Utshovঅধ্যায় 18
18.1
সংজয় উবাচ
পাতিতে যুধি দুর্ধর্ষে মদ্ররাজে মহারথে
তাবকাস্তব পুত্রাশ্চ প্রায়শো বিমুখাভবন্
18.2
বণিজো নাবি ভিন্নায়াং যথাগাধেঽপ্লবেঽর্ণবে
অপারে পারমিচ্ছন্তো হতে শূরে মহাত্মনি
18.3
মদ্ররাজে মহারাজ বিত্রস্তাঃ শরবিক্ষতাঃ
অনাথা নাথমিচ্ছন্তো মৃগাঃ সিংহার্দিতা ইব
18.4
বৃষা যথা ভগ্নশৃঙ্গাঃ শীর্ণদন্তা গজা ইব
মধ্যাহ্নে প্রত্যপায়াম নির্জিতা ধর্মসূনুনা
18.5
ন সংধাতুমনীকানি ন চ রাজন্পরাক্রমে
আসীদ্বুদ্ধির্হতে শল্যে তব যোধস্য কস্যচিৎ
18.6
ভীষ্মে দ্রোণে চ নিহতে সূতপুত্রে চ ভারত
যদ্দুঃখং তব যোধানাং ভয়ং চাসীদ্বিশাং পতে
তদ্ভয়ং স চ নঃ শোকো ভূয় এবাভ্যবর্তত
18.7
নিরাশাশ্চ জয়ে তস্মিন্হতে শল্যে মহারথে
হতপ্রবীরা বিধ্বস্তা বিকৃত্তাশ্চ শিতৈঃ শরৈঃ
মদ্ররাজে হতে রাজন্যোধাস্তে প্রাদ্রবন্ভয়াৎ
18.8
অশ্বানন্যে গজানন্যে রথানন্যে মহারথাঃ
আরুহ্য জবসংপন্নাঃ পাদাতাঃ প্রাদ্রবন্ভয়াৎ
18.9
দ্বিসাহস্রাশ্চ মাতঙ্গা গিরিরূপাঃ প্রহারিণঃ
সংপ্রাদ্রবন্হতে শল্যে অঙ্কুশাঙ্গুষ্ঠচোদিতাঃ
18.10
তে রণাদ্ভরতশ্রেষ্ঠ তাবকাঃ প্রাদ্রবন্দিশঃ
ধাবন্তশ্চাপ্যদৃশ্যন্ত শ্বসমানাঃ শরাতুরাঃ
18.11
তান্প্রভগ্নান্দ্রুতান্দৃষ্ট্বা হতোত্সাহান্পরাজিতান্
অভ্যদ্রবন্ত পাঞ্চালাঃ পাণ্ডবাশ্চ জয়ৈষিণঃ
18.12
বাণশব্দরবশ্চাপি সিংহনাদশ্চ পুষ্কলঃ
শঙ্খশব্দশ্চ শূরাণাং দারুণঃ সমপদ্যত
18.13
দৃষ্ট্বা তু কৌরবং সৈন্যং ভয়ত্রস্তং প্রবিদ্রুতম্
অন্যোন্যং সমভাষন্ত পাঞ্চালাঃ পাণ্ডবৈঃ সহ
18.14
অদ্য রাজা সত্যধৃতির্জিতামিত্রো যুধিষ্ঠিরঃ
অদ্য দুর্যোধনো হীনো দীপ্তয়া নৃপতিশ্রিয়া
18.15
অদ্য শ্রুত্বা হতং পুত্রং ধৃতরাষ্ট্রো জনেশ্বরঃ
নিঃসংজ্ঞঃ পতিতো ভূমৌ কিল্বিষং প্রতিপদ্যতাম্
18.16
অদ্য জানাতু কৌন্তেয়ং সমর্থং সর্বধন্বিনাম্
অদ্যাত্মানং চ দুর্মেধা গর্হয়িষ্যতি পাপকৃৎ
অদ্য ক্ষত্তুর্বচঃ সত্যং স্মরতাং ব্রুবতো হিতম্
18.17
অদ্যপ্রভৃতি পার্থাংশ্চ প্রেষ্যভূত উপাচরন্
বিজানাতু নৃপো দুঃখং যত্প্রাপ্তং পাণ্ডুনন্দনৈঃ
18.18
অদ্য কৃষ্ণস্য মাহাত্ম্যং জানাতু স মহীপতিঃ
অদ্যার্জুনধনুর্ঘোষং ঘোরং জানাতু সংয়ুগে
18.19
অস্ত্রাণাং চ বলং সর্বং বাহ্বোশ্চ বলমাহবে
অদ্য জ্ঞাস্যতি ভীমস্য বলং ঘোরং মহাত্মনঃ
18.20
হতে দুর্যোধনে যুদ্ধে শক্রেণেবাসুরে ময়ে
যত্কৃতং ভীমসেনেন দুঃশাসনবধে তদা
নান্যঃ কর্তাস্তি লোকে তদৃতে ভীমং মহাবলম্
18.21
জানীতামদ্য জ্যেষ্ঠস্য পাণ্ডবস্য পরাক্রমম্
