Utshovঅধ্যায় 68
68.1
সংজয় উবাচ
শল্যস্তু কর্ণার্জুনয়োর্বিমর্দে; বলানি দৃষ্ট্বা মৃদিতানি বাণৈঃ
দুর্যোধনং যান্তমবেক্ষমাণো; সংদর্শয়দ্ভারত যুদ্ধভূমিম্
68.2
নিপাতিতস্যন্দনবাজিনাগং; দৃষ্ট্বা বলং তদ্ধতসূতপুত্রম্
দুর্যোধনোঽশ্রুপ্রতিপূর্ণনেত্রো; মুহুর্মুহুর্ন্যশ্বসদার্তরূপঃ
68.3
কর্ণং তু শূরং পতিতং পৃথিব্যাং; শরাচিতং শোণিতদিগ্ধগাত্রম্
যদৃচ্ছয়া সূর্যমিবাবনিস্থং; দিদৃক্ষবঃ সংপরিবার্য তস্থুঃ
68.4
প্রহৃষ্টবিত্রস্তবিষণ্ণবিস্মৃতা;স্তথাপরে শোকগতা ইবাভবন্
পরে ত্বদীয়াশ্চ পরস্পরেণ; যথা যথৈষাং প্রকৃতিস্তথাভবন্
68.5
প্রবিদ্ধবর্মাভরণাম্বরায়ুধং; ধনংজয়েনাভিহতং হতৌজসম্
নিশম্য কর্ণং কুরবঃ প্রদুদ্রুবু;র্হতর্ষভা গাব ইবাকুলাকুলাঃ
68.6
কৃত্বা বিমর্দং ভৃশমর্জুনেন; কর্ণং হতং কেসরিণেব নাগম্
দৃষ্ট্বা শয়ানং ভুবি মদ্ররাজো; ভীতোঽপসর্পত্সরথঃ সুশীঘ্রম্
68.7
মদ্রাধিপশ্চাপি বিমূঢচেতা;স্তূর্ণং রথেনাপহৃতধ্বজেন
দুর্যোধনস্যান্তিকমেত্য শীঘ্রং; সংভাষ্য দুঃখার্তমুবাচ বাক্যম্
68.8
বিশীর্ণনাগাশ্বরথপ্রবীরং; বলং ত্বদিয়ং যমরাষ্ট্রকল্পম্
অন্যোন্যমাসাদ্য হতং মহদ্ভি;র্নরাশ্বনাগৈর্গিরিকূটকল্পৈঃ
68.9
নৈতাদৃশং ভারত যুদ্ধমাসী;দ্যথাদ্য কর্ণার্জুনয়োর্বভূব
গ্রস্তৌ হি কর্ণেন সমেত্য কৃষ্ণা;বন্যে চ সর্বে তব শত্রবো যে
68.10
দৈবং তু যত্তত্স্ববশং প্রবৃত্তং; তত্পাণ্ডবান্পাতি হিনস্তি চাস্মান্
তবার্থসিদ্ধ্যর্থকরা হি সর্বে; প্রসহ্য বীরা নিহতা দ্বিষদ্ভিঃ
68.11
কুবেরবৈবস্বতবাসবানাং; তুল্যপ্রভাবাম্বুপতেশ্চ বীরাঃ
বীর্যেণ শৌর্যেণ বলেন চৈব; তৈস্তৈশ্চ যুক্তা বিপুলৈর্গুণৌঘৈঃ
68.12
অবধ্যকল্পা নিহতা নরেন্দ্রা;স্তবার্থকামা যুধি পাণ্ডবেয়ৈঃ
তন্মা শুচো ভারত দিষ্টমেত;ত্পর্যায়সিদ্ধির্ন সদাস্তি সিদ্ধিঃ
68.13
এতদ্বচো মদ্রপতের্নিশম্য; স্বং চাপনীতং মনসা নিরীক্ষ্য
