Utshovঅধ্যায় 7
7.1
ধৃতরাষ্ট্র উবাচ
সেনাপত্যং তু সংপ্রাপ্য কর্ণো বৈকর্তনস্তদা
তথোক্তশ্চ স্বয়ং রাজ্ঞা স্নিগ্ধং ভ্রাতৃসমং বচঃ
7.2
যোগমাজ্ঞাপ্য সেনায়া আদিত্যেঽভ্যুদিতে তদা
অকরোত্কিং মহাপ্রাজ্ঞস্তন্মমাচক্ষ্ব সংজয়
7.3
সংজয় উবাচ
কর্ণস্য মতমাজ্ঞায় পুত্রস্তে ভরতর্ষভ
যোগমাজ্ঞাপয়ামাস নান্দীতূর্যপুরঃসরম্
7.4
মহত্যপররাত্রে তু তব পুত্রস্য মারিষ
যোগো যোগেতি সহসা প্রাদুরাসীন্মহাস্বনঃ
7.5
নাগানাং কল্পমানানাং রথানাং চ বরূথিনাম্
সংনহ্যতাং পদাতীনাং বাজিনাং চ বিশাং পতে
7.6
ক্রোশতাং চাপি যোধানাং ত্বরিতানাং পরস্পরম্
বভূব তুমুলঃ শব্দো দিবস্পৃক্সুমহাংস্তদা
7.7
ততঃ শ্বেতপতাকেন বালার্কাকারবাজিনা
হেমপৃষ্ঠেন ধনুষা হস্তিকক্ষ্যেণ কেতুনা
7.8
তূণেন শরপূর্ণেন সাঙ্গদেন বরূথিনা
শতঘ্নীকিঙ্কিণীশক্তিশূলতোমরধারিণা
7.9
কার্মুকেণোপপন্নেন বিমলাদিত্যবর্চসা
রথেনাতিপতাকেন সূতপুত্রো ব্যদৃশ্যত
7.10
ধমন্তং বারিজং তাত হেমজালবিভূষিতম্
বিধুন্বানং মহচ্চাপং কার্তস্বরবিভূষিতম্
7.11
দৃষ্ট্বা কর্ণং মহেষ্বাসং রথস্থং রথিনাং বরম্
ভানুমন্তমিবোদ্যন্তং তমো ঘ্নন্তং সহস্রশঃ
7.12
ন ভীষ্মব্যসনং কেচিন্নাপি দ্রোণস্য মারিষ
নান্যেষাং পুরুষব্যাঘ্র মেনিরে তত্র কৌরবাঃ
7.13
ততস্তু ত্বরয়ন্যোধাঞ্শঙ্খশব্দেন মারিষ
কর্ণো নিষ্কাসয়ামাস কৌরবাণাং বরূথিনীম্
7.14
ব্যূহং ব্যূহ্য মহেষ্বাসো মাকরং শত্রুতাপনঃ
প্রত্যুদ্যয়ৌ তদা কর্ণঃ পাণ্ডবান্বিজিগীষয়া
7.15
মকরস্য তু তুণ্ডে বৈ কর্ণো রাজন্ব্যবস্থিতঃ
নেত্রাভ্যাং শকুনিঃ শূর উলূকশ্চ মহারথঃ
7.16
দ্রোণপুত্রস্তু শিরসি গ্রীবায়াং সর্বসোদরাঃ
মধ্যে দুর্যোধনো রাজা বলেন মহতা বৃতঃ
7.17
বামে পাদে তু রাজেন্দ্র কৃতবর্মা ব্যবস্থিতঃ
নারায়ণবলৈর্যুক্তো গোপালৈর্যুদ্ধদুর্মদঃ
7.18
পাদে তু দক্ষিণে রাজন্গৌতমঃ সত্যবিক্রমঃ
ত্রিগর্তৈশ্চ মহেষ্বাসৈর্দাক্ষিণাত্যৈশ্চ সংবৃতঃ
7.19
অনুপাদস্তু যো বামস্তত্র শল্যো ব্যবস্থিতঃ
মহত্যা সেনয়া সার্ধং মদ্রদেশসমুত্থয়া
7.20
দক্ষিণে তু মহারাজ সুষেণঃ সত্যসংগরঃ
বৃতো রথসহস্রৈশ্চ দন্তিনাং চ শতৈস্তথা
7.21
পুচ্ছে আস্তাং মহাবীরৌ ভ্রাতরৌ পার্থিবৌ তদা
চিত্রসেনশ্চ চিত্রশ্চ মহত্যা সেনয়া বৃতৌ
7.22
ততঃ প্রয়াতে রাজেন্দ্র কর্ণে নরবরোত্তমে
