Utshovঅধ্যায় 9
9.1
সংজয় উবাচ
ততঃ কর্ণো মহেষ্বাসঃ পাণ্ডবানামনীকিনীম্
জঘান সমরে শূরঃ শরৈঃ সংনতপর্বভিঃ
9.2
তথৈব পাণ্ডবা রাজংস্তব পুত্রস্য বাহিনীম্
কর্ণস্য প্রমুখে ক্রুদ্ধা বিনিজঘ্নুর্মহারথাঃ
9.3
কর্ণো রাজন্মহাবাহুর্ন্যবধীত্পাণ্ডবীং চমূম্
নারাচৈরর্করশ্ম্যাভৈঃ কর্মারপরিমার্জিতৈঃ
9.4
তত্র ভারত কর্ণেন নারাচৈস্তাডিতা গজাঃ
নেদুঃ সেদুশ্চ মম্লুশ্চ বভ্রমুশ্চ দিশো দশ
9.5
বধ্যমানে বলে তস্মিন্সূতপুত্রেণ মারিষ
নকুলোঽভ্যদ্রবত্তূর্ণং সূতপুত্রং মহারণে
9.6
ভীমসেনস্তথা দ্রৌণিং কুর্বাণং কর্ম দুষ্করম্
বিন্দানুবিন্দৌ কৈকেয়ৌ সাত্যকিঃ সমবারয়ৎ
9.7
শ্রুতকর্মাণমায়ান্তং চিত্রসেনো মহীপতিঃ
প্রতিবিন্ধ্যং তথা চিত্রশ্চিত্রকেতনকার্মুকঃ
9.8
দুর্যোধনস্তু রাজানং ধর্মপুত্রং যুধিষ্ঠিরম্
সংশপ্তকগণান্ক্রুদ্ধো অভ্যধাবদ্ধনংজয়ঃ
9.9
ধৃষ্টদ্যুম্নঃ কৃপং চাথ তস্মিন্বীরবরক্ষয়ে
শিখণ্ডী কৃতবর্মাণং সমাসাদয়দচ্যুতম্
9.10
শ্রুতকীর্তিস্তথা শল্যং মাদ্রীপুত্রঃ সুতং তব
দুঃশাসনং মহারাজ সহদেবঃ প্রতাপবান্
9.11
কেকয়ৌ সাত্যকিং যুদ্ধে শরবর্ষেণ ভাস্বতা
সাত্যকিঃ কেকয়ৌ চৈব ছাদয়ামাস ভারত
9.12
তাবেনং ভ্রাতরৌ বীরং জঘ্নতুর্হৃদয়ে ভৃশম্
বিষাণাভ্যাং যথা নাগৌ প্রতিনাগং মহাহবে
9.13
শরসংভিন্নবর্মাণৌ তাবুভৌ ভ্রাতরৌ রণে
সাত্যকিং সত্যকর্মাণং রাজন্বিব্যধতুঃ শরৈঃ
9.14
তৌ সাত্যকির্মহারাজ প্রহসন্সর্বতোদিশম্
ছাদয়ঞ্শরবর্ষেণ বারয়ামাস ভারত
9.15
বার্যমাণৌ ততস্তৌ তু শৈনেয়শরবৃষ্টিভিঃ
শৈনেয়স্য রথং তূর্ণং ছাদয়ামাসতুঃ শরৈঃ
9.16
তয়োস্তু ধনুষী চিত্রে ছিত্ত্বা শৌরির্মহাহবে
অথ তৌ সায়কৈস্তীক্ষ্ণৈশ্ছাদয়ামাস দুঃসহৈঃ
9.17
অথান্যে ধনুষী মৃষ্টে প্রগৃহ্য চ মহাশরান্
সাত্যকিং পূরয়ন্তৌ তৌ চেরতুর্লঘু সুষ্ঠু চ
9.18
তাভ্যাং মুক্তা মহাবাণাঃ কঙ্কবর্হিণবাসসঃ
দ্যোতয়ন্তো দিশঃ সর্বাঃ সংপেতুঃ স্বর্ণভূষণাঃ
