Utshovঅধ্যায় 4
4.1
বৈশংপায়ন উবাচ
এতচ্ছ্রুত্বা মহারাজ ধৃতরাষ্ট্রোঽম্বিকাসুতঃ
অব্রবীত্সংজয়ং সূতং শোকব্যাকুলচেতনঃ
4.2
দুষ্প্রণীতেন মে তাত মনসাভিপ্লুতাত্মনঃ
হতং বৈকর্তনং শ্রুত্বা শোকো মর্মাণি কৃন্ততি
4.3
কৃতাস্ত্রপরমাঃ শল্যে দুঃখপারং তিতীর্ষবঃ
কুরূণাং সৃঞ্জয়ানাং চ কে নু জীবন্তি কে মৃতাঃ
4.4
সংজয় উবাচ
হতঃ শাংতনবো রাজন্দুরাধর্ষঃ প্রতাপবান্
হত্বা পাণ্ডবয়োধানামর্বুদং দশভির্দিনৈঃ
4.5
ততো দ্রোণো মহেষ্বাসঃ পাঞ্চালানাং রথব্রজান্
নিহত্য যুধি দুর্ধর্ষঃ পশ্চাদ্রুক্মরথো হতঃ
4.6
হতশিষ্টস্য ভীষ্মেণ দ্রোণেন চ মহাত্মনা
অর্ধং নিহত্য সৈন্যস্য কর্ণো বৈকর্তনো হতঃ
4.7
বিবিংশতির্মহারাজ রাজপুত্রো মহাবলঃ
আনর্তয়োধাঞ্শতশো নিহত্য নিহতো রণে
4.8
অথ পুত্রো বিকর্ণস্তে ক্ষত্রব্রতমনুস্মরন্
ক্ষীণবাহায়ুধঃ শূরঃ স্থিতোঽভিমুখতঃ পরান্
4.9
ঘোররূপান্পরিক্লেশান্দুর্যোধনকৃতান্বহূন্
প্রতিজ্ঞাং স্মরতা চৈব ভীমসেনেন পাতিতঃ
4.10
বিন্দানুবিন্দাবাবন্ত্যৌ রাজপুত্রৌ মহাবলৌ
কৃত্বা নসুকরং কর্ম গতৌ বৈবস্বতক্ষয়ম্
4.11
সিন্ধুরাষ্ট্রমুখানীহ দশ রাষ্ট্রাণি যস্য বৈ
বশে তিষ্ঠন্তি বীরস্য যঃ স্থিতস্তব শাসনে
4.12
অক্ষৌহিণীর্দশৈকাং চ নির্জিত্য নিশিতৈঃ শরৈঃ
অর্জুনেন হতো রাজন্মহাবীর্যো জয়দ্রথঃ
4.13
তথা দুর্যোধনসুতস্তরস্বী যুদ্ধদুর্মদঃ
বর্তমানঃ পিতুঃ শাস্ত্রে সৌভদ্রেণ নিপাতিতঃ
4.14
তথা দৌঃশাসনির্বীরো বাহুশালী রণোত্কটঃ
দ্রৌপদেয়েন বিক্রম্য গমিতো যমসাদনম্
4.15
কিরাতানামধিপতিঃ সাগরানূপবাসিনাম্
দেবরাজস্য ধর্মাত্মা প্রিয়ো বহুমতঃ সখা
4.16
ভগদত্তো মহীপালঃ ক্ষত্রধর্মরতঃ সদা
ধনংজয়েন বিক্রম্য গমিতো যমসাদনম্
4.17
তথা কৌরবদায়াদঃ সৌমদত্তির্মহায়শাঃ
হতো ভূরিশ্রবা রাজঞ্শূরঃ সাত্যকিনা যুধি
4.18
শ্রুতায়ুরপি চাম্বষ্ঠঃ ক্ষত্রিয়াণাং ধনুর্ধরঃ
চরন্নভীতবত্সংখ্যে নিহতঃ সব্যসাচিনা
4.19
তব পুত্রঃ সদা সংখ্যে কৃতাস্ত্রো যুদ্ধদুর্মদঃ
দুঃশাসনো মহারাজ ভীমসেনেন পাতিতঃ
4.20
যস্য রাজন্গজানীকং বহুসাহস্রমদ্ভুতম্