ধনংজয়মভিপ্রেক্ষ্য ধর্মরাজোঽব্রবীদিদম্
7.23
পশ্য পার্থ মহাসেনাং ধার্তরাষ্ট্রস্য সংয়ুগে
কর্ণেন নির্মিতাং বীর গুপ্তাং বীরৈর্মহারথৈঃ
7.24
হতবীরতমা হ্যেষা ধার্তরাষ্ট্রী মহাচমূঃ
ফল্গুশেষা মহাবাহো তৃণৈস্তুল্যা মতা মম
7.25
একো হ্যত্র মহেষ্বাসঃ সূতপুত্রো ব্যবস্থিতঃ
সদেবাসুরগন্ধর্বৈঃ সকিংনরমহোরগৈঃ
চরাচরৈস্ত্রিভির্লোকৈর্যোঽজয্যো রথিনাং বরঃ
7.26
তং হত্বাদ্য মহাবাহো বিজয়স্তব ফল্গুন
উদ্ধৃতশ্চ ভবেচ্ছল্যো মম দ্বাদশবার্ষিকঃ
এবং জ্ঞাত্বা মহাবাহো ব্যূহং ব্যূহ যথেচ্ছসি
7.27
ভ্রাতুস্তদ্বচনং শ্রুত্বা পাণ্ডবঃ শ্বেতবাহনঃ
অর্ধচন্দ্রেণ ব্যূহেন প্রত্যব্যূহত তাং চমূম্
7.28
বামপার্শ্বেঽভবদ্রাজন্ভীমসেনো ব্যবস্থিতঃ
দক্ষিণে চ মহেষ্বাসো ধৃষ্টদ্যুম্নো মহাবলঃ
7.29
মধ্যে ব্যূহস্য সাক্ষাত্তু পাণ্ডবঃ কৃষ্ণসারথিঃ
নকুলঃ সহদেবশ্চ ধর্মরাজশ্চ পৃষ্ঠতঃ
7.30
চক্ররক্ষৌ তু পাঞ্চাল্যৌ যুধামন্যূত্তমৌজসৌ
নার্জুনং জহতুর্যুদ্ধে পাল্যমানৌ কিরীটিনা
7.31
শেষা নৃপতয়ো বীরাঃ স্থিতা ব্যূহস্য দংশিতাঃ
যথাভাবং যথোত্সাহং যথাসত্ত্বং চ ভারত
7.32
এবমেতন্মহাব্যূহং ব্যূহ্য ভারত পাণ্ডবাঃ
তাবকাশ্চ মহেষ্বাসা যুদ্ধায়ৈব মনো দধুঃ
7.33
দৃষ্ট্বা ব্যূঢাং তব চমূং সূতপুত্রেণ সংয়ুগে
নিহতান্পাণ্ডবান্মেনে তব পুত্রঃ সহান্বয়ঃ
7.34
তথৈব পাণ্ডবীং সেনাং ব্যূঢাং দৃষ্ট্বা যুধিষ্ঠিরঃ
ধার্তরাষ্ট্রান্হতান্মেনে সকর্ণান্বৈ জনাধিপ
7.35
ততঃ শঙ্খাশ্চ ভের্যশ্চ পণবানকগোমুখাঃ
সহসৈবাভ্যহন্যন্ত সশব্দাশ্চ সমন্ততঃ
7.36
সেনয়োরুভয়ো রাজন্প্রাবাদ্যন্ত মহাস্বনাঃ
সিংহনাদশ্চ সংজজ্ঞে শূরাণাং জয়গৃদ্ধিনাম্
7.37
হয়হেষিতশব্দাশ্চ বারণানাং চ বৃংহিতম্
রথনেমিস্বনাশ্চোগ্রাঃ সংবভূবুর্জনাধিপ
7.38
ন দ্রোণব্যসনং কশ্চিজ্জানীতে ভরতর্ষভ
দৃষ্ট্বা কর্ণং মহেষ্বাসং মুখে ব্যূহস্য দংশিতম্
7.39
উভে সেনে মহাসত্ত্বে প্রহৃষ্টনরকুঞ্জরে
যোদ্ধুকামে স্থিতে রাজন্হন্তুমন্যোন্যমঞ্জসা
7.40
তত্র যত্তৌ সুসংরব্ধৌ দৃষ্ট্বান্যোন্যং ব্যবস্থিতৌ
অনীকমধ্যে রাজেন্দ্র রেজতুঃ কর্ণপাণ্ডবৌ
7.41
নৃত্যমানে তু তে সেনে সমেয়াতাং পরস্পরম্
তয়োঃ পক্ষৈঃ প্রপক্ষৈশ্চ নির্জগ্মুর্বৈ যুয়ুত্সবঃ
7.42
ততঃ প্রববৃতে যুদ্ধং নরবারণবাজিনাম্
রথিনাং চ মহারাজ অন্যোন্যং নিঘ্নতাং দৃঢম্