Utshovঅধ্যায় 27
27.1
সংজয় উবাচ
তস্মিন্প্রবৃত্তে সংগ্রামে নরবাজিগজক্ষয়ে
শকুনিঃ সৌবলো রাজন্সহদেবং সমভ্যয়াৎ
27.2
ততোঽস্যাপততস্তূর্ণং সহদেবঃ প্রতাপবান্
শরৌঘান্প্রেষয়ামাস পতংগানিব শীঘ্রগান্
উলূকশ্চ রণে ভীমং বিব্যাধ দশভিঃ শরৈঃ
27.3
শকুনিস্তু মহারাজ ভীমং বিদ্ধ্বা ত্রিভিঃ শরৈঃ
সায়কানাং নবত্যা বৈ সহদেবমবাকিরৎ
27.4
তে শূরাঃ সমরে রাজন্সমাসাদ্য পরস্পরম্
বিব্যধুর্নিশিতৈর্বাণৈঃ কঙ্কবর্হিণবাজিতৈঃ
স্বর্ণপুঙ্খৈঃ শিলাধৌতৈরা কর্ণাত্প্রহিতৈঃ শরৈঃ
27.5
তেষাং চাপভুজোত্সৃষ্টা শরবৃষ্টির্বিশাং পতে
আচ্ছাদয়দ্দিশঃ সর্বা ধারাভিরিব তোয়দঃ
27.6
ততঃ ক্রুদ্ধো রণে ভীমঃ সহদেবশ্চ ভারত
চেরতুঃ কদনং সংখ্যে কুর্বন্তৌ সুমহাবলৌ
27.7
তাভ্যাং শরশতৈশ্ছন্নং তদ্বলং তব ভারত
অন্ধকারমিবাকাশমভবত্তত্র তত্র হ
27.8
অশ্বৈর্বিপরিধাবদ্ভিঃ শরচ্ছন্নৈর্বিশাং পতে
তত্র তত্র কৃতো মার্গো বিকর্ষদ্ভির্হতান্বহূন্
27.9
নিহতানাং হয়ানাং চ সহৈব হয়য়োধিভিঃ
বর্মভির্বিনিকৃত্তৈশ্চ প্রাসৈশ্ছিন্নৈশ্চ মারিষ
সংছন্না পৃথিবী জজ্ঞে কুসুমৈঃ শবলা ইব
27.10
যোধাস্তত্র মহারাজ সমাসাদ্য পরস্পরম্
ব্যচরন্ত রণে ক্রুদ্ধা বিনিঘ্নন্তঃ পরস্পরম্
27.11
উদ্বৃত্তনয়নৈ রোষাত্সংদষ্টৌষ্ঠপুটৈর্মুখৈঃ
সকুণ্ডলৈর্মহী ছন্না পদ্মকিঞ্জল্কসংনিভৈঃ
27.12
ভুজৈশ্ছিন্নৈর্মহারাজ নাগরাজকরোপমৈঃ
সাঙ্গদৈঃ সতনুত্রৈশ্চ সাসিপ্রাসপরশ্বধৈঃ
27.13
কবন্ধৈরুত্থিতৈশ্ছিন্নৈর্নৃত্যদ্ভিশ্চাপরৈর্যুধি
ক্রব্যাদগণসংকীর্ণা ঘোরাভূত্পৃথিবী বিভো
27.14
অল্পাবশিষ্টে সৈন্যে তু কৌরবেয়ান্মহাহবে
প্রহৃষ্টাঃ পাণ্ডবা ভূত্বা নিন্যিরে যমসাদনম্
27.15
এতস্মিন্নন্তরে শূরঃ সৌবলেয়ঃ প্রতাপবান্
প্রাসেন সহদেবস্য শিরসি প্রাহরদ্ভৃশম্
স বিহ্বলো মহারাজ রথোপস্থ উপাবিশৎ
27.16
সহদেবং তথা দৃষ্ট্বা ভীমসেনঃ প্রতাপবান্