9.19
বাণান্ধকারমভবত্তয়ো রাজন্মহাহবে
অন্যোন্যস্য ধনুশ্চৈব চিচ্ছিদুস্তে মহারথাঃ
9.20
ততঃ ক্রুদ্ধো মহারাজ সাত্বতো যুদ্ধদুর্মদঃ
ধনুরন্যত্সমাদায় সজ্যং কৃত্বা চ সংয়ুগে
ক্ষুরপ্রেণ সুতীক্ষ্ণেন অনুবিন্দশিরোঽহরৎ
9.21
তচ্ছিরো ন্যপতদ্ভূমৌ কুণ্ডলোত্পীডিতং মহৎ
শম্বরস্য শিরো যদ্বন্নিহতস্য মহারণে
শোষয়ন্কেকয়ান্সর্বাঞ্জগামাশু বসুংধরাম্
9.22
তং দৃষ্ট্বা নিহতং শূরং ভ্রাতা তস্য মহারথঃ
সজ্যমন্যদ্ধনুঃ কৃত্বা শৈনেয়ং প্রত্যবারয়ৎ
9.23
স শক্ত্যা সাত্যকিং বিদ্ধ্বা স্বর্ণপুঙ্খৈঃ শিলাশিতৈঃ
ননাদ বলবন্নাদং তিষ্ঠ তিষ্ঠেতি চাব্রবীৎ
9.24
স সাত্যকিং পুনঃ ক্রুদ্ধঃ কেকয়ানাং মহারথঃ
শরৈরগ্নিশিখাকারৈর্বাহ্বোরুরসি চার্দয়ৎ
9.25
স শরৈঃ ক্ষতসর্বাঙ্গঃ সাত্বতঃ সত্ত্বকোবিদঃ
ররাজ সমরে রাজন্সপত্র ইব কিংশুকঃ
9.26
সাত্যকিঃ সমরে বিদ্ধঃ কেকয়েন মহাত্মনা
কেকয়ং পঞ্চবিংশত্যা বিব্যাধ প্রহসন্নিব
9.27
শতচন্দ্রচিতে গৃহ্য চর্মণী সুভুজৌ তু তৌ
ব্যরোচেতাং মহারঙ্গে নিস্ত্রিংশবরধারিণৌ
যথা দেবাসুরে যুদ্ধে জম্ভশক্রৌ মহাবলৌ
9.28
মণ্ডলানি ততস্তৌ চ বিচরন্তৌ মহারণে
অন্যোন্যমসিভিস্তূর্ণং সমাজঘ্নতুরাহবে
9.29
কেকয়স্য ততশ্চর্ম দ্বিধা চিচ্ছেদ সাত্বতঃ
সাত্যকেশ্চ তথৈবাসৌ চর্ম চিচ্ছেদ পার্থিবঃ
9.30
চর্ম চ্ছিত্ত্বা তু কৈকেয়স্তারাগণশতৈর্বৃতম্
চচার মণ্ডলান্যেব গতপ্রত্যাগতানি চ
9.31
তং চরন্তং মহারঙ্গে নিস্ত্রিংশবরধারিণম্
অপহস্তেন চিচ্ছেদ শৈনেয়স্ত্বরয়ান্বিতঃ
9.32
সবর্মা কেকয়ো রাজন্দ্বিধা ছিন্নো মহাহবে
নিপপাত মহেষ্বাসো বজ্রনুন্ন ইবাচলঃ
9.33
তং নিহত্য রণে শূরঃ শৈনেয়ো রথসত্তমঃ
যুধামন্যো রথং তূর্ণমারুরোহ পরংতপঃ
9.34
ততোঽন্যং রথমাস্থায় বিধিবত্কল্পিতং পুনঃ
কেকয়ানাং মহত্সৈন্যং ব্যধমত্সাত্যকিঃ শরৈঃ
9.35
সা বধ্যমানা সমরে কেকয়স্য মহাচমূঃ
তমুত্সৃজ্য রথং শত্রুং প্রদুদ্রাব দিশো দশ