দুর্যোধনো দীনমনা বিসংজ্ঞঃ; পুনঃ পুনর্ন্যশ্বসদার্তরূপঃ
68.14
তং ধ্যানমূকং কৃপণং ভৃশার্ত;মার্তায়নির্দীনমুবাচ বাক্যম্
পশ্যেদমুগ্রং নরবাজিনাগৈ;রায়োধনং বীরহতৈঃ প্রপন্নম্
68.15
মহীধরাভৈঃ পতিতৈর্মহাগজৈঃ; সকৃত্প্রবিদ্ধৈঃ শরবিদ্ধমর্মভিঃ
তৈর্বিহ্বলদ্ভিশ্চ গতাসুভিশ্চ; প্রধ্বস্তয়ন্ত্রায়ুধবর্ময়োধৈঃ
68.16
বজ্রাপবিদ্ধৈরিব চাচলেন্দ্রৈ;র্বিভিন্নপাষাণমৃগদ্রুমৌষধৈঃ
প্রবিদ্ধঘণ্টাঙ্কুশতোমরধ্বজৈঃ; সহেমমালৈ রুধিরৌঘসংপ্লুতৈঃ
68.17
শরাবভিন্নৈঃ পতিতৈশ্চ বাজিভিঃ; শ্বসদ্ভিরন্যৈঃ ক্ষতজং বমদ্ভিঃ
দীনৈঃ স্তনদ্ভিঃ পরিবৃত্তনেত্রৈ;র্মহীং দশদ্ভিঃ কৃপণং নদদ্ভিঃ
68.18
তথাপবিদ্ধৈর্গজবাজিয়োধৈ;র্মন্দাসুভিশ্চৈব গতাসুভিশ্চ
নরাশ্বনাগৈশ্চ রথৈশ্চ মর্দিতৈ;র্মহী মহাবৈতরণীব দুর্দৃশা
68.19
গজৈর্নিকৃত্তাপরহস্তগাত্রৈ;রুদ্বেপমানৈঃ পতিতৈঃ পৃথিব্যাম্
যশস্বিভির্নাগরথাশ্বয়োধিভিঃ; পদাতিভিশ্চাভিমুখৈর্হতৈঃ পরৈঃ
বিশীর্ণবর্মাভরণাম্বরায়ুধৈ;র্বৃতা নিশান্তৈরিব পাবকৈর্মহী
68.20
শরপ্রহারাভিহতৈর্মহাবলৈ;রবেক্ষ্যমাণৈঃ পতিতৈঃ সহস্রশঃ
প্রনষ্টসংজ্ঞৈঃ পুনরুচ্ছ্বসদ্ভি;র্মহী বভূবানুগতৈরিবাগ্নিভিঃ
দিবশ্চ্যুতৈর্ভূরতিদীপ্তিমদ্ভি;র্নক্তং গ্রহৈর্দ্যৌরমলেব দীপ্তৈঃ
68.21
শরাস্তু কর্ণার্জুনবাহুমুক্তা; বিদার্য নাগাশ্বমনুষ্যদেহান্
প্রাণান্নিরস্যাশু মহীমতীয়ু;র্মহোরগা বাসমিবাভিতোঽস্ত্রৈঃ
68.22
হতৈর্মনুষ্যাশ্বগজৈশ্চ সংখ্যে; শরাবভিন্নৈশ্চ রথৈর্বভূব
ধনংজয়স্যাধিরথেশ্চ মার্গে; গজৈরগম্যা বসুধাতিদুর্গা
68.23
রথৈর্বরেষূন্মথিতৈশ্চ যোধৈঃ; সংস্যূতসূতাশ্ববরায়ুধধ্বজৈঃ
বিশীর্ণশস্ত্রৈর্বিনিকৃত্তবন্ধুরৈ;র্নিকৃত্তচক্রাক্ষয়ুগত্রিবেণুভিঃ
68.24
বিমুক্তয়ন্ত্রৈর্নিহতৈরয়স্ময়ৈ;র্হতানুষঙ্গৈর্বিনিষঙ্গবন্ধুরৈঃ
প্রভগ্ননীডৈর্মণিহেমমণ্ডিতৈঃ; স্তৃতা মহী দ্যৌরিব শারদৈর্ঘনৈঃ