সর্বসৈন্যানি সংক্রুদ্ধো বারয়ামাস ভারত
27.17
নির্বিভেদ চ নারাচৈঃ শতশোঽথ সহস্রশঃ
বিনির্ভিদ্যাকরোচ্চৈব সিংহনাদমরিংদম
27.18
তেন শব্দেন বিত্রস্তাঃ সর্বে সহয়বারণাঃ
প্রাদ্রবন্সহসা ভীতাঃ শকুনেশ্চ পদানুগাঃ
27.19
প্রভগ্নানথ তান্দৃষ্ট্বা রাজা দুর্যোধনোঽব্রবীৎ
নিবর্তধ্বমধর্মজ্ঞা যুধ্যধ্বং কিং সৃতেন বঃ
27.20
ইহ কীর্তিং সমাধায় প্রেত্য লোকান্সমশ্নুতে
প্রাণাঞ্জহাতি যো বীরো যুধি পৃষ্ঠমদর্শয়ন্
27.21
এবমুক্তাস্তু তে রাজ্ঞা সৌবলস্য পদানুগাঃ
পাণ্ডবানভ্যবর্তন্ত মৃত্যুং কৃত্বা নিবর্তনম্
27.22
দ্রবদ্ভিস্তত্র রাজেন্দ্র কৃতঃ শব্দোঽতিদারুণঃ
ক্ষুব্ধসাগরসংকাশঃ ক্ষুভিতঃ সর্বতোঽভবৎ
27.23
তাংস্তদাপততো দৃষ্ট্বা সৌবলস্য পদানুগান্
প্রত্যুদ্যয়ুর্মহারাজ পাণ্ডবা বিজয়ে বৃতাঃ
27.24
প্রত্যাশ্বস্য চ দুর্ধর্ষঃ সহদেবো বিশাং পতে
শকুনিং দশভির্বিদ্ধ্বা হয়াংশ্চাস্য ত্রিভিঃ শরৈঃ
ধনুশ্চিচ্ছেদ চ শরৈঃ সৌবলস্য হসন্নিব
27.25
অথান্যদ্ধনুরাদায় শকুনির্যুদ্ধদুর্মদঃ
বিব্যাধ নকুলং ষষ্ট্যা ভীমসেনং চ সপ্তভিঃ
27.26
উলূকোঽপি মহারাজ ভীমং বিব্যাধ সপ্তভিঃ
সহদেবং চ সপ্তত্যা পরীপ্সন্পিতরং রণে
27.27
তং ভীমসেনঃ সমরে বিব্যাধ নিশিতৈঃ শরৈঃ
শকুনিং চ চতুঃষষ্ট্যা পার্শ্বস্থাংশ্চ ত্রিভিস্ত্রিভিঃ
27.28
তে হন্যমানা ভীমেন নারাচৈস্তৈলপায়িতৈঃ
সহদেবং রণে ক্রুদ্ধাশ্ছাদয়ঞ্শরবৃষ্টিভিঃ
পর্বতং বারিধারাভিঃ সবিদ্যুত ইবাম্বুদাঃ
27.29
ততোঽস্যাপততঃ শূরঃ সহদেবঃ প্রতাপবান্
উলূকস্য মহারাজ ভল্লেনাপাহরচ্ছিরঃ
27.30
স জগাম রথাদ্ভূমিং সহদেবেন পাতিতঃ
রুধিরাপ্লুতসর্বাঙ্গো নন্দয়ন্পাণ্ডবান্যুধি
27.31
পুত্রং তু নিহতং দৃষ্ট্বা শকুনিস্তত্র ভারত
সাশ্রুকণ্ঠো বিনিঃশ্বস্য ক্ষত্তুর্বাক্যমনুস্মরন্
27.32
চিন্তয়িত্বা মুহূর্তং স বাষ্পপূর্ণেক্ষণঃ শ্বসন্
