Utshovঅধ্যায় 12
12.1
সংজয় উবাচ
পীডিতে ধর্মরাজে তু মদ্ররাজেন মারিষ
সাত্যকির্ভীমসেনশ্চ মাদ্রীপুত্রৌ চ পাণ্ডবৌ
পরিবার্য রথৈঃ শল্যং পীডয়ামাসুরাহবে
12.2
তমেকং বহুভির্দৃষ্ট্বা পীড্যমানং মহারথৈঃ
সাধুবাদো মহাঞ্জজ্ঞে সিদ্ধাশ্চাসন্প্রহর্ষিতাঃ
আশ্চর্যমিত্যভাষন্ত মুনয়শ্চাপি সংগতাঃ
12.3
ভীমসেনো রণে শল্যং শল্যভূতং পরাক্রমে
একেন বিদ্ধ্বা বাণেন পুনর্বিব্যাধ সপ্তভিঃ
12.4
সাত্যকিশ্চ শতেনৈনং ধর্মপুত্রপরীপ্সয়া
মদ্রেশ্বরমবাকীর্য সিংহনাদমথানদৎ
12.5
নকুলঃ পঞ্চভিশ্চৈনং সহদেবশ্চ সপ্তভিঃ
বিদ্ধ্বা তং তু ততস্তূর্ণং পুনর্বিব্যাধ সপ্তভিঃ
12.6
স তু শূরো রণে যত্তঃ পীডিতস্তৈর্মহারথৈঃ
বিকৃষ্য কার্মুকং ঘোরং বেগঘ্নং ভারসাধনম্
12.7
সাত্যকিং পঞ্চবিংশত্যা শল্যো বিব্যাধ মারিষ
ভীমসেনং ত্রিসপ্তত্যা নকুলং সপ্তভিস্তথা
12.8
ততঃ সবিশিখং চাপং সহদেবস্য ধন্বিনঃ
ছিত্ত্বা ভল্লেন সমরে বিব্যাধৈনং ত্রিসপ্তভিঃ
12.9
সহদেবস্তু সমরে মাতুলং ভূরিবর্চসম্
সজ্যমন্যদ্ধনুঃ কৃত্বা পঞ্চভিঃ সমতাডয়ৎ
শরৈরাশীবিষাকারৈর্জ্বলজ্জ্বলনসংনিভৈঃ
12.10
সারথিং চাস্য সমরে শরেণানতপর্বণা
বিব্যাধ ভৃশসংক্রুদ্ধস্তং চ ভূয়স্ত্রিভিঃ শরৈঃ
12.11
ভীমসেনস্ত্রিসপ্তত্যা সাত্যকির্নবভিঃ শরৈঃ
ধর্মরাজস্তথা ষষ্ট্যা গাত্রে শল্যং সমর্পয়ৎ
12.12
ততঃ শল্যো মহারাজ নির্বিদ্ধস্তৈর্মহারথৈঃ
সুস্রাব রুধিরং গাত্রৈর্গৈরিকং পর্বতো যথা
12.13
তাংশ্চ সর্বান্মহেষ্বাসান্পঞ্চভিঃ পঞ্চভিঃ শরৈঃ
বিব্যাধ তরসা রাজংস্তদদ্ভুতমিবাভবৎ
12.14
ততোঽপরেণ ভল্লেন ধর্মপুত্রস্য মারিষ
ধনুশ্চিচ্ছেদ সমরে সজ্যং স সুমহারথঃ
12.15
অথান্যদ্ধনুরাদায় ধর্মপুত্রো মহারথঃ
সাশ্বসূতধ্বজরথং শল্যং প্রাচ্ছাদয়চ্ছরৈঃ
12.16
স চ্ছাদ্যমানঃ সমরে ধর্মপুত্রস্য সায়কৈঃ
যুধিষ্ঠিরমথাবিধ্যদ্দশভির্নিশিতৈঃ শরৈঃ
12.17
সাত্যকিস্তু ততঃ ক্রুদ্ধো ধর্মপুত্রে শরার্দিতে
মদ্রাণামধিপং শূরং শরৌঘৈঃ সমবারয়ৎ
12.18
স সাত্যকেঃ প্রচিচ্ছেদ ক্ষুরপ্রেণ মহদ্ধনুঃ
ভীমসেনমুখাংস্তাংশ্চ ত্রিভিস্ত্রিভিরতাডয়ৎ
12.19
তস্য ক্রুদ্ধো মহারাজ সাত্যকিঃ সত্যবিক্রমঃ
তোমরং প্রেষয়ামাস স্বর্ণদণ্ডং মহাধনম্
12.20
ভীমসেনোঽথ নারাচং জ্বলন্তমিব পন্নগম্
নকুলঃ সমরে শক্তিং সহদেবো গদাং শুভাম্
ধর্মরাজঃ শতঘ্নীং তু জিঘাংসুঃ শল্যমাহবে
12.21
তানাপতত এবাশু পঞ্চানাং বৈ ভুজচ্যুতান্
সাত্যকিপ্রহিতং শল্যো ভল্লৈশ্চিচ্ছেদ তোমরম্
12.22
ভীমেন প্রহিতং চাপি শরং কনকভূষণম্
দ্বিধা চিচ্ছেদ সমরে কৃতহস্তঃ প্রতাপবান্