68.25
বিকৃষ্যমণৈর্জবনৈরলংকৃতৈ;র্হতেশ্বরৈরাজিরথৈঃ সুকল্পিতৈঃ
মনুষ্যমাতঙ্গরথাশ্বরাশিভি;র্দ্রুতং ব্রজন্তো বহুধা বিচূর্ণিতাঃ
68.26
সহেমপট্টাঃ পরিঘাঃ পরশ্বধাঃ; কডঙ্গরায়োমুসলানি পট্টিশাঃ
পেতুশ্চ খড্গা বিমলা বিকোশা; গদাশ্চ জাম্বূনদপট্টবদ্ধাঃ
68.27
চাপানি রুক্মাঙ্গদভূষণানি; শরাশ্চ কার্তস্বরচিত্রপুঙ্খাঃ
ঋষ্ট্যশ্চ পীতা বিমলা বিকোশাঃ; প্রাসাঃ সখড্গাঃ কনকাবভাসাঃ
68.28
ছত্রাণি বালব্যজনানি শঙ্খাঃ; স্রজশ্চ পুষ্পোত্তমহেমচিত্রাঃ
কুথাঃ পতাকাম্বরবেষ্টিতাশ্চ; কিরীটমালা মুকুটাশ্চ শুভ্রাঃ
68.29
প্রকীর্ণকা বিপ্রকীর্ণাঃ কুথাশ্চ; প্রধানমুক্তাতরলাশ্চ হারাঃ
আপীডকেয়ূরবরাঙ্গদানি; গ্রৈবেয়নিষ্কাঃ সসুবর্ণসূত্রাঃ
68.30
মণ্যুত্তমা বজ্রসুবর্ণমুক্তা; রত্নানি চোচ্চাবচমঙ্গলানি
গাত্রাণি চাত্যন্তসুখোচিতানি; শিরাংসি চেন্দুপ্রতিমাননানি
68.31
দেহাংশ্চ ভোগাংশ্চ পরিচ্ছদাংশ্চ; ত্যক্ত্বা মনোজ্ঞানি সুখানি চাপি
স্বধর্মনিষ্ঠাং মহতীমবাপ্য; ব্যাপ্তাংশ্চ লোকান্যশসা সমীয়ুঃ
68.32
ইত্যেবমুক্ত্বা বিররাম শল্যো; দুর্যোধনঃ শোকপরীতচেতাঃ
হা কর্ণ হা কর্ণ ইতি ব্রুবাণ; আর্তো বিসংজ্ঞো ভৃশমশ্রুনেত্রঃ
68.33
তং দ্রোণপুত্রপ্রমুখা নরেন্দ্রাঃ; সর্বে সমাশ্বাস্য সহ প্রয়ান্তি
নিরীক্ষমাণা মুহুরর্জুনস্য; ধ্বজং মহান্তং যশসা জ্বলন্তম্
68.34
নরাশ্বমাতঙ্গশরীরজেন; রক্তেন সিক্তা রুধিরেণ ভূমিঃ
রক্তাম্বরস্রক্তপনীয়য়োগা;ন্নারী প্রকাশা ইব সর্বগম্যা
68.35
প্রচ্ছন্নরূপা রুধিরেণ রাজ;ন্রৌদ্রে মুহূর্তেঽতিবিরাজমানাঃ
নৈবাবতস্থুঃ কুরবঃ সমীক্ষ্য; প্রব্রাজিতা দেবলোকাশ্চ সর্বে
68.36
বধেন কর্ণস্য সুদুঃখিতাস্তে; হা কর্ণ হা কর্ণ ইতি ব্রুবাণাঃ
দ্রুতং প্রয়াতাঃ শিবিরাণি রাজ;ন্দিবাকরং রক্তমবেক্ষমাণাঃ
68.37
গাণ্ডীবমুক্তৈস্তু সুবর্ণপুঙ্খৈঃ; শিতৈঃ শরৈঃ শোণিতদিগ্ধবাজৈঃ
