Utshovঅধ্যায় 23
23.1
সংজয় উবাচ
তস্মিঞ্শব্দে মৃদৌ জাতে পাণ্ডবৈর্নিহতে বলে
অশ্বৈঃ সপ্তশতৈঃ শিষ্টৈরুপাবর্তত সৌবলঃ
23.2
স যাত্বা বাহিনীং তূর্ণমব্রবীত্ত্বরয়ন্যুধি
যুধ্যধ্বমিতি সংহৃষ্টাঃ পুনঃ পুনররিংদমঃ
অপৃচ্ছত্ক্ষত্রিয়াংস্তত্র ক্ব নু রাজা মহারথঃ
23.3
শকুনেস্তু বচঃ শ্রুত্বা ত ঊচুর্ভরতর্ষভ
অসৌ তিষ্ঠতি কৌরব্যো রণমধ্যে মহারথঃ
23.4
যত্রৈতত্সুমহচ্ছত্রং পূর্ণচন্দ্রসমপ্রভম্
যত্রৈতে সতলত্রাণা রথাস্তিষ্ঠন্তি দংশিতাঃ
23.5
যত্রৈষ শব্দস্তুমুলঃ পর্জন্যনিনদোপমঃ
তত্র গচ্ছ দ্রুতং রাজংস্ততো দ্রক্ষ্যসি কৌরবম্
23.6
এবমুক্তস্তু তৈঃ শূরৈঃ শকুনিঃ সৌবলস্তদা
প্রয়য়ৌ তত্র যত্রাসৌ পুত্রস্তব নরাধিপ
সর্বতঃ সংবৃতো বীরৈঃ সমরেষ্বনিবর্তিভিঃ
23.7
ততো দুর্যোধনং দৃষ্ট্বা রথানীকে ব্যবস্থিতম্
সরথাংস্তাবকান্সর্বান্হর্ষয়ঞ্শকুনিস্ততঃ
23.8
দুর্যোধনমিদং বাক্যং হৃষ্টরূপো বিশাং পতে
কৃতকার্যমিবাত্মানং মন্যমানোঽব্রবীন্নৃপম্
23.9
জহি রাজন্রথানীকমশ্বাঃ সর্বে জিতা ময়া
নাত্যক্ত্বা জীবিতং সংখ্যে শক্যো জেতুং যুধিষ্ঠিরঃ
23.10
হতে তস্মিন্রথানীকে পাণ্ডবেনাভিপালিতে
গজানেতান্হনিষ্যামঃ পদাতীংশ্চেতরাংস্তথা
23.11
শ্রুত্বা তু বচনং তস্য তাবকা জয়গৃদ্ধিনঃ
জবেনাভ্যপতন্হৃষ্টাঃ পাণ্ডবানামনীকিনীম্
23.12
সর্বে বিবৃততূণীরাঃ প্রগৃহীতশরাসনাঃ
শরাসনানি ধুন্বানাঃ সিংহনাদং প্রচক্রিরে
23.13
ততো জ্যাতলনির্ঘোষঃ পুনরাসীদ্বিশাং পতে
প্রাদুরাসীচ্ছরাণাং চ সুমুক্তানাং সুদারুণঃ
23.14
তান্সমীপগতান্দৃষ্ট্বা জবেনোদ্যতকার্মুকান্
উবাচ দেবকীপুত্রং কুন্তীপুত্রো ধনংজয়ঃ
23.15
চোদয়াশ্বানসংভ্রান্তঃ প্রবিশৈতদ্বলার্ণবম্
অন্তমদ্য গমিষ্যামি শত্রূণাং নিশিতৈঃ শরৈঃ
23.16
অষ্টাদশ দিনান্যদ্য যুদ্ধস্যাস্য জনার্দন
বর্তমানস্য মহতঃ সমাসাদ্য পরস্পরম্
23.17
অনন্তকল্পা ধ্বজিনী ভূত্বা হ্যেষাং মহাত্মনাম্
ক্ষয়মদ্য গতা যুদ্ধে পশ্য দৈবং যথাবিধম্
23.18
সমুদ্রকল্পং তু বলং ধার্তরাষ্ট্রস্য মাধব
অস্মানাসাদ্য সংজাতং গোষ্পদোপমমচ্যুত
23.19
হতে ভীষ্মে চ সংদধ্যাচ্ছিবং স্যাদিহ মাধব
ন চ তত্কৃতবান্মূঢো ধার্তরাষ্ট্রঃ সুবালিশঃ
23.20
উক্তং ভীষ্মেণ যদ্বাক্যং হিতং পথ্যং চ মাধব
তচ্চাপি নাসৌ কৃতবান্বীতবুদ্ধিঃ সুয়োধনঃ
23.21
তস্মিংস্তু পতিতে ভীষ্মে প্রচ্যুতে পৃথিবীতলে
ন জানে কারণং কিং নু যেন যুদ্ধমবর্তত
23.22
