UtshovChapter 68
68.1
संजय उवाच
शल्यस्तु कर्णार्जुनयोर्विमर्दे; बलानि दृष्ट्वा मृदितानि बाणैः
दुर्योधनं यान्तमवेक्षमाणो; संदर्शयद्भारत युद्धभूमिम्
Sanjaya uvacha
Shalyastu karnarjunayorvimarde; balani drishtva mriditani banaih
Duryodhanam yantamavekshamano; sandarshayadbharata yuddhabhumim
68.2
निपातितस्यन्दनवाजिनागं; दृष्ट्वा बलं तद्धतसूतपुत्रम्
दुर्योधनोऽश्रुप्रतिपूर्णनेत्रो; मुहुर्मुहुर्न्यश्वसदार्तरूपः
Nipatitasyandanavajinagam; drishtva balam taddhatasutaputram
Duryodhanoshrupratipurnanetro; muhurmuhurnyashvasadartarupah
68.3
कर्णं तु शूरं पतितं पृथिव्यां; शराचितं शोणितदिग्धगात्रम्
यदृच्छया सूर्यमिवावनिस्थं; दिदृक्षवः संपरिवार्य तस्थुः
Karnam tu shuram patitam prithivyam; sharachitam shonitadigdhagatram
Yadrichchhaya suryamivavanistham; didrikshavah samparivarya tasthuh
68.4
प्रहृष्टवित्रस्तविषण्णविस्मृता;स्तथापरे शोकगता इवाभवन्
परे त्वदीयाश्च परस्परेण; यथा यथैषां प्रकृतिस्तथाभवन्
Prahrishtavitrastavishannavismrita;stathapare shokagata ivabhavan
Pare tvadiyashcha parasparena; yatha yathaisham prakritistathabhavan
68.5
प्रविद्धवर्माभरणाम्बरायुधं; धनंजयेनाभिहतं हतौजसम्
निशम्य कर्णं कुरवः प्रदुद्रुवु;र्हतर्षभा गाव इवाकुलाकुलाः
Praviddhavarmabharanambarayudham; dhananjayenabhihatam hataujasam
Nishamya karnam kuravah pradudruvu;rhatarshabha gava ivakulakulah
68.6
कृत्वा विमर्दं भृशमर्जुनेन; कर्णं हतं केसरिणेव नागम्
दृष्ट्वा शयानं भुवि मद्रराजो; भीतोऽपसर्पत्सरथः सुशीघ्रम्
Kritva vimardam bhrishamarjunena; karnam hatam kesarineva nagam
Drishtva shayanam bhuvi madrarajo; bhitopasarpatsarathah sushighram
68.7
मद्राधिपश्चापि विमूढचेता;स्तूर्णं रथेनापहृतध्वजेन
दुर्योधनस्यान्तिकमेत्य शीघ्रं; संभाष्य दुःखार्तमुवाच वाक्यम्
Madradhipashchapi vimudhacheta;sturnam rathenapahritadhvajena
Duryodhanasyantikametya shighram; sambhashya duhkhartamuvacha vakyam
68.8
विशीर्णनागाश्वरथप्रवीरं; बलं त्वदियं यमराष्ट्रकल्पम्
अन्योन्यमासाद्य हतं महद्भि;र्नराश्वनागैर्गिरिकूटकल्पैः
Vishirnanagashvarathapraviram; balam tvadiyam yamarashtrakalpam
Anyonyamasadya hatam mahadbhi;rnarashvanagairgirikutakalpaih
68.9
नैतादृशं भारत युद्धमासी;द्यथाद्य कर्णार्जुनयोर्बभूव
ग्रस्तौ हि कर्णेन समेत्य कृष्णा;वन्ये च सर्वे तव शत्रवो ये
Naitadrisham bharata yuddhamasi;dyathadya karnarjunayorbabhuva
Grastau hi karnena sametya krishna;vanye cha sarve tava shatravo ye