12.23
নকুলপ্রেষিতাং শক্তিং হেমদণ্ডাং ভয়াবহাম্
গদাং চ সহদেবেন শরৌঘৈঃ সমবারয়ৎ
12.24
শরাভ্যাং চ শতঘ্নীং তাং রাজ্ঞশ্চিচ্ছেদ ভারত
পশ্যতাং পাণ্ডুপুত্রাণাং সিংহনাদং ননাদ চ
নামৃষ্যত্তং তু শৈনেয়ঃ শত্রোর্বিজয়মাহবে
12.25
অথান্যদ্ধনুরাদায় সাত্যকিঃ ক্রোধমূর্ছিতঃ
দ্বাভ্যাং মদ্রেশ্বরং বিদ্ধ্বা সারথিং চ ত্রিভিঃ শরৈঃ
12.26
ততঃ শল্যো মহারাজ সর্বাংস্তান্দশভিঃ শরৈঃ
বিব্যাধ সুভৃশং ক্রুদ্ধস্তোত্ত্রৈরিব মহাদ্বিপান্
12.27
তে বার্যমাণাঃ সমরে মদ্ররাজ্ঞা মহারথাঃ
ন শেকুঃ প্রমুখে স্থাতুং তস্য শত্রুনিষূদনাঃ
12.28
ততো দুর্যোধনো রাজা দৃষ্ট্বা শল্যস্য বিক্রমম্
নিহতান্পাণ্ডবান্মেনে পাঞ্চালানথ সৃঞ্জয়ান্
12.29
ততো রাজন্মহাবাহুর্ভীমসেনঃ প্রতাপবান্
সংত্যজ্য মনসা প্রাণান্মদ্রাধিপময়োধয়ৎ
12.30
নকুলঃ সহদেবশ্চ সাত্যকিশ্চ মহারথঃ
পরিবার্য তদা শল্যং সমন্তাদ্ব্যকিরঞ্শরৈঃ
12.31
স চতুর্ভির্মহেষ্বাসৈঃ পাণ্ডবানাং মহারথৈঃ
বৃতস্তান্যোধয়ামাস মদ্ররাজঃ প্রতাপবান্
12.32
তস্য ধর্মসুতো রাজন্ক্ষুরপ্রেণ মহাহবে
চক্ররক্ষং জঘানাশু মদ্ররাজস্য পার্থিব
12.33
তস্মিংস্তু নিহতে শূরে চক্ররক্ষে মহারথে
মদ্ররাজোঽতিবলবান্সৈনিকানাস্তৃণোচ্ছরৈঃ
12.34
সমাচ্ছন্নাংস্ততস্তাংস্তু রাজন্বীক্ষ্য স সৈনিকান্
চিন্তয়ামাস সমরে ধর্মরাজো যুধিষ্ঠিরঃ
12.35
কথং নু ন ভবেত্সত্যং তন্মাধববচো মহৎ
ন হি ক্রুদ্ধো রণে রাজা ক্ষপয়েত বলং মম
12.36
ততঃ সরথনাগাশ্বাঃ পাণ্ডবাঃ পাণ্ডুপূর্বজ
মদ্রেশ্বরং সমাসেদুঃ পীডয়ন্তঃ সমন্ততঃ
12.37
নানাশস্ত্রৌঘবহুলাং শস্ত্রবৃষ্টিং সমুত্থিতাম্
ব্যধমত্সমরে রাজন্মহাভ্রাণীব মারুতঃ
12.38
ততঃ কনকপুঙ্খাং তাং শল্যক্ষিপ্তাং বিয়দ্গতাম্
শরবৃষ্টিমপশ্যাম শলভানামিবাততিম্
12.39
তে শরা মদ্ররাজেন প্রেষিতা রণমূর্ধনি
সংপতন্তঃ স্ম দৃশ্যন্তে শলভানাং ব্রজা ইব
12.40
মদ্ররাজধনুর্মুক্তৈঃ শরৈঃ কনকভূষণৈঃ
নিরন্তরমিবাকাশং সংবভূব জনাধিপ
12.41
ন পাণ্ডবানাং নাস্মাকং তত্র কশ্চিদ্ব্যদৃশ্যত
বাণান্ধকারে মহতি কৃতে তত্র মহাভয়ে
12.42
মদ্ররাজেন বলিনা লাঘবাচ্ছরবৃষ্টিভিঃ
লোড্যমানং তথা দৃষ্ট্বা পাণ্ডবানাং বলার্ণবম্
বিস্ময়ং পরমং জগ্মুর্দেবগন্ধর্বদানবাঃ
12.43
স তু তান্সর্বতো যত্তাঞ্শরৈঃ সংপীড্য মারিষ
ধর্মরাজমবচ্ছাদ্য সিংহবদ্ব্যনদন্মুহুঃ
12.44
তে ছন্নাঃ সমরে তেন পাণ্ডবানাং মহারথাঃ
ন শেকুস্তং তদা যুদ্ধে প্রত্যুদ্যাতুং মহারথম্
12.45
ধর্মরাজপুরোগাস্তু ভীমসেনমুখা রথাঃ
ন জহুঃ সমরে শূরং শল্যমাহবশোভিনম্