Utshovঅধ্যায় 10
10.1
সংজয় উবাচ
তস্মিন্বিলুলিতে সৈন্যে বধ্যমানে পরস্পরম্
দ্রবমাণেষু যোধেষু নিনদত্সু চ দন্তিষু
10.2
কূজতাং স্তনতাং চৈব পদাতীনাং মহাহবে
বিদ্রুতেষু মহারাজ হয়েষু বহুধা তদা
10.3
প্রক্ষয়ে দারুণে জাতে সংহারে সর্বদেহিনাম্
নানাশস্ত্রসমাবাপে ব্যতিষক্তরথদ্বিপে
10.4
হর্ষণে যুদ্ধশৌণ্ডানাং ভীরূণাং ভয়বর্ধনে
গাহমানেষু যোধেষু পরস্পরবধৈষিষু
10.5
প্রাণাদানে মহাঘোরে বর্তমানে দুরোদরে
সংগ্রামে ঘোররূপে তু যমরাষ্ট্রবিবর্ধনে
10.6
পাণ্ডবাস্তাবকং সৈন্যং ব্যধমন্নিশিতৈঃ শরৈঃ
তথৈব তাবকা যোধা জঘ্নুঃ পাণ্ডবসৈনিকান্
10.7
তস্মিংস্তথা বর্তমানে যুদ্ধে ভীরুভয়াবহে
পূর্বাহ্ণে চৈব সংপ্রাপ্তে ভাস্করোদয়নং প্রতি
10.8
লব্ধলক্ষাঃ পরে রাজন্রক্ষিতাশ্চ মহাত্মনা
অয়োধয়ংস্তব বলং মৃত্যুং কৃত্বা নিবর্তনম্
10.9
বলিভিঃ পাণ্ডবৈর্দৃপ্তৈর্লব্ধলক্ষৈঃ প্রহারিভিঃ
কৌরব্যসীদত্পৃতনা মৃগীবাগ্নিসমাকুলা
10.10
তাং দৃষ্ট্বা সীদতীং সেনাং পঙ্কে গামিব দুর্বলাম্
উজ্জিহীর্ষুস্তদা শল্যঃ প্রায়াত্পাণ্ডুচমূং প্রতি
10.11
মদ্ররাজস্তু সংক্রুদ্ধো গৃহীত্বা ধনুরুত্তমম্
অভ্যদ্রবত সংগ্রামে পাণ্ডবানাততায়িনঃ
10.12
পাণ্ডবাশ্চ মহারাজ সমরে জিতকাশিনঃ
মদ্ররাজং সমাসাদ্য বিব্যধুর্নিশিতৈঃ শরৈঃ
10.13
ততঃ শরশতৈস্তীক্ষ্ণৈর্মদ্ররাজো মহাবলঃ
অর্দয়ামাস তাং সেনাং ধর্মরাজস্য পশ্যতঃ
10.14
প্রাদুরাসংস্ততো রাজন্নানারূপাণ্যনেকশঃ
চচাল শব্দং কুর্বাণা মহী চাপি সপর্বতা
10.15
সদণ্ডশূলা দীপ্তাগ্রাঃ শীর্যমাণাঃ সমন্ততঃ
উল্কা ভূমিং দিবঃ পেতুরাহত্য রবিমণ্ডলম্
10.16
মৃগাশ্চ মাহিষাশ্চাপি পক্ষিণশ্চ বিশাং পতে
অপসব্যং তদা চক্রুঃ সেনাং তে বহুশো নৃপ
10.17
ততস্তদ্যুদ্ধমত্যুগ্রমভবত্সংঘচারিণাম্
তথা সর্বাণ্যনীকানি সংনিপত্য জনাধিপ
অভ্যয়ুঃ কৌরবা রাজন্পাণ্ডবানামনীকিনীম্
10.18
শল্যস্তু শরবর্ষেণ বর্ষন্নিব সহস্রদৃক্
অভ্যবর্ষদদীনাত্মা কুন্তীপুত্রং যুধিষ্ঠিরম্
10.19
ভীমসেনং শরৈশ্চাপি রুক্মপুঙ্খৈঃ শিলাশিতঃ
দ্রৌপদেয়াংস্তথা সর্বান্মাদ্রীপুত্রৌ চ পাণ্ডবৌ
