Utshovঅধ্যায় 13
13.1
সংজয় উবাচ
অর্জুনো দ্রৌণিনা বিদ্ধো যুদ্ধে বহুভিরায়সৈঃ
তস্য চানুচরৈঃ শূরৈস্ত্রিগর্তানাং মহারথৈঃ
দ্রৌণিং বিব্যাধ সমরে ত্রিভিরেব শিলীমুখৈঃ
13.2
তথেতরান্মহেষ্বাসান্দ্বাভ্যাং দ্বাভ্যাং ধনংজয়ঃ
ভূয়শ্চৈব মহাবাহুঃ শরবর্ষৈরবাকিরৎ
13.3
শরকণ্টকিতাস্তে তু তাবকা ভরতর্ষভ
ন জহুঃ সমরে পার্থং বধ্যমানাঃ শিতৈঃ শরৈঃ
13.4
তেঽর্জুনং রথবংশেন দ্রোণপুত্রপুরোগমাঃ
অয়োধয়ন্ত সমরে পরিবার্য মহারথাঃ
13.5
তৈস্তু ক্ষিপ্তাঃ শরা রাজন্কার্তস্বরবিভূষিতাঃ
অর্জুনস্য রথোপস্থং পূরয়ামাসুরঞ্জসা
13.6
তথা কৃষ্ণৌ মহেষ্বাসৌ বৃষভৌ সর্বধন্বিনাম্
শরৈর্বীক্ষ্য বিতুন্নাঙ্গৌ প্রহৃষ্টৌ যুদ্ধদুর্মদৌ
13.7
কূবরং রথচক্রাণি ঈষা যোক্ত্রাণি চাভিভো
যুগং চৈবানুকর্ষং চ শরভূতমভূত্তদা
13.8
নৈতাদৃশং দৃষ্টপূর্বং রাজন্নৈব চ নঃ শ্রুতম্
যাদৃশং তত্র পার্থস্য তাবকাঃ সংপ্রচক্রিরে
13.9
স রথঃ সর্বতো ভাতি চিত্রপুঙ্খৈঃ শিতৈঃ শরৈঃ
উল্কাশতৈঃ সংপ্রদীপ্তং বিমানমিব ভূতলে
13.10
ততোঽর্জুনো মহারাজ শরৈঃ সংনতপর্বভিঃ
অবাকিরত্তাং পৃতনাং মেঘো বৃষ্ট্যা যথাচলম্
13.11
তে বধ্যমানাঃ সমরে পার্থনামাঙ্কিতৈঃ শরৈঃ
পার্থভূতমমন্যন্ত প্রেক্ষমাণাস্তথাবিধম্
13.12
ততোঽদ্ভুতশরজ্বালো ধনুঃশব্দানিলো মহান্
সেনেন্ধনং দদাহাশু তাবকং পার্থপাবকঃ
13.13
চক্রাণাং পততাং চৈব যুগানাং চ ধরাতলে
তূণীরাণাং পতাকানাং ধ্বজানাং চ রথৈঃ সহ
13.14
ঈষাণামনুকর্ষাণাং ত্রিবেণূনাং চ ভারত
অক্ষাণামথ যোক্ত্রাণাং প্রতোদানাং চ সর্বশঃ
13.15
শিরসাং পততাং চৈব কুণ্ডলোষ্ণীষধারিণাম্
ভুজানাং চ মহারাজ স্কন্ধানাং চ সমন্ততঃ
13.16
ছত্রাণাং ব্যজনৈঃ সার্ধং মুকুটানাং চ রাশয়ঃ
সমদৃশ্যন্ত পার্থস্য রথমার্গেষু ভারত
13.17
অগম্যরূপা পৃথিবী মাংসশোণিতকর্দমা
বভূব ভরতশ্রেষ্ঠ রুদ্রস্যাক্রীডনং যথা
ভীরূণাং ত্রাসজননী শূরাণাং হর্ষবর্ধনী
13.18
হত্বা তু সমরে পার্থঃ সহস্রে দ্বে পরংতপ
রথানাং সবরূথানাং বিধূমোঽগ্নিরিব জ্বলন্
13.19
যথা হি ভগবানগ্নির্জগদ্দগ্ধ্বা চরাচরম্
বিধূমো দৃশ্যতে রাজংস্তথা পার্থো মহারথঃ
13.20
দ্রৌণিস্তু সমরে দৃষ্ট্বা পাণ্ডবস্য পরাক্রমম্
রথেনাতিপতাকেন পাণ্ডবং প্রত্যবারয়ৎ
13.21
তাবুভৌ পুরুষব্যাঘ্রৌ শ্বেতাশ্বৌ ধন্বিনাং বরৌ
সমীয়তুস্তদা তূর্ণং পরস্পরবধৈষিণৌ
13.22
তয়োরাসীন্মহারাজ বাণবর্ষং সুদারুণম্
জীমূতানাং যথা বৃষ্টিস্তপান্তে ভরতর্ষভ
13.23
অন্যোন্যস্পর্ধিনৌ তৌ তু শরৈঃ সংনতপর্বভিঃ