68.10
दैवं तु यत्तत्स्ववशं प्रवृत्तं; तत्पाण्डवान्पाति हिनस्ति चास्मान्
तवार्थसिद्ध्यर्थकरा हि सर्वे; प्रसह्य वीरा निहता द्विषद्भिः
Daivam tu yattatsvavasham pravrittam; tatpandavanpati hinasti chasman
Tavarthasiddhyarthakara hi sarve; prasahya vira nihata dvishadbhih
68.11
कुबेरवैवस्वतवासवानां; तुल्यप्रभावाम्बुपतेश्च वीराः
वीर्येण शौर्येण बलेन चैव; तैस्तैश्च युक्ता विपुलैर्गुणौघैः
Kuberavaivasvatavasavanam; tulyaprabhavambupateshcha virah
Viryena shauryena balena chaiva; taistaishcha yukta vipulairgunaughaih
68.12
अवध्यकल्पा निहता नरेन्द्रा;स्तवार्थकामा युधि पाण्डवेयैः
तन्मा शुचो भारत दिष्टमेत;त्पर्यायसिद्धिर्न सदास्ति सिद्धिः
Avadhyakalpa nihata narendra;stavarthakama yudhi pandaveyaih
Tanma shucho bharata dishtameta;tparyayasiddhirna sadasti siddhih
68.13
एतद्वचो मद्रपतेर्निशम्य; स्वं चापनीतं मनसा निरीक्ष्य
दुर्योधनो दीनमना विसंज्ञः; पुनः पुनर्न्यश्वसदार्तरूपः
Etadvacho madrapaternishamya; svam chapanitam manasa nirikshya
Duryodhano dinamana visangyah; punah punarnyashvasadartarupah
68.14
तं ध्यानमूकं कृपणं भृशार्त;मार्तायनिर्दीनमुवाच वाक्यम्
पश्येदमुग्रं नरवाजिनागै;रायोधनं वीरहतैः प्रपन्नम्
Tam dhyanamukam kripanam bhrisharta;martayanirdinamuvacha vakyam
Pashyedamugram naravajinagai;rayodhanam virahataih prapannam
68.15
महीधराभैः पतितैर्महागजैः; सकृत्प्रविद्धैः शरविद्धमर्मभिः
तैर्विह्वलद्भिश्च गतासुभिश्च; प्रध्वस्तयन्त्रायुधवर्मयोधैः
Mahidharabhaih patitairmahagajaih; sakritpraviddhaih sharaviddhamarmabhih
Tairvihvaladbhishcha gatasubhishcha; pradhvastayantrayudhavarmayodhaih
68.16
वज्रापविद्धैरिव चाचलेन्द्रै;र्विभिन्नपाषाणमृगद्रुमौषधैः
प्रविद्धघण्टाङ्कुशतोमरध्वजैः; सहेममालै रुधिरौघसंप्लुतैः
Vajrapaviddhairiva chachalendrai;rvibhinnapashanamrigadrumaushadhaih
Praviddhaghantankushatomaradhvajaih; sahemamalai rudhiraughasamplutaih
68.17
शरावभिन्नैः पतितैश्च वाजिभिः; श्वसद्भिरन्यैः क्षतजं वमद्भिः
दीनैः स्तनद्भिः परिवृत्तनेत्रै;र्महीं दशद्भिः कृपणं नदद्भिः
Sharavabhinnaih patitaishcha vajibhih; shvasadbhiranyaih kshatajam vamadbhih
Dinaih stanadbhih parivrittanetrai;rmahim dashadbhih kripanam nadadbhih
68.18
तथापविद्धैर्गजवाजियोधै;र्मन्दासुभिश्चैव गतासुभिश्च
नराश्वनागैश्च रथैश्च मर्दितै;र्मही महावैतरणीव दुर्दृशा
Tathapaviddhairgajavajiyodhai;rmandasubhishchaiva gatasubhishcha
Narashvanagaishcha rathaishcha marditai;rmahi mahavaitaraniva durdrisha
