Utshovঅধ্যায় 20
20.1
সংজয় উবাচ
তস্মিংস্তু নিহতে শূরে শাল্বে সমিতিশোভনে
তবাভজ্যদ্বলং বেগাদ্বাতেনেব মহাদ্রুমঃ
20.2
তত্প্রভগ্নং বলং দৃষ্ট্বা কৃতবর্মা মহারথঃ
দধার সমরে শূরঃ শত্রুসৈন্যং মহাবলঃ
20.3
সংনিবৃত্তাস্তু তে শূরা দৃষ্ট্বা সাত্বতমাহবে
শৈলোপমং স্থিতং রাজন্কীর্যমাণং শরৈর্যুধি
20.4
ততঃ প্রববৃতে যুদ্ধং কুরূণাং পাণ্ডবৈঃ সহ
নিবৃত্তানাং মহারাজ মৃত্যুং কৃত্বা নিবর্তনম্
20.5
তত্রাশ্চর্যমভূদ্যুদ্ধং সাত্বতস্য পরৈঃ সহ
যদেকো বারয়ামাস পাণ্ডুসেনাং দুরাসদাম্
20.6
তেষামন্যোন্যসুহৃদাং কৃতে কর্মণি দুষ্করে
সিংহনাদঃ প্রহৃষ্টানাং দিবঃস্পৃক্সুমহানভূৎ
20.7
তেন শব্দেন বিত্রস্তান্পাঞ্চালান্ভরতর্ষভ
শিনের্নপ্তা মহাবাহুরন্বপদ্যত সাত্যকিঃ
20.8
স সমাসাদ্য রাজানং ক্ষেমধূর্তিং মহাবলম্
সপ্তভির্নিশিতৈর্বাণৈরনয়দ্যমসাদনম্
20.9
তমায়ান্তং মহাবাহুং প্রবপন্তং শিতাঞ্শরান্
জবেনাভ্যপতদ্ধীমান্হার্দিক্যঃ শিনিপুংগবম্
20.10
তৌ সিংহাবিব নর্দন্তৌ ধন্বিনৌ রথিনাং বরৌ
অন্যোন্যমভ্যধাবেতাং শস্ত্রপ্রবরধারিণৌ
20.11
পাণ্ডবাঃ সহ পাঞ্চালৈর্যোধাশ্চান্যে নৃপোত্তমাঃ
প্রেক্ষকাঃ সমপদ্যন্ত তয়োঃ পুরুষসিংহয়োঃ
20.12
নারাচৈর্বত্সদন্তৈশ্চ বৃষ্ণ্যন্ধকমহারথৌ
অভিজঘ্নতুরন্যোন্যং প্রহৃষ্টাবিব কুঞ্জরৌ
20.13
চরন্তৌ বিবিধান্মার্গান্হার্দিক্যশিনিপুংগবৌ
মুহুরন্তর্দধাতে তৌ বাণবৃষ্ট্যা পরস্পরম্
20.14
চাপবেগবলোদ্ধূতান্মার্গণান্বৃষ্ণিসিংহয়োঃ
আকাশে সমপশ্যাম পতংগানিব শীঘ্রগান্
20.15
তমেকং সত্যকর্মাণমাসাদ্য হৃদিকাত্মজঃ
অবিধ্যন্নিশিতৈর্বাণৈশ্চতুর্ভিশ্চতুরো হয়ান্
20.16
স দীর্ঘবাহুঃ সংক্রুদ্ধস্তোত্ত্রার্দিত ইব দ্বিপঃ
অষ্টাভিঃ কৃতবর্মাণমবিধ্যত্পরমেষুভিঃ
20.17
ততঃ পূর্ণায়তোত্সৃষ্টৈঃ কৃতবর্মা শিলাশিতৈঃ
সাত্যকিং ত্রিভিরাহত্য ধনুরেকেন চিচ্ছিদে
20.18
নিকৃত্তং তদ্ধনুঃশ্রেষ্ঠমপাস্য শিনিপুংগবঃ
অন্যদাদত্ত বেগেন শৈনেয়ঃ সশরং ধনুঃ
