Utshovঅধ্যায় 22
22.1
সংজয় উবাচ
বর্তমানে তথা যুদ্ধে ঘোররূপে ভয়ানকে
অভজ্যত বলং তত্র তব পুত্রস্য পাণ্ডবৈঃ
22.2
তাংস্তু যত্নেন মহতা সংনিবার্য মহারথান্
পুত্রস্তে যোধয়ামাস পাণ্ডবানামনীকিনীম্
22.3
নিবৃত্তাঃ সহসা যোধাস্তব পুত্রপ্রিয়ৈষিণঃ
সংনিবৃত্তেষু তেষ্বেবং যুদ্ধমাসীত্সুদারুণম্
22.4
তাবকানাং পরেষাং চ দেবাসুররণোপমম্
পরেষাং তব সৈন্যে চ নাসীত্কশ্চিত্পরাঙ্মুখঃ
22.5
অনুমানেন যুধ্যন্তে সংজ্ঞাভিশ্চ পরস্পরম্
তেষাং ক্ষয়ো মহানাসীদ্যুধ্যতামিতরেতরম্
22.6
ততো যুধিষ্ঠিরো রাজা ক্রোধেন মহতা যুতঃ
জিগীষমাণঃ সংগ্রামে ধার্তরাষ্ট্রান্সরাজকান্
22.7
ত্রিভিঃ শারদ্বতং বিদ্ধ্বা রুক্মপুঙ্খৈঃ শিলাশিতৈঃ
চতুর্ভির্নিজঘানাশ্বান্কল্যাণান্কৃতবর্মণঃ
22.8
অশ্বত্থামা তু হার্দিক্যমপোবাহ যশস্বিনম্
অথ শারদ্বতোঽষ্টাভিঃ প্রত্যবিধ্যদ্যুধিষ্ঠিরম্
22.9
ততো দুর্যোধনো রাজা রথান্সপ্তশতান্রণে
প্রেষয়দ্যত্র রাজাসৌ ধর্মপুত্রো যুধিষ্ঠিরঃ
22.10
তে রথা রথিভির্যুক্তা মনোমারুতরংহসঃ
অভ্যদ্রবন্ত সংগ্রামে কৌন্তেয়স্য রথং প্রতি
22.11
তে সমন্তান্মহারাজ পরিবার্য যুধিষ্ঠিরম্
অদৃশ্যং সায়কৈশ্চক্রুর্মেঘা ইব দিবাকরম্
22.12
নামৃষ্যন্ত সুসংরব্ধাঃ শিখণ্ডিপ্রমুখা রথাঃ
রথৈরগ্র্যজবৈর্যুক্তৈঃ কিঙ্কিণীজালসংবৃতৈঃ
আজগ্মুরভিরক্ষন্তঃ কুন্তীপুত্রং যুধিষ্ঠিরম্
22.13
ততঃ প্রববৃতে রৌদ্রঃ সংগ্রামঃ শোণিতোদকঃ
পাণ্ডবানাং কুরূণাং চ যমরাষ্ট্রবিবর্ধনঃ
22.14
রথান্সপ্তশতান্হত্বা কুরূণামাততায়িনাম্
পাণ্ডবাঃ সহ পাঞ্চালৈঃ পুনরেবাভ্যবারয়ন্
22.15
তত্র যুদ্ধং মহচ্চাসীত্তব পুত্রস্য পাণ্ডবৈঃ
ন চ নস্তাদৃশং দৃষ্টং নৈব চাপি পরিশ্রুতম্
22.16
বর্তমানে তথা যুদ্ধে নির্মর্যাদে সমন্ততঃ
বধ্যমানেষু যোধেষু তাবকেষ্বিতরেষু চ
22.17
নিনদত্সু চ যোধেষু শঙ্খবর্যৈশ্চ পূরিতৈঃ
উত্কৃষ্টৈঃ সিংহনাদৈশ্চ গর্জিতেন চ ধন্বিনাম্
22.18
অতিপ্রবৃদ্ধে যুদ্ধে চ ছিদ্যমানেষু মর্মসু
