Utshovঅধ্যায় 15
15.1
সংজয় উবাচ
ততঃ সৈন্যাস্তব বিভো মদ্ররাজপুরস্কৃতাঃ
পুনরভ্যদ্রবন্পার্থান্বেগেন মহতা রণে
15.2
পীডিতাস্তাবকাঃ সর্বে প্রধাবন্তো রণোত্কটাঃ
ক্ষণেনৈব চ পার্থাংস্তে বহুত্বাত্সমলোডয়ন্
15.3
তে বধ্যমানাঃ কুরুভিঃ পাণ্ডবা নাবতস্থিরে
নিবার্যমাণা ভীমেন পশ্যতোঃ কৃষ্ণপার্থয়োঃ
15.4
ততো ধনংজয়ঃ ক্রুদ্ধঃ কৃপং সহ পদানুগৈঃ
অবাকিরচ্ছরৌঘেণ কৃতবর্মাণমেব চ
15.5
শকুনিং সহদেবস্তু সহসৈন্যমবারয়ৎ
নকুলঃ পার্শ্বতঃ স্থিত্বা মদ্ররাজমবৈক্ষত
15.6
দ্রৌপদেয়া নরেন্দ্রাংশ্চ ভূয়িষ্ঠং সমবারয়ন্
দ্রোণপুত্রং চ পাঞ্চাল্যঃ শিখণ্ডী সমবারয়ৎ
15.7
ভীমসেনস্তু রাজানং গদাপাণিরবারয়ৎ
শল্যং তু সহ সৈন্যেন কুন্তীপুত্রো যুধিষ্ঠিরঃ
15.8
ততঃ সমভবদ্যুদ্ধং সংসক্তং তত্র তত্র হ
তাবকানাং পরেষাং চ সংগ্রামেষ্বনিবর্তিনাম্
15.9
তত্র পশ্যামহে কর্ম শল্যস্যাতিমহদ্রণে
যদেকঃ সর্বসৈন্যানি পাণ্ডবানাময়ুধ্যত
15.10
ব্যদৃশ্যত তদা শল্যো যুধিষ্ঠিরসমীপতঃ
রণে চন্দ্রমসোঽভ্যাশে শনৈশ্চর ইব গ্রহঃ
15.11
পীডয়িত্বা তু রাজানং শরৈরাশীবিষোপমৈঃ
অভ্যধাবত্পুনর্ভীমং শরবর্ষৈরবাকিরৎ
15.12
তস্য তল্লাঘবং দৃষ্ট্বা তথৈব চ কৃতাস্ত্রতাম্
অপূজয়ন্ননীকানি পরেষাং তাবকানি চ
15.13
পীড্যমানাস্তু শল্যেন পাণ্ডবা ভৃশবিক্ষতাঃ
প্রাদ্রবন্ত রণং হিত্বা ক্রোশমানে যুধিষ্ঠিরে
15.14
বধ্যমানেষ্বনীকেষু মদ্ররাজেন পাণ্ডবঃ
অমর্ষবশমাপন্নো ধর্মরাজো যুধিষ্ঠিরঃ
ততঃ পৌরুষমাস্থায় মদ্ররাজমপীডয়ৎ
15.15
জয়ো বাস্তু বধো বেতি কৃতবুদ্ধির্মহারথঃ
সমাহূয়াব্রবীত্সর্বান্ভ্রাতৄন্কৃষ্ণং চ মাধবম্
15.16
ভীষ্মো দ্রোণশ্চ কর্ণশ্চ যে চান্যে পৃথিবীক্ষিতঃ
কৌরবার্থে পরাক্রান্তাঃ সংগ্রামে নিধনং গতাঃ
15.17
যথাভাগং যথোত্সাহং ভবন্তঃ কৃতপৌরুষাঃ
ভাগোঽবশিষ্ট একোঽয়ং মম শল্যো মহারথঃ
15.18
সোঽহমদ্য যুধা জেতুমাশংসে মদ্রকেশ্বরম্
তত্র যন্মানসং মহ্যং তত্সর্বং নিগদামি বঃ
15.19
চক্ররক্ষাবিমৌ শূরৌ মম মাদ্রবতীসুতৌ
অজেয়ৌ বাসবেনাপি সমরে বীরসংমতৌ
15.20
সাধ্বিমৌ মাতুলং যুদ্ধে ক্ষত্রধর্মপুরস্কৃতৌ
মদর্থং প্রতিয়ুধ্যেতাং মানার্হৌ সত্যসংগরৌ
15.21
মাং বা শল্যো রণে হন্তা তং বাহং ভদ্রমস্তু বঃ
ইতি সত্যামিমাং বাণীং লোকবীরা নিবোধত
15.22
যোত্স্যেঽহং মাতুলেনাদ্য ক্ষত্রধর্মেণ পার্থিবাঃ
স্বয়ং সমভিসংধায় বিজয়ায়েতরায় বা
15.23
তস্য মেঽভ্যধিকং শস্ত্রং সর্বোপকরণানি চ
