Utshovঅধ্যায় 6
6.1
সংজয় উবাচ
হতে দ্রোণে মহেষ্বাসে তস্মিন্নহনি ভারত
কৃতে চ মোঘসংকল্পে দ্রোণপুত্রে মহারথে
6.2
দ্রবমাণে মহারাজ কৌরবাণাং বলে তথা
ব্যূহ্য পার্থঃ স্বকং সৈন্যমতিষ্ঠদ্ভ্রাতৃভিঃ সহ
6.3
তমবস্থিতমাজ্ঞায় পুত্রস্তে ভরতর্ষভ
দ্রবচ্চ স্ববলং দৃষ্ট্বা পৌরুষেণ ন্যবারয়ৎ
6.4
স্বমনীকমবস্থাপ্য বাহুবীর্যে ব্যবস্থিতঃ
যুদ্ধ্বা চ সুচিরং কালং পাণ্ডবৈঃ সহ ভারত
6.5
লব্ধলক্ষৈঃ পরৈর্হৃষ্টৈর্ব্যায়চ্ছদ্ভিশ্চিরং তদা
সংধ্যাকালং সমাসাদ্য প্রত্যাহারমকারয়ৎ
6.6
কৃত্বাবহারং সৈন্যানাং প্রবিশ্য শিবিরং স্বকম্
কুরবোঽঽত্মহিতং মন্ত্রং মন্ত্রয়াং চক্রিরে তদা
6.7
পর্যঙ্কেষু পরার্ধ্যেষু স্পর্ধ্যাস্তরণবত্সু চ
বরাসনেষূপবিষ্টাঃ সুখশয্যাস্বিবামরাঃ
6.8
ততো দুর্যোধনো রাজা সাম্না পরমবল্গুনা
তানাভাষ্য মহেষ্বাসান্প্রাপ্তকালমভাষত
6.9
মতিং মতিমতাং শ্রেষ্ঠাঃ সর্বে প্রব্রূত মাচিরম্
এবং গতে তু যত্কার্যং ভবেত্কার্যকরং নৃপাঃ
6.10
এবমুক্তে নরেন্দ্রেণ নরসিংহা যুয়ুত্সবঃ
চক্রুর্নানাবিধাশ্চেষ্টাঃ সিংহাসনগতাস্তদা
6.11
তেষাং নিশম্যেঙ্গিতানি যুদ্ধে প্রাণাঞ্জুহূষতাম্
সমুদ্বীক্ষ্য মুখং রাজ্ঞো বালার্কসমবর্চসঃ
আচার্যপুত্রো মেধাবী বাক্যজ্ঞো বাক্যমাদদে
6.12
রাগো যোগস্তথা দাক্ষ্যং নয়শ্চেত্যর্থসাধকাঃ
উপায়াঃ পণ্ডিতৈঃ প্রোক্তাঃ সর্বে দৈবসমাশ্রিতাঃ
6.13
লোকপ্রবীরা যেঽস্মাকং দেবকল্পা মহারথাঃ
নীতিমন্তস্তথা যুক্তা দক্ষা রক্তাশ্চ তে হতাঃ
6.14
ন ত্বেব কার্যং নৈরাশ্যমস্মাভির্বিজয়ং প্রতি
সুনীতৈরিহ সর্বার্থৈর্দৈবমপ্যনুলোম্যতে
6.15
তে বয়ং প্রবরং নৄণাং সর্বৈর্গুণগণৈর্যুতম্
কর্ণং সেনাপতিং কৃত্বা প্রমথিষ্যামহে রিপূন্
6.16
ততো দুর্যোধনঃ প্রীতঃ প্রিয়ং শ্রুত্বা বচস্তদা
প্রীতিসংস্কারসংয়ুক্তং তথ্যমাত্মহিতং শুভম্
6.17
স্বং মনঃ সমবস্থাপ্য বাহুবীর্যমুপাশ্রিতঃ
দুর্যোধনো মহারাজ রাধেয়মিদমব্রবীৎ
6.18
কর্ণ জানামি তে বীর্যং সৌহৃদং চ পরং ময়ি
তথাপি ত্বাং মহাবাহো প্রবক্ষ্যামি হিতং বচঃ
6.19
শ্রুত্বা যথেষ্টং চ কুরু বীর যত্তব রোচতে
ভবান্প্রাজ্ঞতমো নিত্যং মম চৈব পরা গতিঃ
6.20
ভীষ্মদ্রোণাবতিরথৌ হতৌ সেনাপতী মম
সেনাপতির্ভবানস্তু তাভ্যাং দ্রবিণবত্তরঃ
6.21
বৃদ্ধৌ চ তৌ মহেষ্বাসৌ সাপেক্ষৌ চ ধনংজয়ে
মানিতৌ চ ময়া বীরৌ রাধেয় বচনাত্তব
6.22
পিতামহত্বং সংপ্রেক্ষ্য পাণ্ডুপুত্রা মহারণে
রক্ষিতাস্তাত ভীষ্মেণ দিবসানি দশৈব হ
6.23
ন্যস্তশস্ত্রে চ ভবতি হতো ভীষ্মঃ পিতামহঃ
শিখণ্ডিনং পুরস্কৃত্য ফল্গুনেন মহাহবে
6.24
হতে তস্মিন্মহাভাগে শরতল্পগতে তদা
ত্বয়োক্তে পুরুষব্যাঘ্র দ্রোণো হ্যাসীত্পুরঃসরঃ