সুদক্ষিণঃ স সংগ্রামে নিহতঃ সব্যসাচিনা
4.21
কোসলানামধিপতির্হত্বা বহুশতান্পরান্
সৌভদ্রেণ হি বিক্রম্য গমিতো যমসাদনম্
4.22
বহুশো যোধয়িত্বা চ ভীমসেনং মহারথঃ
চিত্রসেনস্তব সুতো ভীমসেনেন পাতিতঃ
4.23
মদ্ররাজাত্মজঃ শূরঃ পরেষাং ভয়বর্ধনঃ
অসিচর্মধরঃ শ্রীমান্সৌভদ্রেণ নিপাতিতঃ
4.24
সমঃ কর্ণস্য সমরে যঃ স কর্ণস্য পশ্যতঃ
বৃষসেনো মহাতেজাঃ শীঘ্রাস্ত্রঃ কৃতনিশ্চয়ঃ
4.25
অভিমন্যোর্বধং স্মৃত্বা প্রতিজ্ঞামপি চাত্মনঃ
ধনংজয়েন বিক্রম্য গমিতো যমসাদনম্
4.26
নিত্যপ্রসক্তবৈরো যঃ পাণ্ডবৈঃ পৃথিবীপতিঃ
বিশ্রাব্য বৈরং পার্থেন শ্রুতায়ুঃ স নিপাতিতঃ
4.27
শল্যপুত্রস্তু বিক্রান্তঃ সহদেবেন মারিষ
হতো রুক্মরথো রাজন্ভ্রাতা মাতুলজো যুধি
4.28
রাজা ভগীরথো বৃদ্ধো বৃহত্ক্ষত্রশ্চ কেকয়ঃ
পরাক্রমন্তৌ বিক্রান্তৌ নিহতৌ বীর্যবত্তরৌ
4.29
ভগদত্তসুতো রাজন্কৃতপ্রজ্ঞো মহাবলঃ
শ্যেনবচ্চরতা সংখ্যে নকুলেন নিপাতিতঃ
4.30
পিতামহস্তব তথা বাহ্লিকঃ সহ বাহ্লিকৈঃ
ভীমসেনেন বিক্রম্য গমিতো যমসাদনম্
4.31
জয়ত্সেনস্তথা রাজঞ্জারাসংধির্মহাবলঃ
মাগধো নিহতঃ সংখ্যে সৌভদ্রেণ মহাত্মনা
4.32
পুত্রস্তে দুর্মুখো রাজন্দুঃসহশ্চ মহারথঃ
গদয়া ভীমসেনেন নিহতৌ শূরমানিনৌ
4.33
দুর্মর্ষণো দুর্বিষহো দুর্জয়শ্চ মহারথঃ
কৃত্বা নসুকরং কর্ম গতা বৈবস্বতক্ষয়ম্
4.34
সচিবো বৃষবর্মা তে সূতঃ পরমবীর্যবান্
ভীমসেনেন বিক্রম্য গমিতো যমসাদনম্
4.35
নাগায়ুতবলো রাজা নাগায়ুতবলো মহান্
সগণঃ পাণ্ডুপুত্রেণ নিহতঃ সব্যসাচিনা
4.36
বসাতয়ো মহারাজ দ্বিসাহস্রাঃ প্রহারিণঃ
শূরসেনাশ্চ বিক্রান্তাঃ সর্বে যুধি নিপাতিতাঃ
4.37
অভীষাহাঃ কবচিনঃ প্রহরন্তো মদোত্কটাঃ
শিবয়শ্চ রথোদারাঃ কলিঙ্গসহিতা হতাঃ
4.38
গোকুলে নিত্যসংবৃদ্ধা যুদ্ধে পরমকোবিদাঃ
শ্রেণয়ো বহুসাহস্রাঃ সংশপ্তকগণাশ্চ যে
তে সর্বে পার্থমাসাদ্য গতা বৈবস্বতক্ষয়ম্
4.39
স্যালৌ তব মহারাজ রাজানৌ বৃষকাচলৌ
ত্বদর্থে সংপরাক্রান্তৌ নিহতৌ সব্যসাচিনা
4.40
উগ্রকর্মা মহেষ্বাসো নামতঃ কর্মতস্তথা
