Utshovঅধ্যায় 24
24.1
সংজয় উবাচ
অস্যতাং যতমানানাং শূরাণামনিবর্তিনাম্
সংকল্পমকরোন্মোঘং গাণ্ডীবেন ধনংজয়ঃ
24.2
ইন্দ্রাশনিসমস্পর্শানবিষহ্যান্মহৌজসঃ
বিসৃজন্দৃশ্যতে বাণান্ধারা মুঞ্চন্নিবাম্বুদঃ
24.3
তত্সৈন্যং ভরতশ্রেষ্ঠ বধ্যমানং কিরীটিনা
সংপ্রদুদ্রাব সংগ্রামাত্তব পুত্রস্য পশ্যতঃ
24.4
হতধুর্যা রথাঃ কেচিদ্ধতসূতাস্তথাপরে
ভগ্নাক্ষয়ুগচক্রেষাঃ কেচিদাসন্বিশাং পতে
24.5
অন্যেষাং সায়কাঃ ক্ষীণাস্তথান্যে শরপীডিতাঃ
অক্ষতা যুগপত্কেচিত্প্রাদ্রবন্ভয়পীডিতাঃ
24.6
কেচিত্পুত্রানুপাদায় হতভূয়িষ্ঠবাহনাঃ
বিচুক্রুশুঃ পিতৄনন্যে সহায়ানপরে পুনঃ
24.7
বান্ধবাংশ্চ নরব্যাঘ্র ভ্রাতৄন্সংবন্ধিনস্তথা
দুদ্রুবুঃ কেচিদুত্সৃজ্য তত্র তত্র বিশাং পতে
24.8
বহবোঽত্র ভৃশং বিদ্ধা মুহ্যমানা মহারথাঃ
নিষ্টনন্তঃ স্ম দৃশ্যন্তে পার্থবাণহতা নরাঃ
24.9
তানন্যে রথমারোপ্য সমাশ্বাস্য মুহূর্তকম্
বিশ্রান্তাশ্চ বিতৃষ্ণাশ্চ পুনর্যুদ্ধায় জগ্মিরে
24.10
তানপাস্য গতাঃ কেচিত্পুনরেব যুয়ুত্সবঃ
কুর্বন্তস্তব পুত্রস্য শাসনং যুদ্ধদুর্মদাঃ
24.11
পানীয়মপরে পীত্বা পর্যাশ্বাস্য চ বাহনম্
বর্মাণি চ সমারোপ্য কেচিদ্ভরতসত্তম
24.12
সমাশ্বাস্যাপরে ভ্রাতৄন্নিক্ষিপ্য শিবিরেঽপি চ
পুত্রানন্যে পিতৄনন্যে পুনর্যুদ্ধমরোচয়ন্
24.13
সজ্জয়িত্বা রথান্কেচিদ্যথামুখ্যং বিশাং পতে
আপ্লুত্য পাণ্ডবানীকং পুনর্যুদ্ধমরোচয়ন্
24.14
তে শূরাঃ কিঙ্কিণীজালৈঃ সমাচ্ছন্না বভাসিরে
ত্রৈলোক্যবিজয়ে যুক্তা যথা দৈতেয়দানবাঃ
24.15
আগম্য সহসা কেচিদ্রথৈঃ স্বর্ণবিভূষিতৈঃ
পাণ্ডবানামনীকেষু ধৃষ্টদ্যুম্নময়োধয়ন্
24.16
ধৃষ্টদ্যুম্নোঽপি পাঞ্চাল্যঃ শিখণ্ডী চ মহারথঃ
নাকুলিশ্চ শতানীকো রথানীকময়োধয়ন্
24.17
পাঞ্চাল্যস্তু ততঃ ক্রুদ্ধঃ সৈন্যেন মহতা বৃতঃ
অভ্যদ্রবত্সুসংরব্ধস্তাবকান্হন্তুমুদ্যতঃ
24.18
ততস্ত্বাপততস্তস্য তব পুত্রো জনাধিপ
বাণসংঘাননেকান্বৈ প্রেষয়ামাস ভারত
24.19
ধৃষ্টদ্যুম্নস্ততো রাজংস্তব পুত্রেণ ধন্বিনা
নারাচৈর্বহুভিঃ ক্ষিপ্রং বাহ্বোরুরসি চার্পিতঃ
24.20
সোঽতিবিদ্ধো মহেষ্বাসস্তোত্ত্রার্দিত ইব দ্বিপঃ
তস্যাশ্বাংশ্চতুরো বাণৈঃ প্রেষয়ামাস মৃত্যবে