10.20
ধৃষ্টদ্যুম্নং চ শৈনেয়ং শিখণ্ডিনমথাপি চ
একৈকং দশভির্বাণৈর্বিব্যাধ চ মহাবলঃ
ততোঽসৃজদ্বাণবর্ষং ঘর্মান্তে মঘবানিব
10.21
ততঃ প্রভদ্রকা রাজন্সোমকাশ্চ সহস্রশঃ
পতিতাঃ পাত্যমানাশ্চ দৃশ্যন্তে শল্যসায়কৈঃ
10.22
ভ্রমরাণামিব ব্রাতাঃ শলভানামিব ব্রজাঃ
হ্রাদিন্য ইব মেঘেভ্যঃ শল্যস্য ন্যপতঞ্শরাঃ
10.23
দ্বিরদাস্তুরগাশ্চার্তাঃ পত্তয়ো রথিনস্তথা
শল্যস্য বাণৈর্ন্যপতন্বভ্রমুর্ব্যনদংস্তথা
10.24
আবিষ্ট ইব মদ্রেশো মন্যুনা পৌরুষেণ চ
প্রাচ্ছাদয়দরীন্সংখ্যে কালসৃষ্ট ইবান্তকঃ
বিনর্দমানো মদ্রেশো মেঘহ্রাদো মহাবলঃ
10.25
সা বধ্যমানা শল্যেন পাণ্ডবানামনীকিনী
অজাতশত্রুং কৌন্তেয়মভ্যধাবদ্যুধিষ্ঠিরম্
10.26
তাং সমর্প্য ততঃ সংখ্যে লঘুহস্তঃ শিতৈঃ শরৈঃ
শরবর্ষেণ মহতা যুধিষ্ঠিরমপীডয়ৎ
10.27
তমাপতন্তং পত্ত্যশ্বৈঃ ক্রুদ্ধো রাজা যুধিষ্ঠিরঃ
অবারয়চ্ছরৈস্তীক্ষ্ণৈর্মত্তং দ্বিপমিবাঙ্কুশৈঃ
10.28
তস্য শল্যঃ শরং ঘোরং মুমোচাশীবিষোপমম্
সোঽভ্যবিধ্যন্মহাত্মানং বেগেনাভ্যপতচ্চ গাম্
10.29
ততো বৃকোদরঃ ক্রুদ্ধঃ শল্যং বিব্যাধ সপ্তভিঃ
পঞ্চভিঃ সহদেবস্তু নকুলো দশভিঃ শরৈঃ
10.30
দ্রৌপদেয়াশ্চ শত্রুঘ্নং শূরমার্তায়নিং শরৈঃ
অভ্যবর্ষন্মহাভাগং মেঘা ইব মহীধরম্
10.31
ততো দৃষ্ট্বা তুদ্যমানং শল্যং পার্থৈঃ সমন্ততঃ
কৃতবর্মা কৃপশ্চৈব সংক্রুদ্ধাবভ্যধাবতাম্
10.32
উলূকশ্চ পতত্রী চ শকুনিশ্চাপি সৌবলঃ
স্ময়মানশ্চ শনকৈরশ্বত্থামা মহারথঃ
তব পুত্রাশ্চ কার্ত্স্ন্যেন জুগুপুঃ শল্যমাহবে
10.33
ভীমসেনং ত্রিভির্বিদ্ধ্বা কৃতবর্মা শিলীমুখৈঃ
বাণবর্ষেণ মহতা ক্রুদ্ধরূপমবারয়ৎ
10.34
ধৃষ্টদ্যুম্নং কৃপঃ ক্রুদ্ধো বাণবর্ষৈরপীডয়ৎ
দ্রৌপদেয়াংশ্চ শকুনির্যমৌ চ দ্রৌণিরভ্যয়াৎ
10.35
দুর্যোধনো যুধাং শ্রেষ্ঠাবাহবে কেশবার্জুনৌ
সমভ্যয়াদুগ্রতেজাঃ শরৈশ্চাভ্যহনদ্বলী
10.36
এবং দ্বংদ্বশতান্যাসংস্ত্বদীয়ানাং পরৈঃ সহ
ঘোররূপাণি চিত্রাণি তত্র তত্র বিশাং পতে
10.37
ঋশ্যবর্ণাঞ্জঘানাশ্বান্ভোজো ভীমস্য সংয়ুগে
সোঽবতীর্য রথোপস্থাদ্ধতাশ্বঃ পাণ্ডুনন্দনঃ
