Utshovঅধ্যায় 5
5.1
জনমেজয় উবাচ
শ্রুত্বা কর্ণং হতং যুদ্ধে পুত্রাংশ্চৈবাপলায়িনঃ
নরেন্দ্রঃ কিংচিদাশ্বস্তো দ্বিজশ্রেষ্ঠ কিমব্রবীৎ
5.2
প্রাপ্তবান্পরমং দুঃখং পুত্রব্যসনজং মহৎ
তস্মিন্যদুক্তবান্কালে তন্মমাচক্ষ্ব পৃচ্ছতঃ
5.3
বৈশংপায়ন উবাচ
শ্রুত্বা কর্ণস্য নিধনমশ্রদ্ধেয়মিবাদ্ভুতম্
ভূতসংমোহনং ভীমং মেরোঃ পর্যসনং যথা
5.4
চিত্তমোহমিবায়ুক্তং ভার্গবস্য মহামতেঃ
পরাজয়মিবেন্দ্রস্য দ্বিষদ্ভ্যো ভীমকর্মণঃ
5.5
দিবঃ প্রপতনং ভানোরুর্ব্যামিব মহাদ্যুতেঃ
সংশোষণমিবাচিন্ত্যং সমুদ্রস্যাক্ষয়াম্ভসঃ
5.6
মহীবিয়দ্দিগীশানাং সর্বনাশমিবাদ্ভুতম্
কর্মণোরিব বৈফল্যমুভয়োঃ পুণ্যপাপয়োঃ
5.7
সংচিন্ত্য নিপুণং বুদ্ধ্যা ধৃতরাষ্ট্রো জনেশ্বরঃ
নেদমস্তীতি সংচিন্ত্য কর্ণস্য নিধনং প্রতি
5.8
প্রাণিনামেতদাত্মত্বাত্স্যাদপীতি বিনাশনম্
শোকাগ্নিনা দহ্যমানো ধম্যমান ইবাশয়ঃ
5.9
বিধ্বস্তাত্মা শ্বসন্দীনো হা হেত্যুক্ত্বা সুদুঃখিতঃ
বিললাপ মহারাজ ধৃতরাষ্ট্রোঽম্বিকাসুতঃ
5.10
ধৃতরাষ্ট্র উবাচ
সংজয়াধিরথো বীরঃ সিংহদ্বিরদবিক্রমঃ
বৃষমপ্রতিমস্কন্ধো বৃষভাক্ষগতিস্বনঃ
5.11
বৃষভো বৃষভস্যেব যো যুদ্ধে ন নিবর্ততে
শত্রোরপি মহেন্দ্রস্য বজ্রসংহননো যুবা
5.12
যস্য জ্যাতলশব্দেন শরবৃষ্টিরবেণ চ
রথাশ্বনরমাতঙ্গা নাবতিষ্ঠন্তি সংয়ুগে
5.13
যমাশ্রিত্য মহাবাহুং দ্বিষত্সংঘঘ্নমচ্যুতম্
দুর্যোধনোঽকরোদ্বৈরং পাণ্ডুপুত্রৈর্মহাবলৈঃ
5.14
স কথং রথিনাং শ্রেষ্ঠঃ কর্ণঃ পার্থেন সংয়ুগে
নিহতঃ পুরুষব্যাঘ্রঃ প্রসহ্যাসহ্যবিক্রমঃ
5.15
যো নামন্যত বৈ নিত্যমচ্যুতং ন ধনংজয়ম্
ন বৃষ্ণীনপি তানন্যান্স্ববাহুবলমাশ্রিতঃ
5.16
শার্ঙ্গগাণ্ডীবধন্বানৌ সহিতাবপরাজিতৌ
অহং দিব্যাদ্রথাদেকঃ পাতয়িষ্যামি সংয়ুগে
5.17
ইতি যঃ সততং মন্দমবোচল্লোভমোহিতম্
দুর্যোধনমপাদীনং রাজ্যকামুকমাতুরম্
5.18
যশ্চাজৈষীদতিবলানমিত্রানপি দুর্জয়ান্
গান্ধারান্মদ্রকান্মত্স্যাংস্ত্রিগর্তাংস্তঙ্গণাঞ্শকান্
5.19
পাঞ্চালাংশ্চ বিদেহাংশ্চ কুণিন্দান্কাশিকোসলান্
