Utshovঅধ্যায় 16
16.1
সংজয় উবাচ
অথান্যদ্ধনুরাদায় বলবদ্বেগবত্তরম্
যুধিষ্ঠিরং মদ্রপতির্বিদ্ধ্বা সিংহ ইবানদৎ
16.2
ততঃ স শরবর্ষেণ পর্জন্য ইব বৃষ্টিমান্
অভ্যবর্ষদমেয়াত্মা ক্ষত্রিয়ান্ক্ষত্রিয়র্ষভঃ
16.3
সাত্যকিং দশভির্বিদ্ধ্বা ভীমসেনং ত্রিভিঃ শরৈঃ
সহদেবং ত্রিভির্বিদ্ধ্বা যুধিষ্ঠিরমপীডয়ৎ
16.4
তাংস্তানন্যান্মহেষ্বাসান্সাশ্বান্সরথকুঞ্জরান্
কুঞ্জরান্কুঞ্জরারোহানশ্বানশ্বপ্রয়ায়িনঃ
রথাংশ্চ রথিভিঃ সার্ধং জঘান রথিনাং বরঃ
16.5
বাহূংশ্চিচ্ছেদ চ তথা সায়ুধান্কেতনানি চ
চকার চ মহীং যোধৈস্তীর্ণাং বেদীং কুশৈরিব
16.6
তথা তমরিসৈন্যানি ঘ্নন্তং মৃত্যুমিবান্তকম্
পরিবব্রুর্ভৃশং ক্রুদ্ধাঃ পাণ্ডুপাঞ্চালসোমকাঃ
16.7
তং ভীমসেনশ্চ শিনেশ্চ নপ্তা; মাদ্র্যাশ্চ পুত্রৌ পুরুষপ্রবীরৌ
সমাগতং ভীমবলেন রাজ্ঞা; পর্যাপুরন্যোন্যমথাহ্বয়ন্তঃ
16.8
ততস্তু শূরাঃ সমরে নরেন্দ্রং; মদ্রেশ্বরং প্রাপ্য যুধাং বরিষ্ঠম্
আবার্য চৈনং সমরে নৃবীরা; জঘ্নুঃ শরৈঃ পত্রিভিরুগ্রবেগৈঃ
16.9
সংরক্ষিতো ভীমসেনেন রাজা; মাদ্রীসুতাভ্যামথ মাধবেন
মদ্রাধিপং পত্রিভিরুগ্রবেগৈঃ; স্তনান্তরে ধর্মসুতো নিজঘ্নে
16.10
ততো রণে তাবকানাং রথৌঘাঃ; সমীক্ষ্য মদ্রাধিপতিং শরার্তম্
পর্যাবব্রুঃ প্রবরাঃ সর্বশশ্চ; দুর্যোধনস্যানুমতে সমন্তাৎ
16.11
ততো দ্রুতং মদ্রজনাধিপো রণে; যুধিষ্ঠিরং সপ্তভিরভ্যবিধ্যৎ
তং চাপি পার্থো নবভিঃ পৃষত্কৈ;র্বিব্যাধ রাজংস্তুমুলে মহাত্মা
16.12
আকর্ণপূর্ণায়তসংপ্রয়ুক্তৈঃ; শরৈস্তদা সংয়তি তৈলধৌতৈঃ
অন্যোন্যমাচ্ছাদয়তাং মহারথৌ; মদ্রাধিপশ্চাপি যুধিষ্ঠিরশ্চ
16.13
ততস্তু তূর্ণং সমরে মহারথৌ; পরস্পরস্যান্তরমীক্ষমাণৌ
শরৈর্ভৃশং বিব্যধতুর্নৃপোত্তমৌ; মহাবলৌ শত্রুভিরপ্রধৃষ্যৌ
16.14
তয়োর্ধনুর্জ্যাতলনিস্বনো মহা;ন্মহেন্দ্রবজ্রাশনিতুল্যনিস্বনঃ
পরস্পরং বাণগণৈর্মহাত্মনোঃ; প্রবর্ষতোর্মদ্রপপাণ্ডুবীরয়োঃ
16.15