সারথেশ্চাস্য ভল্লেন শিরঃ কায়াদপাহরৎ
24.21
ততো দুর্যোধনো রাজা পৃষ্ঠমারুহ্য বাজিনঃ
অপাক্রামদ্ধতরথো নাতিদূরমরিংদমঃ
24.22
দৃষ্ট্বা তু হতবিক্রান্তং স্বমনীকং মহাবলঃ
তব পুত্রো মহারাজ প্রয়য়ৌ যত্র সৌবলঃ
24.23
ততো রথেষু ভগ্নেষু ত্রিসাহস্রা মহাদ্বিপাঃ
পাণ্ডবান্রথিনঃ পঞ্চ সমন্তাত্পর্যবারয়ন্
24.24
তে বৃতাঃ সমরে পঞ্চ গজানীকেন ভারত
অশোভন্ত নরব্যাঘ্রা গ্রহা ব্যাপ্তা ঘনৈরিব
24.25
ততোঽর্জুনো মহারাজ লব্ধলক্ষো মহাভুজঃ
বিনির্যয়ৌ রথেনৈব শ্বেতাশ্বঃ কৃষ্ণসারথিঃ
24.26
তৈঃ সমন্তাত্পরিবৃতঃ কুঞ্জরৈঃ পর্বতোপমৈঃ
নারাচৈর্বিমলৈস্তীক্ষ্ণৈর্গজানীকমপোথয়ৎ
24.27
তত্রৈকবাণনিহতানপশ্যাম মহাগজান্
পতিতান্পাত্যমানাংশ্চ বিভিন্নান্সব্যসাচিনা
24.28
ভীমসেনস্তু তান্দৃষ্ট্বা নাগান্মত্তগজোপমঃ
করেণ গৃহ্য মহতীং গদামভ্যপতদ্বলী
অবপ্লুত্য রথাত্তূর্ণং দণ্ডপাণিরিবান্তকঃ
24.29
তমুদ্যতগদং দৃষ্ট্বা পাণ্ডবানাং মহারথম্
বিত্রেসুস্তাবকাঃ সৈন্যাঃ শকৃন্মূত্রং প্রসুস্রুবুঃ
আবিগ্নং চ বলং সর্বং গদাহস্তে বৃকোদরে
24.30
গদয়া ভীমসেনেন ভিন্নকুম্ভান্রজস্বলান্
ধাবমানানপশ্যাম কুঞ্জরান্পর্বতোপমান্
24.31
প্রধাব্য কুঞ্জরাস্তে তু ভীমসেনগদাহতাঃ
পেতুরার্তস্বরং কৃত্বা ছিন্নপক্ষা ইবাদ্রয়ঃ
24.32
তান্ভিন্নকুম্ভান্সুবহূন্দ্রবমাণানিতস্ততঃ
পতমানাংশ্চ সংপ্রেক্ষ্য বিত্রেসুস্তব সৈনিকাঃ
24.33
যুধিষ্ঠিরোঽপি সংক্রুদ্ধো মাদ্রীপুত্রৌ চ পাণ্ডবৌ
গৃধ্রপক্ষৈঃ শিতৈর্বাণৈর্জঘ্নুর্বৈ গজয়োধিনঃ
24.34
ধৃষ্টদ্যুম্নস্তু সমরে পরাজিত্য নরাধিপম্
অপক্রান্তে তব সুতে হয়পৃষ্ঠং সমাশ্রিতে
24.35
দৃষ্ট্বা চ পাণ্ডবান্সর্বান্কুঞ্জরৈঃ পরিবারিতান্
ধৃষ্টদ্যুম্নো মহারাজ সহ সর্বৈঃ প্রভদ্রকৈঃ
পুত্রঃ পাঞ্চালরাজস্য জিঘাংসুঃ কুঞ্জরান্যয়ৌ
24.36
অদৃষ্ট্বা তু রথানীকে দুর্যোধনমরিংদমম্
অশ্বত্থামা কৃপশ্চৈব কৃতবর্মা চ সাত্বতঃ
অপৃচ্ছন্ক্ষত্রিয়াংস্তত্র ক্ব নু দুর্যোধনো গতঃ
24.37
অপশ্যমানা রাজানং বর্তমানে জনক্ষয়ে
মন্বানা নিহতং তত্র তব পুত্রং মহারথাঃ
বিষণ্ণবদনা ভূত্বা পর্যপৃচ্ছন্ত তে সুতম্
24.38
আহুঃ কেচিদ্ধতে সূতে প্রয়াতো যত্র সৌবলঃ