মূঢাংস্তু সর্বথা মন্যে ধার্তরাষ্ট্রান্সুবালিশান্
পতিতে শংতনোঃ পুত্রে যেঽকার্ষুঃ সংয়ুগং পুনঃ
23.23
অনন্তরং চ নিহতে দ্রোণে ব্রহ্মবিদাং বরে
রাধেয়ে চ বিকর্ণে চ নৈবাশাম্যত বৈশসম্
23.24
অল্পাবশিষ্টে সৈন্যেঽস্মিন্সূতপুত্রে চ পাতিতে
সপুত্রে বৈ নরব্যাঘ্রে নৈবাশাম্যত বৈশসম্
23.25
শ্রুতায়ুষি হতে শূরে জলসংধে চ পৌরবে
শ্রুতায়ুধে চ নৃপতৌ নৈবাশাম্যত বৈশসম্
23.26
ভূরিশ্রবসি শল্যে চ শাল্বে চৈব জনার্দন
আবন্ত্যেষু চ বীরেষু নৈবাশাম্যত বৈশসম্
23.27
জয়দ্রথে চ নিহতে রাক্ষসে চাপ্যলায়ুধে
বাহ্লিকে সোমদত্তে চ নৈবাশাম্যত বৈশসম্
23.28
ভগদত্তে হতে শূরে কাম্বোজে চ সুদক্ষিণে
দুঃশাসনে চ নিহতে নৈবাশাম্যত বৈশসম্
23.29
দৃষ্ট্বা চ নিহতাঞ্শূরান্পৃথঙ্মাণ্ডলিকান্নৃপান্
বলিনশ্চ রণে কৃষ্ণ নৈবাশাম্যত বৈশসম্
23.30
অক্ষৌহিণীপতীন্দৃষ্ট্বা ভীমসেনেন পাতিতান্
মোহাদ্বা যদি বা লোভান্নৈবাশাম্যত বৈশসম্
23.31
কো নু রাজকুলে জাতঃ কৌরবেয়ো বিশেষতঃ
নিরর্থকং মহদ্বৈরং কুর্যাদন্যঃ সুয়োধনাৎ
23.32
গুণতোঽভ্যধিকং জ্ঞাত্বা বলতঃ শৌর্যতোঽপি বা
অমূঢঃ কো নু যুধ্যেত জানন্প্রাজ্ঞো হিতাহিতম্
23.33
যন্ন তস্য মনো হ্যাসীত্ত্বয়োক্তস্য হিতং বচঃ
প্রশমে পাণ্ডবৈঃ সার্ধং সোঽন্যস্য শৃণুয়াত্কথম্
23.34
যেন শাংতনবো ভীষ্মো দ্রোণো বিদুর এব চ
প্রত্যাখ্যাতাঃ শমস্যার্থে কিং নু তস্যাদ্য ভেষজম্
23.35
মৌর্খ্যাদ্যেন পিতা বৃদ্ধঃ প্রত্যাখ্যাতো জনার্দন
তথা মাতা হিতং বাক্যং ভাষমাণা হিতৈষিণী
প্রত্যাখ্যাতা হ্যসত্কৃত্য স কস্মৈ রোচয়েদ্বচঃ
23.36
কুলান্তকরণো ব্যক্তং জাত এষ জনার্দন
তথাস্য দৃশ্যতে চেষ্টা নীতিশ্চৈব বিশাং পতে
নৈষ দাস্যতি নো রাজ্যমিতি মে মতিরচ্যুত
23.37
উক্তোঽহং বহুশস্তাত বিদুরেণ মহাত্মনা
ন জীবন্দাস্যতে ভাগং ধার্তরাষ্ট্রঃ কথংচন
23.38
যাবত্প্রাণা ধমিষ্যন্তি ধার্তরাষ্ট্রস্য মানদ
তাবদ্যুষ্মাস্বপাপেষু প্রচরিষ্যতি পাতকম্
23.39
ন স যুক্তোঽন্যথা জেতুমৃতে যুদ্ধেন মাধব
ইত্যব্রবীত্সদা মাং হি বিদুরঃ সত্যদর্শনঃ
23.40
তত্সর্বমদ্য জানামি ব্যবসায়ং দুরাত্মনঃ
যদুক্তং বচনং তেন বিদুরেণ মহাত্মনা
23.41
যো হি শ্রুত্বা বচঃ পথ্যং জামদগ্ন্যাদ্যথাতথম্
অবামন্যত দুর্বুদ্ধির্ধ্রুবং নাশমুখে স্থিতঃ
23.42
উক্তং হি বহুভিঃ সিদ্ধৈর্জাতমাত্রে সুয়োধনে
এনং প্রাপ্য দুরাত্মানং ক্ষয়ং ক্ষত্রং গমিষ্যতি
23.43
তদিদং বচনং তেষাং নিরুক্তং বৈ জনার্দন