ততক্ষতুর্মৃধেঽন্যোন্যং শৃঙ্গাভ্যাং বৃষভাবিব
13.24
তয়োর্যুদ্ধং মহারাজ চিরং সমমিবাভবৎ
অস্ত্রাণাং সংগমশ্চৈব ঘোরস্তত্রাভবন্মহান্
13.25
ততোঽর্জুনং দ্বাদশভী রুক্মপুঙ্খৈঃ সুতেজনৈঃ
বাসুদেবং চ দশভির্দ্রৌণির্বিব্যাধ ভারত
13.26
ততঃ প্রহস্য বীভত্সুর্ব্যাক্ষিপদ্গাণ্ডিবং ধনুঃ
মানয়িত্বা মুহূর্তং চ গুরুপুত্রং মহাহবে
13.27
ব্যশ্বসূতরথং চক্রে সব্যসাচী মহারথঃ
মৃদুপূর্বং ততশ্চৈনং ত্রিভির্বিব্যাধ সায়কৈঃ
13.28
হতাশ্বে তু রথে তিষ্ঠন্দ্রোণপুত্রস্ত্বয়স্ময়ম্
মুসলং পাণ্ডুপুত্রায় চিক্ষেপ পরিঘোপমম্
13.29
তমাপতন্তং সহসা হেমপট্টবিভূষিতম্
চিচ্ছেদ সপ্তধা বীরঃ পার্থঃ শত্রুনিবর্হণঃ
13.30
স চ্ছিন্নং মুসলং দৃষ্ট্বা দ্রৌণিঃ পরমকোপনঃ
আদদে পরিঘং ঘোরং নগেন্দ্রশিখরোপমম্
চিক্ষেপ চৈব পার্থায় দ্রৌণির্যুদ্ধবিশারদঃ
13.31
তমন্তকমিব ক্রুদ্ধং পরিঘং প্রেক্ষ্য পাণ্ডবঃ
অর্জুনস্ত্বরিতো জঘ্নে পঞ্চভিঃ সায়কোত্তমৈঃ
13.32
স চ্ছিন্নঃ পতিতো ভূমৌ পার্থবাণৈর্মহাহবে
দারয়ন্পৃথিবীন্দ্রাণাং মনঃ শব্দেন ভারত
13.33
ততোঽপরৈস্ত্রিভির্বাণৈর্দ্রৌণিং বিব্যাধ পাণ্ডবঃ
সোঽতিবিদ্ধো বলবতা পার্থেন সুমহাবলঃ
ন সংভ্রান্তস্তদা দ্রৌণিঃ পৌরুষে স্বে ব্যবস্থিতঃ
13.34
সুধর্মা তু ততো রাজন্ভারদ্বাজং মহারথম্
অবাকিরচ্ছরব্রাতৈঃ সর্বক্ষত্রস্য পশ্যতঃ
13.35
ততস্তু সুরথোঽপ্যাজৌ পাঞ্চালানাং মহারথঃ
রথেন মেঘঘোষেণ দ্রৌণিমেবাভ্যধাবত
13.36
বিকর্ষন্বৈ ধনুঃ শ্রেষ্ঠং সর্বভারসহং দৃঢম্
জ্বলনাশীবিষনিভৈঃ শরৈশ্চৈনমবাকিরৎ
13.37
সুরথং তু ততঃ ক্রুদ্ধমাপতন্তং মহারথম্
চুকোপ সমরে দ্রৌণির্দণ্ডাহত ইবোরগঃ
13.38
ত্রিশিখাং ভ্রুকুটীং কৃত্বা সৃক্কিণী পরিলেলিহন্
উদ্বীক্ষ্য সুরথং রোষাদ্ধনুর্জ্যামবমৃজ্য চ
মুমোচ তীক্ষ্ণং নারাচং যমদণ্ডসমদ্যুতিম্
13.39
স তস্য হৃদয়ং ভিত্ত্বা প্রবিবেশাতিবেগতঃ
শক্রাশনিরিবোত্সৃষ্টা বিদার্য ধরণীতলম্
13.40
ততস্তং পতিতং ভূমৌ নারাচেন সমাহতম্
বজ্রেণেব যথা শৃঙ্গং পর্বতস্য মহাধনম্
13.41
তস্মিংস্তু নিহতে বীরে দ্রোণপুত্রঃ প্রতাপবান্
আরুরোহ রথং তূর্ণং তমেব রথিনাং বরঃ
13.42
ততঃ সজ্জো মহারাজ দ্রৌণিরাহবদুর্মদঃ
অর্জুনং যোধয়ামাস সংশপ্তকবৃতো রণে
13.43
তত্র যুদ্ধং মহচ্চাসীদর্জুনস্য পরৈঃ সহ
মধ্যংদিনগতে সূর্যে যমরাষ্ট্রবিবর্ধনম্
13.44
তত্রাশ্চর্যমপশ্যাম দৃষ্ট্বা তেষাং পরাক্রমম্
যদেকো যুগপদ্বীরান্সময়োধয়দর্জুনঃ
13.45
বিমর্দস্তু মহানাসীদর্জুনস্য পরৈঃ সহ
শতক্রতোর্যথা পূর্বং মহত্যা দৈত্যসেনয়া