Utshovঅধ্যায় 21
21.1
সংজয় উবাচ
পুত্রস্তু তে মহারাজ রথস্থো রথিনাং বরঃ
দুরুত্সহো বভৌ যুদ্ধে যথা রুদ্রঃ প্রতাপবান্
21.2
তস্য বাণসহস্রৈস্তু প্রচ্ছন্না হ্যভবন্মহী
পরাংশ্চ সিষিচে বাণৈর্ধারাভিরিব পর্বতান্
21.3
ন চ সোঽস্তি পুমান্কশ্চিত্পাণ্ডবানাং মহাহবে
হয়ো গজো রথো বাপি যোঽস্য বাণৈরবিক্ষতঃ
21.4
যং যং হি সমরে যোধং প্রপশ্যামি বিশাং পতে
স স বাণৈশ্চিতোঽভূদ্বৈ পুত্রেণ তব ভারত
21.5
যথা সৈন্যেন রজসা সমুদ্ধূতেন বাহিনী
প্রত্যদৃশ্যত সংছন্না তথা বাণৈর্মহাত্মনঃ
21.6
বাণভূতামপশ্যাম পৃথিবীং পৃথিবীপতে
দুর্যোধনেন প্রকৃতাং ক্ষিপ্রহস্তেন ধন্বিনা
21.7
তেষু যোধসহস্রেষু তাবকেষু পরেষু চ
একো দুর্যোধনো হ্যাসীত্পুমানিতি মতির্মম
21.8
তত্রাদ্ভুতমপশ্যাম তব পুত্রস্য বিক্রমম্
যদেকং সহিতাঃ পার্থা নাত্যবর্তন্ত ভারত
21.9
যুধিষ্ঠিরং শতেনাজৌ বিব্যাধ ভরতর্ষভ
ভীমসেনং চ সপ্তত্যা সহদেবং চ সপ্তভিঃ
21.10
নকুলং চ চতুঃষষ্ট্যা ধৃষ্টদ্যুম্নং চ পঞ্চভিঃ
সপ্তভির্দ্রৌপদেয়াংশ্চ ত্রিভির্বিব্যাধ সাত্যকিম্
ধনুশ্চিচ্ছেদ ভল্লেন সহদেবস্য মারিষ
21.11
তদপাস্য ধনুশ্ছিন্নং মাদ্রীপুত্রঃ প্রতাপবান্
অভ্যধাবত রাজানং প্রগৃহ্যান্যন্মহদ্ধনুঃ
ততো দুর্যোধনং সংখ্যে বিব্যাধ দশভিঃ শরৈঃ
21.12
নকুলশ্চ ততো বীরো রাজানং নবভিঃ শরৈঃ
ঘোররূপৈর্মহেষ্বাসো বিব্যাধ চ ননাদ চ
21.13
সাত্যকিশ্চাপি রাজানং শরেণানতপর্বণা
দ্রৌপদেয়াস্ত্রিসপ্তত্যা ধর্মরাজশ্চ সপ্তভিঃ
অশীত্যা ভীমসেনশ্চ শরৈ রাজানমার্দয়ৎ
21.14
সমন্তাত্কীর্যমাণস্তু বাণসংঘৈর্মহাত্মভিঃ
ন চচাল মহারাজ সর্বসৈন্যস্য পশ্যতঃ
21.15
লাঘবং সৌষ্ঠবং চাপি বীর্যং চৈব মহাত্মনঃ
অতি সর্বাণি ভূতানি দদৃশুঃ সর্বমানবাঃ
21.16
ধার্তরাষ্ট্রাস্তু রাজেন্দ্র যাত্বা তু স্বল্পমন্তরম্
অপশ্যমানা রাজানং পর্যবর্তন্ত দংশিতাঃ
21.17
তেষামাপততাং ঘোরস্তুমুলঃ সমজায়ত
ক্ষুব্ধস্য হি সমুদ্রস্য প্রাবৃট্কালে যথা নিশি
21.18
সমাসাদ্য রণে তে তু রাজানমপরাজিতম্
প্রত্যুদ্যয়ুর্মহেষ্বাসাঃ পাণ্ডবানাততায়িনঃ
21.19
ভীমসেনং রণে ক্রুদ্ধং দ্রোণপুত্রো ন্যবারয়ৎ
ততো বাণৈর্মহারাজ প্রমুক্তৈঃ সর্বতোদিশম্
নাজ্ঞায়ন্ত রণে বীরা ন দিশঃ প্রদিশস্তথা
21.20
তাবুভৌ ক্রূরকর্মাণাবুভৌ ভারত দুঃসহৌ
ঘোররূপময়ুধ্যেতাং কৃতপ্রতিকৃতৈষিণৌ
ত্রাসয়ন্তৌ জগত্সর্বং জ্যাক্ষেপবিহতত্বচৌ
21.21
শকুনিস্তু রণে বীরো যুধিষ্ঠিরমপীডয়ৎ
তস্যাশ্বাংশ্চতুরো হত্বা সুবলস্য সুতো বিভুঃ
নাদং চকার বলবান্সর্বসৈন্যানি কম্পয়ন্
21.22