ধাবমানেষু যোধেষু জয়গৃদ্ধিষু মারিষ
22.19
সংহারে সর্বতো জাতে পৃথিব্যাং শোকসংভবে
বহ্বীনামুত্তমস্ত্রীণাং সীমন্তোদ্ধরণে তথা
22.20
নির্মর্যাদে তথা যুদ্ধে বর্তমানে সুদারুণে
প্রাদুরাসন্বিনাশায় তদোত্পাতাঃ সুদারুণাঃ
চচাল শব্দং কুর্বাণা সপর্বতবনা মহী
22.21
সদণ্ডাঃ সোল্মুকা রাজঞ্শীর্যমাণাঃ সমন্ততঃ
উল্কাঃ পেতুর্দিবো ভূমাবাহত্য রবিমণ্ডলম্
22.22
বিষ্বগ্বাতাঃ প্রাদুরাসন্নীচৈঃ শর্করবর্ষিণঃ
অশ্রূণি মুমুচুর্নাগা বেপথুশ্চাস্পৃশদ্ভৃশম্
22.23
এতান্ঘোরাননাদৃত্য সমুত্পাতান্সুদারুণান্
পুনর্যুদ্ধায় সংমন্ত্র্য ক্ষত্রিয়াস্তস্থুরব্যথাঃ
রমণীয়ে কুরুক্ষেত্রে পুণ্যে স্বর্গং যিয়াসবঃ
22.24
ততো গান্ধাররাজস্য পুত্রঃ শকুনিরব্রবীৎ
যুধ্যধ্বমগ্রতো যাবত্পৃষ্ঠতো হন্মি পাণ্ডবান্
22.25
ততো নঃ সংপ্রয়াতানাং মদ্রয়োধাস্তরস্বিনঃ
হৃষ্টাঃ কিলকিলাশব্দমকুর্বন্তাপরে তথা
22.26
অস্মাংস্তু পুনরাসাদ্য লব্ধলক্ষা দুরাসদাঃ
শরাসনানি ধুন্বন্তঃ শরবর্ষৈরবাকিরন্
22.27
ততো হতং পরৈস্তত্র মদ্ররাজবলং তদা
দুর্যোধনবলং দৃষ্ট্বা পুনরাসীত্পরাঙ্মুখম্
22.28
গান্ধাররাজস্তু পুনর্বাক্যমাহ ততো বলী
নিবর্তধ্বমধর্মজ্ঞা যুধ্যধ্বং কিং সৃতেন বঃ
22.29
অনীকং দশসাহস্রমশ্বানাং ভরতর্ষভ
আসীদ্গান্ধাররাজস্য বিমলপ্রাসয়োধিনাম্
22.30
বলেন তেন বিক্রম্য বর্তমানে জনক্ষয়ে
পৃষ্ঠতঃ পাণ্ডবানীকমভ্যঘ্নন্নিশিতৈঃ শরৈঃ
22.31
তদভ্রমিব বাতেন ক্ষিপ্যমাণং সমন্ততঃ
অভজ্যত মহারাজ পাণ্ডূনাং সুমহদ্বলম্
22.32
ততো যুধিষ্ঠিরঃ প্রেক্ষ্য ভগ্নং স্ববলমন্তিকাৎ
অভ্যচোদয়দব্যগ্রঃ সহদেবং মহাবলম্
22.33
অসৌ সুবলপুত্রো নো জঘনং পীড্য দংশিতঃ
সেনাং নিসূদয়ন্ত্যেষ পশ্য পাণ্ডব দুর্মতিম্
22.34
গচ্ছ ত্বং দ্রৌপদেয়াশ্চ শকুনিং সৌবলং জহি
রথানীকমহং রক্ষ্যে পাঞ্চালসহিতোঽনঘ
22.35
গচ্ছন্তু কুঞ্জরাঃ সর্বে বাজিনশ্চ সহ ত্বয়া
পাদাতাশ্চ ত্রিসাহস্রাঃ শকুনিং সৌবলং জহি