সুহ্মানঙ্গাংশ্চ পুণ্ড্রাংশ্চ নিষাদান্বঙ্গকীচকান্
5.20
বত্সান্কলিঙ্গাংস্তরলানশ্মকানৃষিকাংস্তথা
যো জিত্বা সমরে বীরশ্চক্রে বলিভৃতঃ পুরা
5.21
উচ্চৈঃশ্রবা বরোঽশ্বানাং রাজ্ঞাং বৈশ্রবণো বরঃ
বরো মহেন্দ্রো দেবানাং কর্ণঃ প্রহরতাং বরঃ
5.22
যং লব্ধ্বা মাগধো রাজা সান্ত্বমানার্থগৌরবৈঃ
অরৌত্সীত্পার্থিবং ক্ষত্রমৃতে কৌরবয়াদবান্
5.23
তং শ্রুত্বা নিহতং কর্ণং দ্বৈরথে সব্যসাচিনা
শোকার্ণবে নিমগ্নোঽহমপ্লবঃ সাগরে যথা
5.24
ঈদৃশৈর্যদ্যহং দুঃখৈর্ন বিনশ্যামি সংজয়
বজ্রাদ্দৃঢতরং মন্যে হৃদয়ং মম দুর্ভিদম্
5.25
জ্ঞাতিসংবন্ধিমিত্রাণামিমং শ্রুত্বা পরাজয়ম্
কো মদন্যঃ পুমাঁল্লোকে ন জহ্যাত্সূত জীবিতম্
5.26
বিষমগ্নিং প্রপাতং বা পর্বতাগ্রাদহং বৃণে
ন হি শক্ষ্যামি দুঃখানি সোঢুং কষ্টানি সংজয়
5.27
সংজয় উবাচ
শ্রিয়া কুলেন যশসা তপসা চ শ্রুতেন চ
ত্বামদ্য সন্তো মন্যন্তে যয়াতিমিব নাহুষম্
5.28
শ্রুতে মহর্ষিপ্রতিমঃ কৃতকৃত্যোঽসি পার্থিব
পর্যবস্থাপয়াত্মানং মা বিষাদে মনঃ কৃথাঃ
5.29
ধৃতরাষ্ট্র উবাচ
দৈবমেব পরং মন্যে ধিক্পৌরুষমনর্থকম্
যত্র রামপ্রতীকাশঃ কর্ণোঽহন্যত সংয়ুগে
5.30
হত্বা যুধিষ্ঠিরানীকং পাঞ্চালানাং রথব্রজান্
প্রতাপ্য শরবর্ষেণ দিশঃ সর্বা মহারথঃ
5.31
মোহয়িত্বা রণে পার্থান্বজ্রহস্ত ইবাসুরান্
স কথং নিহতঃ শেতে বাতরুগ্ণ ইব দ্রুমঃ
5.32
শোকস্যান্তং ন পশ্যামি সমুদ্রস্যেব বিপ্লুকাঃ
চিন্তা মে বর্ধতে তীব্রা মুমূর্ষা চাপি জায়তে
5.33
কর্ণস্য নিধনং শ্রুত্বা বিজয়ং ফল্গুনস্য চ
অশ্রদ্ধেয়মহং মন্যে বধং কর্ণস্য সংজয়
5.34
বজ্রসারময়ং নূনং হৃদয়ং সুদৃঢং মম
যচ্ছ্রুত্বা পুরুষব্যাঘ্রং হতং কর্ণং ন দীর্যতে
5.35
আয়ুর্নূনং সুদীর্ঘং মে বিহিতং দৈবতৈঃ পুরা
যত্র কর্ণং হতং শ্রুত্বা জীবামীহ সুদুঃখিতঃ
5.36
ধিগ্জীবিতমিদং মেঽদ্য সুহৃদ্ধীনস্য সংজয়
অদ্য চাহং দশামেতাং গতঃ সংজয় গর্হিতাম্
কৃপণং বর্তয়িষ্যামি শোচ্যঃ সর্বস্য মন্দধীঃ
5.37
অহমেব পুরা ভূত্বা সর্বলোকস্য সত্কৃতঃ