সহদেবং সমাসাদ্য ত্রিভির্বিব্যাধ সায়কৈঃ
27.33
তানপাস্য শরান্মুক্তাঞ্শরসংঘৈঃ প্রতাপবান্
সহদেবো মহারাজ ধনুশ্চিচ্ছেদ সংয়ুগে
27.34
ছিন্নে ধনুষি রাজেন্দ্র শকুনিঃ সৌবলস্তদা
প্রগৃহ্য বিপুলং খড্গং সহদেবায় প্রাহিণোৎ
27.35
তমাপতন্তং সহসা ঘোররূপং বিশাং পতে
দ্বিধা চিচ্ছেদ সমরে সৌবলস্য হসন্নিব
27.36
অসিং দৃষ্ট্বা দ্বিধা ছিন্নং প্রগৃহ্য মহতীং গদাম্
প্রাহিণোত্সহদেবায় সা মোঘা ন্যপতদ্ভুবি
27.37
ততঃ শক্তিং মহাঘোরাং কালরাত্রিমিবোদ্যতাম্
প্রেষয়ামাস সংক্রুদ্ধঃ পাণ্ডবং প্রতি সৌবলঃ
27.38
তামাপতন্তীং সহসা শরৈঃ কাঞ্চনভূষণৈঃ
ত্রিধা চিচ্ছেদ সমরে সহদেবো হসন্নিব
27.39
সা পপাত ত্রিধা ছিন্না ভূমৌ কনকভূষণা
শীর্যমাণা যথা দীপ্তা গগনাদ্বৈ শতহ্রদা
27.40
শক্তিং বিনিহতাং দৃষ্ট্বা সৌবলং চ ভয়ার্দিতম্
দুদ্রুবুস্তাবকাঃ সর্বে ভয়ে জাতে সসৌবলাঃ
27.41
অথোত্ক্রুষ্টং মহদ্ধ্যাসীত্পাণ্ডবৈর্জিতকাশিভিঃ
ধার্তরাষ্ট্রাস্ততঃ সর্বে প্রায়শো বিমুখাভবন্
27.42
তান্বৈ বিমনসো দৃষ্ট্বা মাদ্রীপুত্রঃ প্রতাপবান্
শরৈরনেকসাহস্রৈর্বারয়ামাস সংয়ুগে
27.43
ততো গান্ধারকৈর্গুপ্তং পৃষ্ঠৈরশ্বৈর্জয়ে ধৃতম্
আসসাদ রণে যান্তং সহদেবোঽথ সৌবলম্
27.44
স্বমংশমবশিষ্টং স সংস্মৃত্য শকুনিং নৃপ
রথেন কাঞ্চনাঙ্গেন সহদেবঃ সমভ্যয়াৎ
অধিজ্যং বলবত্কৃত্বা ব্যাক্ষিপন্সুমহদ্ধনুঃ
27.45
স সৌবলমভিদ্রুত্য গৃধ্রপত্রৈঃ শিলাশিতৈঃ
ভৃশমভ্যহনত্ক্রুদ্ধস্তোত্ত্রৈরিব মহাদ্বিপম্
27.46
উবাচ চৈনং মেধাবী নিগৃহ্য স্মারয়ন্নিব
ক্ষত্রধর্মে স্থিতো ভূত্বা যুধ্যস্ব পুরুষো ভব
27.47
যত্তদা হৃষ্যসে মূঢ গ্লহন্নক্ষৈঃ সভাতলে
ফলমদ্য প্রপদ্যস্ব কর্মণস্তস্য দুর্মতে
27.48
নিহতাস্তে দুরাত্মানো যেঽস্মানবহসন্পুরা
দুর্যোধনঃ কুলাঙ্গারঃ শিষ্টস্ত্বং তস্য মাতুলঃ
27.49
অদ্য তে বিহনিষ্যামি ক্ষুরেণোন্মথিতং শিরঃ
