UtshovChapter 34
34.1
जनमेजय उवाच
पूर्वमेव यदा रामस्तस्मिन्युद्ध उपस्थिते
आमन्त्र्य केशवं यातो वृष्णिभिः सहितः प्रभुः
Janamejaya uvacha
Purvameva yada ramastasminyuddha upasthite
Amantrya keshavam yato vrishnibhih sahitah prabhuh
34.2
साहाय्यं धार्तराष्ट्रस्य न च कर्तास्मि केशव
न चैव पाण्डुपुत्राणां गमिष्यामि यथागतम्
Sahayyam dhartarashtrasya na cha kartasmi keshava
Na chaiva panduputranam gamishyami yathagatam
34.3
एवमुक्त्वा तदा रामो यातः शत्रुनिबर्हणः
तस्य चागमनं भूयो ब्रह्मञ्शंसितुमर्हसि
Evamuktva tada ramo yatah shatrunibarhanah
Tasya chagamanam bhuyo brahmanshansitumarhasi
34.4
आख्याहि मे विस्तरतः कथं राम उपस्थितः
कथं च दृष्टवान्युद्धं कुशलो ह्यसि सत्तम
Akhyahi me vistaratah katham rama upasthitah
Katham cha drishtavanyuddham kushalo hyasi sattama
34.5
वैशंपायन उवाच
उपप्लव्ये निविष्टेषु पाण्डवेषु महात्मसु
प्रेषितो धृतराष्ट्रस्य समीपं मधुसूदनः
शमं प्रति महाबाहो हितार्थं सर्वदेहिनाम्
Vaishampayana uvacha
Upaplavye nivishteshu pandaveshu mahatmasu
Preshito dhritarashtrasya samipam madhusudanah
Shamam prati mahabaho hitartham sarvadehinam
34.6
स गत्वा हास्तिनपुरं धृतराष्ट्रं समेत्य च
उक्तवान्वचनं तथ्यं हितं चैव विशेषतः
न च तत्कृतवान्राजा यथाख्यातं हि ते पुरा
Sa gatva hastinapuram dhritarashtram sametya cha
Uktavanvachanam tathyam hitam chaiva visheshatah
Na cha tatkritavanraja yathakhyatam hi te pura
34.7
अनवाप्य शमं तत्र कृष्णः पुरुषसत्तमः
आगच्छत महाबाहुरुपप्लव्यं जनाधिप
Anavapya shamam tatra krishnah purushasattamah
Agachchhata mahabahurupaplavyam janadhipa
34.8
ततः प्रत्यागतः कृष्णो धार्तराष्ट्रविसर्जितः
अक्रियायां नरव्याघ्र पाण्डवानिदमब्रवीत्
Tatah pratyagatah krishno dhartarashtravisarjitah
Akriyayam naravyaghra pandavanidamabravit
34.9
न कुर्वन्ति वचो मह्यं कुरवः कालचोदिताः
निर्गच्छध्वं पाण्डवेयाः पुष्येण सहिता मया
Na kurvanti vacho mahyam kuravah kalachoditah
Nirgachchhadhvam pandaveyah pushyena sahita maya
34.10
ततो विभज्यमानेषु बलेषु बलिनां वरः
प्रोवाच भ्रातरं कृष्णं रौहिणेयो महामनाः
Tato vibhajyamaneshu baleshu balinam varah
Provacha bhrataram krishnam rauhineyo mahamanah
34.11
तेषामपि महाबाहो साहाय्यं मधुसूदन
क्रियतामिति तत्कृष्णो नास्य चक्रे वचस्तदा
Teshamapi mahabaho sahayyam madhusudana
Kriyatamiti tatkrishno nasya chakre vachastada
34.12
ततो मन्युपरीतात्मा जगाम यदुनन्दनः
तीर्थयात्रां हलधरः सरस्वत्यां महायशाः
मैत्रे नक्षत्रयोगे स्म सहितः सर्वयादवैः
Tato manyuparitatma jagama yadunandanah