সংয়ুঞ্জন্তু রণে ক্ষিপ্রং শাস্ত্রবদ্রথয়োজকাঃ
15.24
শৈনেয়ো দক্ষিণং চক্রং ধৃষ্টদ্যুম্নস্তথোত্তরম্
পৃষ্ঠগোপো ভবত্বদ্য মম পার্থো ধনংজয়ঃ
15.25
পুরঃসরো মমাদ্যাস্তু ভীমঃ শস্ত্রভৃতাং বরঃ
এবমভ্যধিকঃ শল্যাদ্ভবিষ্যামি মহামৃধে
15.26
এবমুক্তাস্তথা চক্রুঃ সর্বে রাজ্ঞঃ প্রিয়ৈষিণঃ
ততঃ প্রহর্ষঃ সৈন্যানাং পুনরাসীত্তদা নৃপ
15.27
পাঞ্চালানাং সোমকানাং মত্স্যানাং চ বিশেষতঃ
প্রতিজ্ঞাং তাং চ সংগ্রামে ধর্মরাজস্য পূরয়ন্
15.28
ততঃ শঙ্খাংশ্চ ভেরীশ্চ শতশশ্চৈব পুষ্করান্
অবাদয়ন্ত পাঞ্চালাঃ সিংহনাদাংশ্চ নেদিরে
15.29
তেঽভ্যধাবন্ত সংরব্ধা মদ্ররাজং তরস্বিনঃ
মহতা হর্ষজেনাথ নাদেন কুরুপুংগবাঃ
15.30
হ্রাদেন গজঘণ্টানাং শঙ্খানাং নিনদেন চ
তূর্যশব্দেন মহতা নাদয়ন্তশ্চ মেদিনীম্
15.31
তান্প্রত্যগৃহ্ণাত্পুত্রস্তে মদ্ররাজশ্চ বীর্যবান্
মহামেঘানিব বহূঞ্শৈলাবস্তোদয়াবুভৌ
15.32
শল্যস্তু সমরশ্লাঘী ধর্মরাজমরিংদমম্
ববর্ষ শরবর্ষেণ বর্ষেণ মঘবানিব
15.33
তথৈব কুরুরাজোঽপি প্রগৃহ্য রুচিরং ধনুঃ
দ্রোণোপদেশান্বিবিধান্দর্শয়ানো মহামনাঃ
15.34
ববর্ষ শরবর্ষাণি চিত্রং লঘু চ সুষ্ঠু চ
ন চাস্য বিবরং কশ্চিদ্দদর্শ চরতো রণে
15.35
তাবুভৌ বিবিধৈর্বাণৈস্ততক্ষাতে পরস্পরম্
শার্দূলাবামিষপ্রেপ্সূ পরাক্রান্তাবিবাহবে
15.36
ভীমস্তু তব পুত্রেণ রণশৌণ্ডেন সংগতঃ
পাঞ্চাল্যঃ সাত্যকিশ্চৈব মাদ্রীপুত্রৌ চ পাণ্ডবৌ
শকুনিপ্রমুখান্বীরান্প্রত্যগৃহ্ণন্সমন্ততঃ
15.37
তদাসীত্তুমুলং যুদ্ধং পুনরেব জয়ৈষিণাম্
তাবকানাং পরেষাং চ রাজন্দুর্মন্ত্রিতে তব
15.38
দুর্যোধনস্তু ভীমস্য শরেণানতপর্বণা
চিচ্ছেদাদিশ্য সংগ্রামে ধ্বজং হেমবিভূষিতম্
15.39
সকিঙ্কিণীকজালেন মহতা চারুদর্শনঃ
পপাত রুচিরঃ সিংহো ভীমসেনস্য নানদন্
15.40
পুনশ্চাস্য ধনুশ্চিত্রং গজরাজকরোপমম্
ক্ষুরেণ শিতধারেণ প্রচকর্ত নরাধিপঃ
15.41
স চ্ছিন্নধন্বা তেজস্বী রথশক্ত্যা সুতং তব
বিভেদোরসি বিক্রম্য স রথোপস্থ আবিশৎ
15.42
তস্মিন্মোহমনুপ্রাপ্তে পুনরেব বৃকোদরঃ
যন্তুরেব শিরঃ কায়াত্ক্ষুরপ্রেণাহরত্তদা
15.43
হতসূতা হয়াস্তস্য রথমাদায় ভারত
ব্যদ্রবন্ত দিশো রাজন্হাহাকারস্তদাভবৎ
15.44
তমভ্যধাবত্ত্রাণার্থং দ্রোণপুত্রো মহারথঃ
কৃপশ্চ কৃতবর্মা চ পুত্রং তেঽভিপরীপ্সবঃ
15.45
তস্মিন্বিলুলিতে সৈন্যে ত্রস্তাস্তস্য পদানুগাঃ
গাণ্ডীবধন্বা বিস্ফার্য ধনুস্তানহনচ্ছরৈঃ