22.36
ততো গজাঃ সপ্তশতাশ্চাপপাণিভিরাস্থিতাঃ
পঞ্চ চাশ্বসহস্রাণি সহদেবশ্চ বীর্যবান্
22.37
পাদাতাশ্চ ত্রিসাহস্রা দ্রৌপদেয়াশ্চ সর্বশঃ
রণে হ্যভ্যদ্রবংস্তে তু শকুনিং যুদ্ধদুর্মদম্
22.38
ততস্তু সৌবলো রাজন্নভ্যতিক্রম্য পাণ্ডবান্
জঘান পৃষ্ঠতঃ সেনাং জয়গৃধ্রঃ প্রতাপবান্
22.39
অশ্বারোহাস্তু সংরব্ধাঃ পাণ্ডবানাং তরস্বিনাম্
প্রাবিশন্সৌবলানীকমভ্যতিক্রম্য তান্রথান্
22.40
তে তত্র সাদিনঃ শূরাঃ সৌবলস্য মহদ্বলম্
গজমধ্যেঽবতিষ্ঠন্তঃ শরবর্ষৈরবাকিরন্
22.41
তদুদ্যতগদাপ্রাসমকাপুরুষসেবিতম্
প্রাবর্তত মহদ্যুদ্ধং রাজন্দুর্মন্ত্রিতে তব
22.42
উপারমন্ত জ্যাশব্দাঃ প্রেক্ষকা রথিনোঽভবন্
ন হি স্বেষাং পরেষাং বা বিশেষঃ প্রত্যদৃশ্যত
22.43
শূরবাহুবিসৃষ্টানাং শক্তীনাং ভরতর্ষভ
জ্যোতিষামিব সংপাতমপশ্যন্কুরুপাণ্ডবাঃ
22.44
ঋষ্টিভির্বিমলাভিশ্চ তত্র তত্র বিশাং পতে
সংপতন্তীভিরাকাশমাবৃতং বহ্বশোভত
22.45
প্রাসানাং পততাং রাজন্রূপমাসীত্সমন্ততঃ
শলভানামিবাকাশে তদা ভরতসত্তম
22.46
রুধিরোক্ষিতসর্বাঙ্গা বিপ্রবিদ্ধৈর্নিয়ন্তৃভিঃ
হয়াঃ পরিপতন্তি স্ম শতশোঽথ সহস্রশঃ
22.47
অন্যোন্যপরিপিষ্টাশ্চ সমাসাদ্য পরস্পরম্
অবিক্ষতাঃ স্ম দৃশ্যন্তে বমন্তো রুধিরং মুখৈঃ
22.48
ততোঽভবত্তমো ঘোরং সৈন্যেন রজসা বৃতে
তানপাক্রমতোঽদ্রাক্ষং তস্মাদ্দেশাদরিংদমান্
অশ্বান্রাজন্মনুষ্যাংশ্চ রজসা সংবৃতে সতি
22.49
ভূমৌ নিপতিতাশ্চান্যে বমন্তো রুধিরং বহু
কেশাকেশিসমালগ্না ন শেকুশ্চেষ্টিতুং জনাঃ
22.50
অন্যোন্যমশ্বপৃষ্ঠেভ্যো বিকর্ষন্তো মহাবলাঃ
মল্লা ইব সমাসাদ্য নিজঘ্নুরিতরেতরম্
অশ্বৈশ্চ ব্যপকৃষ্যন্ত বহবোঽত্র গতাসবঃ
22.51
ভূমৌ নিপতিতাশ্চান্যে বহবো বিজয়ৈষিণঃ
তত্র তত্র ব্যদৃশ্যন্ত পুরুষাঃ শূরমানিনঃ
22.52
রক্তোক্ষিতৈশ্ছিন্নভুজৈরপকৃষ্টশিরোরুহৈঃ
ব্যদৃশ্যত মহী কীর্ণা শতশোঽথ সহস্রশঃ
22.53
দূরং ন শক্যং তত্রাসীদ্গন্তুমশ্বেন কেনচিৎ