Tirthayatram haladharah sarasvatyam mahayashah
Maitre nakshatrayoge sma sahitah sarvayadavaih
34.13
आश्रयामास भोजस्तु दुर्योधनमरिंदमः
युयुधानेन सहितो वासुदेवस्तु पाण्डवान्
Ashrayamasa bhojastu duryodhanamarindamah
Yuyudhanena sahito vasudevastu pandavan
34.14
रौहिणेये गते शूरे पुष्येण मधुसूदनः
पाण्डवेयान्पुरस्कृत्य ययावभिमुखः कुरून्
Rauhineye gate shure pushyena madhusudanah
Pandaveyanpuraskritya yayavabhimukhah kurun
34.15
गच्छन्नेव पथिस्थस्तु रामः प्रेष्यानुवाच ह
संभारांस्तीर्थयात्रायां सर्वोपकरणानि च
आनयध्वं द्वारकाया अग्नीन्वै याजकांस्तथा
Gachchhanneva pathisthastu ramah preshyanuvacha ha
Sambharanstirthayatrayam sarvopakaranani cha
Anayadhvam dvarakaya agninvai yajakanstatha
34.16
सुवर्णं रजतं चैव धेनूर्वासांसि वाजिनः
कुञ्जरांश्च रथांश्चैव खरोष्ट्रं वाहनानि च
क्षिप्रमानीयतां सर्वं तीर्थहेतोः परिच्छदम्
Suvarnam rajatam chaiva dhenurvasansi vajinah
Kunjaranshcha rathanshchaiva kharoshtram vahanani cha
Kshipramaniyatam sarvam tirthahetoh parichchhadam
34.17
प्रतिस्रोतः सरस्वत्या गच्छध्वं शीघ्रगामिनः
ऋत्विजश्चानयध्वं वै शतशश्च द्विजर्षभान्
Pratisrotah sarasvatya gachchhadhvam shighragaminah
Ritvijashchanayadhvam vai shatashashcha dvijarshabhan
34.18
एवं संदिश्य तु प्रेष्यान्बलदेवो महाबलः
तीर्थयात्रां ययौ राजन्कुरूणां वैशसे तदा
सरस्वतीं प्रतिस्रोतः समुद्रादभिजग्मिवान्
Evam sandishya tu preshyanbaladevo mahabalah
Tirthayatram yayau rajankurunam vaishase tada
Sarasvatim pratisrotah samudradabhijagmivan
34.19
ऋत्विग्भिश्च सुहृद्भिश्च तथान्यैर्द्विजसत्तमैः
रथैर्गजैस्तथाश्वैश्च प्रेष्यैश्च भरतर्षभ
गोखरोष्ट्रप्रयुक्तैश्च यानैश्च बहुभिर्वृतः
Ritvigbhishcha suhridbhishcha tathanyairdvijasattamaih
Rathairgajaistathashvaishcha preshyaishcha bharatarshabha
Gokharoshtraprayuktaishcha yanaishcha bahubhirvritah
34.20
श्रान्तानां क्लान्तवपुषां शिशूनां विपुलायुषाम्
तानि यानानि देशेषु प्रतीक्ष्यन्ते स्म भारत
बुभुक्षितानामर्थाय कॢप्तमन्नं समन्ततः
Shrantanam klantavapusham shishunam vipulayusham
Tani yanani desheshu pratikshyante sma bharata
Bubhukshitanamarthaya kliptamannam samantatah
34.21
यो यो यत्र द्विजो भोक्तुं कामं कामयते तदा
तस्य तस्य तु तत्रैवमुपजह्रुस्तदा नृप
Yo yo yatra dvijo bhoktum kamam kamayate tada
Tasya tasya tu tatraivamupajahrustada nripa
34.22
तत्र स्थिता नरा राजन्रौहिणेयस्य शासनात्
भक्ष्यपेयस्य कुर्वन्ति राशींस्तत्र समन्ततः
Tatra sthita nara rajanrauhineyasya shasanat
