Utshovঅধ্যায় 1
1.1
বৈশংপায়ন উবাচ
ততো দ্রোণে হতে রাজন্দুর্যোধনমুখা নৃপাঃ
ভৃশমুদ্বিগ্নমনসো দ্রোণপুত্রমুপাগমন্
1.2
তে দ্রোণমুপশোচন্তঃ কশ্মলাভিহতৌজসঃ
পর্যুপাসন্ত শোকার্তাস্ততঃ শারদ্বতীসুতম্
1.3
মুহূর্তং তে সমাশ্বাস্য হেতুভিঃ শাস্ত্রসংমিতৈঃ
রাত্র্যাগমে মহীপালাঃ স্বানি বেশ্মানি ভেজিরে
1.4
বিশেষতঃ সূতপুত্রো রাজা চৈব সুয়োধনঃ
দুঃশাসনোঽথ শকুনির্ন নিদ্রামুপলেভিরে
1.5
তে বেশ্মস্বপি কৌরব্য পৃথ্বীশা নাপ্নুবন্সুখম্
চিন্তয়ন্তঃ ক্ষয়ং তীব্রং নিদ্রাং নৈবোপলেভিরে
1.6
সহিতাস্তে নিশায়াং তু দুর্যোধননিবেশনে
অতিপ্রচণ্ডাদ্বিদ্বেষাত্পাণ্ডবানাং মহাত্মনাম্
1.7
যত্তদ্দ্যূতপরিক্লিষ্টাং কৃষ্ণামানিন্যিরে সভাম্
তত্স্মরন্তোঽন্বতপ্যন্ত ভৃশমুদ্বিগ্নচেতসঃ
1.8
চিন্তয়ন্তশ্চ পার্থানাং তান্ক্লেশান্দ্যূতকারিতান্
কৃচ্ছ্রেণ ক্ষণদাং রাজন্নিন্যুরব্দশতোপমাম্
1.9
ততঃ প্রভাতে বিমলে স্থিতা দিষ্টস্য শাসনে
চক্রুরাবশ্যকং সর্বে বিধিদৃষ্টেন কর্মণা
1.10
তে কৃত্বাবশ্যকার্যাণি সমাশ্বস্য চ ভারত
যোগমাজ্ঞাপয়ামাসুর্যুদ্ধায় চ বিনির্যয়ুঃ
1.11
কর্ণং সেনাপতিং কৃত্বা কৃতকৌতুকমঙ্গলাঃ
বাচয়িত্বা দ্বিজশ্রেষ্ঠান্দধিপাত্রঘৃতাক্ষতৈঃ
1.12
নিষ্কৈর্গোভির্হিরণ্যেন বাসোভিশ্চ মহাধনৈঃ
বর্ধ্যমানা জয়াশীর্ভিঃ সূতমাগধবন্দিভিঃ
1.13
তথৈব পাণ্ডবা রাজন্কৃতসর্বাহ্ণিকক্রিয়াঃ
শিবিরান্নির্যয়ূ রাজন্যুদ্ধায় কৃতনিশ্চয়াঃ
1.14
ততঃ প্রববৃতে যুদ্ধং তুমুলং রোমহর্ষণম্
কুরূণাং পাণ্ডবানাং চ পরস্পরবধৈষিণাম্
1.15
তয়োর্দ্বে দিবসে যুদ্ধং কুরুপাণ্ডবসেনয়োঃ
কর্ণে সেনাপতৌ রাজন্নভূদদ্ভুতদর্শনম্
1.16
ততঃ শত্রুক্ষয়ং কৃত্বা সুমহান্তং রণে বৃষঃ
পশ্যতাং ধার্তরাষ্ট্রাণাং ফল্গুনেন নিপাতিতঃ
1.17
ততস্তত্সংজয়ঃ সর্বং গত্বা নাগাহ্বয়ং পুরম্
আচখ্যৌ ধৃতরাষ্ট্রায় যদ্বৃত্তং কুরুজাঙ্গলে
1.18
জনমেজয় উবাচ
আপগেয়ং হতং শ্রুত্বা দ্রোণং চ সমরে পরৈঃ
যো জগাম পরামার্তিং বৃদ্ধো রাজাম্বিকাসুতঃ
1.19
স শ্রুত্বা নিহতং কর্ণং দুর্যোধনহিতৈষিণম্
কথং দ্বিজবর প্রাণানধারয়ত দুঃখিতঃ
1.20
যস্মিঞ্জয়াশাং পুত্রাণামমন্যত স পার্থিবঃ
তস্মিন্হতে স কৌরব্যঃ কথং প্রাণানধারয়ৎ
1.21
দুর্মরং বত মন্যেঽহং নৃণাং কৃচ্ছ্রেঽপি বর্ততাম্
যত্র কর্ণং হতং শ্রুত্বা নাত্যজজ্জীবিতং নৃপঃ
1.22
তথা শাংতনবং বৃদ্ধং ব্রহ্মন্বাহ্লিকমেব চ
দ্রোণং চ সোমদত্তং চ ভূরিশ্রবসমেব চ
1.23
তথৈব চান্যান্সুহৃদঃ পুত্রপৌত্রাংশ্চ পাতিতান্
শ্রুত্বা যন্নাজহাত্প্রাণাংস্তন্মন্যে দুষ্করং দ্বিজ
1.24
এতন্মে সর্বমাচক্ষ্ব বিস্তরেণ তপোধন
ন হি তৃপ্যামি পূর্বেষাং শৃণ্বানশ্চরিতং মহৎ
1.25
বৈশংপায়ন উবাচ