পরিভূতঃ কথং সূত পুনঃ শক্ষ্যামি জীবিতুম্
দুঃখাত্সুদুঃখং ব্যসনং প্রাপ্তবানস্মি সংজয়
5.38
তস্মাদ্ভীষ্মবধে চৈব দ্রোণস্য চ মহাত্মনঃ
নাত্র শেষং প্রপশ্যামি সূতপুত্রে হতে যুধি
5.39
স হি পারং মহানাসীত্পুত্রাণাং মম সংজয়
যুদ্ধে বিনিহতঃ শূরো বিসৃজন্সায়কান্বহূন্
5.40
কো হি মে জীবিতেনার্থস্তমৃতে পুরুষর্ষভম্
রথাদতিরথো নূনমপতত্সায়কার্দিতঃ
5.41
পর্বতস্যেব শিখরং বজ্রপাতবিদারিতম্
শয়ীত পৃথিবীং নূনং শোভয়ন্রুধিরোক্ষিতঃ
মাতঙ্গ ইব মত্তেন মাতঙ্গেন নিপাতিতঃ
5.42
যদ্বলং ধার্তরাষ্ট্রাণাং পাণ্ডবানাং যতো ভয়ম্
সোঽর্জুনেন হতঃ কর্ণঃ প্রতিমানং ধনুষ্মতাম্
5.43
স হি বীরো মহেষ্বাসঃ পুত্রাণামভয়ংকরঃ
শেতে বিনিহতো বীরঃ শক্রেণেব যথা বলঃ
5.44
পঙ্গোরিবাধ্বগমনং দরিদ্রস্যেব কামিতম্
দুর্যোধনস্য চাকূতং তৃষিতস্যেব পিপ্লুকাঃ
5.45
অন্যথা চিন্তিতং কার্যমন্যথা তত্তু জায়তে
অহো নু বলবদ্দৈবং কালশ্চ দুরতিক্রমঃ
5.46
পলায়মানঃ কৃপণং দীনাত্মা দীনপৌরুষঃ
কচ্চিন্ন নিহতঃ সূত পুত্রো দুঃশাসনো মম
5.47
কচ্চিন্ন নীচাচরিতং কৃতবাংস্তাত সংয়ুগে
কচ্চিন্ন নিহতঃ শূরো যথা ন ক্ষত্রিয়া হতাঃ
5.48
যুধিষ্ঠিরস্য বচনং মা যুদ্ধমিতি সর্বদা
দুর্যোধনো নাভ্যগৃহ্ণান্মূঢঃ পথ্যমিবৌষধম্
5.49
শরতল্পে শয়ানেন ভীষ্মেণ সুমহাত্মনা
পানীয়ং যাচিতঃ পার্থঃ সোঽবিধ্যন্মেদিনীতলম্
5.50
জলস্য ধারাং বিহিতাং দৃষ্ট্বা তাং পাণ্ডবেন হ
অব্রবীত্স মহাবাহুস্তাত সংশাম্য পাণ্ডবৈঃ
5.51
প্রশমাদ্ধি ভবেচ্ছান্তির্মদন্তং যুদ্ধমস্তু চ
ভ্রাতৃভাবেন পৃথিবীং ভুঙ্ক্ষ্ব পাণ্ডুসুতৈঃ সহ
5.52
অকুর্বন্বচনং তস্য নূনং শোচতি মে সুতঃ
তদিদং সমনুপ্রাপ্তং বচনং দীর্ঘদর্শিনঃ
5.53
অহং তু নিহতামাত্যো হতপুত্রশ্চ সংজয়
দ্যূততঃ কৃচ্ছ্রমাপন্নো লূনপক্ষ ইব দ্বিজঃ
5.54
যথা হি শকুনিং গৃহ্য ছিত্ত্বা পক্ষৌ চ সংজয়
বিসর্জয়ন্তি সংহৃষ্টাঃ ক্রীডমানাঃ কুমারকাঃ
5.55
ছিন্নপক্ষতয়া তস্য গমনং নোপপদ্যতে
তথাহমপি সংপ্রাপ্তো লূনপক্ষ ইব দ্বিজঃ
