো রাজঞ্জীবমানো ব্যদৃশ্যত
28.34
দ্রোণপুত্রাদৃতে বীরাত্তথৈব কৃতবর্মণঃ
কৃপাচ্চ গৌতমাদ্রাজন্পার্থিবাচ্চ তবাত্মজাৎ
28.35
ধৃষ্টদ্যুম্নস্তু মাং দৃষ্ট্বা হসন্সাত্যকিমব্রবীৎ
কিমনেন গৃহীতেন নানেনার্থোঽস্তি জীবতা
28.36
ধৃষ্টদ্যুম্নবচঃ শ্রুত্বা শিনের্নপ্তা মহারথঃ
উদ্যম্য নিশিতং খড্গং হন্তুং মামুদ্যতস্তদা
28.37
তমাগম্য মহাপ্রাজ্ঞঃ কৃষ্ণদ্বৈপায়নোঽব্রবীৎ
মুচ্যতাং সংজয়ো জীবন্ন হন্তব্যঃ কথংচন
28.38
দ্বৈপায়নবচঃ শ্রুত্বা শিনের্নপ্তা কৃতাঞ্জলিঃ
ততো মামব্রবীন্মুক্ত্বা স্বস্তি সংজয় সাধয়
28.39
অনুজ্ঞাতস্ত্বহং তেন ন্যস্তবর্মা নিরায়ুধঃ
প্রাতিষ্ঠং যেন নগরং সায়াহ্নে রুধিরোক্ষিতঃ
28.40
ক্রোশমাত্রমপক্রান্তং গদাপাণিমবস্থিতম্
একং দুর্যোধনং রাজন্নপশ্যং ভৃশবিক্ষতম্
28.41
স তু মামশ্রুপূর্ণাক্ষো নাশক্নোদভিবীক্ষিতুম্
উপপ্রৈক্ষত মাং দৃষ্ট্বা তদা দীনমবস্থিতম্
28.42
তং চাহমপি শোচন্তং দৃষ্ট্বৈকাকিনমাহবে
মুহূর্তং নাশকং বক্তুং কিংচিদ্দুঃখপরিপ্লুতঃ
28.43
ততোঽস্মৈ তদহং সর্বমুক্তবান্গ্রহণং তদা
দ্বৈপায়নপ্রসাদাচ্চ জীবতো মোক্ষমাহবে
28.44
মুহূর্তমিব চ ধ্যাত্বা প্রতিলভ্য চ চেতনাম্
ভ্রাতৄংশ্চ সর্বসৈন্যানি পর্যপৃচ্ছত মাং ততঃ
28.45
তস্মৈ তদহমাচক্ষং সর্বং প্রত্যক্ষদর্শিবান্
ভ্রাতৄংশ্চ নিহতান্সর্বান্সৈন্যং চ বিনিপাতিতম্
28.46
ত্রয়ঃ কিল রথাঃ শিষ্টাস্তাবকানাং নরাধিপ
ইতি প্রস্থানকালে মাং কৃষ্ণদ্বৈপায়নোঽব্রবীৎ
28.47
স দীর্ঘমিব নিঃশ্বস্য বিপ্রেক্ষ্য চ পুনঃ পুনঃ
অংসে মাং পাণিনা স্পৃষ্ট্বা পুত্রস্তে পর্যভাষত
28.48
ত্বদন্যো নেহ সংগ্রামে কশ্চিজ্জীবতি সংজয়
দ্বিতীয়ং নেহ পশ্যামি সসহায়াশ্চ পাণ্ডবাঃ
28.49
ব্রূয়াঃ সংজয় রাজানং প্রজ্ঞাচক্ষুষমীশ্বরম্
দুর্যোধনস্তব সুতঃ প্রবিষ্টো হ্রদমিত্যুত
28.50
সুহৃদ্ভিস্তাদৃশৈর্হীনঃ পুত্রৈর্ভ্রাতৃভিরেব চ
পাণ্ডবৈশ্চ হৃতে রাজ্যে কো নু জীবতি মাদৃশঃ
28.51
আচক্ষেথাঃ সর্বমিদং মাং চ মুক্তং মহাহবাৎ
অস্মিংস্তোয়হ্রদে সুপ্তং জীবন্তং ভৃশবিক্ষতম্
28.52
এবমুক্ত্বা মহারাজ প্রাবিশত্তং হ্রদং নৃপঃ
অস্তম্ভয়ত তোয়ং চ মায়য়া মনুজাধিপঃ
28.53
তস্মিন্হ্রদং প্রবিষ্টে তু ত্রীন্রথাঞ্শ্রান্তবাহনান্
অপশ্যং সহিতানেকস্তং দেশং সমুপেয়ুষঃ
28.54
কৃপং শারদ্বতং বীরং দ্রৌণিং চ রথিনাং বরম্
