Utshovঅধ্যায় 8
8.1
সংজয় উবাচ
তে সেনেঽন্যোন্যমাসাদ্য প্রহৃষ্টাশ্বনরদ্বিপে
বৃহত্যৌ সংপ্রজহ্রাতে দেবাসুরচমূপমে
8.2
ততো গজা রথাশ্চাশ্বাঃ পত্তয়শ্চ মহাহবে
সংপ্রহারং পরং চক্রুর্দেহপাপ্মপ্রণাশনম্
8.3
পূর্ণচন্দ্রার্কপদ্মানাং কান্তিত্বিড্গন্ধতঃ সমৈঃ
উত্তমাঙ্গৈর্নৃসিংহানাং নৃসিংহাস্তস্তরুর্মহীম্
8.4
অর্ধচন্দ্রৈস্তথা ভল্লৈঃ ক্ষুরপ্রৈরসিপট্টিশৈঃ
পরশ্বধৈশ্চাপ্যকৃন্তন্নুত্তমাঙ্গানি যুধ্যতাম্
8.5
ব্যায়তায়তবাহূনাং ব্যায়তায়তবাহুভিঃ
ব্যায়তা বাহবঃ পেতুশ্ছিন্নমুষ্ট্যায়ুধাঙ্গদাঃ
8.6
তৈঃ স্ফুরদ্ভির্মহী ভাতি রক্তাঙ্গুলিতলৈস্তদা
গরুডপ্রহতৈরুগ্রৈঃ পঞ্চাস্যৈরিব পন্নগৈঃ
8.7
হয়স্যন্দননাগেভ্যঃ পেতুর্বীরা দ্বিষদ্ধতাঃ
বিমানেভ্যো যথা ক্ষীণে পুণ্যে স্বর্গসদস্তথা
8.8
গদাভিরন্যৈর্গুর্বীভিঃ পরিঘৈর্মুসলৈরপি
পোথিতাঃ শতশঃ পেতুর্বীরা বীরতরৈ রণে
8.9
রথা রথৈর্বিনিহতা মত্তা মত্তৈর্দ্বিপৈর্দ্বিপাঃ
সাদিনঃ সাদিভিশ্চৈব তস্মিন্পরমসংকুলে
8.10
রথা বররথৈর্নাগৈরশ্বারোহাশ্চ পত্তিভিঃ
অশ্বারোহৈঃ পদাতাশ্চ নিহতা যুধি শেরতে
8.11
রথাশ্বপত্তয়ো নাগৈ রথৈর্নাগাশ্চ পত্তয়ঃ
রথপত্তিদ্বিপাশ্চাশ্বৈর্নৃভিশ্চাশ্বরথদ্বিপাঃ
8.12
রথাশ্বেভনরাণাং চ নরাশ্বেভরথৈঃ কৃতম্
পাণিপাদৈশ্চ শস্ত্রৈশ্চ রথৈশ্চ কদনং মহৎ
8.13
তথা তস্মিন্বলে শূরৈর্বধ্যমানে হতেঽপি চ
অস্মানভ্যাগমন্পার্থা বৃকোদরপুরোগমাঃ
8.14
ধৃষ্টদ্যুম্নঃ শিখণ্ডী চ দ্রৌপদেয়াঃ প্রভদ্রকাঃ
সাত্যকিশ্চেকিতানশ্চ দ্রবিডৈঃ সৈনিকৈঃ সহ
8.15
ভৃতা বিত্তেন মহতা পাণ্ড্যাশ্চৌড্রাঃ সকেরলাঃ
ব্যূঢোরস্কা দীর্ঘভুজাঃ প্রাংশবঃ প্রিয়দর্শনাঃ
8.16
আপীডিনো রক্তদন্তা মত্তমাতঙ্গবিক্রমাঃ
নানাবিরাগবসনা গন্ধচূর্ণাবচূর্ণিতাঃ
8.17
বদ্ধাসয়ঃ পাশহস্তা বারণপ্রতিবারণাঃ
সমানমৃত্যবো রাজন্ননীকস্থাঃ পরস্পরম্
8.18
কলাপিনশ্চাপহস্তা দীর্ঘকেশাঃ প্রিয়াহবাঃ
পত্তয়ঃ সাত্যকেরন্ধ্রা ঘোররূপপরাক্রমাঃ
8.19
অথাপরে পুনঃ শূরাশ্চেদিপাঞ্চালকেকয়াঃ
করূষাঃ কোসলাঃ কাশ্যা মাগধাশ্চাপি দুদ্রুবুঃ
8.20
তেষাং রথাশ্চ নাগাশ্চ প্রবরাশ্চাপি পত্তয়ঃ
নানাবিধরবৈর্হৃষ্টা নৃত্যন্তি চ হসন্তি চ
8.21
তস্য সৈন্যস্য মহতো মহামাত্রবরৈর্বৃতঃ
মধ্যং বৃকোদরোঽভ্যাগাত্ত্বদীয়ং নাগধূর্গতঃ
8.22
স নাগপ্রবরোঽত্যুগ্রো বিধিবত্কল্পিতো বভৌ
উদয়াদ্র্যগ্র্যভবনং যথাভ্যুদিতভাস্করম্
8.23