68.19
गजैर्निकृत्तापरहस्तगात्रै;रुद्वेपमानैः पतितैः पृथिव्याम्
यशस्विभिर्नागरथाश्वयोधिभिः; पदातिभिश्चाभिमुखैर्हतैः परैः
विशीर्णवर्माभरणाम्बरायुधै;र्वृता निशान्तैरिव पावकैर्मही
Gajairnikrittaparahastagatrai;rudvepamanaih patitaih prithivyam
Yashasvibhirnagarathashvayodhibhih; padatibhishchabhimukhairhataih paraih
Vishirnavarmabharanambarayudhai;rvrita nishantairiva pavakairmahi
68.20
शरप्रहाराभिहतैर्महाबलै;रवेक्ष्यमाणैः पतितैः सहस्रशः
प्रनष्टसंज्ञैः पुनरुच्छ्वसद्भि;र्मही बभूवानुगतैरिवाग्निभिः
दिवश्च्युतैर्भूरतिदीप्तिमद्भि;र्नक्तं ग्रहैर्द्यौरमलेव दीप्तैः
Sharapraharabhihatairmahabalai;ravekshyamanaih patitaih sahasrashah
Pranashtasangyaih punaruchchhvasadbhi;rmahi babhuvanugatairivagnibhih
Divashchyutairbhuratidiptimadbhi;rnaktam grahairdyauramaleva diptaih
68.21
शरास्तु कर्णार्जुनबाहुमुक्ता; विदार्य नागाश्वमनुष्यदेहान्
प्राणान्निरस्याशु महीमतीयु;र्महोरगा वासमिवाभितोऽस्त्रैः
Sharastu karnarjunabahumukta; vidarya nagashvamanushyadehan
Pranannirasyashu mahimatiyu;rmahoraga vasamivabhitostraih
68.22
हतैर्मनुष्याश्वगजैश्च संख्ये; शरावभिन्नैश्च रथैर्बभूव
धनंजयस्याधिरथेश्च मार्गे; गजैरगम्या वसुधातिदुर्गा
Hatairmanushyashvagajaishcha sankhye; sharavabhinnaishcha rathairbabhuva
Dhananjayasyadhiratheshcha marge; gajairagamya vasudhatidurga
68.23
रथैर्वरेषून्मथितैश्च योधैः; संस्यूतसूताश्ववरायुधध्वजैः
विशीर्णशस्त्रैर्विनिकृत्तबन्धुरै;र्निकृत्तचक्राक्षयुगत्रिवेणुभिः
Rathairvareshunmathitaishcha yodhaih; sansyutasutashvavarayudhadhvajaih
Vishirnashastrairvinikrittabandhurai;rnikrittachakrakshayugatrivenubhih
68.24
विमुक्तयन्त्रैर्निहतैरयस्मयै;र्हतानुषङ्गैर्विनिषङ्गबन्धुरैः
प्रभग्ननीडैर्मणिहेममण्डितैः; स्तृता मही द्यौरिव शारदैर्घनैः
Vimuktayantrairnihatairayasmayai;rhatanushangairvinishangabandhuraih
Prabhagnanidairmanihemamanditaih; strita mahi dyauriva sharadairghanaih
68.25
विकृष्यमणैर्जवनैरलंकृतै;र्हतेश्वरैराजिरथैः सुकल्पितैः
मनुष्यमातङ्गरथाश्वराशिभि;र्द्रुतं व्रजन्तो बहुधा विचूर्णिताः
Vikrishyamanairjavanairalankritai;rhateshvarairajirathaih sukalpitaih
Manushyamatangarathashvarashibhi;rdrutam vrajanto bahudha vichurnitah
68.26
सहेमपट्टाः परिघाः परश्वधाः; कडङ्गरायोमुसलानि पट्टिशाः
पेतुश्च खड्गा विमला विकोशा; गदाश्च जाम्बूनदपट्टबद्धाः
Sahemapattah parighah parashvadhah; kadangarayomusalani pattishah