সাশ্বারোহৈর্হতৈরশ্বৈরাবৃতে বসুধাতলে
22.54
রুধিরোক্ষিতসংনাহৈরাত্তশস্ত্রৈরুদায়ুধৈঃ
নানাপ্রহরণৈর্ঘোরৈঃ পরস্পরবধৈষিভিঃ
সুসংনিকৃষ্টৈঃ সংগ্রামে হতভূয়িষ্ঠসৈনিকৈঃ
22.55
স মুহূর্তং ততো যুদ্ধ্বা সৌবলোঽথ বিশাং পতে
ষট্সহস্রৈর্হয়ৈঃ শিষ্টৈরপায়াচ্ছকুনিস্ততঃ
22.56
তথৈব পাণ্ডবানীকং রুধিরেণ সমুক্ষিতম্
ষট্সহস্রৈর্হয়ৈঃ শিষ্টৈরপায়াচ্ছ্রান্তবাহনম্
22.57
অশ্বারোহাস্তু পাণ্ডূনামব্রুবন্রুধিরোক্ষিতাঃ
সুসংনিকৃষ্টাঃ সংগ্রামে ভূয়িষ্ঠং ত্যক্তজীবিতাঃ
22.58
নেহ শক্যং রথৈর্যোদ্ধুং কুত এব মহাগজৈঃ
রথানেব রথা যান্তু কুঞ্জরাঃ কুঞ্জরানপি
22.59
প্রতিয়াতো হি শকুনিঃ স্বমনীকমবস্থিতঃ
ন পুনঃ সৌবলো রাজা যুদ্ধমভ্যাগমিষ্যতি
22.60
ততস্তু দ্রৌপদেয়াশ্চ তে চ মত্তা মহাদ্বিপাঃ
প্রয়য়ুর্যত্র পাঞ্চাল্যো ধৃষ্টদ্যুম্নো মহারথঃ
22.61
সহদেবোঽপি কৌরব্য রজোমেঘে সমুত্থিতে
একাকী প্রয়য়ৌ তত্র যত্র রাজা যুধিষ্ঠিরঃ
22.62
ততস্তেষু প্রয়াতেষু শকুনিঃ সৌবলঃ পুনঃ
পার্শ্বতোঽভ্যহনত্ক্রুদ্ধো ধৃষ্টদ্যুম্নস্য বাহিনীম্
22.63
তত্পুনস্তুমুলং যুদ্ধং প্রাণাংস্ত্যক্ত্বাভ্যবর্তত
তাবকানাং পরেষাং চ পরস্পরবধৈষিণাম্
22.64
তে হ্যন্যোন্যমবেক্ষন্ত তস্মিন্বীরসমাগমে
যোধাঃ পর্যপতন্রাজঞ্শতশোঽথ সহস্রশঃ
22.65
অসিভিশ্ছিদ্যমানানাং শিরসাং লোকসংক্ষয়ে
প্রাদুরাসীন্মহাশব্দস্তালানাং পততামিব
22.66
বিমুক্তানাং শরীরাণাং ভিন্নানাং পততাং ভুবি
সায়ুধানাং চ বাহূনামুরূণাং চ বিশাং পতে
আসীত্কটকটাশব্দঃ সুমহান্রোমহর্ষণঃ
22.67
নিঘ্নন্তো নিশিতৈঃ শস্ত্রৈর্ভ্রাতৄন্পুত্রান্সখীনপি
যোধাঃ পরিপতন্তি স্ম যথামিষকৃতে খগাঃ
22.68
অন্যোন্যং প্রতিসংরব্ধাঃ সমাসাদ্য পরস্পরম্
অহং পূর্বমহং পূর্বমিতি ন্যঘ্নন্সহস্রশঃ
22.69
সংঘাতৈরাসনভ্রষ্টৈরশ্বারোহৈর্গতাসুভিঃ
হয়াঃ পরিপতন্তি স্ম শতশোঽথ সহস্রশঃ
22.70
স্ফুরতাং প্রতিপিষ্টানামশ্বানাং শীঘ্রসারিণাম্
স্তনতাং চ মনুষ্যাণাং সংনদ্ধানাং বিশাং পতে