ভোজং চ কৃতবর্মাণং সহিতাঞ্শরবিক্ষতান্
28.55
তে সর্বে মামভিপ্রেক্ষ্য তূর্ণমশ্বানচোদয়ন্
উপয়ায় চ মামূচুর্দিষ্ট্যা জীবসি সংজয়
28.56
অপৃচ্ছংশ্চৈব মাং সর্বে পুত্রং তব জনাধিপম্
কচ্চিদ্দুর্যোধনো রাজা স নো জীবতি সংজয়
28.57
আখ্যাতবানহং তেভ্যস্তদা কুশলিনং নৃপম্
তচ্চৈব সর্বমাচক্ষং যন্মাং দুর্যোধনোঽব্রবীৎ
হ্রদং চৈবাহমাচষ্ট যং প্রবিষ্টো নরাধিপঃ
28.58
অশ্বত্থামা তু তদ্রাজন্নিশম্য বচনং মম
তং হ্রদং বিপুলং প্রেক্ষ্য করুণং পর্যদেবয়ৎ
28.59
অহো ধিঙ্ন স জানাতি জীবতোঽস্মান্নরাধিপঃ
পর্যাপ্তা হি বয়ং তেন সহ যোধয়িতুং পরান্
28.60
তে তু তত্র চিরং কালং বিলপ্য চ মহারথাঃ
প্রাদ্রবন্রথিনাং শ্রেষ্ঠা দৃষ্ট্বা পাণ্ডুসুতান্রণে
28.61
তে তু মাং রথমারোপ্য কৃপস্য সুপরিষ্কৃতম্
সেনানিবেশমাজগ্মুর্হতশেষাস্ত্রয়ো রথাঃ
28.62
তত্র গুল্মাঃ পরিত্রস্তাঃ সূর্যে চাস্তমিতে সতি
সর্বে বিচুক্রুশুঃ শ্রুত্বা পুত্রাণাং তব সংক্ষয়ম্
28.63
ততো বৃদ্ধা মহারাজ যোষিতাং রক্ষণো নরাঃ
রাজদারানুপাদায় প্রয়য়ুর্নগরং প্রতি
28.64
তত্র বিক্রোশতীনাং চ রুদতীনাং চ সর্বশঃ
প্রাদুরাসীন্মহাঞ্শব্দঃ শ্রুত্বা তদ্বলসংক্ষয়ম্
28.65
ততস্তা যোষিতো রাজন্ক্রন্দন্ত্যো বৈ মুহুর্মুহুঃ
কুরর্য ইব শব্দেন নাদয়ন্ত্যো মহীতলম্
28.66
আজঘ্নুঃ করজৈশ্চাপি পাণিভিশ্চ শিরাংস্যুত
লুলুবুশ্চ তদা কেশান্ক্রোশন্ত্যস্তত্র তত্র হ
28.67
হাহাকারবিনাদিন্যো বিনিঘ্নন্ত্য উরাংসি চ
ক্রোশন্ত্যস্তত্র রুরুদুঃ ক্রন্দমানা বিশাং পতে
28.68
ততো দুর্যোধনামাত্যাঃ সাশ্রুকণ্ঠা ভৃশাতুরাঃ
রাজদারানুপাদায় প্রয়য়ুর্নগরং প্রতি
28.69
বেত্রজর্ঝরহস্তাশ্চ দ্বারাধ্যক্ষা বিশাং পতে
শয়নীয়ানি শুভ্রাণি স্পর্ধ্যাস্তরণবন্তি চ
সমাদায় যয়ুস্তূর্ণং নগরং দাররক্ষিণঃ
28.70
আস্থায়াশ্বতরীয়ুক্তান্স্যন্দনানপরে জনাঃ
স্বান্স্বান্দারানুপাদায় প্রয়য়ুর্নগরং প্রতি
28.71
অদৃষ্টপূর্বা যা নার্যো ভাস্করেণাপি বেশ্মসু
দদৃশুস্তা মহারাজ জনা যান্তীঃ পুরং প্রতি
28.72
তাঃ স্ত্রিয়ো ভরতশ্রেষ্ঠ সৌকুমার্যসমন্বিতাঃ
প্রয়য়ুর্নগরং তূর্ণং হতস্বজনবান্ধবাঃ
28.73
আ গোপালাবিপালেভ্যো দ্রবন্তো নগরং প্রতি
যয়ুর্মনুষ্যাঃ সংভ্রান্তা ভীমসেনভয়ার্দিতাঃ
28.74
