Utshovঅধ্যায় 17
17.1
সংজয় উবাচ
শল্যে তু নিহতে রাজন্মদ্ররাজপদানুগাঃ
রথাঃ সপ্তশতা বীরা নির্যয়ুর্মহতো বলাৎ
17.2
দুর্যোধনস্তু দ্বিরদমারুহ্যাচলসংনিভম্
ছত্রেণ ধ্রিয়মাণেন বীজ্যমানশ্চ চামরৈঃ
ন গন্তব্যং ন গন্তব্যমিতি মদ্রানবারয়ৎ
17.3
দুর্যোধনেন তে বীরা বার্যমাণাঃ পুনঃ পুনঃ
যুধিষ্ঠিরং জিঘাংসন্তঃ পাণ্ডূনাং প্রাবিশন্বলম্
17.4
তে তু শূরা মহারাজ কৃতচিত্তাঃ স্ম যোধনে
ধনুঃশব্দং মহত্কৃত্বা সহায়ুধ্যন্ত পাণ্ডবৈঃ
17.5
শ্রুত্বা তু নিহতং শল্যং ধর্মপুত্রং চ পীডিতম্
মদ্ররাজপ্রিয়ে যুক্তৈর্মদ্রকাণাং মহারথৈঃ
17.6
আজগাম ততঃ পার্থো গাণ্ডীবং বিক্ষিপন্ধনুঃ
পূরয়ন্রথঘোষেণ দিশঃ সর্বা মহারথঃ
17.7
ততোঽর্জুনশ্চ ভীমশ্চ মাদ্রীপুত্রৌ চ পাণ্ডবৌ
সাত্যকিশ্চ নরব্যাঘ্রো দ্রৌপদেয়াশ্চ সর্বশঃ
17.8
ধৃষ্টদ্যুম্নঃ শিখণ্ডী চ পাঞ্চালাঃ সহ সোমকৈঃ
যুধিষ্ঠিরং পরীপ্সন্তঃ সমন্তাত্পর্যবারয়ন্
17.9
তে সমন্তাত্পরিবৃতাঃ পাণ্ডবৈঃ পুরুষর্ষভাঃ
ক্ষোভয়ন্তি স্ম তাং সেনাং মকরাঃ সাগরং যথা
17.10
পুরোবাতেন গঙ্গেব ক্ষোভ্যমানা মহানদী
অক্ষোভ্যত তদা রাজন্পাণ্ডূনাং ধ্বজিনী পুনঃ
17.11
প্রস্কন্দ্য সেনাং মহতীং ত্যক্তাত্মানো মহারথাঃ
বৃক্ষানিব মহাবাতাঃ কম্পয়ন্তি স্ম তাবকাঃ
17.12
বহবশ্চুক্রুশুস্তত্র ক্ব স রাজা যুধিষ্ঠিরঃ
ভ্রাতরো বাস্য তে শূরা দৃশ্যন্তে নেহ কেচন
17.13
পাঞ্চালানাং মহাবীর্যাঃ শিখণ্ডী চ মহারথঃ
ধৃষ্টদ্যুম্নোঽথ শৈনেয়ো দ্রৌপদেয়াশ্চ সর্বশঃ
17.14
এবং তান্বাদিনঃ শূরান্দ্রৌপদেয়া মহারথাঃ
অভ্যঘ্নন্যুয়ুধানশ্চ মদ্ররাজপদানুগান্
17.15
চক্রৈর্বিমথিতৈঃ কেচিত্কেচিচ্ছিন্নৈর্মহাধ্বজৈঃ
প্রত্যদৃশ্যন্ত সমরে তাবকা নিহতাঃ পরৈঃ
17.16
আলোক্য পাণ্ডবান্যুদ্ধে যোধা রাজন্সমন্ততঃ
বার্যমাণা যয়ুর্বেগাত্তব পুত্রেণ ভারত
17.17
দুর্যোধনস্তু তান্বীরান্বারয়ামাস সান্ত্বয়ন্
ন চাস্য শাসনং কশ্চিত্তত্র চক্রে মহারথঃ
17.18
ততো গান্ধাররাজস্য পুত্রঃ শকুনিরব্রবীৎ
দুর্যোধনং মহারাজ বচনং বচনক্ষমঃ
17.19
কিং নঃ সংপ্রেক্ষমাণানাং মদ্রাণাং হন্যতে বলম্
ন যুক্তমেতত্সমরে ত্বয়ি তিষ্ঠতি ভারত
17.20
সহিতৈর্নাম যোদ্ধব্যমিত্যেষ সময়ঃ কৃতঃ