Bhakshyapeyasya kurvanti rashinstatra samantatah
34.23
वासांसि च महार्हाणि पर्यङ्कास्तरणानि च
पूजार्थं तत्र कॢप्तानि विप्राणां सुखमिच्छताम्
Vasansi cha maharhani paryankastaranani cha
Pujartham tatra kliptani vipranam sukhamichchhatam
34.24
यत्र यः स्वपते विप्रः क्षत्रियो वापि भारत
तत्र तत्र तु तस्यैव सर्वं कॢप्तमदृश्यत
Yatra yah svapate viprah kshatriyo vapi bharata
Tatra tatra tu tasyaiva sarvam kliptamadrishyata
34.25
यथासुखं जनः सर्वस्तिष्ठते याति वा तदा
यातुकामस्य यानानि पानानि तृषितस्य च
Yathasukham janah sarvastishthate yati va tada
Yatukamasya yanani panani trishitasya cha
34.26
बुभुक्षितस्य चान्नानि स्वादूनि भरतर्षभ
उपजह्रुर्नरास्तत्र वस्त्राण्याभरणानि च
Bubhukshitasya channani svaduni bharatarshabha
Upajahrurnarastatra vastranyabharanani cha
34.27
स पन्थाः प्रबभौ राजन्सर्वस्यैव सुखावहः
स्वर्गोपमस्तदा वीर नराणां तत्र गच्छताम्
Sa panthah prababhau rajansarvasyaiva sukhavahah
Svargopamastada vira naranam tatra gachchhatam
34.28
नित्यप्रमुदितोपेतः स्वादुभक्षः शुभान्वितः
विपण्यापणपण्यानां नानाजनशतैर्वृतः
नानाद्रुमलतोपेतो नानारत्नविभूषितः
Nityapramuditopetah svadubhakshah shubhanvitah
Vipanyapanapanyanam nanajanashatairvritah
Nanadrumalatopeto nanaratnavibhushitah
34.29
ततो महात्मा नियमे स्थितात्मा; पुण्येषु तीर्थेषु वसूनि राजन्
ददौ द्विजेभ्यः क्रतुदक्षिणाश्च; यदुप्रवीरो हलभृत्प्रतीतः
Tato mahatma niyame sthitatma; punyeshu tirtheshu vasuni rajan
Dadau dvijebhyah kratudakshinashcha; yadupraviro halabhritpratitah
34.30
दोग्ध्रीश्च धेनूश्च सहस्रशो वै; सुवाससः काञ्चनबद्धशृङ्गीः
हयांश्च नानाविधदेशजाता;न्यानानि दासीश्च तथा द्विजेभ्यः
Dogdhrishcha dhenushcha sahasrasho vai; suvasasah kanchanabaddhashringih
Hayanshcha nanavidhadeshajata;nyanani dasishcha tatha dvijebhyah
34.31
रत्नानि मुक्तामणिविद्रुमं च; शृङ्गीसुवर्णं रजतं च शुभ्रम्
अयस्मयं ताम्रमयं च भाण्डं; ददौ द्विजातिप्रवरेषु रामः
Ratnani muktamanividrumam cha; shringisuvarnam rajatam cha shubhram
Ayasmayam tamramayam cha bhandam; dadau dvijatipravareshu ramah
34.32
एवं स वित्तं प्रददौ महात्मा; सरस्वतीतीर्थवरेषु भूरि
ययौ क्रमेणाप्रतिमप्रभाव;स्ततः कुरुक्षेत्रमुदारवृत्तः
Evam sa vittam pradadau mahatma; sarasvatitirthavareshu bhuri
Yayau kramenapratimaprabhava;statah kurukshetramudaravrittah
34.33
जनमेजय उवाच
सारस्वतानां तीर्थानां गुणोत्पत्तिं वदस्व मे
फलं च द्विपदां श्रेष्ठ कर्मनिर्वृत्तिमेव च
Janamejaya uvacha
Sarasvatanam tirthanam gunotpattim vadasva me