5.56
ক্ষীণঃ সর্বার্থহীনশ্চ নির্বন্ধুর্জ্ঞাতিবর্জিতঃ
কাং দিশং প্রতিপত্স্যামি দীনঃ শত্রুবশং গতঃ
5.57
দুর্যোধনস্য বৃদ্ধ্যর্থং পৃথিবীং যোঽজয়ত্প্রভুঃ
স জিতঃ পাণ্ডবৈঃ শূরৈঃ সমর্থৈর্বীর্যশালিভিঃ
5.58
তস্মিন্হতে মহেষ্বাসে কর্ণে যুধি কিরীটিনা
কে বীরাঃ পর্যবর্তন্ত তন্মমাচক্ষ্ব সংজয়
5.59
কচ্চিন্নৈকঃ পরিত্যক্তঃ পাণ্ডবৈর্নিহতো রণে
উক্তং ত্বয়া পুরা বীর যথা বীরা নিপাতিতাঃ
5.60
ভীষ্মমপ্রতিয়ুধ্যন্তং শিখণ্ডী সায়কোত্তমৈঃ
পাতয়ামাস সমরে সর্বশস্ত্রভৃতাং বরম্
5.61
তথা দ্রৌপদিনা দ্রোণো ন্যস্তসর্বায়ুধো যুধি
যুক্তয়োগো মহেষ্বাসঃ শরৈর্বহুভিরাচিতঃ
নিহতঃ খড্গমুদ্যম্য ধৃষ্টদ্যুম্নেন সংজয়
5.62
অন্তরেণ হতাবেতৌ ছলেন চ বিশেষতঃ
অশ্রৌষমহমেতদ্বৈ ভীষ্মদ্রোণৌ নিপাতিতৌ
5.63
ভীষ্মদ্রোণৌ হি সমরে ন হন্যাদ্বজ্রভৃত্স্বয়ম্
ন্যায়েন যুধ্যমানৌ হি তদ্বৈ সত্যং ব্রবীমি তে
5.64
কর্ণং ত্বস্যন্তমস্ত্রাণি দিব্যানি চ বহূনি চ
কথমিন্দ্রোপমং বীরং মৃত্যুর্যুদ্ধে সমস্পৃশৎ
5.65
যস্য বিদ্যুত্প্রভাং শক্তিং দিব্যাং কনকভূষণাম্
প্রায়চ্ছদ্দ্বিষতাং হন্ত্রীং কুণ্ডলাভ্যাং পুরংদরঃ
5.66
যস্য সর্পমুখো দিব্যঃ শরঃ কনকভূষণঃ
অশেত নিহতঃ পত্রী চন্দনেষ্বরিসূদনঃ
5.67
ভীষ্মদ্রোণমুখান্বীরান্যোঽবমন্য মহারথান্
জামদগ্ন্যান্মহাঘোরং ব্রাহ্মমস্ত্রমশিক্ষত
5.68
যশ্চ দ্রোণমুখান্দৃষ্ট্বা বিমুখানর্দিতাঞ্শরৈঃ
সৌভদ্রস্য মহাবাহুর্ব্যধমত্কার্মুকং শরৈঃ
5.69
যশ্চ নাগায়ুতপ্রাণং বাতরংহসমচ্যুতম্
বিরথং ভ্রাতরং কৃত্বা ভীমসেনমুপাহসৎ
5.70
সহদেবং চ নির্জিত্য শরৈঃ সংনতপর্বভিঃ
কৃপয়া বিরথং কৃত্বা নাহনদ্ধর্মবিত্তয়া
5.71
যশ্চ মায়াসহস্রাণি ধ্বংসয়িত্বা রণোত্কটম্
ঘটোত্কচং রাক্ষসেন্দ্রং শক্রশক্ত্যাভিজঘ্নিবান্
5.72
এতানি দিবসান্যস্য যুদ্ধে ভীতো ধনংজয়ঃ
নাগমদ্দ্বৈরথং বীরঃ স কথং নিহতো রণে
5.73
রথসঙ্গো ন চেত্তস্য ধনুর্বা ন ব্যশীর্যত
ন চেদস্ত্রাণি নির্ণেশুঃ স কথং নিহতঃ পরৈঃ
5.74
