Utshovঅধ্যায় 25
25.1
সংজয় উবাচ
গজানীকে হতে তস্মিন্পাণ্ডুপুত্রেণ ভারত
বধ্যমানে বলে চৈব ভীমসেনেন সংয়ুগে
25.2
চরন্তং চ তথা দৃষ্ট্বা ভীমসেনমরিংদমম্
দণ্ডহস্তং যথা ক্রুদ্ধমন্তকং প্রাণহারিণম্
25.3
সমেত্য সমরে রাজন্হতশেষাঃ সুতাস্তব
অদৃশ্যমানে কৌরব্যে পুত্রে দুর্যোধনে তব
সোদর্যাঃ সহিতা ভূত্বা ভীমসেনমুপাদ্রবন্
25.4
দুর্মর্ষণো মহারাজ জৈত্রো ভূরিবলো রবিঃ
ইত্যেতে সহিতা ভূত্বা তব পুত্রাঃ সমন্ততঃ
ভীমসেনমভিদ্রুত্য রুরুধুঃ সর্বতোদিশম্
25.5
ততো ভীমো মহারাজ স্বরথং পুনরাস্থিতঃ
মুমোচ নিশিতান্বাণান্পুত্রাণাং তব মর্মসু
25.6
তে কীর্যমাণা ভীমেন পুত্রাস্তব মহারণে
ভীমসেনমপাসেধন্প্রবণাদিব কুঞ্জরম্
25.7
ততঃ ক্রুদ্ধো রণে ভীমঃ শিরো দুর্মর্ষণস্য হ
ক্ষুরপ্রেণ প্রমথ্যাশু পাতয়ামাস ভূতলে
25.8
ততোঽপরেণ ভল্লেন সর্বাবরণভেদিনা
শ্রুতান্তমবধীদ্ভীমস্তব পুত্রং মহারথঃ
25.9
জয়ত্সেনং ততো বিদ্ধ্বা নারাচেন হসন্নিব
পাতয়ামাস কৌরব্যং রথোপস্থাদরিংদমঃ
স পপাত রথাদ্রাজন্ভূমৌ তূর্ণং মমার চ
25.10
শ্রুতর্বা তু ততো ভীমং ক্রুদ্ধো বিব্যাধ মারিষ
শতেন গৃধ্রবাজানাং শরাণাং নতপর্বণাম্
25.11
ততঃ ক্রুদ্ধো রণে ভীমো জৈত্রং ভূরিবলং রবিম্
ত্রীনেতাংস্ত্রিভিরানর্ছদ্বিষাগ্নিপ্রতিমৈঃ শরৈঃ
25.12
তে হতা ন্যপতন্ভূমৌ স্যন্দনেভ্যো মহারথাঃ
বসন্তে পুষ্পশবলা নিকৃত্তা ইব কিংশুকাঃ
25.13
ততোঽপরেণ তীক্ষ্ণেন নারাচেন পরংতপঃ
দুর্বিমোচনমাহত্য প্রেষয়ামাস মৃত্যবে
25.14
স হতঃ প্রাপতদ্ভূমৌ স্বরথাদ্রথিনাং বরঃ
গিরেস্তু কূটজো ভগ্নো মারুতেনেব পাদপঃ
25.15
দুষ্প্রধর্ষং ততশ্চৈব সুজাতং চ সুতৌ তব
একৈকং ন্যবধীত্সংখ্যে দ্বাভ্যাং দ্বাভ্যাং চমূমুখে
তৌ শিলীমুখবিদ্ধাঙ্গৌ পেততূ রথসত্তমৌ
25.16
ততো যতন্তমপরমভিবীক্ষ্য সুতং তব
ভল্লেন যুধি বিব্যাধ ভীমো দুর্বিষহং রণে
স পপাত হতো বাহাত্পশ্যতাং সর্বধন্বিনাম্
25.17
দৃষ্ট্বা তু নিহতান্ভ্রাতৄন্বহূনেকেন সংয়ুগে
অমর্ষবশমাপন্নঃ শ্রুতর্বা ভীমমভ্যয়াৎ
25.18
বিক্ষিপন্সুমহচ্চাপং কার্তস্বরবিভূষিতম্
বিসৃজন্সায়কাংশ্চৈব বিষাগ্নিপ্রতিমান্বহূন্