Phalam cha dvipadam shreshtha karmanirvrittimeva cha
34.34
यथाक्रमं च भगवंस्तीर्थानामनुपूर्वशः
ब्रह्मन्ब्रह्मविदां श्रेष्ठ परं कौतूहलं हि मे
Yathakramam cha bhagavanstirthanamanupurvashah
Brahmanbrahmavidam shreshtha param kautuhalam hi me
34.35
वैशंपायन उवाच
तीर्थानां विस्तरं राजन्गुणोत्पत्तिं च सर्वशः
मयोच्यमानां शृणु वै पुण्यां राजेन्द्र कृत्स्नशः
Vaishampayana uvacha
Tirthanam vistaram rajangunotpattim cha sarvashah
Mayochyamanam shrinu vai punyam rajendra kritsnashah
34.36
पूर्वं महाराज यदुप्रवीर; ऋत्विक्सुहृद्विप्रगणैश्च सार्धम्
पुण्यं प्रभासं समुपाजगाम; यत्रोडुराड्यक्ष्मणा क्लिश्यमानः
Purvam maharaja yadupravira; ritviksuhridvipraganaishcha sardham
Punyam prabhasam samupajagama; yatroduradyakshmana klishyamanah
34.37
विमुक्तशापः पुनराप्य तेजः; सर्वं जगद्भासयते नरेन्द्र
एवं तु तीर्थप्रवरं पृथिव्यां; प्रभासनात्तस्य ततः प्रभासः
Vimuktashapah punarapya tejah; sarvam jagadbhasayate narendra
Evam tu tirthapravaram prithivyam; prabhasanattasya tatah prabhasah
34.38
जनमेजय उवाच
किमर्थं भगवान्सोमो यक्ष्मणा समगृह्यत
कथं च तीर्थप्रवरे तस्मिंश्चन्द्रो न्यमज्जत
Janamejaya uvacha
Kimartham bhagavansomo yakshmana samagrihyata
Katham cha tirthapravare tasminshchandro nyamajjata
34.39
कथमाप्लुत्य तस्मिंस्तु पुनराप्यायितः शशी
एतन्मे सर्वमाचक्ष्व विस्तरेण महामुने
Kathamaplutya tasminstu punarapyayitah shashi
Etanme sarvamachakshva vistarena mahamune
34.40
वैशंपायन उवाच
दक्षस्य तनया यास्ताः प्रादुरासन्विशां पते
स सप्तविंशतिं कन्या दक्षः सोमाय वै ददौ
Vaishampayana uvacha
Dakshasya tanaya yastah pradurasanvisham pate
Sa saptavinshatim kanya dakshah somaya vai dadau
34.41
नक्षत्रयोगनिरताः संख्यानार्थं च भारत
पत्न्यो वै तस्य राजेन्द्र सोमस्य शुभलक्षणाः
Nakshatrayoganiratah sankhyanartham cha bharata
Patnyo vai tasya rajendra somasya shubhalakshanah
34.42
तास्तु सर्वा विशालाक्ष्यो रूपेणाप्रतिमा भुवि
अत्यरिच्यत तासां तु रोहिणी रूपसंपदा
Tastu sarva vishalakshyo rupenapratima bhuvi
Atyarichyata tasam tu rohini rupasampada
34.43
ततस्तस्यां स भगवान्प्रीतिं चक्रे निशाकरः
सास्य हृद्या बभूवाथ तस्मात्तां बुभुजे सदा
Tatastasyam sa bhagavanpritim chakre nishakarah
Sasya hridya babhuvatha tasmattam bubhuje sada
34.44
पुरा हि सोमो राजेन्द्र रोहिण्यामवसच्चिरम्
ततोऽस्य कुपितान्यासन्नक्षत्राणि महात्मनः
Pura hi somo rajendra rohinyamavasachchiram
Tatosya kupitanyasannakshatrani mahatmanah
34.45