বৃক্ষাত্ফলমিবোদ্ধৃত্য লগুডেন প্রমাথিনা
27.50
এবমুক্ত্বা মহারাজ সহদেবো মহাবলঃ
সংক্রুদ্ধো নরশার্দূলো বেগেনাভিজগাম হ
27.51
অভিগম্য তু দুর্ধর্ষঃ সহদেবো যুধাং পতিঃ
বিকৃষ্য বলবচ্চাপং ক্রোধেন প্রহসন্নিব
27.52
শকুনিং দশভির্বিদ্ধ্বা চতুর্ভিশ্চাস্য বাজিনঃ
ছত্রং ধ্বজং ধনুশ্চাস্য ছিত্ত্বা সিংহ ইবানদৎ
27.53
ছিন্নধ্বজধনুশ্ছত্রঃ সহদেবেন সৌবলঃ
ততো বিদ্ধশ্চ বহুভিঃ সর্বমর্মসু সায়কৈঃ
27.54
ততো ভূয়ো মহারাজ সহদেবঃ প্রতাপবান্
শকুনেঃ প্রেষয়ামাস শরবৃষ্টিং দুরাসদাম্
27.55
ততস্তু ক্রুদ্ধঃ সুবলস্য পুত্রো; মাদ্রীসুতং সহদেবং বিমর্দে
প্রাসেন জাম্বূনদভূষণেন; জিঘাংসুরেকোঽভিপপাত শীঘ্রম্
27.56
মাদ্রীসুতস্তস্য সমুদ্যতং তং; প্রাসং সুবৃত্তৌ চ ভুজৌ রণাগ্রে
ভল্লৈস্ত্রিভির্যুগপত্সংচকর্ত; ননাদ চোচ্চৈস্তরসাজিমধ্যে
27.57
তস্যাশুকারী সুসমাহিতেন; সুবর্ণপুঙ্খেন দৃঢায়সেন
ভল্লেন সর্বাবরণাতিগেন; শিরঃ শরীরাত্প্রমমাথ ভূয়ঃ
27.58
শরেণ কার্তস্বরভূষিতেন; দিবাকরাভেন সুসংশিতেন
হৃতোত্তমাঙ্গো যুধি পাণ্ডবেন; পপাত ভূমৌ সুবলস্য পুত্রঃ
27.59
স তচ্ছিরো বেগবতা শরেণ; সুবর্ণপুঙ্খেন শিলাশিতেন
প্রাবেরয়ত্কুপিতঃ পাণ্ডুপুত্রো; যত্তত্কুরূণামনয়স্য মূলম্
27.60
হৃতোত্তমাঙ্গং শকুনিং সমীক্ষ্য; ভূমৌ শয়ানং রুধিরার্দ্রগাত্রম্
যোধাস্ত্বদীয়া ভয়নষ্টসত্ত্বা; দিশঃ প্রজগ্মুঃ প্রগৃহীতশস্ত্রাঃ
27.61
বিপ্রদ্রুতাঃ শুষ্কমুখা বিসংজ্ঞা; গাণ্ডীবঘোষেণ সমাহতাশ্চ
ভয়ার্দিতা ভগ্নরথাশ্বনাগাঃ; পদাতয়শ্চৈব সধার্তরাষ্ট্রাঃ
27.62
ততো রথাচ্ছকুনিং পাতয়িত্বা; মুদান্বিতা ভারত পাণ্ডবেয়াঃ
শঙ্খান্প্রদধ্মুঃ সমরে প্রহৃষ্টাঃ; সকেশবাঃ সৈনিকান্হর্ষয়ন্তঃ
27.63
তং চাপি সর্বে প্রতিপূজয়ন্তো; হৃষ্টা ব্রুবাণাঃ সহদেবমাজৌ
দিষ্ট্যা হতো নৈকৃতিকো দুরাত্মা; সহাত্মজো বীর রণে ত্বয়েতি