ক্ষয়ং যাতা হি রাজানো দুর্যোধনকৃতে ভৃশম্
23.44
সোঽদ্য সর্বান্রণে যোধান্নিহনিষ্যামি মাধব
ক্ষত্রিয়েষু হতেষ্বাশু শূন্যে চ শিবিরে কৃতে
23.45
বধায় চাত্মনোঽস্মাভিঃ সংয়ুগং রোচয়িষ্যতি
তদন্তং হি ভবেদ্বৈরমনুমানেন মাধব
23.46
এবং পশ্যামি বার্ষ্ণেয় চিন্তয়ন্প্রজ্ঞয়া স্বয়া
বিদুরস্য চ বাক্যেন চেষ্টয়া চ দুরাত্মনঃ
23.47
সংয়াহি ভারতীং বীর যাবদ্ধন্মি শিতৈঃ শরৈঃ
দুর্যোধনং দুরাত্মানং বাহিনীং চাস্য সংয়ুগে
23.48
ক্ষেমমদ্য করিষ্যামি ধর্মরাজস্য মাধব
হত্বৈতদ্দুর্বলং সৈন্যং ধার্তরাষ্ট্রস্য পশ্যতঃ
23.49
সংজয় উবাচ
অভীশুহস্তো দাশার্হস্তথোক্তঃ সব্যসাচিনা
তদ্বলৌঘমমিত্রাণামভীতঃ প্রাবিশদ্রণে
23.50
শরাসনবরং ঘোরং শক্তিকণ্টকসংবৃতম্
গদাপরিঘপন্থানং রথনাগমহাদ্রুমম্
23.51
হয়পত্তিলতাকীর্ণং গাহমানো মহায়শাঃ
ব্যচরত্তত্র গোবিন্দো রথেনাতিপতাকিনা
23.52
তে হয়াঃ পাণ্ডুরা রাজন্বহন্তোঽর্জুনমাহবে
দিক্ষু সর্বাস্বদৃশ্যন্ত দাশার্হেণ প্রচোদিতাঃ
23.53
ততঃ প্রায়াদ্রথেনাজৌ সব্যসাচী পরংতপঃ
কিরঞ্শরশতাংস্তীক্ষ্ণান্বারিধারা ইবাম্বুদঃ
23.54
প্রাদুরাসীন্মহাঞ্শব্দঃ শরাণাং নতপর্বণাম্
ইষুভিশ্ছাদ্যমানানাং সমরে সব্যসাচিনা
23.55
অসজ্জন্তস্তনুত্রেষু শরৌঘাঃ প্রাপতন্ভুবি
ইন্দ্রাশনিসমস্পর্শা গাণ্ডীবপ্রেষিতাঃ শরাঃ
23.56
নরান্নাগান্সমাহত্য হয়াংশ্চাপি বিশাং পতে
অপতন্ত রণে বাণাঃ পতংগা ইব ঘোষিণঃ
23.57
আসীত্সর্বমবচ্ছন্নং গাণ্ডীবপ্রেষিতৈঃ শরৈঃ
ন প্রাজ্ঞায়ন্ত সমরে দিশো বা প্রদিশোঽপি বা
23.58
সর্বমাসীজ্জগত্পূর্ণং পার্থনামাঙ্কিতৈঃ শরৈঃ
রুক্মপুঙ্খৈস্তৈলধৌতৈঃ কর্মারপরিমার্জিতৈঃ
23.59
তে দহ্যমানাঃ পার্থেন পাবকেনেব কুঞ্জরাঃ
সমাসীদন্ত কৌরব্যা বধ্যমানাঃ শিতৈঃ শরৈঃ
23.60
শরচাপধরঃ পার্থঃ প্রজ্বলন্নিব ভারত
দদাহ সমরে যোধান্কক্ষমগ্নিরিব জ্বলন্
23.61
যথা বনান্তে বনপৈর্বিসৃষ্টঃ; কক্ষং দহেত্কৃষ্ণগতিঃ সঘোষঃ
ভূরিদ্রুমং শুষ্কলতাবিতানং; ভৃশং সমৃদ্ধো জ্বলনঃ প্রতাপী
23.62
এবং স নারাচগণপ্রতাপী; শরার্চিরুচ্চাবচতিগ্মতেজাঃ
দদাহ সর্বাং তব পুত্রসেনা;মমৃষ্যমাণস্তরসা তরস্বী
23.63
তস্যেষবঃ প্রাণহরাঃ সুমুক্তা; নাসজ্জন্বৈ বর্মসু রুক্মপুঙ্খাঃ
ন চ দ্বিতীয়ং প্রমুমোচ বাণং; নরে হয়ে বা পরমদ্বিপে বা
23.64
অনেকরূপাকৃতিভির্হি বাণৈ;র্মহারথানীকমনুপ্রবিশ্য
স এব একস্তব পুত্রসেনাং; জঘান দৈত্যানিব বজ্রপাণিঃ