কো হি শক্তো রণে কর্ণং বিধুন্বানং মহদ্ধনুঃ
বিমুঞ্চন্তং শরান্ঘোরান্দিব্যান্যস্ত্রাণি চাহবে
জেতুং পুরুষশার্দূলং শার্দূলমিব বেগিতম্
5.75
ধ্রুবং তস্য ধনুশ্ছিন্নং রথো বাপি গতো মহীম্
অস্ত্রাণি বা প্রনষ্টানি যথা শংসসি মে হতম্
ন হ্যন্যদনুপশ্যামি কারণং তস্য নাশনে
5.76
ন হন্যামর্জুনং যাবত্তাবত্পাদৌ ন ধাবয়ে
ইতি যস্য মহাঘোরং ব্রতমাসীন্মহাত্মনঃ
5.77
যস্য ভীতো বনে নিত্যং ধর্মরাজো যুধিষ্ঠিরঃ
ত্রয়োদশ সমা নিদ্রাং ন লেভে পুরুষর্ষভঃ
5.78
যস্য বীর্যবতো বীর্যং সমাশ্রিত্য মহাত্মনঃ
মম পুত্রঃ সভাং ভার্যাং পাণ্ডূনাং নীতবান্বলাৎ
5.79
তত্র চাপি সভামধ্যে পাণ্ডবানাং চ পশ্যতাম্
দাসভার্যেতি পাঞ্চালীমব্রবীত্কুরুসংসদি
5.80
যশ্চ গাণ্ডীবমুক্তানাং স্পর্শমুগ্রমচিন্তয়ন্
অপতির্হ্যসি কৃষ্ণেতি ব্রুবন্পার্থানবৈক্ষত
5.81
যস্য নাসীদ্ভয়ং পার্থৈঃ সপুত্রৈঃ সজনার্দনৈঃ
স্ববাহুবলমাশ্রিত্য মুহূর্তমপি সংজয়
5.82
তস্য নাহং বধং মন্যে দেবৈরপি সবাসবৈঃ
প্রতীপমুপধাবদ্ভিঃ কিং পুনস্তাত পাণ্ডবৈঃ
5.83
ন হি জ্যাং স্পৃশমানস্য তলত্রে চাপি গৃহ্ণতঃ
পুমানাধিরথেঃ কশ্চিত্প্রমুখে স্থাতুমর্হতি
5.84
অপি স্যান্মেদিনী হীনা সোমসূর্যপ্রভাংশুভিঃ
ন বধঃ পুরুষেন্দ্রস্য সমরেষ্বপলায়িনঃ
5.85
যদি মন্দঃ সহায়েন ভ্রাত্রা দুঃশাসনেন চ
বাসুদেবস্য দুর্বুদ্ধিঃ প্রত্যাখ্যানমরোচয়ৎ
5.86
স নূনমৃষভস্কন্ধং দৃষ্ট্বা কর্ণং নিপাতিতম্
দুঃশাসনং চ নিহতং মন্যে শোচতি পুত্রকঃ
5.87
হতং বৈকর্তনং শ্রুত্বা দ্বৈরথে সব্যসাচিনা
জয়তঃ পাণ্ডবান্দৃষ্ট্বা কিং স্বিদ্দুর্যোধনোঽব্রবীৎ
5.88
দুর্মর্ষণং হতং শ্রুত্বা বৃষসেনং চ সংয়ুগে
প্রভগ্নং চ বলং দৃষ্ট্বা বধ্যমানং মহারথৈঃ
5.89
পরাঙ্মুখাংস্তথা রাজ্ঞঃ পলায়নপরায়ণান্
বিদ্রুতান্রথিনো দৃষ্ট্বা মন্যে শোচতি পুত্রকঃ
5.90
অনেয়শ্চাভিমানেন বালবুদ্ধিরমর্ষণঃ
হতোত্সাহং বলং দৃষ্ট্বা কিং স্বিদ্দুর্যোধনোঽব্রবীৎ
5.91
ভ্রাতরং নিহতং দৃষ্ট্বা ভীমসেনেন সংয়ুগে
রুধিরং পীয়মানেন কিং স্বিদ্দুর্যোধনোঽব্রবীৎ