কালো দণ্ডমিবোদ্যম্য গদাপাণিরয়ুধ্যত
10.38
প্রমুখে সহদেবস্য জঘানাশ্বাংশ্চ মদ্ররাট্
ততঃ শল্যস্য তনয়ং সহদেবোঽসিনাবধীৎ
10.39
গৌতমঃ পুনরাচার্যো ধৃষ্টদ্যুম্নময়োধয়ৎ
অসংভ্রান্তমসংভ্রান্তো যত্নবান্যত্নবত্তরম্
10.40
দ্রৌপদেয়াংস্তথা বীরানেকৈকং দশভিঃ শরৈঃ
অবিধ্যদাচার্যসুতো নাতিক্রুদ্ধঃ স্ময়ন্নিব
10.41
শল্যোঽপি রাজন্সংক্রুদ্ধো নিঘ্নন্সোমকপাণ্ডবান্
পুনরেব শিতৈর্বাণৈর্যুধিষ্ঠিরমপীডয়ৎ
10.42
তস্য ভীমো রণে ক্রুদ্ধঃ সংদষ্টদশনচ্ছদঃ
বিনাশায়াভিসংধায় গদামাদত্ত বীর্যবান্
10.43
যমদণ্ডপ্রতীকাশাং কালরাত্রিমিবোদ্যতাম্
গজবাজিমনুষ্যাণাং প্রাণান্তকরণীমপি
10.44
হেমপট্টপরিক্ষিপ্তামুল্কাং প্রজ্বলিতামিব
শৈক্যাং ব্যালীমিবাত্যুগ্রাং বজ্রকল্পাময়স্ময়ীম্
10.45
চন্দনাগুরুপঙ্কাক্তাং প্রমদামীপ্সিতামিব
বসামেদোসৃগাদিগ্ধাং জিহ্বাং বৈবস্বতীমিব
10.46
পটুঘণ্টারবশতাং বাসবীমশনীমিব
নির্মুক্তাশীবিষাকারাং পৃক্তাং গজমদৈরপি
10.47
ত্রাসনীং রিপুসৈন্যানাং স্বসৈন্যপরিহর্ষিণীম্
মনুষ্যলোকে বিখ্যাতাং গিরিশৃঙ্গবিদারিণীম্
10.48
যয়া কৈলাসভবনে মহেশ্বরসখং বলী
আহ্বয়ামাস কৌন্তেয়ঃ সংক্রুদ্ধমলকাধিপম্
10.49
যয়া মায়াবিনো দৃপ্তান্সুবহূন্ধনদালয়ে
জঘান গুহ্যকান্ক্রুদ্ধো মন্দারার্থে মহাবলঃ
নিবার্যমাণো বহুভির্দ্রৌপদ্যাঃ প্রিয়মাস্থিতঃ
10.50
তাং বজ্রমণিরত্নৌঘামষ্টাশ্রিং বজ্রগৌরবাম্
সমুদ্যম্য মহাবাহুঃ শল্যমভ্যদ্রবদ্রণে
10.51
গদয়া যুদ্ধকুশলস্তয়া দারুণনাদয়া
পোথয়ামাস শল্যস্য চতুরোঽশ্বান্মহাজবান্
10.52
ততঃ শল্যো রণে ক্রুদ্ধঃ পীনে বক্ষসি তোমরম্
নিচখান নদন্বীরো বর্ম ভিত্ত্বা চ সোঽভ্যগাৎ
10.53
বৃকোদরস্ত্বসংভ্রাতস্তমেবোদ্ধৃত্য তোমরম্
যন্তারং মদ্ররাজস্য নির্বিভেদ ততো হৃদি
10.54
স ভিন্নবর্মা রুধিরং বমন্বিত্রস্তমানসঃ
পপাতাভিমুখো দীনো মদ্ররাজস্ত্বপাক্রমৎ
10.55
কৃতপ্রতিকৃতং দৃষ্ট্বা শল্যো বিস্মিতমানসঃ
গদামাশ্রিত্য ধীরাত্মা প্রত্যমিত্রমবৈক্ষত
10.56
ততঃ সুমনসঃ পার্থা ভীমসেনমপূজয়ন্
তদ্দৃষ্ট্বা কর্ম সংগ্রামে ঘোরমক্লিষ্টকর্মণঃ