Utshovঅধ্যায় 26
26.1
সংজয় উবাচ
দুর্যোধনো মহারাজ সুদর্শশ্চাপি তে সুতঃ
হতশেষৌ তদা সংখ্যে বাজিমধ্যে ব্যবস্থিতৌ
26.2
ততো দুর্যোধনং দৃষ্ট্বা বাজিমধ্যে ব্যবস্থিতম্
উবাচ দেবকীপুত্রঃ কুন্তীপুত্রং ধনংজয়ম্
26.3
শত্রবো হতভূয়িষ্ঠা জ্ঞাতয়ঃ পরিপালিতাঃ
গৃহীত্বা সংজয়ং চাসৌ নিবৃত্তঃ শিনিপুংগবঃ
26.4
পরিশ্রান্তশ্চ নকুলঃ সহদেবশ্চ ভারত
যোধয়িত্বা রণে পাপান্ধার্তরাষ্ট্রপদানুগান্
26.5
সুয়োধনমভিত্যজ্য ত্রয় এতে ব্যবস্থিতাঃ
কৃপশ্চ কৃতবর্মা চ দ্রৌণিশ্চৈব মহারথঃ
26.6
অসৌ তিষ্ঠতি পাঞ্চাল্যঃ শ্রিয়া পরময়া যুতঃ
দুর্যোধনবলং হত্বা সহ সর্বৈঃ প্রভদ্রকৈঃ
26.7
অসৌ দুর্যোধনঃ পার্থ বাজিমধ্যে ব্যবস্থিতঃ
ছত্রেণ ধ্রিয়মাণেন প্রেক্ষমাণো মুহুর্মুহুঃ
26.8
প্রতিব্যূহ্য বলং সর্বং রণমধ্যে ব্যবস্থিতঃ
এনং হত্বা শিতৈর্বাণৈঃ কৃতকৃত্যো ভবিষ্যসি
26.9
গজানীকং হতং দৃষ্ট্বা ত্বাং চ প্রাপ্তমরিংদম
যাবন্ন বিদ্রবন্ত্যেতে তাবজ্জহি সুয়োধনম্
26.10
যাতু কশ্চিত্তু পাঞ্চাল্যং ক্ষিপ্রমাগম্যতামিতি
পরিশ্রান্তবলস্তাত নৈষ মুচ্যেত কিল্বিষী
26.11
তব হত্বা বলং সর্বং সংগ্রামে ধৃতরাষ্ট্রজঃ
জিতান্পাণ্ডুসুতান্মত্বা রূপং ধারয়তে মহৎ
26.12
নিহতং স্ববলং দৃষ্ট্বা পীডিতং চাপি পাণ্ডবৈঃ
ধ্রুবমেষ্যতি সংগ্রামে বধায়ৈবাত্মনো নৃপঃ
26.13
এবমুক্তঃ ফল্গুনস্তু কৃষ্ণং বচনমব্রবীৎ
ধৃতরাষ্ট্রসুতাঃ সর্বে হতা ভীমেন মানদ
যাবেতাবাস্থিতৌ কৃষ্ণ তাবদ্য ন ভবিষ্যতঃ
26.14
হতো ভীষ্মো হতো দ্রোণঃ কর্ণো বৈকর্তনো হতঃ
মদ্ররাজো হতঃ শল্যো হতঃ কৃষ্ণ জয়দ্রথঃ
26.15
হয়াঃ পঞ্চশতাঃ শিষ্টাঃ শকুনেঃ সৌবলস্য চ
রথানাং তু শতে শিষ্টে দ্বে এব তু জনার্দন
দন্তিনাং চ শতং সাগ্রং ত্রিসাহস্রাঃ পদাতয়ঃ
26.16
অশ্বত্থামা কৃপশ্চৈব ত্রিগর্তাধিপতিস্তথা
উলূকঃ শকুনিশ্চৈব কৃতবর্মা চ সাত্বতঃ
26.17
এতদ্বলমভূচ্ছেষং ধার্তরাষ্ট্রস্য মাধব
মোক্ষো ন নূনং কালাদ্ধি বিদ্যতে ভুবি কস্যচিৎ
26.18
তথা বিনিহতে সৈন্যে পশ্য দুর্যোধনং স্থিতম্
অদ্যাহ্না হি মহারাজো হতামিত্রো ভবিষ্যতি