5.92
সহ গান্ধাররাজেন সভায়াং যদভাষত
কর্ণোঽর্জুনং রণে হন্তা হতে তস্মিন্কিমব্রবীৎ
5.93
দ্যূতং কৃত্বা পুরা হৃষ্টো বঞ্চয়িত্বা চ পাণ্ডবান্
শকুনিঃ সৌবলস্তাত হতে কর্ণে কিমব্রবীৎ
5.94
কৃতবর্মা মহেষ্বাসঃ সাত্বতানাং মহারথঃ
কর্ণং বিনিহতং দৃষ্ট্বা হার্দিক্যঃ কিমভাষত
5.95
ব্রাহ্মণাঃ ক্ষত্রিয়া বৈশ্যা যস্য শিক্ষামুপাসতে
ধনুর্বেদং চিকীর্ষন্তো দ্রোণপুত্রস্য ধীমতঃ
5.96
যুবা রূপেণ সংপন্নো দর্শনীয়ো মহায়শাঃ
অশ্বত্থামা হতে কর্ণে কিমভাষত সংজয়
5.97
আচার্যত্বং ধনুর্বেদে গতঃ পরমতত্ত্ববিৎ
কৃপঃ শারদ্বতস্তাত হতে কর্ণে কিমব্রবীৎ
5.98
মদ্ররাজো মহেষ্বাসঃ শল্যঃ সমিতিশোভনঃ
দিষ্টং তেন হি তত্সর্বং যথা কর্ণো নিপাতিতঃ
5.99
যে চ কেচন রাজানঃ পৃথিব্যাং যোদ্ধুমাগতাঃ
বৈকর্তনং হতং দৃষ্ট্বা কিমভাষন্ত সংজয়
5.100
কর্ণে তু নিহতে বীরে রথব্যাঘ্রে নরর্ষভে
কিং বো মুখমনীকানামাসীত্সংজয় ভাগশঃ
5.101
মদ্ররাজঃ কথং শল্যো নিয়ুক্তো রথিনাং বরঃ
বৈকর্তনস্য সারথ্যে তন্মমাচক্ষ্ব সংজয়
5.102
কেঽরক্ষন্দক্ষিণং চক্রং সূতপুত্রস্য সংয়ুগে
বামং চক্রং ররক্ষুর্বা কে বা বীরস্য পৃষ্ঠতঃ
5.103
কে কর্ণং বাজহুঃ শূরাঃ কে ক্ষুদ্রাঃ প্রাদ্রবন্ভয়াৎ
কথং চ বঃ সমেতানাং হতঃ কর্ণো মহারথঃ
5.104
পাণ্ডবাশ্চ কথং শূরাঃ প্রত্যুদীয়ুর্মহারথম্
সৃজন্তং শরবর্ষাণি বারিধারা ইবাম্বুদম্
5.105
স চ সর্পমুখো দিব্যো মহেষুপ্রবরস্তদা
ব্যর্থঃ কথং সমভবত্তন্মমাচক্ষ্ব সংজয়
5.106
মামকস্যাস্য সৈন্যস্য হৃতোত্সেধস্য সংজয়
অবশেষং ন পশ্যামি ককুদে মৃদিতে সতি
5.107
তৌ হি বীরৌ মহেষ্বাসৌ মদর্থে কুরুসত্তমৌ
ভীষ্মদ্রোণৌ হতৌ শ্রুত্বা কো ন্বর্থো জীবিতেন মে
5.108
ন মৃষ্যামি চ রাধেয়ং হতমাহবশোভিনম্
যস্য বাহ্বোর্বলং তুল্যং কুঞ্জরাণাং শতং শতম্
5.109
দ্রোণে হতে চ যদ্বৃত্তং কৌরবাণাং পরৈঃ সহ
সংগ্রামে নরবীরাণাং তন্মমাচক্ষ্ব সংজয়
5.110
যথা চ কর্ণঃ কৌন্তেয়ৈঃ সহ যুদ্ধময়োজয়ৎ
যথা চ দ্বিষতাং হন্তা রণে শান্তস্তদুচ্যতাম্