শাল্বরাজো মহারাজ ভীমসেনেন পাতিতঃ
4.41
ওঘবাংশ্চ মহারাজ বৃহন্তঃ সহিতো রণে
পরাক্রমন্তৌ মিত্রার্থে গতৌ বৈবস্বতক্ষয়ম্
4.42
তথৈব রথিনাং শ্রেষ্ঠঃ ক্ষেমধূর্তির্বিশাং পতে
নিহতো গদয়া রাজন্ভীমসেনেন সংয়ুগে
4.43
তথা রাজা মহেষ্বাসো জলসংধো মহাবলঃ
সুমহত্কদনং কৃত্বা হতঃ সাত্যকিনা রণে
4.44
অলায়ুধো রাক্ষসেন্দ্রঃ খরবন্ধুরয়ানগঃ
ঘটোত্কচেন বিক্রম্য গমিতো যমসাদনম্
4.45
রাধেয়াঃ সূতপুত্রাশ্চ ভ্রাতরশ্চ মহারথাঃ
কেকয়াঃ সর্বশশ্চাপি নিহতাঃ সব্যসাচিনা
4.46
মালবা মদ্রকাশ্চৈব দ্রবিডাশ্চোগ্রবিক্রমাঃ
যৌধেয়াশ্চ ললিত্থাশ্চ ক্ষুদ্রকাশ্চাপ্যুশীনরাঃ
4.47
মাবেল্লকাস্তুণ্ডিকেরাঃ সাবিত্রীপুত্রকাঞ্চলাঃ
প্রাচ্যোদীচ্যাঃ প্রতীচ্যাশ্চ দাক্ষিণাত্যাশ্চ মারিষ
4.48
পত্তীনাং নিহতাঃ সংঘা হয়ানাময়ুতানি চ
রথব্রজাশ্চ নিহতা হতাশ্চ বরবারণাঃ
4.49
সধ্বজাঃ সায়ুধাঃ শূরাঃ সবর্মাম্বরভূষণাঃ
কালেন মহতা যত্তাঃ কুলে যে চ বিবর্ধিতাঃ
4.50
তে হতাঃ সমরে রাজন্পার্থেনাক্লিষ্টকর্মণা
অন্যে তথামিতবলাঃ পরস্পরবধৈষিণঃ
4.51
এতে চান্যে চ বহবো রাজানঃ সগণা রণে
হতাঃ সহস্রশো রাজন্যন্মাং ত্বং পরিপৃচ্ছসি
এবমেষ ক্ষয়ো বৃত্তঃ কর্ণার্জুনসমাগমে
4.52
মহেন্দ্রেণ যথা বৃত্রো যথা রামেণ রাবণঃ
যথা কৃষ্ণেন নিহতো মুরো রণনিপাতিতঃ
কার্তবীর্যশ্চ রামেণ ভার্গবেণ হতো যথা
4.53
সজ্ঞাতিবান্ধবঃ শূরঃ সমরে যুদ্ধদুর্মদঃ
রণে কৃত্বা মহায়ুদ্ধং ঘোরং ত্রৈলোক্যবিশ্রুতম্
4.54
তথার্জুনেন নিহতো দ্বৈরথে যুদ্ধদুর্মদঃ
সামাত্যবান্ধবো রাজন্কর্ণঃ প্রহরতাং বরঃ
4.55
জয়াশা ধার্তরাষ্ট্রাণাং বৈরস্য চ মুখং যতঃ
তীর্ণং তত্পাণ্ডবৈ রাজন্যত্পুরা নাববুধ্যসে
4.56
উচ্যমানো মহারাজ বন্ধুভির্হিতকাঙ্ক্ষিভিঃ
তদিদং সমনুপ্রাপ্তং ব্যসনং ত্বাং মহাত্যয়ম্
4.57
পুত্রাণাং রাজ্যকামানাং ত্বয়া রাজন্হিতৈষিণা
অহিতানীব চীর্ণানি তেষাং তে ফলমাগতম্
4.58
ধৃতরাষ্ট্র উবাচ
আখ্যাতা মামকাস্তাত নিহতা যুধি পাণ্ডবৈঃ
নিহতান্পাণ্ডবেয়ানাং মামকৈর্ব্রূহি সংজয়
4.59
সংজয় উবাচ