26.19
ন হি মে মোক্ষ্যতে কশ্চিত্পরেষামিতি চিন্তয়ে
যে ত্বদ্য সমরং কৃষ্ণ ন হাস্যন্তি রণোত্কটাঃ
তান্বৈ সর্বান্হনিষ্যামি যদ্যপি স্যুরমানুষাঃ
26.20
অদ্য যুদ্ধে সুসংক্রুদ্ধো দীর্ঘং রাজ্ঞঃ প্রজাগরম্
অপনেষ্যামি গান্ধারং পাতয়িত্বা শিতৈঃ শরৈঃ
26.21
নিকৃত্যা বৈ দুরাচারো যানি রত্নানি সৌবলঃ
সভায়ামহরদ্দ্যূতে পুনস্তান্যাহরাম্যহম্
26.22
অদ্য তা অপি বেত্স্যন্তি সর্বা নাগপুরস্ত্রিয়ঃ
শ্রুত্বা পতীংশ্চ পুত্রাংশ্চ পাণ্ডবৈর্নিহতান্যুধি
26.23
সমাপ্তমদ্য বৈ কর্ম সর্বং কৃষ্ণ ভবিষ্যতি
অদ্য দুর্যোধনো দীপ্তাং শ্রিয়ং প্রাণাংশ্চ ত্যক্ষ্যতি
26.24
নাপয়াতি ভয়াত্কৃষ্ণ সংগ্রামাদ্যদি চেন্মম
নিহতং বিদ্ধি বার্ষ্ণেয় ধার্তরাষ্ট্রং সুবালিশম্
26.25
মম হ্যেতদশক্তং বৈ বাজিবৃন্দমরিংদম
সোঢুং জ্যাতলনির্ঘোষং যাহি যাবন্নিহন্ম্যহম্
26.26
এবমুক্তস্তু দাশার্হঃ পাণ্ডবেন যশস্বিনা
অচোদয়দ্ধয়ান্রাজন্দুর্যোধনবলং প্রতি
26.27
তদনীকমভিপ্রেক্ষ্য ত্রয়ঃ সজ্জা মহারথাঃ
ভীমসেনোঽর্জুনশ্চৈব সহদেবশ্চ মারিষ
প্রয়য়ুঃ সিংহনাদেন দুর্যোধনজিঘাংসয়া
26.28
তান্প্রেক্ষ্য সহিতান্সর্বাঞ্জবেনোদ্যতকার্মুকান্
সৌবলোঽভ্যদ্রবদ্যুদ্ধে পাণ্ডবানাততায়িনঃ
26.29
সুদর্শনস্তব সুতো ভীমসেনং সমভ্যয়াৎ
সুশর্মা শকুনিশ্চৈব যুয়ুধাতে কিরীটিনা
সহদেবং তব সুতো হয়পৃষ্ঠগতোঽভ্যয়াৎ
26.30
ততো হ্যয়ত্নতঃ ক্ষিপ্রং তব পুত্রো জনাধিপ
প্রাসেন সহদেবস্য শিরসি প্রাহরদ্ভৃশম্
26.31
সোপাবিশদ্রথোপস্থে তব পুত্রেণ তাডিতঃ
রুধিরাপ্লুতসর্বাঙ্গ আশীবিষ ইব শ্বসন্
26.32
প্রতিলভ্য ততঃ সংজ্ঞাং সহদেবো বিশাং পতে
দুর্যোধনং শরৈস্তীক্ষ্ণৈঃ সংক্রুদ্ধঃ সমবাকিরৎ
26.33
পার্থোঽপি যুধি বিক্রম্য কুন্তীপুত্রো ধনংজয়ঃ
শূরাণামশ্বপৃষ্ঠেভ্যঃ শিরাংসি নিচকর্ত হ
26.34
তদনীকং তদা পার্থো ব্যধমদ্বহুভিঃ শরৈঃ
পাতয়িত্বা হয়ান্সর্বাংস্ত্রিগর্তানাং রথান্যয়ৌ
26.35
ততস্তে সহিতা ভূত্বা ত্রিগর্তানাং মহারথাঃ
অর্জুনং বাসুদেবং চ শরবর্ষৈরবাকিরন্
26.36
সত্যকর্মাণমাক্ষিপ্য ক্ষুরপ্রেণ মহায়শাঃ
