Utshovঅধ্যায় 11
11.1
সংজয় উবাচ
পতিতং প্রেক্ষ্য যন্তারং শল্যঃ সর্বায়সীং গদাম্
আদায় তরসা রাজংস্তস্থৌ গিরিরিবাচলঃ
11.2
তং দীপ্তমিব কালাগ্নিং পাশহস্তমিবান্তকম্
সশৃঙ্গমিব কৈলাসং সবজ্রমিব বাসবম্
11.3
সশূলমিব হর্যক্ষং বনে মত্তমিব দ্বিপম্
জবেনাভ্যপতদ্ভীমঃ প্রগৃহ্য মহতীং গদাম্
11.4
ততঃ শঙ্খপ্রণাদশ্চ তূর্যাণাং চ সহস্রশঃ
সিংহনাদশ্চ সংজজ্ঞে শূরাণাং হর্ষবর্ধনঃ
11.5
প্রেক্ষন্তঃ সর্বতস্তৌ হি যোধা যোধমহাদ্বিপৌ
তাবকাশ্চ পরে চৈব সাধু সাধ্বিত্যথাব্রুবন্
11.6
ন হি মদ্রাধিপাদন্যো রামাদ্বা যদুনন্দনাৎ
সোঢুমুত্সহতে বেগং ভীমসেনস্য সংয়ুগে
11.7
তথা মদ্রাধিপস্যাপি গদাবেগং মহাত্মনঃ
সোঢুমুত্সহতে নান্যো যোধো যুধি বৃকোদরাৎ
11.8
তৌ বৃষাবিব নর্দন্তৌ মণ্ডলানি বিচেরতুঃ
আবল্গিতৌ গদাহস্তৌ মদ্ররাজবৃকোদরৌ
11.9
মণ্ডলাবর্তমার্গেষু গদাবিহরণেষু চ
নির্বিশেষমভূদ্যুদ্ধং তয়োঃ পুরুষসিংহয়োঃ
11.10
তপ্তহেমময়ৈঃ শুভ্রৈর্বভূব ভয়বর্ধনী
অগ্নিজ্বালৈরিবাবিদ্ধা পট্টৈঃ শল্যস্য সা গদা
11.11
তথৈব চরতো মার্গান্মণ্ডলেষু মহাত্মনঃ
বিদ্যুদভ্রপ্রতীকাশা ভীমস্য শুশুভে গদা
11.12
তাডিতা মদ্ররাজেন ভীমস্য গদয়া গদা
দীপ্যমানেব বৈ রাজন্সসৃজে পাবকার্চিষঃ
11.13
তথা ভীমেন শল্যস্য তাডিতা গদয়া গদা
অঙ্গারবর্ষং মুমুচে তদদ্ভুতমিবাভবৎ
11.14
দন্তৈরিব মহানাগৌ শৃঙ্গৈরিব মহর্ষভৌ
তোত্ত্রৈরিব তদান্যোন্যং গদাগ্রাভ্যাং নিজঘ্নতুঃ
11.15
তৌ গদানিহতৈর্গাত্রৈঃ ক্ষণেন রুধিরোক্ষিতৌ
প্রেক্ষণীয়তরাবাস্তাং পুষ্পিতাবিব কিংশুকৌ
11.16
গদয়া মদ্ররাজেন সব্যদক্ষিণমাহতঃ
ভীমসেনো মহাবাহুর্ন চচালাচলো যথা
11.17
তথা ভীমগদাবেগৈস্তাড্যমানো মুহুর্মুহুঃ
শল্যো ন বিব্যথে রাজন্দন্তিনেবাহতো গিরিঃ
11.18
শুশ্রুবে দিক্ষু সর্বাসু তয়োঃ পুরুষসিংহয়োঃ
গদানিপাতসংহ্রাদো বজ্রয়োরিব নিস্বনঃ
11.19
নিবৃত্য তু মহাবীর্যৌ সমুচ্ছ্রিতগদাবুভৌ
পুনরন্তরমার্গস্থৌ মণ্ডলানি বিচেরতুঃ
11.20
অথাভ্যেত্য পদান্যষ্টৌ সংনিপাতোঽভবত্তয়োঃ
উদ্যম্য লোহদণ্ডাভ্যামতিমানুষকর্মণোঃ
11.21
প্রার্থয়ানৌ তদান্যোঽন্যং মণ্ডলানি বিচেরতুঃ
ক্রিয়াবিশেষং কৃতিনৌ দর্শয়ামাসতুস্তদা