ता गत्वा पितरं प्राहुः प्रजापतिमतन्द्रिताः
सोमो वसति नास्मासु रोहिणीं भजते सदा
Ta gatva pitaram prahuh prajapatimatandritah
Somo vasati nasmasu rohinim bhajate sada
34.46
ता वयं सहिताः सर्वास्त्वत्सकाशे प्रजेश्वर
वत्स्यामो नियताहारास्तपश्चरणतत्पराः
Ta vayam sahitah sarvastvatsakashe prajeshvara
Vatsyamo niyataharastapashcharanatatparah
34.47
श्रुत्वा तासां तु वचनं दक्षः सोममथाब्रवीत्
समं वर्तस्व भार्यासु मा त्वाधर्मो महान्स्पृशेत्
Shrutva tasam tu vachanam dakshah somamathabravit
Samam vartasva bharyasu ma tvadharmo mahansprishet
34.48
ताश्च सर्वाब्रवीद्दक्षो गच्छध्वं सोममन्तिकात्
समं वत्स्यति सर्वासु चन्द्रमा मम शासनात्
Tashcha sarvabraviddaksho gachchhadhvam somamantikat
Samam vatsyati sarvasu chandrama mama shasanat
34.49
विसृष्टास्तास्तदा जग्मुः शीतांशुभवनं तदा
तथापि सोमो भगवान्पुनरेव महीपते
रोहिणीं निवसत्येव प्रीयमाणो मुहुर्मुहुः
Visrishtastastada jagmuh shitanshubhavanam tada
Tathapi somo bhagavanpunareva mahipate
Rohinim nivasatyeva priyamano muhurmuhuh
34.50
ततस्ताः सहिताः सर्वा भूयः पितरमब्रुवन्
तव शुश्रूषणे युक्ता वत्स्यामो हि तवाश्रमे
सोमो वसति नास्मासु नाकरोद्वचनं तव
Tatastah sahitah sarva bhuyah pitaramabruvan
Tava shushrushane yukta vatsyamo hi tavashrame
Somo vasati nasmasu nakarodvachanam tava
34.51
तासां तद्वचनं श्रुत्वा दक्षः सोममथाब्रवीत्
समं वर्तस्व भार्यासु मा त्वां शप्स्ये विरोचन
Tasam tadvachanam shrutva dakshah somamathabravit
Samam vartasva bharyasu ma tvam shapsye virochana
34.52
अनादृत्य तु तद्वाक्यं दक्षस्य भगवाञ्शशी
रोहिण्या सार्धमवसत्ततस्ताः कुपिताः पुनः
Anadritya tu tadvakyam dakshasya bhagavanshashi
Rohinya sardhamavasattatastah kupitah punah
34.53
गत्वा च पितरं प्राहुः प्रणम्य शिरसा तदा
सोमो वसति नास्मासु तस्मान्नः शरणं भव
Gatva cha pitaram prahuh pranamya shirasa tada
Somo vasati nasmasu tasmannah sharanam bhava
34.54
रोहिण्यामेव भगवन्सदा वसति चन्द्रमाः
तस्मान्नस्त्राहि सर्वा वै यथा नः सोम आविशेत्
Rohinyameva bhagavansada vasati chandramah
Tasmannastrahi sarva vai yatha nah soma avishet
34.55
तच्छ्रुत्वा भगवान्क्रुद्धो यक्ष्माणं पृथिवीपते
ससर्ज रोषात्सोमाय स चोडुपतिमाविशत्
Tachchhrutva bhagavankruddho yakshmanam prithivipate
Sasarja roshatsomaya sa chodupatimavishat
34.56
स यक्ष्मणाभिभूतात्माक्षीयताहरहः शशी
यत्नं चाप्यकरोद्राजन्मोक्षार्थं तस्य यक्ष्मणः
Sa yakshmanabhibhutatmakshiyataharahah shashi
Yatnam chapyakarodrajanmokshartham tasya yakshmanah
34.57