শরৈশ্চিতাঙ্গো ভুবি ভাতি কর্ণো; হতোঽপি সন্সূর্য ইবাংশুমালী
68.38
কর্ণস্য দেহং রুধিরাবসিক্তং; ভক্তানুকম্পী ভগবান্বিবস্বান্
স্পৃষ্ট্বা করৈর্লোহিতরক্তরূপঃ; সিষ্ণাসুরভ্যেতি পরং সমুদ্রম্
68.39
ইতীব সংচিন্ত্য সুরর্ষিসংঘাঃ; সংপ্রস্থিতা যান্তি যথানিকেতম্
সংচিন্তয়িত্বা চ জনা বিসস্রু;র্যথাসুখং খং চ মহীতলং চ
68.40
তদদ্ভুতং প্রাণভৃতাং ভয়ংকরং; নিশম্য যুদ্ধং কুরুবীরমুখ্যয়োঃ
ধনংজয়স্যাধিরথেশ্চ বিস্মিতাঃ; প্রশংসমানাঃ প্রয়য়ুস্তদা জনাঃ
68.41
শরৈঃ সংকৃত্তবর্মাণং বীরং বিশসনে হতম্
গতাসুমপি রাধেয়ং নৈব লক্ষ্মীর্ব্যমুঞ্চত
68.42
নানাভরণবান্রাজন্মৃষ্টজাম্বূনদাঙ্গদঃ
হতো বৈকর্তনঃ শেতে পাদপোঽঙ্কুরবানিব
68.43
কনকোত্তমসংকাশঃ প্রদীপ্ত ইব পাবকঃ
সপুত্রঃ পুরুষব্যাঘ্রঃ সংশান্তঃ পার্থতেজসা
প্রতাপ্য পাণ্ডবান্রাজন্পাঞ্চালাংশ্চাস্ত্রতেজসা
68.44
দদানীত্যেব যোঽবোচন্ন নাস্তীত্যর্থিতোঽর্থিভিঃ
সদ্ভিঃ সদা সত্পুরুষঃ স হতো দ্বৈরথে বৃষঃ
68.45
যস্য ব্রাহ্মণসাত্সর্বমাত্মার্থং ন মহাত্মনঃ
নাদেয়ং ব্রাহ্মণেষ্বাসীদ্যস্য স্বমপি জীবিতম্
68.46
সদা নৄণাং প্রিয়ো দাতা প্রিয়দানো দিবং গতঃ
আদায় তব পুত্রাণাং জয়াশাং শর্ম বর্ম চ
68.47
হতে স্ম কর্ণে সরিতো ন স্রবন্তি; জগাম চাস্তং কলুষো দিবাকরঃ
গ্রহশ্চ তির্যগ্জ্বলিতার্কবর্ণো; যমস্য পুত্রোঽভ্যুদিয়ায় রাজন্
68.48
নভঃ পফালাথ ননাদ চোর্বী; ববুশ্চ বাতাঃ পরুষাতিবেলম্
দিশঃ সধূমাশ্চ ভৃশং প্রজজ্বলু;র্মহার্ণবাশ্চুক্ষুভিরে চ সস্বনাঃ
68.49
সকাননাঃ সাদ্রিচয়াশ্চকম্পুঃ; প্রবিব্যথুর্ভূতগণাশ্চ মারিষ
বৃহস্পতী রোহিণীং সংপ্রপীড্য; বভূব চন্দ্রার্কসমানবর্ণঃ
68.50
হতে কর্ণে ন দিশো বিপ্রজজ্ঞু;স্তমোবৃতা দ্যৌর্বিচচাল ভূমিঃ
পপাত চোল্কা জ্বলনপ্রকাশা; নিশাচরাশ্চাপ্যভবন্প্রহৃষ্টাঃ
68.51
শশিপ্রকাশাননমর্জুনো যদা; ক্ষুরেণ কর্ণস্য শিরো ন্যপাতয়ৎ