হতে কর্ণে মহারাজ নিশি গাবল্গণিস্তদা
দীনো যয়ৌ নাগপুরমশ্বৈর্বাতসমৈর্জবে
1.26
স হাস্তিনপুরং গত্বা ভৃশমুদ্বিগ্নমানসঃ
জগাম ধৃতরাষ্ট্রস্য ক্ষয়ং প্রক্ষীণবান্ধবম্
1.27
স সমুদ্বীক্ষ্য রাজানং কশ্মলাভিহতৌজসম্
ববন্দে প্রাঞ্জলির্ভূত্বা মূর্ধ্না পাদৌ নৃপস্য হ
1.28
সংপূজ্য চ যথান্যায়ং ধৃতরাষ্ট্রং মহীপতিম্
হা কষ্টমিতি চোক্ত্বা স ততো বচনমাদদে
1.29
সংজয়োঽহং ক্ষিতিপতে কচ্চিদাস্তে সুখং ভবান্
স্বদোষেণাপদং প্রাপ্য কচ্চিন্নাদ্য বিমুহ্যসি
1.30
হিতান্যুক্তানি বিদুরদ্রোণগাঙ্গেয়কেশবৈঃ
অগৃহীতান্যনুস্মৃত্য কচ্চিন্ন কুরুষে ব্যথাম্
1.31
রামনারদকণ্বৈশ্চ হিতমুক্তং সভাতলে
নগৃহীতমনুস্মৃত্য কচ্চিন্ন কুরুষে ব্যথাম্
1.32
সুহৃদস্ত্বদ্ধিতে যুক্তান্ভীষ্মদ্রোণমুখান্পরৈঃ
নিহতান্যুধি সংস্মৃত্য কচ্চিন্ন কুরুষে ব্যথাম্
1.33
তমেবংবাদিনং রাজা সূতপুত্রং কৃতাঞ্জলিম্
সুদীর্ঘমভিনিঃশ্বস্য দুঃখার্ত ইদমব্রবীৎ
1.34
গাঙ্গেয়ে নিহতে শূরে দিব্যাস্ত্রবতি সংজয়
দ্রোণে চ পরমেষ্বাসে ভৃশং মে ব্যথিতং মনঃ
1.35
যো রথানাং সহস্রাণি দংশিতানাং দশৈব হি
অহন্যহনি তেজস্বী নিজঘ্নে বসুসংভবঃ
1.36
স হতো যজ্ঞসেনস্য পুত্রেণেহ শিখণ্ডিনা
পাণ্ডবেয়াভিগুপ্তেন ভৃশং মে ব্যথিতং মনঃ
1.37
ভার্গবঃ প্রদদৌ যস্মৈ পরমাস্ত্রং মহাত্মনে
সাক্ষাদ্রামেণ যো বাল্যে ধনুর্বেদ উপাকৃতঃ
1.38
যস্য প্রসাদাত্কৌন্তেয়া রাজপুত্রা মহাবলাঃ
মহারথত্বং সংপ্রাপ্তাস্তথান্যে বসুধাধিপাঃ
1.39
তং দ্রোণং নিহতং শ্রুত্বা ধৃষ্টদ্যুম্নেন সংয়ুগে
সত্যসংধং মহেষ্বাসং ভৃশং মে ব্যথিতং মনঃ
1.40
ত্রৈলোক্যে যস্য শাস্ত্রেষু ন পুমান্বিদ্যতে সমঃ
তং দ্রোণং নিহতং শ্রুত্বা কিমকুর্বত মামকাঃ
1.41
সংশপ্তকানাং চ বলে পাণ্ডবেন মহাত্মনা
ধনংজয়েন বিক্রম্য গমিতে যমসাদনম্
1.42
নারায়ণাস্ত্রে নিহতে দ্রোণপুত্রস্য ধীমতঃ
হতশেষেষ্বনীকেষু কিমকুর্বত মামকাঃ
1.43
বিপ্রদ্রুতানহং মন্যে নিমগ্নঃ শোকসাগরে
প্লবমানান্হতে দ্রোণে সন্ননৌকানিবার্ণবে
1.44
দুর্যোধনস্য কর্ণস্য ভোজস্য কৃতবর্মণঃ
মদ্ররাজস্য শল্যস্য দ্রৌণেশ্চৈব কৃপস্য চ
1.45
মত্পুত্রশেষস্য তথা তথান্যেষাং চ সংজয়
বিপ্রকীর্ণেষ্বনীকেষু মুখবর্ণোঽভবত্কথম্
1.46
এতত্সর্বং যথা বৃত্তং তত্ত্বং গাবল্গণে রণে
আচক্ষ্ব পাণ্ডবেয়ানাং মামকানাং চ সর্বশঃ
1.47
সংজয় উবাচ
পাণ্ডবেয়ৈর্হি যদ্বৃত্তং কৌরবেয়েষু মারিষ
তচ্ছ্রুত্বা মা ব্যথাং কার্ষীর্দিষ্টে ন ব্যথতে মনঃ
1.48
যস্মাদভাবী ভাবী বা ভবেদর্থো নরং প্রতি
অপ্রাপ্তৌ তস্য বা প্রাপ্তৌ ন কশ্চিদ্ব্যথতে বুধঃ
1.49
ধৃতরাষ্ট্র উবাচ
ন ব্যথা শৃণ্বতঃ কাচিদ্বিদ্যতে মম সংজয়
দিষ্টমেতত্পুরা মন্যে কথয়স্ব যথেচ্ছকম্