Utshovঅধ্যায় 14
14.1
সংজয় উবাচ
দুর্যোধনো মহারাজ ধৃষ্টদ্যুম্নশ্চ পার্ষতঃ
চক্রতুঃ সুমহদ্যুদ্ধং শরশক্তিসমাকুলম্
14.2
তয়োরাসন্মহারাজ শরধারাঃ সহস্রশঃ
অম্বুদানাং যথা কালে জলধারাঃ সমন্ততঃ
14.3
রাজা তু পার্ষতং বিদ্ধ্বা শরৈঃ পঞ্চভিরায়সৈঃ
দ্রোণহন্তারমুগ্রেষুঃ পুনর্বিব্যাধ সপ্তভিঃ
14.4
ধৃষ্টদ্যুম্নস্তু সমরে বলবান্দৃঢবিক্রমঃ
সপ্তত্যা বিশিখানাং বৈ দুর্যোধনমপীডয়ৎ
14.5
পীডিতং প্রেক্ষ্য রাজানং সোদর্যা ভরতর্ষভ
মহত্যা সেনয়া সার্ধং পরিবব্রুঃ স্ম পার্ষতম্
14.6
স তৈঃ পরিবৃতঃ শূরৈঃ সর্বতোঽতিরথৈর্ভৃশম্
ব্যচরত্সমরে রাজন্দর্শয়ন্হস্তলাঘবম্
14.7
শিখণ্ডী কৃতবর্মাণং গৌতমং চ মহারথম্
প্রভদ্রকৈঃ সমায়ুক্তো যোধয়ামাস ধন্বিনৌ
14.8
তত্রাপি সুমহদ্যুদ্ধং ঘোররূপং বিশাং পতে
প্রাণান্সংত্যজতাং যুদ্ধে প্রাণদ্যূতাভিদেবনে
14.9
শল্যস্তু শরবর্ষাণি বিমুঞ্চন্সর্বতোদিশম্
পাণ্ডবান্পীডয়ামাস সসাত্যকিবৃকোদরান্
14.10
তথোভৌ চ যমৌ যুদ্ধে যমতুল্যপরাক্রমৌ
যোধয়ামাস রাজেন্দ্র বীর্যেণ চ বলেন চ
14.11
শল্যসায়কনুন্নানাং পাণ্ডবানাং মহামৃধে
ত্রাতারং নাধ্যগচ্ছন্ত কেচিত্তত্র মহারথাঃ
14.12
ততস্তু নকুলঃ শূরো ধর্মরাজে প্রপীডিতে
অভিদুদ্রাব বেগেন মাতুলং মাদ্রিনন্দনঃ
14.13
সংছাদ্য সমরে শল্যং নকুলঃ পরবীরহা
বিব্যাধ চৈনং দশভিঃ স্ময়মানঃ স্তনান্তরে
14.14
সর্বপারশবৈর্বাণৈঃ কর্মারপরিমার্জিতৈঃ
স্বর্ণপুঙ্খৈঃ শিলাধৌতৈর্ধনুর্যন্ত্রপ্রচোদিতৈঃ
14.15
শল্যস্তু পীডিতস্তেন স্বস্রীয়েণ মহাত্মনা
নকুলং পীডয়ামাস পত্রিভির্নতপর্বভিঃ
14.16
ততো যুধিষ্ঠিরো রাজা ভীমসেনোঽথ সাত্যকিঃ
সহদেবশ্চ মাদ্রেয়ো মদ্ররাজমুপাদ্রবন্
14.17
তানাপতত এবাশু পূরয়ানান্রথস্বনৈঃ
দিশশ্চ প্রদিশশ্চৈব কম্পয়ানাংশ্চ মেদিনীম্
প্রতিজগ্রাহ সমরে সেনাপতিরমিত্রজিৎ
14.18
যুধিষ্ঠিরং ত্রিভির্বিদ্ধ্বা ভীমসেনং চ সপ্তভিঃ
সাত্যকিং চ শতেনাজৌ সহদেবং ত্রিভিঃ শরৈঃ
14.19
ততস্তু সশরং চাপং নকুলস্য মহাত্মনঃ
মদ্রেশ্বরঃ ক্ষুরপ্রেণ তদা চিচ্ছেদ মারিষ
তদশীর্যত বিচ্ছিন্নং ধনুঃ শল্যস্য সায়কৈঃ
14.20
অথান্যদ্ধনুরাদায় মাদ্রীপুত্রো মহারথঃ
মদ্ররাজরথং তূর্ণং পূরয়ামাস পত্রিভিঃ
14.21
যুধিষ্ঠিরস্তু মদ্রেশং সহদেবশ্চ মারিষ