অথান্তরিক্ষে দিবি চেহ চাসকৃ;দ্বভূব হাহেতি জনস্য নিস্বনঃ
68.52
স দেবগন্ধর্বমনুষ্যপূজিতং; নিহত্য কর্ণং রিপুমাহবেঽর্জুনঃ
ররাজ পার্থঃ পরমেণ তেজসা; বৃত্রং নিহত্যেব সহস্রলোচনঃ
68.53
ততো রথেনাম্বুদবৃন্দনাদিনা; শরন্নভোমধ্যগভাস্করত্বিষা
পতাকিনা ভীমনিনাদকেতুনা; হিমেন্দুশঙ্খস্ফটিকাবভাসিনা
সুবর্ণমুক্তামণিবজ্রবিদ্রুমৈ;রলংকৃতেনাপ্রতিমানরংহসা
68.54
নরোত্তমৌ পাণ্ডবকেশিমর্দনা;বুদাহিতাবগ্নিদিবাকরোপমৌ
রণাজিরে বীতভয়ৌ বিরেজতুঃ; সমানয়ানাবিব বিষ্ণুবাসবৌ
68.55
ততো ধনুর্জ্যাতলনেমিনিস্বনৈঃ; প্রসহ্য কৃত্বা চ রিপূন্হতপ্রভান্
সংসাধয়িত্বৈব কুরূঞ্শরৌঘৈঃ; কপিধ্বজঃ পক্ষিবরধ্বজশ্চ
প্রসহ্য শঙ্খৌ ধমতুঃ সুঘোষৌ; মনাংস্যরীণামবসাদয়ন্তৌ
68.56
সুবর্ণজালাবততৌ মহাস্বনৌ; হিমাবদাতৌ পরিগৃহ্য পাণিভিঃ
চুচুম্বতুঃ শঙ্খবরৌ নৃণাং বরৌ; বরাননাভ্যাং যুগপচ্চ দধ্মতুঃ
68.57
পাঞ্চজন্যস্য নির্ঘোষো দেবদত্তস্য চোভয়োঃ
পৃথিবীমন্তরিক্ষং চ দ্যামপশ্চাপ্যপূরয়ৎ
68.58
তৌ শঙ্খশব্দেন নিনাদয়ন্তৌ; বনানি শৈলান্সরিতো দিশশ্চ
বিত্রাসয়ন্তৌ তব পুত্রসেনাং; যুধিষ্ঠিরং নন্দয়তঃ স্ম বীরৌ
68.59
ততঃ প্রয়াতাঃ কুরবো জবেন; শ্রুত্বৈব শঙ্খস্বনমীর্যমাণম্
বিহায় মদ্রাধিপতিং পতিং চ; দুর্যোধনং ভারত ভারতানাম্
68.60
মহাহবে তং বহু শোভমানং; ধনংজয়ং ভূতগণাঃ সমেতাঃ
তদান্বমোদন্ত জনার্দনং চ; প্রভাকরাবভ্যুদিতৌ যথৈব
68.61
সমাচিতৌ কর্ণশরৈঃ পরংতপা;বুভৌ ব্যভাতাং সমরেঽচ্যুতার্জুনৌ
তমো নিহত্যাভ্যুদিতৌ যথামলৌ; শশাঙ্কসূর্যাবিব রশ্মিমালিনৌ
68.62
বিহায় তান্বাণগণানথাগতৌ; সুহৃদ্বৃতাবপ্রতিমানবিক্রমৌ
সুখং প্রবিষ্টৌ শিবিরং স্বমীশ্বরৌ; সদস্যহূতাবিব বাসবাচ্যুতৌ
68.63
সদেবগন্ধর্বমনুষ্যচারণৈ;র্মহর্ষিভির্যক্ষমহোরগৈরপি
জয়াভিবৃদ্ধ্যা পরয়াভিপূজিতৌ; নিহত্য কর্ণং পরমাহবে তদা