Utshovঅধ্যায় 10
10.1
সংজয় উবাচ
শ্রুতকর্মা মহারাজ চিত্রসেনং মহীপতিম্
আজঘ্নে সমরে ক্রুদ্ধঃ পঞ্চাশদ্ভিঃ শিলীমুখৈঃ
10.2
অভিসারস্তু তং রাজা নবভির্নিশিতৈঃ শরৈঃ
শ্রুতকর্মাণমাহত্য সূতং বিব্যাধ পঞ্চভিঃ
10.3
শ্রুতকর্মা ততঃ ক্রুদ্ধশ্চিত্রসেনং চমূমুখে
নারাচেন সুতীক্ষ্ণেন মর্মদেশে সমর্দয়ৎ
10.4
এতস্মিন্নন্তরে চৈনং শ্রুতকীর্তির্মহায়শাঃ
নবত্যা জগতীপালং ছাদয়ামাস পত্রিভিঃ
10.5
প্রতিলভ্য ততঃ সংজ্ঞাং চিত্রসেনো মহারথঃ
ধনুশ্চিচ্ছেদ ভল্লেন তং চ বিব্যাধ সপ্তভিঃ
10.6
সোঽন্যত্কার্মুকমাদায় বেগঘ্নং রুক্মভূষণম্
চিত্ররূপতরং চক্রে চিত্রসেনং শরোর্মিভিঃ
10.7
স শরৈশ্চিত্রিতো রাজংশ্চিত্রমাল্যধরো যুবা
যুবেব সমশোভত্স গোষ্ঠীমধ্যে স্বলংকৃতঃ
10.8
শ্রুতকর্মাণমথ বৈ নারাচেন স্তনান্তরে
বিভেদ সমরে ক্রুদ্ধস্তিষ্ঠ তিষ্ঠেতি চাব্রবীৎ
10.9
শ্রুতকর্মাপি সমরে নারাচেন সমর্দিতঃ
সুস্রাব রুধিরং ভূরি গৈরিকাম্ভ ইবাচলঃ
10.10
ততঃ স রুধিরাক্তাঙ্গো রুধিরেণ কৃতচ্ছবিঃ
ররাজ সমরে রাজন্সপুষ্প ইব কিংশুকঃ
10.11
শ্রুতকর্মা ততো রাজঞ্শত্রূণাং সমভিদ্রুতঃ
শত্রুসংবরণং কৃত্বা দ্বিধা চিচ্ছেদ কার্মুকম্
10.12
অথৈনং ছিন্নধন্বানং নারাচানাং ত্রিভিঃ শতৈঃ
বিব্যাধ ভরতশ্রেষ্ঠ শ্রুতকর্মা মহায়শাঃ
10.13
ততোঽপরেণ ভল্লেন ভৃশং তীক্ষ্ণেন সত্বরঃ
জহার সশিরস্ত্রাণং শিরস্তস্য মহাত্মনঃ
10.14
তচ্ছিরো ন্যপতদ্ভূমৌ সুমহচ্চিত্রবর্মণঃ
যদৃচ্ছয়া যথা চন্দ্রশ্চ্যুতঃ স্বর্গান্মহীতলে
10.15
রাজানং নিহতং দৃষ্ট্বা অভিসারং চ মারিষ
অভ্যদ্রবন্ত বেগেন চিত্রসেনস্য সৈনিকাঃ
10.16
ততঃ ক্রুদ্ধো মহেষ্বাসস্তত্সৈন্যং প্রাদ্রবচ্ছরৈঃ
অন্তকালে যথা ক্রুদ্ধঃ সর্বভূতানি প্রেতরাট্
দ্রাবয়ন্নিষুভিস্তূর্ণং শ্রুতকর্মা ব্যরোচত
10.17
প্রতিবিন্ধ্যস্ততশ্চিত্রং ভিত্ত্বা পঞ্চভিরাশুগৈঃ
সারথিং ত্রিভিরানর্চ্ছদ্ধ্বজমেকেষুণা ততঃ
10.18
তং চিত্রো নবভির্ভল্লৈর্বাহ্বোরুরসি চার্দয়ৎ