এতস্মিন্নন্তরে বীরং রাজানমপরাজিতম্
অপোবাহ রথেনাজৌ সহদেবঃ প্রতাপবান্
21.23
অথান্যং রথমাস্থায় ধর্মরাজো যুধিষ্ঠিরঃ
শকুনিং নবভির্বিদ্ধ্বা পুনর্বিব্যাধ পঞ্চভিঃ
ননাদ চ মহানাদং প্রবরঃ সর্বধন্বিনাম্
21.24
তদ্যুদ্ধমভবচ্চিত্রং ঘোররূপং চ মারিষ
ঈক্ষিতৃপ্রীতিজননং সিদ্ধচারণসেবিতম্
21.25
উলূকস্তু মহেষ্বাসং নকুলং যুদ্ধদুর্মদম্
অভ্যদ্রবদমেয়াত্মা শরবর্ষৈঃ সমন্ততঃ
21.26
তথৈব নকুলঃ শূরঃ সৌবলস্য সুতং রণে
শরবর্ষেণ মহতা সমন্তাত্পর্যবারয়ৎ
21.27
তৌ তত্র সমরে বীরৌ কুলপুত্রৌ মহারথৌ
যোধয়ন্তাবপশ্যেতাং পরস্পরকৃতাগসৌ
21.28
তথৈব কৃতবর্মা তু শৈনেয়ং শত্রুতাপনম্
যোধয়ঞ্শুশুভে রাজন্বলং শক্র ইবাহবে
21.29
দুর্যোধনো ধনুশ্ছিত্ত্বা ধৃষ্টদ্যুম্নস্য সংয়ুগে
অথৈনং ছিন্নধন্বানং বিব্যাধ নিশিতৈঃ শরৈঃ
21.30
ধৃষ্টদ্যুম্নোঽপি সমরে প্রগৃহ্য পরমায়ুধম্
রাজানং যোধয়ামাস পশ্যতাং সর্বধন্বিনাম্
21.31
তয়োর্যুদ্ধং মহচ্চাসীত্সংগ্রামে ভরতর্ষভ
প্রভিন্নয়োর্যথা সক্তং মত্তয়োর্বরহস্তিনোঃ
21.32
গৌতমস্তু রণে ক্রুদ্ধো দ্রৌপদেয়ান্মহাবলান্
বিব্যাধ বহুভিঃ শূরঃ শরৈঃ সংনতপর্বভিঃ
21.33
তস্য তৈরভবদ্যুদ্ধমিন্দ্রিয়ৈরিব দেহিনঃ
ঘোররূপমসংবার্যং নির্মর্যাদমতীব চ
21.34
তে চ তং পীডয়ামাসুরিন্দ্রিয়াণীব বালিশম্
স চ তান্প্রতিসংরব্ধঃ প্রত্যয়োধয়দাহবে
21.35
এবং চিত্রমভূদ্যুদ্ধং তস্য তৈঃ সহ ভারত
উত্থায়োত্থায় হি যথা দেহিনামিন্দ্রিয়ৈর্বিভো
21.36
নরাশ্চৈব নরৈঃ সার্ধং দন্তিনো দন্তিভিস্তথা
হয়া হয়ৈঃ সমাসক্তা রথিনো রথিভিস্তথা
সংকুলং চাভবদ্ভূয়ো ঘোররূপং বিশাং পতে
21.37
ইদং চিত্রমিদং ঘোরমিদং রৌদ্রমিতি প্রভো
যুদ্ধান্যাসন্মহারাজ ঘোরাণি চ বহূনি চ
21.38
তে সমাসাদ্য সমরে পরস্পরমরিংদমাঃ
বিব্যধুশ্চৈব জঘ্নুশ্চ সমাসাদ্য মহাহবে
21.39
তেষাং শস্ত্রসমুদ্ভূতং রজস্তীব্রমদৃশ্যত
প্রবাতেনোদ্ধতং রাজন্ধাবদ্ভিশ্চাশ্বসাদিভিঃ
21.40
রথনেমিসমুদ্ভূতং নিঃশ্বাসৈশ্চাপি দন্তিনাম্
রজঃ সংধ্যাভ্রকপিলং দিবাকরপথং যয়ৌ
21.41
রজসা তেন সংপৃক্তে ভাস্করে নিষ্প্রভীকৃতে
সংছাদিতাভবদ্ভূমিস্তে চ শূরা মহারথাঃ
21.42
মুহূর্তাদিব সংবৃত্তং নীরজস্কং সমন্ততঃ
বীরশোণিতসিক্তায়াং ভূমৌ ভরতসত্তম
উপাশাম্যত্ততস্তীব্রং তদ্রজো ঘোরদর্শনম্
21.43
ততোঽপশ্যং মহারাজ দ্বংদ্বয়ুদ্ধানি ভারত
যথাপ্রাগ্র্যং যথাজ্যেষ্ঠং মধ্যাহ্নে বৈ সুদারুণে
বর্মণাং তত্র রাজেন্দ্র ব্যদৃশ্যন্তোজ্জ্বলাঃ প্রভাঃ
21.44
শব্দঃ সুতুমুলঃ সংখ্যে শরাণাং পততামভূৎ
মহাবেণুবনস্যেব দহ্যমানস্য সর্বতঃ