দশভির্দশভির্বাণৈরুরস্যেনমবিধ্যতাম্
14.22
ভীমসেনস্ততঃ ষষ্ট্যা সাত্যকির্নবভিঃ শরৈঃ
মদ্ররাজমভিদ্রুত্য জঘ্নতুঃ কঙ্কপত্রিভিঃ
14.23
মদ্ররাজস্ততঃ ক্রুদ্ধঃ সাত্যকিং নবভিঃ শরৈঃ
বিব্যাধ ভূয়ঃ সপ্তত্যা শরাণাং নতপর্বণাম্
14.24
অথাস্য সশরং চাপং মুষ্টৌ চিচ্ছেদ মারিষ
হয়াংশ্চ চতুরঃ সংখ্যে প্রেষয়ামাস মৃত্যবে
14.25
বিরথং সাত্যকিং কৃত্বা মদ্ররাজো মহাবলঃ
বিশিখানাং শতেনৈনমাজঘান সমন্ততঃ
14.26
মাদ্রীপুত্রৌ তু সংরব্ধৌ ভীমসেনং চ পাণ্ডবম্
যুধিষ্ঠিরং চ কৌরব্য বিব্যাধ দশভিঃ শরৈঃ
14.27
তত্রাদ্ভুতমপশ্যাম মদ্ররাজস্য পৌরুষম্
যদেনং সহিতাঃ পার্থা নাভ্যবর্তন্ত সংয়ুগে
14.28
অথান্যং রথমাস্থায় সাত্যকিঃ সত্যবিক্রমঃ
পীডিতান্পাণ্ডবান্দৃষ্ট্বা মদ্ররাজবশং গতান্
অভিদুদ্রাব বেগেন মদ্রাণামধিপং বলী
14.29
আপতন্তং রথং তস্য শল্যঃ সমিতিশোভনঃ
প্রত্যুদ্যয়ৌ রথেনৈব মত্তো মত্তমিব দ্বিপম্
14.30
স সংনিপাতস্তুমুলো বভূবাদ্ভুতদর্শনঃ
সাত্যকেশ্চৈব শূরস্য মদ্রাণামধিপস্য চ
যাদৃশো বৈ পুরা বৃত্তঃ শম্বরামররাজয়োঃ
14.31
সাত্যকিঃ প্রেক্ষ্য সমরে মদ্ররাজং ব্যবস্থিতম্
বিব্যাধ দশভির্বাণৈস্তিষ্ঠ তিষ্ঠেতি চাব্রবীৎ
14.32
মদ্ররাজস্তু সুভৃশং বিদ্ধস্তেন মহাত্মনা
সাত্যকিং প্রতিবিব্যাধ চিত্রপুঙ্খৈঃ শিতৈঃ শরৈঃ
14.33
ততঃ পার্থা মহেষ্বাসাঃ সাত্বতাভিসৃতং নৃপম্
অভ্যদ্রবন্রথৈস্তূর্ণং মাতুলং বধকাম্যয়া
14.34
তত আসীত্পরামর্দস্তুমুলঃ শোণিতোদকঃ
শূরাণাং যুধ্যমানানাং সিংহানামিব নর্দতাম্
14.35
তেষামাসীন্মহারাজ ব্যতিক্ষেপঃ পরস্পরম্
সিংহানামামিষেপ্সূনাং কূজতামিব সংয়ুগে
14.36
তেষাং বাণসহস্রৌঘৈরাকীর্ণা বসুধাভবৎ
অন্তরিক্ষং চ সহসা বাণভূতমভূত্তদা
14.37
শরান্ধকারং বহুধা কৃতং তত্র সমন্ততঃ
অভ্রচ্ছায়েব সংজজ্ঞে শরৈর্মুক্তৈর্মহাত্মভিঃ
14.38
তত্র রাজঞ্শরৈর্মুক্তৈর্নির্মুক্তৈরিব পন্নগৈঃ
স্বর্ণপুঙ্খৈঃ প্রকাশদ্ভির্ব্যরোচন্ত দিশস্তথা
14.39
তত্রাদ্ভুতং পরং চক্রে শল্যঃ শত্রুনিবর্হণঃ
যদেকঃ সমরে শূরো যোধয়ামাস বৈ বহূন্
14.40
মদ্ররাজভুজোত্সৃষ্টৈঃ কঙ্কবর্হিণবাজিতৈঃ
সংপতদ্ভিঃ শরৈর্ঘোরৈরবাকীর্যত মেদিনী
14.41
তত্র শল্যরথং রাজন্বিচরন্তং মহাহবে
অপশ্যাম যথা পূর্বং শক্রস্যাসুরসংক্ষয়ে