অধ্যায় 3

3.1

বৈশংপায়ন উবাচ
এতচ্ছ্রুত্বা মহারাজ ধৃতরাষ্ট্রোঽম্বিকাসুতঃ
শোকস্যান্তমপশ্যন্বৈ হতং মত্বা সুয়োধনম্
বিহ্বলঃ পতিতো ভূমৌ নষ্টচেতা ইব দ্বিপঃ

তস্মিন্নিপতিতে ভূমৌ বিহ্বলে রাজসত্তমে
আর্তনাদো মহানাসীত্স্ত্রীণাং ভরতসত্তম

স শব্দঃ পৃথিবীং সর্বাং পূরয়ামাস সর্বশঃ
শোকার্ণবে মহাঘোরে নিমগ্না ভরতস্ত্রিয়ঃ

রাজানং চ সমাসাদ্য গান্ধারী ভরতর্ষভ
নিঃসংজ্ঞা পতিতা ভূমৌ সর্বাণ্যন্তঃপুরাণি চ

ততস্তাঃ সংজয়ো রাজন্সমাশ্বাসয়দাতুরাঃ
মুহ্যমানাঃ সুবহুশো মুঞ্চন্ত্যো বারি নেত্রজম্

সমাশ্বস্তাঃ স্ত্রিয়স্তাস্তু বেপমানা মুহুর্মুহুঃ
কদল্য ইব বাতেন ধূয়মানাঃ সমন্ততঃ

রাজানং বিদুরশ্চাপি প্রজ্ঞাচক্ষুষমীশ্বরম্
আশ্বাসয়ামাস তদা সিঞ্চংস্তোয়েন কৌরবম্

স লব্ধ্বা শনকৈঃ সংজ্ঞাং তাশ্চ দৃষ্ট্বা স্ত্রিয়ো নৃপ
উন্মত্ত ইব রাজা স স্থিতস্তূষ্ণীং বিশাং পতে

ততো ধ্যাত্বা চিরং কালং নিঃশ্বসংশ্চ পুনঃ পুনঃ
স্বান্পুত্রান্গর্হয়ামাস বহু মেনে চ পাণ্ডবান্

গর্হয়িত্বাত্মনো বুদ্ধিং শকুনেঃ সৌবলস্য চ
ধ্যাত্বা চ সুচিরং কালং বেপমানো মুহুর্মুহুঃ

সংস্তভ্য চ মনো ভূয়ো রাজা ধৈর্যসমন্বিতঃ
পুনর্গাবল্গণিং সূতং পর্যপৃচ্ছত সংজয়ম্

যত্ত্বয়া কথিতং বাক্যং শ্রুতং সংজয় তন্ময়া
কচ্চিদ্দুর্যোধনঃ সূত ন গতো বৈ যমক্ষয়ম্
ব্রূহি সংজয় তত্ত্বেন পুনরুক্তাং কথামিমাম্

এবমুক্তোঽব্রবীত্সূতো রাজানং জনমেজয়
হতো বৈকর্তনো রাজন্সহ পুত্রৈর্মহারথৈঃ
ভ্রাতৃভিশ্চ মহেষ্বাসৈঃ সূতপুত্রৈস্তনুত্যজৈঃ

দুঃশাসনশ্চ নিহতঃ পাণ্ডবেন যশস্বিনা
পীতং চ রুধিরং কোপাদ্ভীমসেনেন সংয়ুগে