কুন্তয়ো যুধি বিক্রান্তা মহাসত্ত্বা মহাবলাঃ
সানুবন্ধাঃ সহামাত্যা ভীষ্মেণ যুধি পাতিতাঃ
4.60
সমঃ কিরীটিনা সংখ্যে বীর্যেণ চ বলেন চ
সত্যজিত্সত্যসংধেন দ্রোণেন নিহতো রণে
4.61
তথা বিরাটদ্রুপদৌ বৃদ্ধৌ সহসুতৌ নৃপৌ
পরাক্রমন্তৌ মিত্রার্থে দ্রোণেন নিহতৌ রণে
4.62
যো বাল এব সমরে সংমিতঃ সব্যসাচিনা
কেশবেন চ দুর্ধর্ষো বলদেবেন চাভিভূঃ
4.63
স এষ কদনং কৃত্বা মহদ্রণবিশারদঃ
পরিবার্য মহামাত্রৈঃ ষড্ভিঃ পরমকৈ রথৈঃ
অশক্নুবদ্ভির্বীভত্সুমভিমন্যুর্নিপাতিতঃ
4.64
তং কৃতং বিরথং বীরং ক্ষত্রধর্মে ব্যবস্থিতম্
দৌঃশাসনির্মহারাজ সৌভদ্রং হতবান্রণে
4.65
বৃহন্তস্তু মহেষ্বাসঃ কৃতাস্ত্রো যুদ্ধদুর্মদঃ
দুঃশাসনেন বিক্রম্য গমিতো যমসাদনম্
4.66
মণিমান্দণ্ডধারশ্চ রাজানৌ যুদ্ধদুর্মদৌ
পরাক্রমন্তৌ মিত্রার্থে দ্রোণেন বিনিপাতিতৌ
4.67
অংশুমান্ভোজরাজস্তু সহসৈন্যো মহারথঃ
ভারদ্বাজেন বিক্রম্য গমিতো যমসাদনম্
4.68
চিত্রায়ুধশ্চিত্রয়োধী কৃত্বা তৌ কদনং মহৎ
চিত্রমার্গেণ বিক্রম্য কর্ণেন নিহতৌ যুধি
4.69
বৃকোদরসমো যুদ্ধে দৃঢঃ কেকয়জো যুধি
কেকয়েনৈব বিক্রম্য ভ্রাত্রা ভ্রাতা নিপাতিতঃ
4.70
জনমেজয়ো গদায়োধী পার্বতীয়ঃ প্রতাপবান্
দুর্মুখেন মহারাজ তব পুত্রেণ পাতিতঃ
4.71
রোচমানৌ নরব্যাঘ্রৌ রোচমানৌ গ্রহাবিব
দ্রোণেন যুগপদ্রাজন্দিবং সংপ্রেষিতৌ শরৈঃ
4.72
নৃপাশ্চ প্রতিয়ুধ্যন্তঃ পরাক্রান্তা বিশাং পতে
কৃত্বা নসুকরং কর্ম গতা বৈবস্বতক্ষয়ম্
4.73
পুরুজিত্কুন্তিভোজশ্চ মাতুলঃ সব্যসাচিনঃ
সংগ্রামনির্জিতাঁল্লোকান্গমিতো দ্রোণসায়কৈঃ
4.74
অভিভূঃ কাশিরাজশ্চ কাশিকৈর্বহুভির্বৃতঃ
বসুদানস্য পুত্রেণ ন্যাসিতো দেহমাহবে
4.75
অমিতৌজা যুধামন্যুরুত্তমৌজাশ্চ বীর্যবান্
নিহত্য শতশঃ শূরান্পরৈর্বিনিহতৌ রণে
4.76
ক্ষত্রধর্মা চ পাঞ্চাল্যঃ ক্ষত্রবর্মা চ মারিষ
দ্রোণেন পরমেষ্বাসৌ গমিতৌ যমসাদনম্
4.77
শিখণ্ডিতনয়ো যুদ্ধে ক্ষত্রদেবো যুধাং পতিঃ
লক্ষ্মণেন হতো রাজংস্তব পৌত্রেণ ভারত
4.78
সুচিত্রশ্চিত্রধর্মা চ পিতাপুত্রৌ মহারথৌ
প্রচরন্তৌ মহাবীর্যৌ দ্রোণেন নিহতৌ রণে