তৌ চেরতুর্ব্যাঘ্রশিশুপ্রকাশৌ; মহাবনেষ্বামিষগৃদ্ধিনাবিব
বিষাণিনৌ নাগবরাবিবোভৌ; ততক্ষতুঃ সংয়ুগজাতদর্পৌ
16.16
ততস্তু মদ্রাধিপতির্মহাত্মা; যুধিষ্ঠিরং ভীমবলং প্রসহ্য
বিব্যাধ বীরং হৃদয়েঽতিবেগং; শরেণ সূর্যাগ্নিসমপ্রভেণ
16.17
ততোঽতিবিদ্ধোঽথ যুধিষ্ঠিরোঽপি; সুসংপ্রয়ুক্তেন শরেণ রাজন্
জঘান মদ্রাধিপতিং মহাত্মা; মুদং চ লেভে ঋষভঃ কুরূণাম্
16.18
ততো মুহূর্তাদিব পার্থিবেন্দ্রো; লব্ধ্বা সংজ্ঞাং ক্রোধসংরক্তনেত্রঃ
শতেন পার্থং ত্বরিতো জঘান; সহস্রনেত্রপ্রতিমপ্রভাবঃ
16.19
ত্বরংস্ততো ধর্মসুতো মহাত্মা; শল্যস্য ক্রুদ্ধো নবভিঃ পৃষত্কৈঃ
ভিত্ত্বা হ্যুরস্তপনীয়ং চ বর্ম; জঘান ষড্ভিস্ত্বপরৈঃ পৃষত্কৈঃ
16.20
ততস্তু মদ্রাধিপতিঃ প্রহৃষ্টো; ধনুর্বিকৃষ্য ব্যসৃজত্পৃষত্কান্
দ্বাভ্যাং ক্ষুরাভ্যাং চ তথৈব রাজ্ঞ;শ্চিচ্ছেদ চাপং কুরুপুংগবস্য
16.21
নবং ততোঽন্যত্সমরে প্রগৃহ্য; রাজা ধনুর্ঘোরতরং মহাত্মা
শল্যং তু বিদ্ধ্বা নিশিতৈঃ সমন্তা;দ্যথা মহেন্দ্রো নমুচিং শিতাগ্রৈঃ
16.22
ততস্তু শল্যো নবভিঃ পৃষত্কৈ;র্ভীমস্য রাজ্ঞশ্চ যুধিষ্ঠিরস্য
নিকৃত্য রৌক্মে পটুবর্মণী তয়ো;র্বিদারয়ামাস ভুজৌ মহাত্মা
16.23
ততোঽপরেণ জ্বলিতার্কতেজসা; ক্ষুরেণ রাজ্ঞো ধনুরুন্মমাথ
কৃপশ্চ তস্যৈব জঘান সূতং; ষড্ভিঃ শরৈঃ সোঽভিমুখং পপাত
16.24
মদ্রাধিপশ্চাপি যুধিষ্ঠিরস্য; শরৈশ্চতুর্ভির্নিজঘান বাহান্
বাহাংশ্চ হত্বা ব্যকরোন্মহাত্মা; যোধক্ষয়ং ধর্মসুতস্য রাজ্ঞঃ
16.25
তথা কৃতে রাজনি ভীমসেনো; মদ্রাধিপস্যাশু ততো মহাত্মা
ছিত্ত্বা ধনুর্বেগবতা শরেণ; দ্বাভ্যামবিধ্যত্সুভৃশং নরেন্দ্রম্
16.26
অথাপরেণাস্য জহার যন্তুঃ; কায়াচ্ছিরঃ সংনহনীয়মধ্যাৎ
জঘান চাশ্বাংশ্চতুরঃ স শীঘ্রং; তথা ভৃশং কুপিতো ভীমসেনঃ
16.27
তমগ্রণীঃ সর্বধনুর্ধরাণা;মেকং চরন্তং সমরেঽতিবেগম্
ভীমঃ শতেন ব্যকিরচ্ছরাণাং; মাদ্রীপুত্রঃ সহদেবস্তথৈব
16.28
তৈঃ সায়কৈর্মোহিতং বীক্ষ্য শল্যং; ভীমঃ শরৈরস্য চকর্ত বর্ম