Petushcha khadga vimala vikosha; gadashcha jambunadapattabaddhah
68.27
चापानि रुक्माङ्गदभूषणानि; शराश्च कार्तस्वरचित्रपुङ्खाः
ऋष्ट्यश्च पीता विमला विकोशाः; प्रासाः सखड्गाः कनकावभासाः
Chapani rukmangadabhushanani; sharashcha kartasvarachitrapunkhah
Rishtyashcha pita vimala vikoshah; prasah sakhadgah kanakavabhasah
68.28
छत्राणि वालव्यजनानि शङ्खाः; स्रजश्च पुष्पोत्तमहेमचित्राः
कुथाः पताकाम्बरवेष्टिताश्च; किरीटमाला मुकुटाश्च शुभ्राः
Chhatrani valavyajanani shankhah; srajashcha pushpottamahemachitrah
Kuthah patakambaraveshtitashcha; kiritamala mukutashcha shubhrah
68.29
प्रकीर्णका विप्रकीर्णाः कुथाश्च; प्रधानमुक्तातरलाश्च हाराः
आपीडकेयूरवराङ्गदानि; ग्रैवेयनिष्काः ससुवर्णसूत्राः
Prakirnaka viprakirnah kuthashcha; pradhanamuktataralashcha harah
Apidakeyuravarangadani; graiveyanishkah sasuvarnasutrah
68.30
मण्युत्तमा वज्रसुवर्णमुक्ता; रत्नानि चोच्चावचमङ्गलानि
गात्राणि चात्यन्तसुखोचितानि; शिरांसि चेन्दुप्रतिमाननानि
Manyuttama vajrasuvarnamukta; ratnani chochchavachamangalani
Gatrani chatyantasukhochitani; shiransi chendupratimananani
68.31
देहांश्च भोगांश्च परिच्छदांश्च; त्यक्त्वा मनोज्ञानि सुखानि चापि
स्वधर्मनिष्ठां महतीमवाप्य; व्याप्तांश्च लोकान्यशसा समीयुः
Dehanshcha bhoganshcha parichchhadanshcha; tyaktva manogyani sukhani chapi
Svadharmanishtham mahatimavapya; vyaptanshcha lokanyashasa samiyuh
68.32
इत्येवमुक्त्वा विरराम शल्यो; दुर्योधनः शोकपरीतचेताः
हा कर्ण हा कर्ण इति ब्रुवाण; आर्तो विसंज्ञो भृशमश्रुनेत्रः
Ityevamuktva virarama shalyo; duryodhanah shokaparitachetah
Ha karna ha karna iti bruvana; arto visangyo bhrishamashrunetrah
68.33
तं द्रोणपुत्रप्रमुखा नरेन्द्राः; सर्वे समाश्वास्य सह प्रयान्ति
निरीक्षमाणा मुहुरर्जुनस्य; ध्वजं महान्तं यशसा ज्वलन्तम्
Tam dronaputrapramukha narendrah; sarve samashvasya saha prayanti
Nirikshamana muhurarjunasya; dhvajam mahantam yashasa jvalantam
68.34
नराश्वमातङ्गशरीरजेन; रक्तेन सिक्ता रुधिरेण भूमिः
रक्ताम्बरस्रक्तपनीययोगा;न्नारी प्रकाशा इव सर्वगम्या
Narashvamatangasharirajena; raktena sikta rudhirena bhumih
Raktambarasraktapaniyayoga;nnari prakasha iva sarvagamya
68.35
प्रच्छन्नरूपा रुधिरेण राज;न्रौद्रे मुहूर्तेऽतिविराजमानाः
नैवावतस्थुः कुरवः समीक्ष्य; प्रव्राजिता देवलोकाश्च सर्वे
Prachchhannarupa rudhirena raja;nraudre muhurtetivirajamanah
Naivavatasthuh kuravah samikshya; pravrajita devalokashcha sarve