4.79
বার্ধক্ষেমির্মহারাজ কৃত্বা কদনমাহবে
বাহ্লিকেন মহারাজ কৌরবেণ নিপাতিতঃ
4.80
ধৃষ্টকেতুর্মহারাজ চেদীনাং প্রবরো রথঃ
কৃত্বা নসুকরং কর্ম গতো বৈবস্বতক্ষয়ম্
4.81
তথা সত্যধৃতিস্তাত কৃত্বা কদনমাহবে
পাণ্ডবার্থে পরাক্রান্তো গমিতো যমসাদনম্
4.82
পুত্রস্তু শিশুপালস্য সুকেতুঃ পৃথিবীপতে
নিহত্য শাত্রবান্সংখ্যে দ্রোণেন নিহতো যুধি
4.83
তথা সত্যধৃতির্বীরো মদিরাশ্বশ্চ বীর্যবান্
সূর্যদত্তশ্চ বিক্রান্তো নিহতো দ্রোণসায়কৈঃ
4.84
শ্রেণিমাংশ্চ মহারাজ যুধ্যমানঃ পরাক্রমী
কৃত্বা নসুকরং কর্ম গতো বৈবস্বতক্ষয়ম্
4.85
তথৈব যুধি বিক্রান্তো মাগধঃ পরবীরহা
ভীষ্মেণ নিহতো রাজন্যুধ্যমানঃ পরাক্রমী
4.86
বসুদানশ্চ কদনং কুর্বাণোঽতীব সংয়ুগে
ভারদ্বাজেন বিক্রম্য গমিতো যমসাদনম্
4.87
এতে চান্যে চ বহবঃ পাণ্ডবানাং মহারথাঃ
হতা দ্রোণেন বিক্রম্য যন্মাং ত্বং পরিপৃচ্ছসি
4.88
ধৃতরাষ্ট্র উবাচ
হতপ্রবীরে সৈন্যেঽস্মিন্মামকে বদতাং বর
অহতাঞ্শংস মে সূত যেঽত্র জীবন্তি কেচন
4.89
এতেষু নিহতেষ্বদ্য যে ত্বয়া পরিকীর্তিতাঃ
অহতান্মন্যসে যাংস্ত্বং তেঽপি স্বর্গজিতো মতাঃ
4.90
সংজয় উবাচ
যস্মিন্মহাস্ত্রাণি সমর্পিতানি; চিত্রাণি শুভ্রাণি চতুর্বিধানি
দিব্যানি রাজন্নিহিতানি চৈব; দ্রোণেন বীরদ্বিজসত্তমেন
4.91
মহারথঃ কৃতিমান্ক্ষিপ্রহস্তো; দৃঢায়ুধো দৃঢমুষ্টির্দৃঢেষুঃ
স বীর্যবান্দ্রোণপুত্রস্তরস্বী; ব্যবস্থিতো যোদ্ধুকামস্ত্বদর্থে
4.92
আনর্তবাসী হৃদিকাত্মজোঽসৌ; মহারথঃ সাত্বতানাং বরিষ্ঠঃ
স্বয়ং ভোজঃ কৃতবর্মা কৃতাস্ত্রো; ব্যবস্থিতো যোদ্ধুকামস্ত্বদর্থে
4.93
শারদ্বতো গৌতমশ্চাপি রাজ;ন্মহাবলো বহুচিত্রাস্ত্রয়োধী
ধনুশ্চিত্রং সুমহদ্ভারসাহং; ব্যবস্থিতো যোত্স্যমানঃ প্রগৃহ্য
4.94
আর্তায়নিঃ সমরে দুষ্প্রকম্প্যঃ; সেনাগ্রণীঃ প্রথমস্তাবকানাম্
স্বস্রেয়াংস্তান্পাণ্ডবেয়ান্বিসৃজ্য; সত্যাং বাচং তাং চিকীর্ষুস্তরস্বী
4.95
তেজোবধং সূতপুত্রস্য সংখ্যে; প্রতিশ্রুত্বাজাতশত্রোঃ পুরস্তাৎ