স ভীমসেনেন নিকৃত্তবর্মা; মদ্রাধিপশ্চর্ম সহস্রতারম্
16.29
প্রগৃহ্য খড্গং চ রথান্মহাত্মা; প্রস্কন্দ্য কুন্তীসুতমভ্যধাবৎ
ছিত্ত্বা রথেষাং নকুলস্য সোঽথ; যুধিষ্ঠিরং ভীমবলোঽভ্যধাবৎ
16.30
তং চাপি রাজানমথোত্পতন্তং; ক্রুদ্ধং যথৈবান্তকমাপতন্তম্
ধৃষ্টদ্যুম্নো দ্রৌপদেয়াঃ শিখণ্ডী; শিনেশ্চ নপ্তা সহসা পরীয়ুঃ
16.31
অথাস্য চর্মাপ্রতিমং ন্যকৃন্ত;দ্ভীমো মহাত্মা দশভিঃ পৃষত্কঃ
খড্গং চ ভল্লৈর্নিচকর্ত মুষ্টৌ; নদন্প্রহৃষ্টস্তব সৈন্যমধ্যে
16.32
তত্কর্ম ভীমস্য সমীক্ষ্য হৃষ্টা;স্তে পাণ্ডবানাং প্রবরা রথৌঘাঃ
নাদং চ চক্রুর্ভৃশমুত্স্ময়ন্তঃ; শঙ্খাংশ্চ দধ্মুঃ শশিসংনিকাশান্
16.33
তেনাথ শব্দেন বিভীষণেন; তবাভিতপ্তং বলমপ্রহৃষ্টম্
স্বেদাভিভূতং রুধিরোক্ষিতাঙ্গং; বিসংজ্ঞকল্পং চ তথা বিষণ্ণম্
16.34
স মদ্ররাজঃ সহসাবকীর্ণো; ভীমাগ্রগৈঃ পাণ্ডবয়োধমুখ্যৈঃ
যুধিষ্ঠিরস্যাভিমুখং জবেন; সিংহো যথা মৃগহেতোঃ প্রয়াতঃ
16.35
স ধর্মরাজো নিহতাশ্বসূতং; ক্রোধেন দীপ্তজ্বলনপ্রকাশম্
দৃষ্ট্বা তু মদ্রাধিপতিং স তূর্ণং; সমভ্যধাবত্তমরিং বলেন
16.36
গোবিন্দবাক্যং ত্বরিতং বিচিন্ত্য; দধ্রে মতিং শল্যবিনাশনায়
স ধর্মরাজো নিহতাশ্বসূতে; রথে তিষ্ঠঞ্শক্তিমেবাভিকাঙ্ক্ষন্
16.37
তচ্চাপি শল্যস্য নিশম্য কর্ম; মহাত্মনো ভাগমথাবশিষ্টম্
স্মৃত্বা মনঃ শল্যবধে যতাত্মা; যথোক্তমিন্দ্রাবরজস্য চক্রে
16.38
স ধর্মরাজো মণিহেমদণ্ডাং; জগ্রাহ শক্তিং কনকপ্রকাশাম্
নেত্রে চ দীপ্তে সহসা বিবৃত্য; মদ্রাধিপং ক্রুদ্ধমনা নিরৈক্ষৎ
16.39
নিরীক্ষিতো বৈ নরদেব রাজ্ঞা; পূতাত্মনা নির্হৃতকল্মষেণ
অভূন্ন যদ্ভস্মসান্মদ্ররাজ;স্তদদ্ভুতং মে প্রতিভাতি রাজন্
16.40
ততস্তু শক্তিং রুচিরোগ্রদণ্ডাং; মণিপ্রবালোজ্জ্বলিতাং প্রদীপ্তাম্
চিক্ষেপ বেগাত্সুভৃশং মহাত্মা; মদ্রাধিপায় প্রবরঃ কুরূণাম্
16.41
দীপ্তামথৈনাং মহতা বলেন; সবিস্ফুলিঙ্গাং সহসা পতন্তীম্