অথ কস্মাত্পরানেব ঘ্নতো মর্ষয়সে নৃপ
17.21
দুর্যোধন উবাচ
বার্যমাণা ময়া পূর্বং নৈতে চক্রুর্বচো মম
এতে হি নিহতাঃ সর্বে প্রস্কন্নাঃ পাণ্ডুবাহিনীম্
17.22
শকুনিরুবাচ
ন ভর্তুঃ শাসনং বীরা রণে কুর্বন্ত্যমর্ষিতাঃ
অলং ক্রোদ্ধুং তথৈতেষাং নায়ং কাল উপেক্ষিতুম্
17.23
যামঃ সর্বেঽত্র সংভূয় সবাজিরথকুঞ্জরাঃ
পরিত্রাতুং মহেষ্বাসান্মদ্ররাজপদানুগান্
17.24
অন্যোন্যং পরিরক্ষামো যত্নেন মহতা নৃপ
এবং সর্বেঽনুসংচিন্ত্য প্রয়য়ুর্যত্র সৈনিকাঃ
17.25
সংজয় উবাচ
এবমুক্তস্ততো রাজা বলেন মহতা বৃতঃ
প্রয়য়ৌ সিংহনাদেন কম্পয়ন্বৈ বসুংধরাম্
17.26
হত বিধ্যত গৃহ্ণীত প্রহরধ্বং নিকৃন্তত
ইত্যাসীত্তুমুলঃ শব্দস্তব সৈন্যস্য ভারত
17.27
পাণ্ডবাস্তু রণে দৃষ্ট্বা মদ্ররাজপদানুগান্
সহিতানভ্যবর্তন্ত গুল্মমাস্থায় মধ্যমম্
17.28
তে মুহূর্তাদ্রণে বীরা হস্তাহস্তং বিশাং পতে
নিহতাঃ প্রত্যদৃশ্যন্ত মদ্ররাজপদানুগাঃ
17.29
ততো নঃ সংপ্রয়াতানাং হতামিত্রাস্তরস্বিনঃ
হৃষ্টাঃ কিলকিলাশব্দমকুর্বন্সহিতাঃ পরে
17.30
অথোত্থিতানি রুণ্ডানি সমদৃশ্যন্ত সর্বশঃ
পপাত মহতী চোল্কা মধ্যেনাদিত্যমণ্ডলম্
17.31
রথৈর্ভগ্নৈর্যুগাক্ষৈশ্চ নিহতৈশ্চ মহারথৈঃ
অশ্বৈর্নিপতিতৈশ্চৈব সংছন্নাভূদ্বসুংধরা
17.32
বাতায়মানৈস্তুরগৈর্যুগাসক্তৈস্তুরংগমৈঃ
অদৃশ্যন্ত মহারাজ যোধাস্তত্র রণাজিরে
17.33
ভগ্নচক্রান্রথান্কেচিদবহংস্তুরগা রণে
রথার্ধং কেচিদাদায় দিশো দশ বিবভ্রমুঃ
তত্র তত্র চ দৃশ্যন্তে যোক্ত্রৈঃ শ্লিষ্টাঃ স্ম বাজিনঃ
17.34
রথিনঃ পতমানাশ্চ ব্যদৃশ্যন্ত নরোত্তম
গগনাত্প্রচ্যুতাঃ সিদ্ধাঃ পুণ্যানামিব সংক্ষয়ে
17.35
নিহতেষু চ শূরেষু মদ্ররাজানুগেষু চ
অস্মানাপততশ্চাপি দৃষ্ট্বা পার্থা মহারথাঃ
17.36
অভ্যবর্তন্ত বেগেন জয়গৃধ্রাঃ প্রহারিণঃ
বাণশব্দরবান্কৃত্বা বিমিশ্রাঞ্শঙ্খনিস্বনৈঃ
17.37
অস্মাংস্তু পুনরাসাদ্য লব্ধলক্ষাঃ প্রহারিণঃ
শরাসনানি ধুন্বানাঃ সিংহনাদান্প্রচুক্রুশুঃ
17.38
ততো হতমভিপ্রেক্ষ্য মদ্ররাজবলং মহৎ
মদ্ররাজং চ সমরে দৃষ্ট্বা শূরং নিপাতিতম্
দুর্যোধনবলং সর্বং পুনরাসীত্পরাঙ্মুখম্
17.39
বধ্যমানং মহারাজ পাণ্ডবৈর্জিতকাশিভিঃ
দিশো ভেজেঽথ সংভ্রান্তং ত্রাসিতং দৃঢধন্বিভিঃ