তস্যায়সং বর্মবরং বররত্নবিভূষিতম্
তারোদ্ভাসস্য নভসঃ শারদস্য সমত্বিষম্
8.24
স তোমরপ্রাসকরশ্চারুমৌলিঃ স্বলংকৃতঃ
চরন্মধ্যংদিনার্কাভস্তেজসা ব্যদহদ্রিপূন্
8.25
তং দৃষ্ট্বা দ্বিরদং দূরাত্ক্ষেমধূর্তির্দ্বিপস্থিতঃ
আহ্বয়ানোঽভিদুদ্রাব প্রমনাঃ প্রমনস্তরম্
8.26
তয়োঃ সমভবদ্যুদ্ধং দ্বিপয়োরুগ্ররূপয়োঃ
যদৃচ্ছয়া দ্রুমবতোর্মহাপর্বতয়োরিব
8.27
সংসক্তনাগৌ তৌ বীরৌ তোমরৈরিতরেতরম্
বলবত্সূর্যরশ্ম্যাভৈর্ভিত্ত্বা ভিত্ত্বা বিনেদতুঃ
8.28
ব্যপসৃত্য তু নাগাভ্যাং মণ্ডলানি বিচেরতুঃ
প্রগৃহ্য চৈব ধনুষী জঘ্নতুর্বৈ পরস্পরম্
8.29
ক্ষ্বেডিতাস্ফোটিতরবৈর্বাণশব্দৈশ্চ সর্বশঃ
তৌ জনান্হর্ষয়িত্বা চ সিংহনাদান্প্রচক্রতুঃ
8.30
সমুদ্যতকরাভ্যাং তৌ দ্বিপাভ্যাং কৃতিনাবুভৌ
বাতোদ্ধূতপতাকাভ্যাং যুয়ুধাতে মহাবলৌ
8.31
তাবন্যোন্যস্য ধনুষী ছিত্ত্বান্যোন্যং বিনেদতুঃ
শক্তিতোমরবর্ষেণ প্রাবৃণ্মেঘাবিবাম্বুভিঃ
8.32
ক্ষেমধূর্তিস্তদা ভীমং তোমরেণ স্তনান্তরে
নির্বিভেদ তু বেগেন ষড্ভিশ্চাপ্যপরৈর্নদন্
8.33
স ভীমসেনঃ শুশুভে তোমরৈরঙ্গমাশ্রিতৈঃ
ক্রোধদীপ্তবপুর্মেঘৈঃ সপ্তসপ্তিরিবাংশুমান্
8.34
ততো ভাস্করবর্ণাভমঞ্জোগতিময়স্ময়ম্
সসর্জ তোমরং ভীমঃ প্রত্যমিত্রায় যত্নবান্
8.35
ততঃ কুলূতাধিপতিশ্চাপমায়ম্য সায়কৈঃ
দশভিস্তোমরং ছিত্ত্বা শক্ত্যা বিব্যাধ পাণ্ডবম্
8.36
অথ কার্মুকমাদায় মহাজলদনিস্বনম্
রিপোরভ্যর্দয়ন্নাগমুন্মদঃ পাণ্ডবঃ শরৈঃ
8.37
স শরৌঘার্দিতো নাগো ভীমসেনেন সংয়ুগে
নিগৃহ্যমাণো নাতিষ্ঠদ্বাতধ্বস্ত ইবাম্বুদঃ
8.38
তামভ্যধাবদ্দ্বিরদং ভীমসেনস্য নাগরাট্
মহাবাতেরিতং মেঘং বাতোদ্ধূত ইবাম্বুদঃ
8.39
সংনিবর্ত্যাত্মনো নাগং ক্ষেমধূর্তিঃ প্রয়ত্নতঃ
বিব্যাধাভিদ্রুতং বাণৈর্ভীমসেনং সকুঞ্জরম্
8.40
ততঃ সাধুবিসৃষ্টেন ক্ষুরেণ পুরুষর্ষভঃ
ছিত্ত্বা শরাসনং শত্রোর্নাগমামিত্রমার্দয়ৎ
8.41
ততঃ খজাকয়া ভীমং ক্ষেমধূর্তিঃ পরাভিনৎ
জঘান চাস্য দ্বিরদং নারাচৈঃ সর্বমর্মসু
8.42
পুরা নাগস্য পতনাদবপ্লুত্য স্থিতো মহীম্
ভীমসেনো রিপোর্নাগং গদয়া সমপোথয়ৎ
8.43
তস্মাত্প্রমথিতান্নাগাত্ক্ষেমধূর্তিমবদ্রুতম্
উদ্যতাসিমুপায়ান্তং গদয়াহন্বৃকোদরঃ
8.44
স পপাত হতঃ সাসির্ব্যসুঃ স্বমভিতো দ্বিপম্
বজ্রপ্ররুগ্ণমচলং সিংহো বজ্রহতো যথা
8.45
নিহতং নৃপতিং দৃষ্ট্বা কুলূতানাং যশস্করম্
প্রাদ্রবদ্ব্যথিতা সেনা ত্বদীয়া ভরতর্ষভ