প্রৈক্ষন্ত সর্বে কুরবঃ সমেতা; যথা যুগান্তে মহতীমিবোল্কাম্
16.42
তাং কালরাত্রীমিব পাশহস্তাং; যমস্য ধাত্রীমিব চোগ্ররূপাম্
সব্রহ্মদণ্ডপ্রতিমামমোঘাং; সসর্জ যত্তো যুধি ধর্মরাজঃ
16.43
গন্ধস্রগগ্র্যাসনপানভোজনৈ;রভ্যর্চিতাং পাণ্ডুসুতৈঃ প্রয়ত্নাৎ
সংবর্তকাগ্নিপ্রতিমাং জ্বলন্তীং; কৃত্যামথর্বাঙ্গিরসীমিবোগ্রাম্
16.44
ঈশানহেতোঃ প্রতিনির্মিতাং তাং; ত্বষ্ট্রা রিপূণামসুদেহভক্ষাম্
ভূম্যন্তরিক্ষাদিজলাশয়ানি; প্রসহ্য ভূতানি নিহন্তুমীশাম্
16.45
ঘণ্টাপতাকামণিবজ্রভাজং; বৈডূর্যচিত্রাং তপনীয়দণ্ডাম্
ত্বষ্ট্রা প্রয়ত্নান্নিয়মেন কৢপ্তাং; ব্রহ্মদ্বিষামন্তকরীমমোঘাম্
16.46
বলপ্রয়ত্নাদধিরূঢবেগাং; মন্ত্রৈশ্চ ঘোরৈরভিমন্ত্রয়িত্বা
সসর্জ মার্গেণ চ তাং পরেণ; বধায় মদ্রাধিপতেস্তদানীম্
16.47
হতোঽস্যসাবিত্যভিগর্জমানো; রুদ্রোঽন্তকায়ান্তকরং যথেষুম্
প্রসার্য বাহুং সুদৃঢং সুপাণিং; ক্রোধেন নৃত্যন্নিব ধর্মরাজঃ
16.48
তাং সর্বশক্ত্যা প্রহিতাং স শক্তিং; যুধিষ্ঠিরেণাপ্রতিবার্যবীর্যাম্
প্রতিগ্রহায়াভিননর্দ শল্যঃ; সম্যগ্ঘুতামগ্নিরিবাজ্যধারাম্
16.49
সা তস্য মর্মাণি বিদার্য শুভ্র;মুরো বিশালং চ তথৈব বর্ম
বিবেশ গাং তোয়মিবাপ্রসক্তা; যশো বিশালং নৃপতের্দহন্তী
16.50
নাসাক্ষিকর্ণাস্যবিনিঃসৃতেন; প্রস্যন্দতা চ ব্রণসংভবেন
সংসিক্তগাত্রো রুধিরেণ সোঽভূ;ত্ক্রৌঞ্চো যথা স্কন্দহতো মহাদ্রিঃ
16.51
প্রসার্য বাহূ স রথাদ্গতো গাং; সংছিন্নবর্মা কুরুনন্দনেন
মহেন্দ্রবাহপ্রতিমো মহাত্মা; বজ্রাহতং শৃঙ্গমিবাচলস্য
16.52
বাহূ প্রসার্যাভিমুখো ধর্মরাজস্য মদ্ররাট্
ততো নিপতিতো ভূমাবিন্দ্রধ্বজ ইবোচ্ছ্রিতঃ
16.53
স তথা ভিন্নসর্বাঙ্গো রুধিরেণ সমুক্ষিতঃ
প্রত্যুদ্গত ইব প্রেম্ণা ভূম্যা স নরপুংগবঃ
16.54
প্রিয়য়া কান্তয়া কান্তঃ পতমান ইবোরসি
চিরং ভুক্ত্বা বসুমতীং প্রিয়াং কান্তামিব প্রভুঃ