20.19
তদাদায় ধনুঃশ্রেষ্ঠং বরিষ্ঠঃ সর্বধন্বিনাম্
আরোপ্য চ মহাবীর্যো মহাবুদ্ধির্মহাবলঃ
20.20
অমৃষ্যমাণো ধনুষশ্ছেদনং কৃতবর্মণা
কুপিতোঽতিরথঃ শীঘ্রং কৃতবর্মাণমভ্যয়াৎ
20.21
ততঃ সুনিশিতৈর্বাণৈর্দশভিঃ শিনিপুংগবঃ
জঘান সূতমশ্বাংশ্চ ধ্বজং চ কৃতবর্মণঃ
20.22
ততো রাজন্মহেষ্বাসঃ কৃতবর্মা মহারথঃ
হতাশ্বসূতং সংপ্রেক্ষ্য রথং হেমপরিষ্কৃতম্
20.23
রোষেণ মহতাবিষ্টঃ শূলমুদ্যম্য মারিষ
চিক্ষেপ ভুজবেগেন জিঘাংসুঃ শিনিপুংগবম্
20.24
তচ্ছূলং সাত্বতো হ্যাজৌ নির্ভিদ্য নিশিতৈঃ শরৈঃ
চূর্ণিতং পাতয়ামাস মোহয়ন্নিব মাধবম্
ততোঽপরেণ ভল্লেন হৃদ্যেনং সমতাডয়ৎ
20.25
স যুদ্ধে যুয়ুধানেন হতাশ্বো হতসারথিঃ
কৃতবর্মা কৃতাস্ত্রেণ ধরণীমন্বপদ্যত
20.26
তস্মিন্সাত্যকিনা বীরে দ্বৈরথে বিরথীকৃতে
সমপদ্যত সর্বেষাং সৈন্যানাং সুমহদ্ভয়ম্
20.27
পুত্রস্য তব চাত্যর্থং বিষাদঃ সমপদ্যত
হতসূতে হতাশ্বে চ বিরথে কৃতবর্মণি
20.28
হতাশ্বং চ সমালক্ষ্য হতসূতমরিংদমম্
অভ্যধাবত্কৃপো রাজঞ্জিঘাংসুঃ শিনিপুংগবম্
20.29
তমারোপ্য রথোপস্থে মিষতাং সর্বধন্বিনাম্
অপোবাহ মহাবাহুস্তূর্ণমায়োধনাদপি
20.30
শৈনেয়েঽধিষ্ঠিতে রাজন্বিরথে কৃতবর্মণি
দুর্যোধনবলং সর্বং পুনরাসীত্পরাঙ্মুখম্
20.31
তত্পরে নাববুধ্যন্ত সৈন্যেন রজসাবৃতে
তাবকাঃ প্রদ্রুতা রাজন্দুর্যোধনমৃতে নৃপম্
20.32
দুর্যোধনস্তু সংপ্রেক্ষ্য ভগ্নং স্ববলমন্তিকাৎ
জবেনাভ্যপতত্তূর্ণং সর্বাংশ্চৈকো ন্যবারয়ৎ
20.33
পাণ্ডূংশ্চ সর্বান্সংক্রুদ্ধো ধৃষ্টদ্যুম্নং চ পার্ষতম্
শিখণ্ডিনং দ্রৌপদেয়ান্পাঞ্চালানাং চ যে গণাঃ
20.34
কেকয়ান্সোমকাংশ্চৈব পাঞ্চালাংশ্চৈব মারিষ
অসংভ্রমং দুরাধর্ষঃ শিতৈরস্ত্রৈরবারয়ৎ
20.35
অতিষ্ঠদাহবে যত্তঃ পুত্রস্তব মহাবলঃ
যথা যজ্ঞে মহানগ্নির্মন্ত্রপূতঃ প্রকাশয়ন্
20.36
তং পরে নাভ্যবর্তন্ত মর্ত্যা মৃত্যুমিবাহবে
অথান্যং রথমাস্থায় হার্দিক্যঃ সমপদ্যত