6.25
তেনাপি রক্ষিতাঃ পার্থাঃ শিষ্যত্বাদিহ সংয়ুগে
স চাপি নিহতো বৃদ্ধো ধৃষ্টদ্যুম্নেন সত্বরম্
6.26
নিহতাভ্যাং প্রধানাভ্যাং তাভ্যামমিতবিক্রম
ত্বত্সমং সমরে যোধং নান্যং পশ্যামি চিন্তয়ন্
6.27
ভবানেব তু নঃ শক্তো বিজয়ায় ন সংশয়ঃ
পূর্বং মধ্যে চ পশ্চাচ্চ তবৈব বিদিতং হি তৎ
6.28
স ভবান্ধুর্যবত্সংখ্যে ধুরমুদ্বোঢুমর্হসি
অভিষেচয় সেনান্যে স্বয়মাত্মানমাত্মনা
6.29
দেবতানাং যথা স্কন্দঃ সেনানীঃ প্রভুরব্যয়ঃ
তথা ভবানিমাং সেনাং ধার্তরাষ্ট্রীং বিভর্তু মে
জহি শত্রুগণান্সর্বান্মহেন্দ্র ইব দানবান্
6.30
অবস্থিতং রণে জ্ঞাত্বা পাণ্ডবাস্ত্বাং মহারথম্
দ্রবিষ্যন্তি সপাঞ্চালা বিষ্ণুং দৃষ্ট্বেব দানবাঃ
তস্মাত্ত্বং পুরুষব্যাঘ্র প্রকর্ষেথা মহাচমূম্
6.31
ভবত্যবস্থিতে যত্তে পাণ্ডবা গতচেতসঃ
ভবিষ্যন্তি সহামাত্যাঃ পাঞ্চালৈঃ সৃঞ্জয়ৈঃ সহ
6.32
যথা হ্যভ্যুদিতঃ সূর্যঃ প্রতপন্স্বেন তেজসা
ব্যপোহতি তমস্তীব্রং তথা শত্রূন্ব্যপোহ নঃ
6.33
কর্ণ উবাচ
উক্তমেতন্ময়া পূর্বং গান্ধারে তব সংনিধৌ
জেষ্যামি পাণ্ডবান্রাজন্সপুত্রান্সজনার্দনান্
6.34
সেনাপতির্ভবিষ্যামি তবাহং নাত্র সংশয়ঃ
স্থিরো ভব মহারাজ জিতান্বিদ্ধি চ পাণ্ডবান্
6.35
সংজয় উবাচ
এবমুক্তো মহাতেজাস্ততো দুর্যোধনো নৃপঃ
উত্তস্থৌ রাজভিঃ সার্ধং দেবৈরিব শতক্রতুঃ
সেনাপত্যেন সত্কর্তুং কর্ণং স্কন্দমিবামরাঃ
6.36
ততোঽভিষিষিচুস্তূর্ণং বিধিদৃষ্টেন কর্মণা
দুর্যোধনমুখা রাজন্রাজানো বিজয়ৈষিণঃ
শাতকৌম্ভময়ৈঃ কুম্ভৈর্মাহেয়ৈশ্চাভিমন্ত্রিতৈঃ
6.37
তোয়পূর্ণৈর্বিষাণৈশ্চ দ্বীপিখড্গমহর্ষভৈঃ
মণিমুক্তাময়ৈশ্চান্যৈঃ পুণ্যগন্ধৈস্তথৌষধৈঃ
6.38
ঔদুম্বরে সমাসীনমাসনে ক্ষৌমসংবৃতম্
শাস্ত্রদৃষ্টেন বিধিনা সংভারৈশ্চ সুসংভৃতৈঃ
6.39
জয় পার্থান্সগোবিন্দান্সানুগাংস্ত্বং মহাহবে
ইতি তং বন্দিনঃ প্রাহুর্দ্বিজাশ্চ ভরতর্ষভ
6.40
জহি পার্থান্সপাঞ্চালান্রাধেয় বিজয়ায় নঃ
উদ্যন্নিব সদা ভানুস্তমাংস্যুগ্রৈর্গভস্তিভিঃ
6.41
ন হ্যলং ত্বদ্বিসৃষ্টানাং শরাণাং তে সকেশবাঃ
কৃতঘ্নাঃ সূর্যরশ্মীনাং জ্বলতামিব দর্শনে
6.42
ন হি পার্থাঃ সপাঞ্চালাঃ স্থাতুং শক্তাস্তবাগ্রতঃ
আত্তশস্ত্রস্য সমরে মহেন্দ্রস্যেব দানবাঃ
6.43
অভিষিক্তস্তু রাধেয়ঃ প্রভয়া সোঽমিতপ্রভঃ
ব্যত্যরিচ্যত রূপেণ দিবাকর ইবাপরঃ
6.44
সেনাপত্যেন রাধেয়মভিষিচ্য সুতস্তব
অমন্যত তদাত্মানং কৃতার্থং কালচোদিতঃ
6.45
কর্ণোঽপি রাজন্সংপ্রাপ্য সেনাপত্যমরিংদমঃ
যোগমাজ্ঞাপয়ামাস সূর্যস্যোদয়নং প্রতি
6.46
তব পুত্রৈর্বৃতঃ কর্ণঃ শুশুভে তত্র ভারত
দেবৈরিব যথা স্কন্দঃ সংগ্রামে তারকাময়ে