সর্বৈরঙ্গৈঃ সমাশ্লিষ্য প্রসুপ্ত ইব সোঽভবৎ
16.55
ধর্ম্যে ধর্মাত্মনা যুদ্ধে নিহতো ধর্মসূনুনা
সম্যগ্ঘুত ইব স্বিষ্টঃ প্রশান্তোঽগ্নিরিবাধ্বরে
16.56
শক্ত্যা বিভিন্নহৃদয়ং বিপ্রবিদ্ধায়ুধধ্বজম্
সংশান্তমপি মদ্রেশং লক্ষ্মীর্নৈব ব্যমুঞ্চত
16.57
ততো যুধিষ্ঠিরশ্চাপমাদায়েন্দ্রধনুষ্প্রভম্
ব্যধমদ্দ্বিষতঃ সংখ্যে খগরাডিব পন্নগান্
দেহাসূন্নিশিতৈর্ভল্লৈ রিপূণাং নাশয়ন্ক্ষণাৎ
16.58
ততঃ পার্থস্য বাণৌঘৈরাবৃতাঃ সৈনিকাস্তব
নিমীলিতাক্ষাঃ ক্ষিণ্বন্তো ভৃশমন্যোন্যমর্দিতাঃ
সংন্যস্তকবচা দেহৈর্বিপত্রায়ুধজীবিতাঃ
16.59
ততঃ শল্যে নিপতিতে মদ্ররাজানুজো যুবা
ভ্রাতুঃ সর্বৈর্গুণৈস্তুল্যো রথী পাণ্ডবমভ্যয়াৎ
16.60
বিব্যাধ চ নরশ্রেষ্ঠো নারাচৈর্বহুভিস্ত্বরন্
হতস্যাপচিতিং ভ্রাতুশ্চিকীর্ষুর্যুদ্ধদুর্মদঃ
16.61
তং বিব্যাধাশুগৈঃ ষড্ভির্ধর্মরাজস্ত্বরন্নিব
কার্মুকং চাস্য চিচ্ছেদ ক্ষুরাভ্যাং ধ্বজমেব চ
16.62
ততোঽস্য দীপ্যমানেন সুদৃঢেন শিতেন চ
প্রমুখে বর্তমানস্য ভল্লেনাপাহরচ্ছিরঃ
16.63
সকুণ্ডলং তদ্দদৃশে পতমানং শিরো রথাৎ
পুণ্যক্ষয়মিব প্রাপ্য পতন্তং স্বর্গবাসিনম্
16.64
তস্যাপকৃষ্টশীর্ষং তচ্ছরীরং পতিতং রথাৎ
রুধিরেণাবসিক্তাঙ্গং দৃষ্ট্বা সৈন্যমভজ্যত
16.65
বিচিত্রকবচে তস্মিন্হতে মদ্রনৃপানুজে
হাহাকারং বিকুর্বাণাঃ কুরবো বিপ্রদুদ্রুবুঃ
16.66
শল্যানুজং হতং দৃষ্ট্বা তাবকাস্ত্যক্তজীবিতাঃ
বিত্রেসুঃ পাণ্ডবভয়াদ্রজোধ্বস্তাস্তথা ভৃশম্
16.67
তাংস্তথা ভজ্যতস্ত্রস্তান্কৌরবান্ভরতর্ষভ
শিনের্নপ্তা কিরন্বাণৈরভ্যবর্তত সাত্যকিঃ
16.68
তমায়ান্তং মহেষ্বাসমপ্রসহ্যং দুরাসদম্
হার্দিক্যস্ত্বরিতো রাজন্প্রত্যগৃহ্ণাদভীতবৎ
16.69
তৌ সমেতৌ মহাত্মানৌ বার্ষ্ণেয়াবপরাজিতৌ
হার্দিক্যঃ সাত্যকিশ্চৈব সিংহাবিব মদোত্কটৌ
16.70
ইষুভির্বিমলাভাসৈশ্ছাদয়ন্তৌ পরস্পরম্
অর্চির্ভিরিব সূর্যস্য দিবাকরসমপ্রভৌ
16.71
চাপমার্গবলোদ্ধূতান্মার্গণান্বৃষ্ণিসিংহয়োঃ
