Utshovঅধ্যায় 19
19.1
সংজয় উবাচ
সংনিবৃত্তে বলৌঘে তু শাল্বো ম্লেচ্ছগণাধিপঃ
অভ্যবর্তত সংক্রুদ্ধঃ পাণ্ডূনাং সুমহদ্বলম্
19.2
আস্থায় সুমহানাগং প্রভিন্নং পর্বতোপমম্
দৃপ্তমৈরাবতপ্রখ্যমমিত্রগণমর্দনম্
19.3
যোঽসৌ মহাভদ্রকুলপ্রসূতঃ; সুপূজিতো ধার্তরাষ্ট্রেণ নিত্যম্
সুকল্পিতঃ শাস্ত্রবিনিশ্চয়জ্ঞৈঃ; সদোপবাহ্যঃ সমরেষু রাজন্
19.4
তমাস্থিতো রাজবরো বভূব; যথোদয়স্থঃ সবিতা ক্ষপান্তে
স তেন নাগপ্রবরেণ রাজ;ন্নভ্যুদ্যয়ৌ পাণ্ডুসুতান্সমন্তাৎ
শিতৈঃ পৃষত্কৈর্বিদদার চাপি; মহেন্দ্রবজ্রপ্রতিমৈঃ সুঘোরৈঃ
19.5
ততঃ শরান্বৈ সৃজতো মহারণে; যোধাংশ্চ রাজন্নয়তো যমায়
নাস্যান্তরং দদৃশুঃ স্বে পরে বা; যথা পুরা বজ্রধরস্য দৈত্যাঃ
19.6
তে পাণ্ডবাঃ সোমকাঃ সৃঞ্জয়াশ্চ; তমেব নাগং দদৃশুঃ সমন্তাৎ
সহস্রশো বৈ বিচরন্তমেকং; যথা মহেন্দ্রস্য গজং সমীপে
19.7
সংদ্রাব্যমাণং তু বলং পরেষাং; পরীতকল্পং বিবভৌ সমন্তাৎ
নৈবাবতস্থে সমরে ভৃশং ভয়া;দ্বিমর্দমানং তু পরস্পরং তদা
19.8
ততঃ প্রভগ্না সহসা মহাচমূঃ; সা পাণ্ডবী তেন নরাধিপেন
দিশশ্চতস্রঃ সহসা প্রধাবিতা; গজেন্দ্রবেগং তমপারয়ন্তী
19.9
দৃষ্ট্বা চ তাং বেগবতা প্রভগ্নাং; সর্বে ত্বদীয়া যুধি যোধমুখ্যাঃ
অপূজয়ংস্তত্র নরাধিপং তং; দধ্মুশ্চ শঙ্খাঞ্শশিসংনিকাশান্
19.10
শ্রুত্বা নিনাদং ত্বথ কৌরবাণাং; হর্ষাদ্বিমুক্তং সহ শঙ্খশব্দৈঃ
সেনাপতিঃ পাণ্ডবসৃঞ্জয়ানাং; পাঞ্চালপুত্রো ন মমর্ষ রোষাৎ
19.11
ততস্তু তং বৈ দ্বিরদং মহাত্মা; প্রত্যুদ্যয়ৌ ত্বরমাণো জয়ায়
জম্ভো যথা শক্রসমাগমে বৈ; নাগেন্দ্রমৈরাবণমিন্দ্রবাহ্যম্
19.12
তমাপতন্তং সহসা তু দৃষ্ট্বা; পাঞ্চালরাজং যুধি রাজসিংহঃ
তং বৈ দ্বিপং প্রেষয়ামাস তূর্ণং; বধায় রাজন্দ্রুপদাত্মজস্য
19.13
স তং দ্বিপং সহসাভ্যাপতন্ত;মবিধ্যদর্কপ্রতিমৈঃ পৃষত্কৈঃ
কর্মারধৌতৈর্নিশিতৈর্জ্বলদ্ভি;র্নারাচমুখ্যৈস্ত্রিভিরুগ্রবেগৈঃ