ততোঽস্য স্যন্দনস্যেষাং চিচ্ছিদে পাণ্ডুনন্দনঃ
26.37
শিলাশিতেন চ বিভো ক্ষুরপ্রেণ মহায়শাঃ
শিরশ্চিচ্ছেদ প্রহসংস্তপ্তকুণ্ডলভূষণম্
26.38
সত্যেষুমথ চাদত্ত যোধানাং মিষতাং ততঃ
যথা সিংহো বনে রাজন্মৃগং পরিবুভুক্ষিতঃ
26.39
তং নিহত্য ততঃ পার্থঃ সুশর্মাণং ত্রিভিঃ শরৈঃ
বিদ্ধ্বা তানহনত্সর্বান্রথান্রুক্মবিভূষিতান্
26.40
ততস্তু প্রত্বরন্পার্থো দীর্ঘকালং সুসংভৃতম্
মুঞ্চন্ক্রোধবিষং তীক্ষ্ণং প্রস্থলাধিপতিং প্রতি
26.41
তমর্জুনঃ পৃষত্কানাং শতেন ভরতর্ষভ
পূরয়িত্বা ততো বাহান্ন্যহনত্তস্য ধন্বিনঃ
26.42
ততঃ শরং সমাদায় যমদণ্ডোপমং শিতম্
সুশর্মাণং সমুদ্দিশ্য চিক্ষেপাশু হসন্নিব
26.43
স শরঃ প্রেষিতস্তেন ক্রোধদীপ্তেন ধন্বিনা
সুশর্মাণং সমাসাদ্য বিভেদ হৃদয়ং রণে
26.44
স গতাসুর্মহারাজ পপাত ধরণীতলে
নন্দয়ন্পাণ্ডবান্সর্বান্ব্যথয়ংশ্চাপি তাবকান্
26.45
সুশর্মাণং রণে হত্বা পুত্রানস্য মহারথান্
সপ্ত চাষ্টৌ চ ত্রিংশচ্চ সায়কৈরনয়ত্ক্ষয়ম্
26.46
ততোঽস্য নিশিতৈর্বাণৈঃ সর্বান্হত্বা পদানুগান্
অভ্যগাদ্ভারতীং সেনাং হতশেষাং মহারথঃ
26.47
ভীমস্তু সমরে ক্রুদ্ধঃ পুত্রং তব জনাধিপ
সুদর্শনমদৃশ্যং তং শরৈশ্চক্রে হসন্নিব
26.48
ততোঽস্য প্রহসন্ক্রুদ্ধঃ শিরঃ কায়াদপাহরৎ
ক্ষুরপ্রেণ সুতীক্ষ্ণেন স হতঃ প্রাপতদ্ভুবি
26.49
তস্মিংস্তু নিহতে বীরে ততস্তস্য পদানুগাঃ
পরিবব্রূ রণে ভীমং কিরন্তো বিশিখাঞ্শিতান্
26.50
ততস্তু নিশিতৈর্বাণৈস্তদনীকং বৃকোদরঃ
ইন্দ্রাশনিসমস্পর্শৈঃ সমন্তাত্পর্যবাকিরৎ
ততঃ ক্ষণেন তদ্ভীমো ন্যহনদ্ভরতর্ষভ
26.51
তেষু তূত্সাদ্যমানেষু সেনাধ্যক্ষা মহাবলাঃ
ভীমসেনং সমাসাদ্য ততোঽয়ুধ্যন্ত ভারত
তাংস্তু সর্বাঞ্শরৈর্ঘোরৈরবাকিরত পাণ্ডবঃ
26.52
তথৈব তাবকা রাজন্পাণ্ডবেয়ান্মহারথান্
শরবর্ষেণ মহতা সমন্তাত্পর্যবারয়ন্
26.53
ব্যাকুলং তদভূত্সর্বং পাণ্ডবানাং পরৈঃ সহ
তাবকানাং চ সমরে পাণ্ডবেয়ৈর্যুয়ুত্সতাম্
26.54
তত্র যোধাস্তদা পেতুঃ পরস্পরসমাহতাঃ
উভয়োঃ সেনয়ো রাজন্সংশোচন্তঃ স্ম বান্ধবান্