দুরাধর্ষঃ শক্রসমানবীর্যঃ; শল্যঃ স্থিতো যোদ্ধুকামস্ত্বদর্থে
4.96
আজানেয়ৈঃ সৈন্ধবৈঃ পার্বতীয়ৈ;র্নদীজকাম্বোজবনায়ুবাহ্লিকৈঃ
গান্ধাররাজঃ স্ববলেন যুক্তো; ব্যবস্থিতো যোদ্ধুকামস্ত্বদর্থে
4.97
তথা সুতস্তে জ্বলনার্কবর্ণং; রথং সমাস্থায় কুরুপ্রবীর
ব্যবস্থিতঃ কুরুমিত্রো নরেন্দ্র; ব্যভ্রে সূর্যো ভ্রাজমানো যথা বৈ
4.98
দুর্যোধনো নাগকুলস্য মধ্যে; মহাবীর্যঃ সহ সৈন্যপ্রবীরৈঃ
রথেন জাম্বূনদভূষণেন; ব্যবস্থিতঃ সমরে যোদ্ধুকামঃ
4.99
স রাজমধ্যে পুরুষপ্রবীরো; ররাজ জাম্বূনদচিত্রবর্মা
পদ্মপ্রভো বহ্নিরিবাল্পধূমো; মেঘান্তরে সূর্য ইব প্রকাশঃ
4.100
তথা সুষেণোঽপ্যসিচর্মপাণি;স্তবাত্মজঃ সত্যসেনশ্চ বীরঃ
ব্যবস্থিতৌ চিত্রসেনেন সার্ধং; হৃষ্টাত্মানৌ সমরে যোদ্ধুকামৌ
4.101
হ্রীনিষেধা ভরতা রাজপুত্রা;শ্চিত্রায়ুধঃ শ্রুতকর্মা জয়শ্চ
শলশ্চ সত্যব্রতদুঃশলৌ চ; ব্যবস্থিতা বলিনো যোদ্ধুকামাঃ
4.102
কৈতব্যানামধিপঃ শূরমানী; রণে রণে শত্রুহা রাজপুত্রঃ
পত্রী হয়ী নাগরথপ্রয়ায়ী; ব্যবস্থিতো যোদ্ধুকামস্ত্বদর্থে
4.103
বীরঃ শ্রুতায়ুশ্চ শ্রুতায়ুধশ্চ; চিত্রাঙ্গদশ্চিত্রবর্মা স বীরঃ
ব্যবস্থিতা যে তু সৈন্যে নরাগ্র্যাঃ; প্রহারিণো মানিনঃ সত্যসংধাঃ
4.104
কর্ণাত্মজঃ সত্যসেনো মহাত্মা; ব্যবস্থিতঃ সমরে যোদ্ধুকামঃ
অথাপরৌ কর্ণসুতৌ বরার্হৌ; ব্যবস্থিতৌ লঘুহস্তৌ নরেন্দ্র
বলং মহদ্দুর্ভিদমল্পধৈর্যৈঃ; সমাশ্রিতৌ যোত্স্যমানৌ ত্বদর্থে
4.105
এতৈশ্চ মুখ্যৈরপরৈশ্চ রাজ;ন্যোধপ্রবীরৈরমিতপ্রভাবৈঃ
ব্যবস্থিতো নাগকুলস্য মধ্যে; যথা মহেন্দ্রঃ কুরুরাজো জয়ায়
4.106
ধৃতরাষ্ট্র উবাচ
আখ্যাতা জীবমানা যে পরেভ্যোঽন্যে যথাতথম্
ইতীদমভিগচ্ছামি ব্যক্তমর্থাভিপত্তিতঃ
4.107
বৈশংপায়ন উবাচ
এবং ব্রুবন্নেব তদা ধৃতরাষ্ট্রোঽম্বিকাসুতঃ
হতপ্রবীরং বিধ্বস্তং কিংচিচ্ছেষং স্বকং বলম্
শ্রুত্বা ব্যামোহমগমচ্ছোকব্যাকুলিতেন্দ্রিয়ঃ
4.108
মুহ্যমানোঽব্রবীচ্চাপি মুহূর্তং তিষ্ঠ সংজয়
ব্যাকুলং মে মনস্তাত শ্রুত্বা সুমহদপ্রিয়ম্
নষ্টচিত্তস্ততঃ সোঽথ বভূব জগতীপতিঃ