11.22
অথোদ্যম্য গদে ঘোরে সশৃঙ্গাবিব পর্বতৌ
তাবাজঘ্নতুরন্যোন্যং যথা ভূমিচলেঽচলৌ
11.23
তৌ পরস্পরবেগাচ্চ গদাভ্যাং চ ভৃশাহতৌ
যুগপত্পেততুর্বীরাবুভাবিন্দ্রধ্বজাবিব
11.24
উভয়োঃ সেনয়োর্বীরাস্তদা হাহাকৃতোঽভবন্
ভৃশং মর্মণ্যভিহতাবুভাবাস্তাং সুবিহ্বলৌ
11.25
ততঃ সগদমারোপ্য মদ্রাণামৃষভং রথে
অপোবাহ কৃপঃ শল্যং তূর্ণমায়োধনাদপি
11.26
ক্ষীববদ্বিহ্বলত্বাত্তু নিমেষাত্পুনরুত্থিতঃ
ভীমসেনো গদাপাণিঃ সমাহ্বয়ত মদ্রপম্
11.27
ততস্তু তাবকাঃ শূরা নানাশস্ত্রসমায়ুতাঃ
নানাবাদিত্রশব্দেন পাণ্ডুসেনাময়োধয়ন্
11.28
ভুজাবুচ্ছ্রিত্য শস্ত্রং চ শব্দেন মহতা ততঃ
অভ্যদ্রবন্মহারাজ দুর্যোধনপুরোগমাঃ
11.29
তদনীকমভিপ্রেক্ষ্য ততস্তে পাণ্ডুনন্দনাঃ
প্রয়য়ুঃ সিংহনাদেন দুর্যোধনবধেপ্সয়া
11.30
তেষামাপততাং তূর্ণং পুত্রস্তে ভরতর্ষভ
প্রাসেন চেকিতানং বৈ বিব্যাধ হৃদয়ে ভৃশম্
11.31
স পপাত রথোপস্থে তব পুত্রেণ তাডিতঃ
রুধিরৌঘপরিক্লিন্নঃ প্রবিশ্য বিপুলং তমঃ
11.32
চেকিতানং হতং দৃষ্ট্বা পাণ্ডবানাং মহারথাঃ
প্রসক্তমভ্যবর্ষন্ত শরবর্ষাণি ভাগশঃ
11.33
তাবকানামনীকেষু পাণ্ডবা জিতকাশিনঃ
ব্যচরন্ত মহারাজ প্রেক্ষণীয়াঃ সমন্ততঃ
11.34
কৃপশ্চ কৃতবর্মা চ সৌবলশ্চ মহাবলঃ
অয়োধয়ন্ধর্মরাজং মদ্ররাজপুরস্কৃতাঃ
11.35
ভারদ্বাজস্য হন্তারং ভূরিবীর্যপরাক্রমম্
দুর্যোধনো মহারাজ ধৃষ্টদ্যুম্নময়োধয়ৎ
11.36
ত্রিসাহস্রা রথা রাজংস্তব পুত্রেণ চোদিতাঃ
অয়োধয়ন্ত বিজয়ং দ্রোণপুত্রপুরস্কৃতাঃ
11.37
বিজয়ে ধৃতসংকল্পাঃ সমভিত্যক্তজীবিতাঃ
প্রাবিশংস্তাবকা রাজন্হংসা ইব মহত্সরঃ
11.38
ততো যুদ্ধমভূদ্ঘোরং পরস্পরবধৈষিণাম্
অন্যোন্যবধসংয়ুক্তমন্যোন্যপ্রীতিবর্ধনম্
11.39
তস্মিন্প্রবৃত্তে সংগ্রামে রাজন্বীরবরক্ষয়ে
অনিলেনেরিতং ঘোরমুত্তস্থৌ পার্থিবং রজঃ
11.40
শ্রবণান্নামধেয়ানাং পাণ্ডবানাং চ কীর্তনাৎ
পরস্পরং বিজানীমো যে চায়ুধ্যন্নভীতবৎ
11.41
তদ্রজঃ পুরুষব্যাঘ্র শোণিতেন প্রশামিতম্
দিশশ্চ বিমলা জজ্ঞুস্তস্মিন্রজসি শামিতে
11.42
তথা প্রবৃত্তে সংগ্রামে ঘোররূপে ভয়ানকে
তাবকানাং পরেষাং চ নাসীত্কশ্চিত্পরাঙ্মুখঃ
11.43
ব্রহ্মলোকপরা ভূত্বা প্রার্থয়ন্তো জয়ং যুধি