68.36
वधेन कर्णस्य सुदुःखितास्ते; हा कर्ण हा कर्ण इति ब्रुवाणाः
द्रुतं प्रयाताः शिबिराणि राज;न्दिवाकरं रक्तमवेक्षमाणाः
Vadhena karnasya suduhkhitaste; ha karna ha karna iti bruvanah
Drutam prayatah shibirani raja;ndivakaram raktamavekshamanah
68.37
गाण्डीवमुक्तैस्तु सुवर्णपुङ्खैः; शितैः शरैः शोणितदिग्धवाजैः
शरैश्चिताङ्गो भुवि भाति कर्णो; हतोऽपि सन्सूर्य इवांशुमाली
Gandivamuktaistu suvarnapunkhaih; shitaih sharaih shonitadigdhavajaih
Sharaishchitango bhuvi bhati karno; hatopi sansurya ivanshumali
68.38
कर्णस्य देहं रुधिरावसिक्तं; भक्तानुकम्पी भगवान्विवस्वान्
स्पृष्ट्वा करैर्लोहितरक्तरूपः; सिष्णासुरभ्येति परं समुद्रम्
Karnasya deham rudhiravasiktam; bhaktanukampi bhagavanvivasvan
Sprishtva karairlohitaraktarupah; sishnasurabhyeti param samudram
68.39
इतीव संचिन्त्य सुरर्षिसंघाः; संप्रस्थिता यान्ति यथानिकेतम्
संचिन्तयित्वा च जना विसस्रु;र्यथासुखं खं च महीतलं च
Itiva sanchintya surarshisanghah; samprasthita yanti yathaniketam
Sanchintayitva cha jana visasru;ryathasukham kham cha mahitalam cha
68.40
तदद्भुतं प्राणभृतां भयंकरं; निशम्य युद्धं कुरुवीरमुख्ययोः
धनंजयस्याधिरथेश्च विस्मिताः; प्रशंसमानाः प्रययुस्तदा जनाः
Tadadbhutam pranabhritam bhayankaram; nishamya yuddham kuruviramukhyayoh
Dhananjayasyadhiratheshcha vismitah; prashansamanah prayayustada janah
68.41
शरैः संकृत्तवर्माणं वीरं विशसने हतम्
गतासुमपि राधेयं नैव लक्ष्मीर्व्यमुञ्चत
Sharaih sankrittavarmanam viram vishasane hatam
Gatasumapi radheyam naiva lakshmirvyamunchata
68.42
नानाभरणवान्राजन्मृष्टजाम्बूनदाङ्गदः
हतो वैकर्तनः शेते पादपोऽङ्कुरवानिव
Nanabharanavanrajanmrishtajambunadangadah
Hato vaikartanah shete padaponkuravaniva
68.43
कनकोत्तमसंकाशः प्रदीप्त इव पावकः
सपुत्रः पुरुषव्याघ्रः संशान्तः पार्थतेजसा
प्रताप्य पाण्डवान्राजन्पाञ्चालांश्चास्त्रतेजसा
Kanakottamasankashah pradipta iva pavakah
Saputrah purushavyaghrah sanshantah parthatejasa
Pratapya pandavanrajanpanchalanshchastratejasa
68.44
ददानीत्येव योऽवोचन्न नास्तीत्यर्थितोऽर्थिभिः
सद्भिः सदा सत्पुरुषः स हतो द्वैरथे वृषः
Dadanityeva yovochanna nastityarthitorthibhih
Sadbhih sada satpurushah sa hato dvairathe vrishah
68.45
यस्य ब्राह्मणसात्सर्वमात्मार्थं न महात्मनः
नादेयं ब्राह्मणेष्वासीद्यस्य स्वमपि जीवितम्
Yasya brahmanasatsarvamatmartham na mahatmanah
Nadeyam brahmaneshvasidyasya svamapi jivitam