इष्ट्वेष्टिभिर्महाराज विविधाभिर्निशाकरः
न चामुच्यत शापाद्वै क्षयं चैवाभ्यगच्छत
Ishtveshtibhirmaharaja vividhabhirnishakarah
Na chamuchyata shapadvai kshayam chaivabhyagachchhata
34.58
क्षीयमाणे ततः सोमे ओषध्यो न प्रजज्ञिरे
निरास्वादरसाः सर्वा हतवीर्याश्च सर्वशः
Kshiyamane tatah some oshadhyo na prajagyire
Nirasvadarasah sarva hataviryashcha sarvashah
34.59
ओषधीनां क्षये जाते प्राणिनामपि संक्षयः
कृशाश्चासन्प्रजाः सर्वाः क्षीयमाणे निशाकरे
Oshadhinam kshaye jate praninamapi sankshayah
Krishashchasanprajah sarvah kshiyamane nishakare
34.60
ततो देवाः समागम्य सोममूचुर्महीपते
किमिदं भवतो रूपमीदृशं न प्रकाशते
Tato devah samagamya somamuchurmahipate
Kimidam bhavato rupamidrisham na prakashate
34.61
कारणं ब्रूहि नः सर्वं येनेदं ते महद्भयम्
श्रुत्वा तु वचनं त्वत्तो विधास्यामस्ततो वयम्
Karanam bruhi nah sarvam yenedam te mahadbhayam
Shrutva tu vachanam tvatto vidhasyamastato vayam
34.62
एवमुक्तः प्रत्युवाच सर्वांस्ताञ्शशलक्षणः
शापं च कारणं चैव यक्ष्माणं च तथात्मनः
Evamuktah pratyuvacha sarvanstanshashalakshanah
Shapam cha karanam chaiva yakshmanam cha tathatmanah
34.63
देवास्तस्य वचः श्रुत्वा गत्वा दक्षमथाब्रुवन्
प्रसीद भगवन्सोमे शापश्चैष निवर्त्यताम्
Devastasya vachah shrutva gatva dakshamathabruvan
Prasida bhagavansome shapashchaisha nivartyatam
34.64
असौ हि चन्द्रमाः क्षीणः किंचिच्छेषो हि लक्ष्यते
क्षयाच्चैवास्य देवेश प्रजाश्चापि गताः क्षयम्
Asau hi chandramah kshinah kinchichchhesho hi lakshyate
Kshayachchaivasya devesha prajashchapi gatah kshayam
34.65
वीरुदोषधयश्चैव बीजानि विविधानि च
तथा वयं लोकगुरो प्रसादं कर्तुमर्हसि
Virudoshadhayashchaiva bijani vividhani cha
Tatha vayam lokaguro prasadam kartumarhasi
34.66
एवमुक्तस्तदा चिन्त्य प्राह वाक्यं प्रजापतिः
नैतच्छक्यं मम वचो व्यावर्तयितुमन्यथा
हेतुना तु महाभागा निवर्तिष्यति केनचित्
Evamuktastada chintya praha vakyam prajapatih
Naitachchhakyam mama vacho vyavartayitumanyatha
Hetuna tu mahabhaga nivartishyati kenachit
34.67
समं वर्ततु सर्वासु शशी भार्यासु नित्यशः
सरस्वत्या वरे तीर्थे उन्मज्जञ्शशलक्षणः
पुनर्वर्धिष्यते देवास्तद्वै सत्यं वचो मम
Samam vartatu sarvasu shashi bharyasu nityashah
Sarasvatya vare tirthe unmajjanshashalakshanah
Punarvardhishyate devastadvai satyam vacho mama
34.68
मासार्धं च क्षयं सोमो नित्यमेव गमिष्यति
मासार्धं च सदा वृद्धिं सत्यमेतद्वचो मम
Masardham cha kshayam somo nityameva gamishyati
Masardham cha sada vriddhim satyametadvacho mama