22.71
শক্ত্যৃষ্টিপ্রাসশব্দশ্চ তুমুলঃ সমজায়ত
ভিন্দতাং পরমর্মাণি রাজন্দুর্মন্ত্রিতে তব
22.72
শ্রমাভিভূতাঃ সংরব্ধাঃ শ্রান্তবাহাঃ পিপাসিতাঃ
বিক্ষতাশ্চ শিতৈঃ শস্ত্রৈরভ্যবর্তন্ত তাবকাঃ
22.73
মত্তা রুধিরগন্ধেন বহবোঽত্র বিচেতসঃ
জঘ্নুঃ পরান্স্বকাংশ্চৈব প্রাপ্তান্প্রাপ্তাননন্তরান্
22.74
বহবশ্চ গতপ্রাণাঃ ক্ষত্রিয়া জয়গৃদ্ধিনঃ
ভূমাবভ্যপতন্রাজঞ্শরবৃষ্টিভিরাবৃতাঃ
22.75
বৃকগৃধ্রশৃগালানাং তুমুলে মোদনেঽহনি
আসীদ্বলক্ষয়ো ঘোরস্তব পুত্রস্য পশ্যতঃ
22.76
নরাশ্বকায়সংছন্না ভূমিরাসীদ্বিশাং পতে
রুধিরোদকচিত্রা চ ভীরূণাং ভয়বর্ধিনী
22.77
অসিভিঃ পট্টিশৈঃ শূলৈস্তক্ষমাণাঃ পুনঃ পুনঃ
তাবকাঃ পাণ্ডবাশ্চৈব নাভ্যবর্তন্ত ভারত
22.78
প্রহরন্তো যথাশক্তি যাবত্প্রাণস্য ধারণম্
যোধাঃ পরিপতন্তি স্ম বমন্তো রুধিরং ব্রণৈঃ
22.79
শিরো গৃহীত্বা কেশেষু কবন্ধঃ সমদৃশ্যত
উদ্যম্য নিশিতং খড্গং রুধিরেণ সমুক্ষিতম্
22.80
অথোত্থিতেষু বহুষু কবন্ধেষু জনাধিপ
তথা রুধিরগন্ধেন যোধাঃ কশ্মলমাবিশন্
22.81
মন্দীভূতে ততঃ শব্দে পাণ্ডবানাং মহদ্বলম্
অল্পাবশিষ্টৈস্তুরগৈরভ্যবর্তত সৌবলঃ
22.82
ততোঽভ্যধাবংস্ত্বরিতাঃ পাণ্ডবা জয়গৃদ্ধিনঃ
পদাতয়শ্চ নাগাশ্চ সাদিনশ্চোদ্যতায়ুধাঃ
22.83
কোষ্টকীকৃত্য চাপ্যেনং পরিক্ষিপ্য চ সর্বশঃ
শস্ত্রৈর্নানাবিধৈর্জঘ্নুর্যুদ্ধপারং তিতীর্ষবঃ
22.84
ত্বদীয়াস্তাংস্তু সংপ্রেক্ষ্য সর্বতঃ সমভিদ্রুতান্
সাশ্বপত্তিদ্বিপরথাঃ পাণ্ডবানভিদুদ্রুবুঃ
22.85
কেচিত্পদাতয়ঃ পদ্ভির্মুষ্টিভিশ্চ পরস্পরম্
নিজঘ্নুঃ সমরে শূরাঃ ক্ষীণশস্ত্রাস্ততোঽপতন্
22.86
রথেভ্যো রথিনঃ পেতুর্দ্বিপেভ্যো হস্তিসাদিনঃ
বিমানেভ্য ইব ভ্রষ্টাঃ সিদ্ধাঃ পুণ্যক্ষয়াদ্যথা
22.87
এবমন্যোন্যমায়স্তা যোধা জঘ্নুর্মহামৃধে
পিতৄন্ভ্রাতৄন্বয়স্যাংশ্চ পুত্রানপি তথাপরে
22.88
এবমাসীদমর্যাদং যুদ্ধং ভরতসত্তম
প্রাসাসিবাণকলিলে বর্তমানে সুদারুণে