68.46
सदा नॄणां प्रियो दाता प्रियदानो दिवं गतः
आदाय तव पुत्राणां जयाशां शर्म वर्म च
Sada nrinam priyo data priyadano divam gatah
Adaya tava putranam jayasham sharma varma cha
68.47
हते स्म कर्णे सरितो न स्रवन्ति; जगाम चास्तं कलुषो दिवाकरः
ग्रहश्च तिर्यग्ज्वलितार्कवर्णो; यमस्य पुत्रोऽभ्युदियाय राजन्
Hate sma karne sarito na sravanti; jagama chastam kalusho divakarah
Grahashcha tiryagjvalitarkavarno; yamasya putrobhyudiyaya rajan
68.48
नभः पफालाथ ननाद चोर्वी; ववुश्च वाताः परुषातिवेलम्
दिशः सधूमाश्च भृशं प्रजज्वलु;र्महार्णवाश्चुक्षुभिरे च सस्वनाः
Nabhah paphalatha nanada chorvi; vavushcha vatah parushativelam
Dishah sadhumashcha bhrisham prajajvalu;rmaharnavashchukshubhire cha sasvanah
68.49
सकाननाः साद्रिचयाश्चकम्पुः; प्रविव्यथुर्भूतगणाश्च मारिष
बृहस्पती रोहिणीं संप्रपीड्य; बभूव चन्द्रार्कसमानवर्णः
Sakananah sadrichayashchakampuh; pravivyathurbhutaganashcha marisha
Brihaspati rohinim samprapidya; babhuva chandrarkasamanavarnah
68.50
हते कर्णे न दिशो विप्रजज्ञु;स्तमोवृता द्यौर्विचचाल भूमिः
पपात चोल्का ज्वलनप्रकाशा; निशाचराश्चाप्यभवन्प्रहृष्टाः
Hate karne na disho viprajagyu;stamovrita dyaurvichachala bhumih
Papata cholka jvalanaprakasha; nishacharashchapyabhavanprahrishtah
68.51
शशिप्रकाशाननमर्जुनो यदा; क्षुरेण कर्णस्य शिरो न्यपातयत्
अथान्तरिक्षे दिवि चेह चासकृ;द्बभूव हाहेति जनस्य निस्वनः
Shashiprakashananamarjuno yada; kshurena karnasya shiro nyapatayat
Athantarikshe divi cheha chasakri;dbabhuva haheti janasya nisvanah
68.52
स देवगन्धर्वमनुष्यपूजितं; निहत्य कर्णं रिपुमाहवेऽर्जुनः
रराज पार्थः परमेण तेजसा; वृत्रं निहत्येव सहस्रलोचनः
Sa devagandharvamanushyapujitam; nihatya karnam ripumahaverjunah
Raraja parthah paramena tejasa; vritram nihatyeva sahasralochanah
68.53
ततो रथेनाम्बुदवृन्दनादिना; शरन्नभोमध्यगभास्करत्विषा
पताकिना भीमनिनादकेतुना; हिमेन्दुशङ्खस्फटिकावभासिना
सुवर्णमुक्तामणिवज्रविद्रुमै;रलंकृतेनाप्रतिमानरंहसा
Tato rathenambudavrindanadina; sharannabhomadhyagabhaskaratvisha
Patakina bhimaninadaketuna; himendushankhasphatikavabhasina
Suvarnamuktamanivajravidrumai;ralankritenapratimanaranhasa
68.54
नरोत्तमौ पाण्डवकेशिमर्दना;वुदाहितावग्निदिवाकरोपमौ
रणाजिरे वीतभयौ विरेजतुः; समानयानाविव विष्णुवासवौ
Narottamau pandavakeshimardana;vudahitavagnidivakaropamau
Ranajire vitabhayau virejatuh; samanayanaviva vishnuvasavau