অপি চৈষাং ভয়ং তীব্রং পার্থেভ্যোঽভূত্সুদারুণম্
প্রেক্ষমাণাস্তদান্যোন্যমাধাবন্নগরং প্রতি
28.75
তস্মিংস্তদা বর্তমানে বিদ্রবে ভৃশদারুণে
যুয়ুত্সুঃ শোকসংমূঢঃ প্রাপ্তকালমচিন্তয়ৎ
28.76
জিতো দুর্যোধনঃ সংখ্যে পাণ্ডবৈর্ভীমবিক্রমৈঃ
একাদশচমূভর্তা ভ্রাতরশ্চাস্য সূদিতাঃ
হতাশ্চ কুরবঃ সর্বে ভীষ্মদ্রোণপুরঃসরাঃ
28.77
অহমেকো বিমুক্তস্তু ভাগ্যয়োগাদ্যদৃচ্ছয়া
বিদ্রুতানি চ সর্বাণি শিবিরাণি সমন্ততঃ
28.78
দুর্যোধনস্য সচিবা যে কেচিদবশেষিতাঃ
রাজদারানুপাদায় ব্যধাবন্নগরং প্রতি
28.79
প্রাপ্তকালমহং মন্যে প্রবেশং তৈঃ সহাভিভো
যুধিষ্ঠিরমনুজ্ঞাপ্য ভীমসেনং তথৈব চ
28.80
এতমর্থং মহাবাহুরুভয়োঃ স ন্যবেদয়ৎ
তস্য প্রীতোঽভবদ্রাজা নিত্যং করুণবেদিতা
পরিষ্বজ্য মহাবাহুর্বৈশ্যাপুত্রং ব্যসর্জয়ৎ
28.81
ততঃ স রথমাস্থায় দ্রুতমশ্বানচোদয়ৎ
অসংভাবিতবাংশ্চাপি রাজদারান্পুরং প্রতি
28.82
তৈশ্চৈব সহিতঃ ক্ষিপ্রমস্তং গচ্ছতি ভাস্করে
প্রবিষ্টো হাস্তিনপুরং বাষ্পকণ্ঠোঽশ্রুলোচনঃ
28.83
অপশ্যত মহাপ্রাজ্ঞং বিদুরং সাশ্রুলোচনম্
রাজ্ঞঃ সমীপান্নিষ্ক্রান্তং শোকোপহতচেতসম্
28.84
তমব্রবীত্সত্যধৃতিঃ প্রণতং ত্বগ্রতঃ স্থিতম্
অস্মিন্কুরুক্ষয়ে বৃত্তে দিষ্ট্যা ত্বং পুত্র জীবসি
28.85
বিনা রাজ্ঞঃ প্রবেশাদ্বৈ কিমসি ত্বমিহাগতঃ
এতন্মে কারণং সর্বং বিস্তরেণ নিবেদয়
28.86
যুয়ুত্সুরুবাচ
নিহতে শকুনৌ তাত সজ্ঞাতিসুতবান্ধবে
হতশেষপরীবারো রাজা দুর্যোধনস্ততঃ
স্বকং স হয়মুত্সৃজ্য প্রাঙ্মুখঃ প্রাদ্রবদ্ভয়াৎ
28.87
অপক্রান্তে তু নৃপতৌ স্কন্ধাবারনিবেশনাৎ
ভয়ব্যাকুলিতং সর্বং প্রাদ্রবন্নগরং প্রতি
28.88
ততো রাজ্ঞঃ কলত্রাণি ভ্রাতৄণাং চাস্য সর্বশঃ
বাহনেষু সমারোপ্য স্ত্র্যধ্যক্ষাঃ প্রাদ্রবন্ভয়াৎ
28.89
ততোঽহং সমনুজ্ঞাপ্য রাজানং সহকেশবম্
প্রবিষ্টো হাস্তিনপুরং রক্ষঁল্লোকাদ্ধি বাচ্যতাম্
28.90
এতচ্ছ্রুত্বা তু বচনং বৈশ্যাপুত্রেণ ভাষিতম্
প্রাপ্তকালমিতি জ্ঞাত্বা বিদুরঃ সর্বধর্মবিৎ
অপূজয়দমেয়াত্মা যুয়ুত্সুং বাক্যকোবিদম্
28.91
প্রাপ্তকালমিদং সর্বং ভবতো ভরতক্ষয়ে
অদ্য ত্বমিহ বিশ্রান্তঃ শ্বোঽভিগন্তা যুধিষ্ঠিরম্
28.92
এতাবদুক্ত্বা বচনং বিদুরঃ সর্বধর্মবিৎ
যুয়ুত্সুং সমনুজ্ঞাপ্য প্রবিবেশ নৃপক্ষয়ম্
যুয়ুত্সুরপি তাং রাত্রিং স্বগৃহে ন্যবসত্তদা