মদ্ররাজং হতং শ্রুত্বা দেবৈরপি সুদুঃসহম্
18.22
অদ্য জ্ঞাস্যতি সংগ্রামে মাদ্রীপুত্রৌ মহাবলৌ
নিহতে সৌবলে শূরে গান্ধারেষু চ সর্বশঃ
18.23
কথং তেষাং জয়ো ন স্যাদ্যেষাং যোদ্ধা ধনংজয়ঃ
সাত্যকির্ভীমসেনশ্চ ধৃষ্টদ্যুম্নশ্চ পার্ষতঃ
18.24
দ্রৌপদ্যাস্তনয়াঃ পঞ্চ মাদ্রীপুত্রৌ চ পাণ্ডবৌ
শিখণ্ডী চ মহেষ্বাসো রাজা চৈব যুধিষ্ঠিরঃ
18.25
যেষাং চ জগতাং নাথো নাথঃ কৃষ্ণো জনার্দনঃ
কথং তেষাং জয়ো ন স্যাদ্যেষাং ধর্মো ব্যপাশ্রয়ঃ
18.26
ভীষ্মং দ্রোণং চ কর্ণং চ মদ্ররাজানমেব চ
তথান্যান্নৃপতীন্বীরাঞ্শতশোঽথ সহস্রশঃ
18.27
কোঽন্যঃ শক্তো রণে জেতুমৃতে পার্থং যুধিষ্ঠিরম্
যস্য নাথো হৃষীকেশঃ সদা ধর্ময়শোনিধিঃ
18.28
ইত্যেবং বদমানাস্তে হর্ষেণ মহতা যুতাঃ
প্রভগ্নাংস্তাবকান্রাজন্সৃঞ্জয়াঃ পৃষ্ঠতোঽন্বয়ুঃ
18.29
ধনংজয়ো রথানীকমভ্যবর্তত বীর্যবান্
মাদ্রীপুত্রৌ চ শকুনিং সাত্যকিশ্চ মহারথঃ
18.30
তান্প্রেক্ষ্য দ্রবতঃ সর্বান্ভীমসেনভয়ার্দিতান্
দুর্যোধনস্তদা সূতমব্রবীদুত্স্ময়ন্নিব
18.31
ন মাতিক্রমতে পার্থো ধনুষ্পাণিমবস্থিতম্
জঘনে সর্বসৈন্যানাং মমাশ্বান্প্রতিপাদয়
18.32
জঘনে যুধ্যমানং হি কৌন্তেয়ো মাং ধনংজয়ঃ
নোত্সহেতাভ্যতিক্রান্তুং বেলামিব মহোদধিঃ
18.33
পশ্য সৈন্যং মহত্সূত পাণ্ডবৈঃ সমভিদ্রুতম্
সৈন্যরেণুং সমুদ্ধূতং পশ্যস্বৈনং সমন্ততঃ
18.34
সিংহনাদাংশ্চ বহুশঃ শৃণু ঘোরান্ভয়ানকান্
তস্মাদ্যাহি শনৈঃ সূত জঘনং পরিপালয়
18.35
ময়ি স্থিতে চ সমরে নিরুদ্ধেষু চ পাণ্ডুষু
পুনরাবর্ততে তূর্ণং মামকং বলমোজসা
18.36
তচ্ছ্রুত্বা তব পুত্রস্য শূরাগ্র্যসদৃশং বচঃ
সারথির্হেমসংছন্নাঞ্শনৈরশ্বানচোদয়ৎ
18.37
গজাশ্বরথিভির্হীনাস্ত্যক্তাত্মানঃ পদাতয়ঃ
একবিংশতিসাহস্রাঃ সংয়ুগায়াবতস্থিরে
18.38
নানাদেশসমুদ্ভূতা নানারঞ্জিতবাসসঃ
অবস্থিতাস্তদা যোধাঃ প্রার্থয়ন্তো মহদ্যশঃ
18.39
তেষামাপততাং তত্র সংহৃষ্টানাং পরস্পরম্
সংমর্দঃ সুমহাঞ্জজ্ঞে ঘোররূপো ভয়ানকঃ
18.40
ভীমসেনং তদা রাজন্ধৃষ্টদ্যুম্নং চ পার্ষতম্
বলেন চতুরঙ্গেণ নানাদেশ্যা ন্যবারয়ন্
18.41
ভীমমেবাভ্যবর্তন্ত রণেঽন্যে তু পদাতয়ঃ
প্রক্ষ্বেড্যাস্ফোট্য সংহৃষ্টা বীরলোকং যিয়াসবঃ
18.42
আসাদ্য ভীমসেনং তু সংরব্ধা যুদ্ধদুর্মদাঃ
ধার্তরাষ্ট্রা বিনেদুর্হি নান্যাং চাকথয়ন্কথাম্
পরিবার্য রণে ভীমং নিজঘ্নুস্তে সমন্ততঃ
18.43
স বধ্যমানঃ সমরে পদাতিগণসংবৃতঃ
ন চচাল রথোপস্থে মৈনাক ইব পর্বতঃ
18.44