68.55
ततो धनुर्ज्यातलनेमिनिस्वनैः; प्रसह्य कृत्वा च रिपून्हतप्रभान्
संसाधयित्वैव कुरूञ्शरौघैः; कपिध्वजः पक्षिवरध्वजश्च
प्रसह्य शङ्खौ धमतुः सुघोषौ; मनांस्यरीणामवसादयन्तौ
Tato dhanurjyatalaneminisvanaih; prasahya kritva cha ripunhataprabhan
Sansadhayitvaiva kurunsharaughaih; kapidhvajah pakshivaradhvajashcha
Prasahya shankhau dhamatuh sughoshau; manansyarinamavasadayantau
68.56
सुवर्णजालावततौ महास्वनौ; हिमावदातौ परिगृह्य पाणिभिः
चुचुम्बतुः शङ्खवरौ नृणां वरौ; वराननाभ्यां युगपच्च दध्मतुः
Suvarnajalavatatau mahasvanau; himavadatau parigrihya panibhih
Chuchumbatuh shankhavarau nrinam varau; varananabhyam yugapachcha dadhmatuh
68.57
पाञ्चजन्यस्य निर्घोषो देवदत्तस्य चोभयोः
पृथिवीमन्तरिक्षं च द्यामपश्चाप्यपूरयत्
Panchajanyasya nirghosho devadattasya chobhayoh
Prithivimantariksham cha dyamapashchapyapurayat
68.58
तौ शङ्खशब्देन निनादयन्तौ; वनानि शैलान्सरितो दिशश्च
वित्रासयन्तौ तव पुत्रसेनां; युधिष्ठिरं नन्दयतः स्म वीरौ
Tau shankhashabdena ninadayantau; vanani shailansarito dishashcha
Vitrasayantau tava putrasenam; yudhishthiram nandayatah sma virau
68.59
ततः प्रयाताः कुरवो जवेन; श्रुत्वैव शङ्खस्वनमीर्यमाणम्
विहाय मद्राधिपतिं पतिं च; दुर्योधनं भारत भारतानाम्
Tatah prayatah kuravo javena; shrutvaiva shankhasvanamiryamanam
Vihaya madradhipatim patim cha; duryodhanam bharata bharatanam
68.60
महाहवे तं बहु शोभमानं; धनंजयं भूतगणाः समेताः
तदान्वमोदन्त जनार्दनं च; प्रभाकरावभ्युदितौ यथैव
Mahahave tam bahu shobhamanam; dhananjayam bhutaganah sametah
Tadanvamodanta janardanam cha; prabhakaravabhyuditau yathaiva
68.61
समाचितौ कर्णशरैः परंतपा;वुभौ व्यभातां समरेऽच्युतार्जुनौ
तमो निहत्याभ्युदितौ यथामलौ; शशाङ्कसूर्याविव रश्मिमालिनौ
Samachitau karnasharaih parantapa;vubhau vyabhatam samarechyutarjunau
Tamo nihatyabhyuditau yathamalau; shashankasuryaviva rashmimalinau
68.62
विहाय तान्बाणगणानथागतौ; सुहृद्वृतावप्रतिमानविक्रमौ
सुखं प्रविष्टौ शिबिरं स्वमीश्वरौ; सदस्यहूताविव वासवाच्युतौ
Vihaya tanbanagananathagatau; suhridvritavapratimanavikramau
Sukham pravishtau shibiram svamishvarau; sadasyahutaviva vasavachyutau
68.63
सदेवगन्धर्वमनुष्यचारणै;र्महर्षिभिर्यक्षमहोरगैरपि
जयाभिवृद्ध्या परयाभिपूजितौ; निहत्य कर्णं परमाहवे तदा
Sadevagandharvamanushyacharanai;rmaharshibhiryakshamahoragairapi
Jayabhivriddhya parayabhipujitau; nihatya karnam paramahave tada