স্বর্ণপুঙ্খৈঃ শিলাধৌতৈঃ কঙ্কবর্হিণবাজিতৈঃ
10.19
প্রতিবিন্ধ্যো ধনুস্তস্য ছিত্ত্বা ভারত সায়কৈঃ
পঞ্চভির্নিশিতৈর্বাণৈরথৈনং সংপ্রজঘ্নিবান্
10.20
ততঃ শক্তিং মহারাজ হেমদণ্ডাং দুরাসদাম্
প্রাহিণোত্তব পুত্রায় ঘোরামগ্নিশিখামিব
10.21
তামাপতন্তীং সহসা শক্তিমুল্কামিবাম্বরাৎ
দ্বিধা চিচ্ছেদ সমরে প্রতিবিন্ধ্যো হসন্নিব
10.22
সা পপাত তদা ছিন্না প্রতিবিন্ধ্যশরৈঃ শিতৈঃ
যুগান্তে সর্বভূতানি ত্রাসয়ন্তী যথাশনিঃ
10.23
শক্তিং তাং প্রহতাং দৃষ্ট্বা চিত্রো গৃহ্য মহাগদাম্
প্রতিবিন্ধ্যায় চিক্ষেপ রুক্মজালবিভূষিতাম্
10.24
সা জঘান হয়াংস্তস্য সারথিং চ মহারণে
রথং প্রমৃদ্য বেগেন ধরণীমন্বপদ্যত
10.25
এতস্মিন্নেব কালে তু রথাদাপ্লুত্য ভারত
শক্তিং চিক্ষেপ চিত্রায় স্বর্ণঘণ্টামলংকৃতাম্
10.26
তামাপতন্তীং জগ্রাহ চিত্রো রাজন্মহামনাঃ
ততস্তামেব চিক্ষেপ প্রতিবিন্ধ্যায় ভারত
10.27
সমাসাদ্য রণে শূরং প্রতিবিন্ধ্যং মহাপ্রভা
নির্ভিদ্য দক্ষিণং বাহুং নিপপাত মহীতলে
পতিতাভাসয়চ্চৈব তং দেশমশনির্যথা
10.28
প্রতিবিন্ধ্যস্ততো রাজংস্তোমরং হেমভূষিতম্
প্রেষয়ামাস সংক্রুদ্ধশ্চিত্রস্য বধকাম্যয়া
10.29
স তস্য দেবাবরণং ভিত্ত্বা হৃদয়মেব চ
জগাম ধরণীং তূর্ণং মহোরগ ইবাশয়ম্
10.30
স পপাত তদা রাজংস্তোমরেণ সমাহতঃ
প্রসার্য বিপুলৌ বাহূ পীনৌ পরিঘসংনিভৌ
10.31
চিত্রং সংপ্রেক্ষ্য নিহতং তাবকা রণশোভিনঃ
অভ্যদ্রবন্ত বেগেন প্রতিবিন্ধ্যং সমন্ততঃ
10.32
সৃজন্তো বিবিধান্বাণাঞ্শতঘ্নীশ্চ সকিঙ্কিণীঃ
ত এনং ছাদয়ামাসুঃ সূর্যমভ্রগণা ইব
10.33
তানপাস্য মহাবাহুঃ শরজালেন সংয়ুগে
ব্যদ্রাবয়ত্তব চমূং বজ্রহস্ত ইবাসুরীম্
10.34
তে বধ্যমানাঃ সমরে তাবকাঃ পাণ্ডবৈর্নৃপ
বিপ্রকীর্যন্ত সহসা বাতনুন্না ঘনা ইব
10.35
বিপ্রদ্রুতে বলে তস্মিন্বধ্যমানে সমন্ততঃ
দ্রৌণিরেকোঽভ্যয়াত্তূর্ণং ভীমসেনং মহাবলম্
10.36
ততঃ সমাগমো ঘোরো বভূব সহসা তয়োঃ
যথা দেবাসুরে যুদ্ধে বৃত্রবাসবয়োরভূৎ