25.19
স তু রাজন্ধনুশ্ছিত্ত্বা পাণ্ডবস্য মহামৃধে
অথৈনং ছিন্নধন্বানং বিংশত্যা সমবাকিরৎ
25.20
ততোঽন্যদ্ধনুরাদায় ভীমসেনো মহারথঃ
অবাকিরত্তব সুতং তিষ্ঠ তিষ্ঠেতি চাব্রবীৎ
25.21
মহদাসীত্তয়োর্যুদ্ধং চিত্ররূপং ভয়ানকম্
যাদৃশং সমরে পূর্বং জম্ভবাসবয়োরভূৎ
25.22
তয়োস্তত্র শরৈর্মুক্তৈর্যমদণ্ডনিভৈঃ শুভৈঃ
সমাচ্ছন্না ধরা সর্বা খং চ সর্বা দিশস্তথা
25.23
ততঃ শ্রুতর্বা সংক্রুদ্ধো ধনুরায়ম্য সায়কৈঃ
ভীমসেনং রণে রাজন্বাহ্বোরুরসি চার্পয়ৎ
25.24
সোঽতিবিদ্ধো মহারাজ তব পুত্রেণ ধন্বিনা
ভীমঃ সংচুক্ষুভে ক্রুদ্ধঃ পর্বণীব মহোদধিঃ
25.25
ততো ভীমো রুষাবিষ্টঃ পুত্রস্য তব মারিষ
সারথিং চতুরশ্চাশ্বান্বাণৈর্নিন্যে যমক্ষয়ম্
25.26
বিরথং তং সমালক্ষ্য বিশিখৈর্লোমবাহিভিঃ
অবাকিরদমেয়াত্মা দর্শয়ন্পাণিলাঘবম্
25.27
শ্রুতর্বা বিরথো রাজন্নাদদে খড্গচর্মণী
অথাস্যাদদতঃ খড্গং শতচন্দ্রং চ ভানুমৎ
ক্ষুরপ্রেণ শিরঃ কায়াত্পাতয়ামাস পাণ্ডবঃ
25.28
ছিন্নোত্তমাঙ্গস্য ততঃ ক্ষুরপ্রেণ মহাত্মনঃ
পপাত কায়ঃ স রথাদ্বসুধামনুনাদয়ন্
25.29
তস্মিন্নিপতিতে বীরে তাবকা ভয়মোহিতাঃ
অভ্যদ্রবন্ত সংগ্রামে ভীমসেনং যুয়ুত্সবঃ
25.30
তানাপতত এবাশু হতশেষাদ্বলার্ণবাৎ
দংশিতঃ প্রতিজগ্রাহ ভীমসেনঃ প্রতাপবান্
তে তু তং বৈ সমাসাদ্য পরিবব্রুঃ সমন্ততঃ
25.31
ততস্তু সংবৃতো ভীমস্তাবকৈর্নিশিতৈঃ শরৈঃ
পীডয়ামাস তান্সর্বান্সহস্রাক্ষ ইবাসুরান্
25.32
ততঃ পঞ্চশতান্হত্বা সবরূথান্মহারথান্
জঘান কুঞ্জরানীকং পুনঃ সপ্তশতং যুধি
25.33
হত্বা দশ সহস্রাণি পত্তীনাং পরমেষুভিঃ
বাজিনাং চ শতান্যষ্টৌ পাণ্ডবঃ স্ম বিরাজতে
25.34
ভীমসেনস্তু কৌন্তেয়ো হত্বা যুদ্ধে সুতাংস্তব
মেনে কৃতার্থমাত্মানং সফলং জন্ম চ প্রভো
25.35
তং তথা যুধ্যমানং চ বিনিঘ্নন্তং চ তাবকান্
ঈক্ষিতুং নোত্সহন্তে স্ম তব সৈন্যানি ভারত
25.36
বিদ্রাব্য তু কুরূন্সর্বাংস্তাংশ্চ হত্বা পদানুগান্
দোর্ভ্যাং শব্দং ততশ্চক্রে ত্রাসয়ানো মহাদ্বিপান্
25.37
হতভূয়িষ্ঠয়োধা তু তব সেনা বিশাং পতে
কিংচিচ্ছেষা মহারাজ কৃপণা সমপদ্যত