অপরে ত্বব্রুবংস্তত্র ক্ষত্রিয়া ভৃশবিক্ষতাঃ
24.39
দুর্যোধনেন কিং কার্যং দ্রক্ষ্যধ্বং যদি জীবতি
যুধ্যধ্বং সহিতাঃ সর্বে কিং বো রাজা করিষ্যতি
24.40
তে ক্ষত্রিয়াঃ ক্ষতৈর্গাত্রৈর্হতভূয়িষ্ঠবাহনাঃ
শরৈঃ সংপীড্যমানাশ্চ নাতিব্যক্তমিবাব্রুবন্
24.41
ইদং সর্বং বলং হন্মো যেন স্ম পরিবারিতাঃ
এতে সর্বে গজান্হত্বা উপয়ান্তি স্ম পাণ্ডবাঃ
24.42
শ্রুত্বা তু বচনং তেষামশ্বত্থামা মহাবলঃ
হিত্বা পাঞ্চালরাজস্য তদনীকং দুরুত্সহম্
24.43
কৃপশ্চ কৃতবর্মা চ প্রয়য়ুর্যত্র সৌবলঃ
রথানীকং পরিত্যজ্য শূরাঃ সুদৃঢধন্বিনঃ
24.44
ততস্তেষু প্রয়াতেষু ধৃষ্টদ্যুম্নপুরোগমাঃ
আয়য়ুঃ পাণ্ডবা রাজন্বিনিঘ্নন্তঃ স্ম তাবকান্
24.45
দৃষ্ট্বা তু তানাপততঃ সংপ্রহৃষ্টান্মহারথান্
পরাক্রান্তাংস্ততো বীরান্নিরাশাঞ্জীবিতে তদা
বিবর্ণমুখভূয়িষ্ঠমভবত্তাবকং বলম্
24.46
পরিক্ষীণায়ুধান্দৃষ্ট্বা তানহং পরিবারিতান্
রাজন্বলেন দ্ব্যঙ্গেন ত্যক্ত্বা জীবিতমাত্মনঃ
24.47
আত্মনাপঞ্চমোঽয়ুধ্যং পাঞ্চালস্য বলেন হ
তস্মিন্দেশে ব্যবস্থাপ্য যত্র শারদ্বতঃ স্থিতঃ
24.48
সংপ্রয়ুদ্ধা বয়ং পঞ্চ কিরীটিশরপীডিতাঃ
ধৃষ্টদ্যুম্নং মহানীকং তত্র নোঽভূদ্রণো মহান্
জিতাস্তেন বয়ং সর্বে ব্যপয়াম রণাত্ততঃ
24.49
অথাপশ্যং সাত্যকিং তমুপায়ান্তং মহারথম্
রথৈশ্চতুঃশতৈর্বীরো মাং চাভ্যদ্রবদাহবে
24.50
ধৃষ্টদ্যুম্নাদহং মুক্তঃ কথংচিচ্ছ্রান্তবাহনঃ
পতিতো মাধবানীকং দুষ্কৃতী নরকং যথা
তত্র যুদ্ধমভূদ্ঘোরং মুহূর্তমতিদারুণম্
24.51
সাত্যকিস্তু মহাবাহুর্মম হত্বা পরিচ্ছদম্
জীবগ্রাহমগৃহ্ণান্মাং মূর্ছিতং পতিতং ভুবি
24.52
ততো মুহূর্তাদিব তদ্গজানীকমবধ্যত
গদয়া ভীমসেনেন নারাচৈরর্জুনেন চ
24.53
প্রতিপিষ্টৈর্মহানাগৈঃ সমন্তাত্পর্বতোপমৈঃ
নাতিপ্রসিদ্ধেব গতিঃ পাণ্ডবানামজায়ত
24.54
রথমার্গাংস্ততশ্চক্রে ভীমসেনো মহাবলঃ
পাণ্ডবানাং মহারাজ ব্যপকর্ষন্মহাগজান্
24.55
অশ্বত্থামা কৃপশ্চৈব কৃতবর্মা চ সাত্বতঃ
অপশ্যন্তো রথানীকে দুর্যোধনমরিংদমম্
রাজানং মৃগয়ামাসুস্তব পুত্রং মহারথম্
24.56
পরিত্যজ্য চ পাঞ্চালং প্রয়াতা যত্র সৌবলঃ
রাজ্ঞোঽদর্শনসংবিগ্না বর্তমানে জনক্ষয়ে