Utshovঅধ্যায় 67
67.1
সংজয় উবাচ
অথাব্রবীদ্বাসুদেবো রথস্থো; রাধেয় দিষ্ট্যা স্মরসীহ ধর্মম্
প্রায়েণ নীচা ব্যসনেষু মগ্না; নিন্দন্তি দৈবং কুকৃতং ন তত্তৎ
67.2
যদ্দ্রৌপদীমেকবস্ত্রাং সভায়া;মানায্য ত্বং চৈব সুয়োধনশ্চ
দুঃশাসনঃ শকুনিঃ সৌবলশ্চ; ন তে কর্ণ প্রত্যভাত্তত্র ধর্মঃ
67.3
যদা সভায়াং কৌন্তেয়মনক্ষজ্ঞং যুধিষ্ঠিরম্
অক্ষজ্ঞঃ শকুনির্জেতা তদা ধর্মঃ ক্ব তে গতঃ
67.4
যদা রজস্বলাং কৃষ্ণাং দুঃশাসনবশে স্থিতাম্
সভায়াং প্রাহসঃ কর্ণ ক্ব তে ধর্মস্তদা গতঃ
67.5
রাজ্যলুব্ধঃ পুনঃ কর্ণ সমাহ্বয়সি পাণ্ডবম্
গান্ধাররাজমাশ্রিত্য ক্ব তে ধর্মস্তদা গতঃ
67.6
এবমুক্তে তু রাধেয়ে বাসুদেবেন পাণ্ডবম্
মন্যুরভ্যাবিশত্তীব্রঃ স্মৃত্বা তত্তদ্ধনংজয়ম্
67.7
তস্য ক্রোধেন সর্বেভ্যঃ স্রোতোভ্যস্তেজসোঽর্চিষঃ
প্রাদুরাসন্মহারাজ তদদ্ভুতমিবাভবৎ
67.8
তং সমীক্ষ্য ততঃ কর্ণো ব্রহ্মাস্ত্রেণ ধনংজয়ম্
অভ্যবর্ষত্পুনর্যত্নমকরোদ্রথসর্জনে
তদস্ত্রমস্ত্রেণাবার্য প্রজহারাস্য পাণ্ডবঃ
67.9
ততোঽন্যদস্ত্রং কৌন্তেয়ো দয়িতং জাতবেদসঃ
মুমোচ কর্ণমুদ্দিশ্য তত্প্রজজ্বাল বৈ ভৃশম্
67.10
বারুণেন ততঃ কর্ণঃ শময়ামাস পাবকম্
জীমূতৈশ্চ দিশঃ সর্বাশ্চক্রে তিমিরদুর্দিনাঃ
67.11
পাণ্ডবেয়স্ত্বসংভ্রান্তো বায়ব্যাস্ত্রেণ বীর্যবান্
অপোবাহ তদাভ্রাণি রাধেয়স্য প্রপশ্যতঃ
67.12
তং হস্তিকক্ষ্যাপ্রবরং চ বাণৈঃ; সুবর্ণমুক্তামণিবজ্রমৃষ্টম্
কালপ্রয়ত্নোত্তমশিল্পিয়ত্নৈঃ; কৃতং সুরূপং বিতমস্কমুচ্চৈঃ
67.13
ঊর্জস্করং তব সৈন্যস্য নিত্য;মমিত্রবিত্রাসনমীড্যরূপম্
বিখ্যাতমাদিত্যসমস্য লোকে; ত্বিষা সমং পাবকভানুচন্দ্রৈঃ
67.14
ততঃ ক্ষুরেণাধিরথেঃ কিরীটী; সুবর্ণপুঙ্খেন শিতেন যত্তঃ
শ্রিয়া জ্বলন্তং ধ্বজমুন্মমাথ; মহারথস্যাধিরথের্মহাত্মা
67.15
যশশ্চ ধর্মশ্চ জয়শ্চ মারিষ; প্রিয়াণি সর্বাণি চ তেন কেতুনা
তদা কুরূণাং হৃদয়ানি চাপত;ন্বভূব হাহেতি চ নিস্বনো মহান্
67.16
অথ ত্বরন্কর্ণবধায় পাণ্ডবো; মহেন্দ্রবজ্রানলদণ্ডসংনিভম্
আদত্ত পার্থোঽঞ্জলিকং নিষঙ্গা;ত্সহস্ররশ্মেরিব রশ্মিমুত্তমম্
67.17
মর্মচ্ছিদং শোণিতমাংসদিগ্ধং; বৈশ্বানরার্কপ্রতিমং মহার্হম্
নরাশ্বনাগাসুহরং ত্র্যরত্নিং; ষড্বাজমঞ্জোগতিমুগ্রবেগম্
67.18
সহস্রনেত্রাশনিতুল্যতেজসং; সমানক্রব্যাদমিবাতিদুঃসহম্
পিনাকনারায়ণচক্রসংনিভং; ভয়ংকরং প্রাণভৃতাং বিনাশনম্
67.19
যুক্ত্বা মহাস্ত্রেণ পরেণ মন্ত্রবি;দ্বিকৃষ্য গাণ্ডীবমুবাচ সস্বনম্
অয়ং মহাস্ত্রোঽপ্রতিমো ধৃতঃ শরঃ; শরীরভিচ্চাসুহরশ্চ দুর্হৃদঃ