15.46
যুধিষ্ঠিরস্তু মদ্রেশমভ্যধাবদমর্ষিতঃ
স্বয়ং সংচোদয়ন্নশ্বান্দন্তবর্ণান্মনোজবান্
15.47
তত্রাদ্ভুতমপশ্যাম কুন্তীপুত্রে যুধিষ্ঠিরে
পুরা ভূত্বা মৃদুর্দান্তো যত্তদা দারুণোঽভবৎ
15.48
বিবৃতাক্ষশ্চ কৌন্তেয়ো বেপমানশ্চ মন্যুনা
চিচ্ছেদ যোধান্নিশিতৈঃ শরৈঃ শতসহস্রশঃ
15.49
যাং যাং প্রত্যুদ্যয়ৌ সেনাং তাং তাং জ্যেষ্ঠঃ স পাণ্ডবঃ
শরৈরপাতয়দ্রাজন্গিরীন্বজ্রৈরিবোত্তমৈঃ
15.50
সাশ্বসূতধ্বজরথান্রথিনঃ পাতয়ন্বহূন্
আক্রীডদেকো বলবান্পবনস্তোয়দানিব
15.51
সাশ্বারোহাংশ্চ তুরগান্পত্তীংশ্চৈব সহস্রশঃ
ব্যপোথয়ত সংগ্রামে ক্রুদ্ধো রুদ্রঃ পশূনিব
15.52
শূন্যমায়োধনং কৃত্বা শরবর্ষৈঃ সমন্ততঃ
অভ্যদ্রবত মদ্রেশং তিষ্ঠ শল্যেতি চাব্রবীৎ
15.53
তস্য তচ্চরিতং দৃষ্ট্বা সংগ্রামে ভীমকর্মণঃ
বিত্রেসুস্তাবকাঃ সর্বে শল্যস্ত্বেনং সমভ্যয়াৎ
15.54
ততস্তৌ তু সুসংরব্ধৌ প্রধ্মাপ্য সলিলোদ্ভবৌ
সমাহূয় তদান্যোন্যং ভর্ত্সয়ন্তৌ সমীয়তুঃ
15.55
শল্যস্তু শরবর্ষেণ যুধিষ্ঠিরমবাকিরৎ
মদ্ররাজং চ কৌন্তেয়ঃ শরবর্ষৈরবাকিরৎ
15.56
ব্যদৃশ্যেতাং তদা রাজন্কঙ্কপত্রিভিরাহবে
উদ্ভিন্নরুধিরৌ শূরৌ মদ্ররাজয়ুধিষ্ঠিরৌ
15.57
পুষ্পিতাবিব রেজাতে বনে শল্মলিকিংশুকৌ
দীপ্যমানৌ মহাত্মানৌ প্রাণয়োর্যুদ্ধদুর্মদৌ
15.58
দৃষ্ট্বা সর্বাণি সৈন্যানি নাধ্যবস্যংস্তয়োর্জয়ম্
হত্বা মদ্রাধিপং পার্থো ভোক্ষ্যতেঽদ্য বসুংধরাম্
15.59
শল্যো বা পাণ্ডবং হত্বা দদ্যাদ্দুর্যোধনায় গাম্
ইতীব নিশ্চয়ো নাভূদ্যোধানাং তত্র ভারত
15.60
প্রদক্ষিণমভূত্সর্বং ধর্মরাজস্য যুধ্যতঃ
15.61
ততঃ শরশতং শল্যো মুমোচাশু যুধিষ্ঠিরে
ধনুশ্চাস্য শিতাগ্রেণ বাণেন নিরকৃন্তত
15.62
সোঽন্যত্কার্মুকমাদায় শল্যং শরশতৈস্ত্রিভিঃ
অবিধ্যত্কার্মুকং চাস্য ক্ষুরেণ নিরকৃন্তত
15.63
অথাস্য নিজঘানাশ্বাংশ্চতুরো নতপর্বভিঃ
দ্বাভ্যামথ শিতাগ্রাভ্যামুভৌ চ পার্ষ্ণিসারথী
15.64
ততোঽস্য দীপ্যমানেন পীতেন নিশিতেন চ
প্রমুখে বর্তমানস্য ভল্লেনাপাহরদ্ধ্বজম্
ততঃ প্রভগ্নং তত্সৈন্যং দৌর্যোধনমরিংদম
15.65
ততো মদ্রাধিপং দ্রৌণিরভ্যধাবত্তথাকৃতম্
আরোপ্য চৈনং স্বরথং ত্বরমাণঃ প্রদুদ্রুবে
15.66
মুহূর্তমিব তৌ গত্বা নর্দমানে যুধিষ্ঠিরে
স্থিত্বা ততো মদ্রপতিরন্যং স্যন্দনমাস্থিতঃ
15.67
বিধিবত্কল্পিতং শুভ্রং মহাম্বুদনিনাদিনম্
সজ্জয়ন্ত্রোপকরণং দ্বিষতাং রোমহর্ষণম্