তে তু ক্রুদ্ধা মহারাজ পাণ্ডবস্য মহারথম্
নিগ্রহীতুং প্রচক্রুর্হি যোধাংশ্চান্যানবারয়ন্
18.45
অক্রুধ্যত রণে ভীমস্তৈস্তদা পর্যবস্থিতৈঃ
সোঽবতীর্য রথাত্তূর্ণং পদাতিঃ সমবস্থিতঃ
18.46
জাতরূপপরিচ্ছন্নাং প্রগৃহ্য মহতীং গদাম্
অবধীত্তাবকান্যোধান্দণ্ডপাণিরিবান্তকঃ
18.47
রথাশ্বদ্বিপহীনাংস্তু তান্ভীমো গদয়া বলী
একবিংশতিসাহস্রান্পদাতীনবপোথয়ৎ
18.48
হত্বা তত্পুরুষানীকং ভীমঃ সত্যপরাক্রমঃ
ধৃষ্টদ্যুম্নং পুরস্কৃত্য নচিরাত্প্রত্যদৃশ্যত
18.49
পাদাতা নিহতা ভূমৌ শিশ্যিরে রুধিরোক্ষিতাঃ
সংভগ্না ইব বাতেন কর্ণিকারাঃ সুপুষ্পিতাঃ
18.50
নানাপুষ্পস্রজোপেতা নানাকুণ্ডলধারিণঃ
নানাজাত্যা হতাস্তত্র নানাদেশসমাগতাঃ
18.51
পতাকাধ্বজসংছন্নং পদাতীনাং মহদ্বলম্
নিকৃত্তং বিবভৌ তত্র ঘোররূপং ভয়ানকম্
18.52
যুধিষ্ঠিরপুরোগাস্তু সর্বসৈন্যমহারথাঃ
অভ্যধাবন্মহাত্মানং পুত্রং দুর্যোধনং তব
18.53
তে সর্বে তাবকান্দৃষ্ট্বা মহেষ্বাসান্পরাঙ্মুখান্
নাভ্যবর্তন্ত তে পুত্রং বেলেব মকরালয়ম্
18.54
তদদ্ভুতমপশ্যাম তব পুত্রস্য পৌরুষম্
যদেকং সহিতাঃ পার্থা ন শেকুরতিবর্তিতুম্
18.55
নাতিদূরাপয়াতং তু কৃতবুদ্ধিং পলায়নে
দুর্যোধনঃ স্বকং সৈন্যমব্রবীদ্ভৃশবিক্ষতম্
18.56
ন তং দেশং প্রপশ্যামি পৃথিব্যাং পর্বতেষু বা
যত্র যাতান্ন বো হন্যুঃ পাণ্ডবাঃ কিং সৃতেন বঃ
18.57
অল্পং চ বলমেতেষাং কৃষ্ণৌ চ ভৃশবিক্ষতৌ
যদি সর্বেঽত্র তিষ্ঠামো ধ্রুবো নো বিজয়ো ভবেৎ
18.58
বিপ্রয়াতাংস্তু বো ভিন্নান্পাণ্ডবাঃ কৃতকিল্বিষান্
অনুসৃত্য হনিষ্যন্তি শ্রেয়ো নঃ সমরে স্থিতম্
18.59
শৃণুধ্বং ক্ষত্রিয়াঃ সর্বে যাবন্তঃ স্থ সমাগতাঃ
যদা শূরং চ ভীরুং চ মারয়ত্যন্তকঃ সদা
কো নু মূঢো ন যুধ্যেত পুরুষঃ ক্ষত্রিয়ব্রুবঃ
18.60
শ্রেয়ো নো ভীমসেনস্য ক্রুদ্ধস্য প্রমুখে স্থিতম্
সুখঃ সাংগ্রামিকো মৃত্যুঃ ক্ষত্রধর্মেণ যুধ্যতাম্
জিত্বেহ সুখমাপ্নোতি হতঃ প্রেত্য মহত্ফলম্
18.61
ন যুদ্ধধর্মাচ্ছ্রেয়ান্বৈ পন্থাঃ স্বর্গস্য কৌরবাঃ
অচিরেণ জিতাঁল্লোকান্হতো যুদ্ধে সমশ্নুতে
18.62
শ্রুত্বা তু বচনং তস্য পূজয়িত্বা চ পার্থিবাঃ
পুনরেবান্ববর্তন্ত পাণ্ডবানাততায়িনঃ
18.63
তানাপতত এবাশু ব্যূঢানীকাঃ প্রহারিণঃ
প্রত্যুদ্যয়ুস্তদা পার্থা জয়গৃধ্রাঃ প্রহারিণঃ
18.64
ধনংজয়ো রথেনাজাবভ্যবর্তত বীর্যবান্
বিশ্রুতং ত্রিষু লোকেষু গাণ্ডীবং বিক্ষিপন্ধনুঃ
18.65
মাদ্রীপুত্রৌ চ শকুনিং সাত্যকিশ্চ মহাবলঃ
জবেনাভ্যপতন্হৃষ্টা যতো বৈ তাবকং বলম্