সুয়ুদ্ধেন পরাক্রান্তা নরাঃ স্বর্গমভীপ্সবঃ
11.44
ভর্তৃপিণ্ডবিমোক্ষার্থং ভর্তৃকার্যবিনিশ্চিতাঃ
স্বর্গসংসক্তমনসো যোধা যুয়ুধিরে তদা
11.45
নানারূপাণি শস্ত্রাণি বিসৃজন্তো মহারথাঃ
অন্যোন্যমভিগর্জন্তঃ প্রহরন্তঃ পরস্পরম্
11.46
হত বিধ্যত গৃহ্ণীত প্রহরধ্বং নিকৃন্তত
ইতি স্ম বাচঃ শ্রূয়ন্তে তব তেষাং চ বৈ বলে
11.47
ততঃ শল্যো মহারাজ ধর্মরাজং যুধিষ্ঠিরম্
বিব্যাধ নিশিতৈর্বাণৈর্হন্তুকামো মহারথম্
11.48
তস্য পার্থো মহারাজ নারাচান্বৈ চতুর্দশ
মর্মাণ্যুদ্দিশ্য মর্মজ্ঞো নিচখান হসন্নিব
11.49
তং বার্য পাণ্ডবং বাণৈর্হন্তুকামো মহায়শাঃ
বিব্যাধ সমরে ক্রুদ্ধো বহুভিঃ কঙ্কপত্রিভিঃ
11.50
অথ ভূয়ো মহারাজ শরেণ নতপর্বণা
যুধিষ্ঠিরং সমাজঘ্নে সর্বসৈন্যস্য পশ্যতঃ
11.51
ধর্মরাজোঽপি সংক্রুদ্ধো মদ্ররাজং মহায়শাঃ
বিব্যাধ নিশিতৈর্বাণৈঃ কঙ্কবর্হিণবাজিতৈঃ
11.52
চন্দ্রসেনং চ সপ্তত্যা সূতং চ নবভিঃ শরৈঃ
দ্রুমসেনং চতুঃষষ্ট্যা নিজঘান মহারথঃ
11.53
চক্ররক্ষে হতে শল্যঃ পাণ্ডবেন মহাত্মনা
নিজঘান ততো রাজংশ্চেদীন্বৈ পঞ্চবিংশতিম্
11.54
সাত্যকিং পঞ্চবিংশত্যা ভীমসেনং চ পঞ্চভিঃ
মাদ্রীপুত্রৌ শতেনাজৌ বিব্যাধ নিশিতৈঃ শরৈঃ
11.55
এবং বিচরতস্তস্য সংগ্রামে রাজসত্তম
সংপ্রেষয়চ্ছিতান্পার্থঃ শরানাশীবিষোপমান্
11.56
ধ্বজাগ্রং চাস্য সমরে কুন্তীপুত্রো যুধিষ্ঠিরঃ
প্রমুখে বর্তমানস্য ভল্লেনাপহরদ্রথাৎ
11.57
পাণ্ডুপুত্রেণ বৈ তস্য কেতুং ছিন্নং মহাত্মনা
নিপতন্তমপশ্যাম গিরিশৃঙ্গমিবাহতম্
11.58
ধ্বজং নিপতিতং দৃষ্ট্বা পাণ্ডবং চ ব্যবস্থিতম্
সংক্রুদ্ধো মদ্ররাজোঽভূচ্ছরবর্ষং মুমোচ হ
11.59
শল্যঃ সায়কবর্ষেণ পর্জন্য ইব বৃষ্টিমান্
অভ্যবর্ষদমেয়াত্মা ক্ষত্রিয়ং ক্ষত্রিয়র্ষভঃ
11.60
সাত্যকিং ভীমসেনং চ মাদ্রীপুত্রৌ চ পাণ্ডবৌ
একৈকং পঞ্চভির্বিদ্ধ্বা যুধিষ্ঠিরমপীডয়ৎ
11.61
ততো বাণময়ং জালং বিততং পাণ্ডবোরসি
অপশ্যাম মহারাজ মেঘজালমিবোদ্গতম্
11.62
তস্য শল্যো রণে ক্রুদ্ধো বাণৈঃ সংনতপর্বভিঃ
দিশঃ প্রচ্ছাদয়ামাস প্রদিশশ্চ মহারথঃ
11.63
ততো যুধিষ্ঠিরো রাজা বাণজালেন পীডিতঃ
বভূব হৃতবিক্রান্তো জম্ভো বৃত্রহণা যথা