19.14
ততোঽপরান্পঞ্চ শিতান্মহাত্মা; নারাচমুখ্যান্বিসসর্জ কুম্ভে
স তৈস্তু বিদ্ধঃ পরমদ্বিপো রণে; তদা পরাবৃত্য ভৃশং প্রদুদ্রুবে
19.15
তং নাগরাজং সহসা প্রণুন্নং; বিদ্রাব্যমাণং চ নিগৃহ্য শাল্বঃ
তোত্ত্রাঙ্কুশৈঃ প্রেষয়ামাস তূর্ণং; পাঞ্চালরাজস্য রথং প্রদিশ্য
19.16
দৃষ্ট্বাপতন্তং সহসা তু নাগং; ধৃষ্টদ্যুম্নঃ স্বরথাচ্ছীঘ্রমেব
গদাং প্রগৃহ্যাশু জবেন বীরো; ভূমিং প্রপন্নো ভয়বিহ্বলাঙ্গঃ
19.17
স তং রথং হেমবিভূষিতাঙ্গং; সাশ্বং সসূতং সহসা বিমৃদ্য
উত্ক্ষিপ্য হস্তেন তদা মহাদ্বিপো; বিপোথয়ামাস বসুংধরাতলে
19.18
পাঞ্চালরাজস্য সুতং স দৃষ্ট্বা; তদার্দিতং নাগবরেণ তেন
তমভ্যধাবত্সহসা জবেন; ভীমঃ শিখণ্ডী চ শিনেশ্চ নপ্তা
19.19
শরৈশ্চ বেগং সহসা নিগৃহ্য; তস্যাভিতোঽভ্যাপততো গজস্য
স সংগৃহীতো রথিভির্গজো বৈ; চচাল তৈর্বার্যমাণশ্চ সংখ্যে
19.20
ততঃ পৃষত্কান্প্রববর্ষ রাজা; সূর্যো যথা রশ্মিজালং সমন্তাৎ
তেনাশুগৈর্বধ্যমানা রথৌঘাঃ; প্রদুদ্রুবুস্তত্র ততস্তু সর্বে
19.21
তত্কর্ম শাল্বস্য সমীক্ষ্য সর্বে; পাঞ্চালমত্স্যা নৃপ সৃঞ্জয়াশ্চ
হাহাকারৈর্নাদয়ন্তঃ স্ম যুদ্ধে; দ্বিপং সমন্তাদ্রুরুধুর্নরাগ্র্যাঃ
19.22
পাঞ্চালরাজস্ত্বরিতস্তু শূরো; গদাং প্রগৃহ্যাচলশৃঙ্গকল্পাম্
অসংভ্রমং ভারত শত্রুঘাতী; জবেন বীরোঽনুসসার নাগম্
19.23
ততোঽথ নাগং ধরণীধরাভং; মদং স্রবন্তং জলদপ্রকাশম্
গদাং সমাবিধ্য ভৃশং জঘান; পাঞ্চালরাজস্য সুতস্তরস্বী
19.24
স ভিন্নকুম্ভঃ সহসা বিনদ্য; মুখাত্প্রভূতং ক্ষতজং বিমুঞ্চন্
পপাত নাগো ধরণীধরাভঃ; ক্ষিতিপ্রকম্পাচ্চলিতো যথাদ্রিঃ
19.25
নিপাত্যমানে তু তদা গজেন্দ্রে; হাহাকৃতে তব পুত্রস্য সৈন্যে
স শাল্বরাজস্য শিনিপ্রবীরো; জহার ভল্লেন শিরঃ শিতেন
19.26
হৃতোত্তমাঙ্গো যুধি সাত্বতেন; পপাত ভূমৌ সহ নাগরাজ্ঞা
যথাদ্রিশৃঙ্গং সুমহত্প্রণুন্নং; বজ্রেণ দেবাধিপচোদিতেন