67.20
তপোঽস্তি তপ্তং গুরবশ্চ তোষিতা; ময়া যদিষ্টং সুহৃদাং তথা শ্রুতম্
অনেন সত্যেন নিহন্ত্বয়ং শরঃ; সুদংশিতঃ কর্ণমরিং মমাজিতঃ
67.21
ইত্যূচিবাংস্তং স মুমোচ বাণং; ধনংজয়ঃ কর্ণবধায় ঘোরম্
কৃত্যামথর্বাঙ্গিরসীমিবোগ্রাং; দীপ্তামসহ্যাং যুধি মৃত্যুনাপি
67.22
ব্রুবন্কিরীটী তমতিপ্রহৃষ্টো; অয়ং শরো মে বিজয়াবহোঽস্তু
জিঘাংসুরর্কেন্দুসমপ্রভাবঃ; কর্ণং সমাপ্তিং নয়তাং যমায়
67.23
তেনেষুবর্যেণ কিরীটমালী; প্রহৃষ্টরূপো বিজয়াবহেন
জিঘাংসুরর্কেন্দুসমপ্রভেণ; চক্রে বিষক্তং রিপুমাততায়ী
67.24
তদুদ্যতাদিত্যসমানবর্চসং; শরন্নভোমধ্যগভাস্করোপমম্
বরাঙ্গমুর্ব্যামপতচ্চমূপতে;র্দিবাকরোঽস্তাদিব রক্তমণ্ডলঃ
67.25
তদস্য দেহী সততং সুখোদিতং; স্বরূপমত্যর্থমুদারকর্মণঃ
পরেণ কৃচ্ছ্রেণ শরীরমত্যজ;দ্গৃহং মহর্দ্ধীব সসঙ্গমীশ্বরঃ
67.26
শরৈর্বিভুগ্নং ব্যসু তদ্বিবর্মণঃ; পপাত কর্ণস্য শরীরমুচ্ছ্রিতম্
স্রবদ্ব্রণং গৈরিকতোয়বিস্রবং; গিরের্যথা বজ্রহতং শিরস্তথা
67.27
দেহাত্তু কর্ণস্য নিপাতিতস্য; তেজো দীপ্তং খং বিগাহ্যাচিরেণ
তদদ্ভুতং সর্বমনুষ্যয়োধাঃ; পশ্যন্তি রাজন্নিহতে স্ম কর্ণে
67.28
তং সোমকাঃ প্রেক্ষ্য হতং শয়ানং; প্রীতা নাদং সহ সৈন্যৈরকুর্বন্
তূর্যাণি চাজঘ্নুরতীব হৃষ্টা; বাসাংসি চৈবাদুধুবুর্ভুজাংশ্চ
বলান্বিতাশ্চাপ্যপরে হ্যনৃত্য;ন্নন্যোন্যমাশ্লিষ্য নদন্ত ঊচুঃ
67.29
দৃষ্ট্বা তু কর্ণং ভুবি নিষ্টনন্তং; হতং রথাত্সায়কেনাবভিন্নম্
মহানিলেনাগ্নিমিবাপবিদ্ধং; যজ্ঞাবসানে শয়নে নিশান্তে
67.30
শরৈরাচিতসর্বাঙ্গঃ শোণিতৌঘপরিপ্লুতঃ
বিভাতি দেহঃ কর্ণস্য স্বরশ্মিভিরিবাংশুমান্
67.31
প্রতাপ্য সেনামামিত্রীং দীপ্তৈঃ শরগভস্তিভিঃ
বলিনার্জুনকালেন নীতোঽস্তং কর্ণভাস্করঃ
67.32
অস্তং গচ্ছন্যথাদিত্যঃ প্রভামাদায় গচ্ছতি
এবং জীবিতমাদায় কর্ণস্যেষুর্জগাম হ
67.33
অপরাহ্ণে পরাহ্ণস্য সূতপুত্রস্য মারিষ
ছিন্নমঞ্জলিকেনাজৌ সোত্সেধমপতচ্ছিরঃ
67.34
উপর্যুপরি সৈন্যানাং তস্য শত্রোস্তদঞ্জসা
শিরঃ কর্ণস্য সোত্সেধমিষুঃ সোঽপাহরদ্দ্রুতম্
67.35
সংজয় উবাচ
কর্ণং তু শূরং পতিতং পৃথিব্যাং; শরাচিতং শোণিতদিগ্ধগাত্রম্
দৃষ্ট্বা শয়ানং ভুবি মদ্ররাজ;শ্ছিন্নধ্বজেনাপয়য়ৌ রথেন
67.36
কর্ণে হতে কুরবঃ প্রাদ্রবন্ত; ভয়ার্দিতা গাঢবিদ্ধাশ্চ সংখ্যে
অবেক্ষমাণা মুহুরর্জুনস্য; ধ্বজং মহান্তং বপুষা জ্বলন্তম্
67.37
সহস্রনেত্রপ্রতিমানকর্মণঃ; সহস্রপত্রপ্রতিমাননং শুভম্
সহস্ররশ্মির্দিনসংক্ষয়ে যথা; তথাপতত্তস্য শিরো বসুংধরাম্