অধ্যায় 2

2.1

সংজয় উবাচ
হতে দ্রোণে মহেষ্বাসে তব পুত্রা মহারথাঃ
বভূবুরাশ্বস্তমুখা বিষণ্ণা গতচেতসঃ

অবাঙ্মুখাঃ শস্ত্রভৃতঃ সর্ব এব বিশাং পতে
অপ্রেক্ষমাণাঃ শোকার্তা নাভ্যভাষন্পরস্পরম্

তান্দৃষ্ট্বা ব্যথিতাকারান্সৈন্যানি তব ভারত
ঊর্ধ্বমেবাভ্যবেক্ষন্ত দুঃখত্রস্তান্যনেকশঃ

শস্ত্রাণ্যেষাং চ রাজেন্দ্র শোণিতাক্তান্যশেষতঃ
প্রাভ্রশ্যন্ত করাগ্রেভ্যো দৃষ্ট্বা দ্রোণং নিপাতিতম্

তানি বদ্ধান্যনিষ্টানি লম্বমানানি ভারত
অদৃশ্যন্ত মহারাজ নক্ষত্রাণি যথা দিবি

তথার্তং স্তিমিতং দৃষ্ট্বা গতসত্ত্বমিব স্থিতম্
স্বং বলং তন্মহারাজ রাজা দুর্যোধনোঽব্রবীৎ

ভবতাং বাহুবীর্যং হি সমাশ্রিত্য ময়া যুধি
পাণ্ডবেয়াঃ সমাহূতা যুদ্ধং চেদং প্রবর্তিতম্

তদিদং নিহতে দ্রোণে বিষণ্ণমিব লক্ষ্যতে
যুধ্যমানাশ্চ সমরে যোধা বধ্যন্তি সর্বতঃ

জয়ো বাপি বধো বাপি যুধ্যমানস্য সংয়ুগে
ভবেত্কিমত্র চিত্রং বৈ যুধ্যধ্বং সর্বতোমুখাঃ

পশ্যধ্বং চ মহাত্মানং কর্ণং বৈকর্তনং যুধি
প্রচরন্তং মহেষ্বাসং দিব্যৈরস্ত্রৈর্মহাবলম্

যস্য বৈ যুধি সংত্রাসাত্কুন্তীপুত্রো ধনংজয়ঃ
নিবর্ততে সদামর্ষাত্সিংহাত্ক্ষুদ্রমৃগো যথা

যেন নাগায়ুতপ্রাণো ভীমসেনো মহাবলঃ
মানুষেণৈব যুদ্ধেন তামবস্থাং প্রবেশিতঃ

যেন দিব্যাস্ত্রবিচ্ছূরো মায়াবী স ঘটোত্কচঃ
অমোঘয়া রণে শক্ত্যা নিহতো ভৈরবং নদন্

তস্য দুষ্পারবীর্যস্য সত্যসংধস্য ধীমতঃ
বাহ্বোর্দ্রবিণমক্ষয্যমদ্য দ্রক্ষ্যথ সংয়ুগে

দ্রোণপুত্রস্য বিক্রান্তং রাধেয়স্যৈব চোভয়োঃ
পাণ্ডুপাঞ্চালসৈন্যেষু দ্রক্ষ্যথাপি মহাত্মনোঃ

সর্ব এব ভবন্তশ্চ শূরাঃ প্রাজ্ঞাঃ কুলোদ্গতাঃ
শীলবন্তঃ কৃতাস্ত্রাশ্চ দ্রক্ষ্যথাদ্য পরস্পরম্

এবমুক্তে মহারাজ কর্ণো বৈকর্তনো নৃপঃ
সিংহনাদং বিনদ্যোচ্চৈঃ প্রায়ুধ্যত মহাবলঃ

স সৃঞ্জয়ানাং সর্বেষাং পাঞ্চালানাং চ পশ্যতাম্
কেকয়ানাং বিদেহানামকরোত্কদনং মহৎ

তস্যেষুধারাঃ শতশঃ প্রাদুরাসঞ্শরাসনাৎ
অগ্রে পুঙ্খে চ সংসক্তা যথা ভ্রমরপঙ্ক্তয়ঃ

স পীডয়িত্বা পাঞ্চালান্পাণ্ডবাংশ্চ তরস্বিনঃ
হত্বা সহস্রশো যোধানর্জুনেন নিপাতিতঃ