আকাশে সমপশ্যাম পতংগানিব শীঘ্রগান্
16.72
সাত্যকিং দশভির্বিদ্ধ্বা হয়াংশ্চাস্য ত্রিভিঃ শরৈঃ
চাপমেকেন চিচ্ছেদ হার্দিক্যো নতপর্বণা
16.73
তন্নিকৃত্তং ধনুঃ শ্রেষ্ঠমপাস্য শিনিপুংগবঃ
অন্যদাদত্ত বেগেন বেগবত্তরমায়ুধম্
16.74
তদাদায় ধনুঃ শ্রেষ্ঠং বরিষ্ঠঃ সর্বধন্বিনাম্
হার্দিক্যং দশভির্বাণৈঃ প্রত্যবিধ্যত্স্তনান্তরে
16.75
ততো রথং যুগেষাং চ ছিত্ত্বা ভল্লৈঃ সুসংয়তৈঃ
অশ্বাংস্তস্যাবধীত্তূর্ণমুভৌ চ পার্ষ্ণিসারথী
16.76
মদ্ররাজে হতে রাজন্বিরথে কৃতবর্মণি
দুর্যোধনবলং সর্বং পুনরাসীত্পরাঙ্মুখম্
16.77
তত্পরে নাববুধ্যন্ত সৈন্যেন রজসা বৃতে
বলং তু হতভূয়িষ্ঠং তত্তদাসীত্পরাঙ্মুখম্
16.78
ততো মুহূর্তাত্তেঽপশ্যন্রজো ভৌমং সমুত্থিতম্
বিবিধৈঃ শোণিতস্রাবৈঃ প্রশান্তং পুরুষর্ষভ
16.79
ততো দুর্যোধনো দৃষ্ট্বা ভগ্নং স্ববলমন্তিকাৎ
জবেনাপততঃ পার্থানেকঃ সর্বানবারয়ৎ
16.80
পাণ্ডবান্সরথান্দৃষ্ট্বা ধৃষ্টদ্যুম্নং চ পার্ষতম্
আনর্তং চ দুরাধর্ষং শিতৈর্বাণৈরবাকিরৎ
16.81
তং পরে নাভ্যবর্তন্ত মর্ত্যা মৃত্যুমিবাগতম্
অথান্যং রথমাস্থায় হার্দিক্যোঽপি ন্যবর্তত
16.82
ততো যুধিষ্ঠিরো রাজা ত্বরমাণো মহারথঃ
চতুর্ভির্নিজঘানাশ্বান্পত্রিভিঃ কৃতবর্মণঃ
বিব্যাধ গৌতমং চাপি ষড্ভির্ভল্লৈঃ সুতেজনৈঃ
16.83
অশ্বত্থামা ততো রাজ্ঞা হতাশ্বং বিরথীকৃতম্
সমপোবাহ হার্দিক্যং স্বরথেন যুধিষ্ঠিরাৎ
16.84
ততঃ শারদ্বতোঽষ্টাভিঃ প্রত্যবিধ্যদ্যুধিষ্ঠিরম্
বিব্যাধ চাশ্বান্নিশিতৈস্তস্যাষ্টাভিঃ শিলীমুখৈঃ
16.85
এবমেতন্মহারাজ যুদ্ধশেষমবর্তত
তব দুর্মন্ত্রিতে রাজন্সহপুত্রস্য ভারত
16.86
তস্মিন্মহেষ্বাসবরে বিশস্তে; সংগ্রামমধ্যে কুরুপুংগবেন
পার্থাঃ সমেতাঃ পরমপ্রহৃষ্টাঃ; শঙ্খান্প্রদধ্মুর্হতমীক্ষ্য শল্যম্
16.87
যুধিষ্ঠিরং চ প্রশশংসুরাজৌ; পুরা সুরা বৃত্রবধে যথেন্দ্রম্
চক্রুশ্চ নানাবিধবাদ্যশব্দা;ন্নিনাদয়ন্তো বসুধাং সমন্তাৎ