34.69
सरस्वतीं ततः सोमो जगाम ऋषिशासनात्
प्रभासं परमं तीर्थं सरस्वत्या जगाम ह
Sarasvatim tatah somo jagama rishishasanat
Prabhasam paramam tirtham sarasvatya jagama ha
34.70
अमावास्यां महातेजास्तत्रोन्मज्जन्महाद्युतिः
लोकान्प्रभासयामास शीतांशुत्वमवाप च
Amavasyam mahatejastatronmajjanmahadyutih
Lokanprabhasayamasa shitanshutvamavapa cha
34.71
देवाश्च सर्वे राजेन्द्र प्रभासं प्राप्य पुष्कलम्
सोमेन सहिता भूत्वा दक्षस्य प्रमुखेऽभवन्
Devashcha sarve rajendra prabhasam prapya pushkalam
Somena sahita bhutva dakshasya pramukhebhavan
34.72
ततः प्रजापतिः सर्वा विससर्जाथ देवताः
सोमं च भगवान्प्रीतो भूयो वचनमब्रवीत्
Tatah prajapatih sarva visasarjatha devatah
Somam cha bhagavanprito bhuyo vachanamabravit
34.73
मावमंस्थाः स्त्रियः पुत्र मा च विप्रान्कदाचन
गच्छ युक्तः सदा भूत्वा कुरु वै शासनं मम
Mavamansthah striyah putra ma cha viprankadachana
Gachchha yuktah sada bhutva kuru vai shasanam mama
34.74
स विसृष्टो महाराज जगामाथ स्वमालयम्
प्रजाश्च मुदिता भूत्वा भोजने च यथा पुरा
Sa visrishto maharaja jagamatha svamalayam
Prajashcha mudita bhutva bhojane cha yatha pura
34.75
एतत्ते सर्वमाख्यातं यथा शप्तो निशाकरः
प्रभासं च यथा तीर्थं तीर्थानां प्रवरं ह्यभूत्
Etatte sarvamakhyatam yatha shapto nishakarah
Prabhasam cha yatha tirtham tirthanam pravaram hyabhut
34.76
अमावास्यां महाराज नित्यशः शशलक्षणः
स्नात्वा ह्याप्यायते श्रीमान्प्रभासे तीर्थ उत्तमे
Amavasyam maharaja nityashah shashalakshanah
Snatva hyapyayate shrimanprabhase tirtha uttame
34.77
अतश्चैनं प्रजानन्ति प्रभासमिति भूमिप
प्रभां हि परमां लेभे तस्मिन्नुन्मज्ज्य चन्द्रमाः
Atashchainam prajananti prabhasamiti bhumipa
Prabham hi paramam lebhe tasminnunmajjya chandramah
34.78
ततस्तु चमसोद्भेदमच्युतस्त्वगमद्बली
चमसोद्भेद इत्येवं यं जनाः कथयन्त्युत
Tatastu chamasodbhedamachyutastvagamadbali
Chamasodbheda ityevam yam janah kathayantyuta
34.79
तत्र दत्त्वा च दानानि विशिष्टानि हलायुधः
उषित्वा रजनीमेकां स्नात्वा च विधिवत्तदा
Tatra dattva cha danani vishishtani halayudhah
Ushitva rajanimekam snatva cha vidhivattada
34.80
उदपानमथागच्छत्त्वरावान्केशवाग्रजः
आद्यं स्वस्त्ययनं चैव तत्रावाप्य महत्फलम्
Udapanamathagachchhattvaravankeshavagrajah
Adyam svastyayanam chaiva tatravapya mahatphalam
34.81
स्निग्धत्वादोषधीनां च भूमेश्च जनमेजय
जानन्ति सिद्धा राजेन्द्र नष्टामपि सरस्वतीम्
Snigdhatvadoshadhinam cha bhumeshcha janamejaya
Jananti siddha rajendra nashtamapi sarasvatim