Utshovঅধ্যায় 66
66.1
সংজয় উবাচ
ততোঽপয়াতাঃ শরপাতমাত্র;মবস্থিতাঃ কুরবো ভিন্নসেনাঃ
বিদ্যুত্প্রকাশং দদৃশুঃ সমন্তা;দ্ধনংজয়াস্ত্রং সমুদীর্যমাণম্
66.2
তদর্জুনাস্ত্রং গ্রসতে স্ম বীরা;ন্বিয়ত্তথাকাশমনন্তঘোষম্
ক্রুদ্ধেন পার্থেন তদাশু সৃষ্টং; বধায় কর্ণস্য মহাবিমর্দে
66.3
রামাদুপাত্তেন মহামহিম্না; আথর্বণেনারিবিনাশনেন
তদর্জুনাস্ত্রং ব্যধমদ্দহন্তং; পার্থং চ বাণৈর্নিশিতৈর্নিজঘ্নে
66.4
ততো বিমর্দঃ সুমহান্বভূব; তস্যার্জুনস্যাধিরথেশ্চ রাজন্
অন্যোন্যমাসাদয়তোঃ পৃষত্কৈ;র্বিষাণঘাতৈর্দ্বিপয়োরিবোগ্রৈঃ
66.5
ততো রিপুঘ্নং সমধত্ত কর্ণঃ; সুসংশিতং সর্পমুখং জ্বলন্তম্
রৌদ্রং শরং সংয়তি সুপ্রধৌতং; পার্থার্থমত্যর্থচিরায় গুপ্তম্
66.6
সদার্চিতং চন্দনচূর্ণশায়িনং; সুবর্ণনালীশয়নং মহাবিষম্
প্রদীপ্তমৈরাবতবংশসংভবং; শিরো জিহীর্ষুর্যুধি ফল্গুনস্য
66.7
তমব্রবীন্মদ্ররাজো মহাত্মা; বৈকর্তনং প্রেক্ষ্য হি সংহিতেষুম্
ন কর্ণ গ্রীবামিষুরেষ প্রাপ্স্যতে; সংলক্ষ্য সংধত্স্ব শরং শিরোঘ্নম্
66.8
অথাব্রবীত্ক্রোধসংরক্তনেত্রঃ; কর্ণঃ শল্যং সংধিতেষুঃ প্রসহ্য
ন সংধত্তে দ্বিঃ শরং শল্য কর্ণো; ন মাদৃশাঃ শাঠ্যয়ুক্তা ভবন্তি
66.9
তথৈবমুক্ত্বা বিসসর্জ তং শরং; বলাহকং বর্ষঘনাভিপূজিতম্
হতোঽসি বৈ ফল্গুন ইত্যবোচ;ত্ততস্ত্বরন্নূর্জিতমুত্সসর্জ
66.10
সংধীয়মানং ভুজগং দৃষ্ট্বা কর্ণেন মাধবঃ
আক্রম্য স্যন্দনং পদ্ভ্যাং বলেন বলিনাং বরঃ
66.11
অবগাঢে রথে ভূমৌ জানুভ্যামগমন্হয়াঃ
ততঃ শরঃ সোঽভ্যহনত্কিরীটং তস্য ধীমতঃ
66.12
অথার্জুনস্যোত্তমগাত্রভূষণং; ধরাবিয়দ্দ্যোসলিলেষু বিশ্রুতম্
বলাস্ত্রসর্গোত্তময়ত্নমন্যুভিঃ; শরেণ মূর্ধ্নঃ স জহার সূতজঃ
66.13
দিবাকরেন্দুজ্বলনগ্রহত্বিষং; সুবর্ণমুক্তামণিজালভূষিতম্
পুরংদরার্থং তপসা প্রয়ত্নতঃ; স্বয়ং কৃতং যদ্ভুবনস্য সূনুনা
66.14
মহার্হরূপং দ্বিষতাং ভয়ংকরং; বিভাতি চাত্যর্থসুখং সুগন্ধি তৎ
নিজঘ্নুষে দেবরিপূন্সুরেশ্বরঃ; স্বয়ং দদৌ যত্সুমনাঃ কিরীটিনে
66.15
হরাম্বুপাখণ্ডলবিত্তগোপ্তৃভিঃ; পিনাকপাশাশনিসায়কোত্তমৈঃ
সুরোত্তমৈরপ্যবিষহ্যমর্দিতুং; প্রসহ্য নাগেন জহার যদ্বৃষঃ
66.16
তদুত্তমেষূন্মথিতং বিষাগ্নিনা; প্রদীপ্তমর্চিষ্মদভিক্ষিতি প্রিয়ম্
পপাত পার্থস্য কিরীটমুত্তমং; দিবাকরোঽস্তাদিব পর্বতাজ্জ্বলন্
66.17
ততঃ কিরীটং বহুরত্নমণ্ডিতং; জহার নাগোঽর্জুনমূর্ধতো বলাৎ
গিরেঃ সুজাতাঙ্কুরপুষ্পিতদ্রুমং; মহেন্দ্রবজ্রঃ শিখরং যথোত্তমম্
66.18
মহী বিয়দ্দ্যৌঃ সলিলানি বায়ুনা; যথা বিভিন্নানি বিভান্তি ভারত
তথৈব শব্দো ভুবনেষ্বভূত্তদা; জনা ব্যবস্যন্ব্যথিতাশ্চ চস্খলুঃ
66.19
ততঃ সমুদ্গ্রথ্য সিতেন বাসসা; স্বমূর্ধজানব্যথিতঃ স্থিতোঽর্জুনঃ
বিভাতি সংপূর্ণমরীচিভাস্বতা; শিরোগতেনোদয়পর্বতো যথা
66.20
বলাহকঃ কর্ণভুজেরিতস্ততো; হুতাশনার্কপ্রতিমদ্যুতির্মহান্
মহোরগঃ কৃতবৈরোঽর্জুনেন; কিরীটমাসাদ্য সমুত্পপাত
66.21
তমব্রবীদ্বিদ্ধি কৃতাগসং মে; কৃষ্ণাদ্য মাতুর্বধজাতবৈরম্
ততঃ কৃষ্ণঃ পার্থমুবাচ সংখ্যে; মহোরগং কৃতবৈরং জহি ত্বম্
66.22
স এবমুক্তো মধুসূদনেন; গাণ্ডীবধন্বা রিপুষূগ্রধন্বা
উবাচ কো ন্বেষ মমাদ্য নাগঃ; স্বয়ং য আগাদ্গরুডস্য বক্ত্রম্
66.23
কৃষ্ণ উবাচ
যোঽসৌ ত্বয়া খাণ্ডবে চিত্রভানুং; সংতর্পয়ানেন ধনুর্ধরেণ
বিয়দ্গতো বাণনিকৃত্তদেহো; হ্যনেকরূপো নিহতাস্য মাতা
66.24
ততস্তু জিষ্ণুঃ পরিহৃত্য শেষাং;শ্চিচ্ছেদ ষড্ভির্নিশিতৈঃ সুধারৈঃ
নাগং বিয়ত্তির্যগিবোত্পতন্তং; স ছিন্নগাত্রো নিপপাত ভূমৌ
66.25
তস্মিন্মুহূর্তে দশভিঃ পৃষত্কৈঃ; শিলাশিতৈর্বর্হিণবাজিতৈশ্চ
বিব্যাধ কর্ণঃ পুরুষপ্রবীরং; ধনংজয়ং তির্যগবেক্ষমাণম্
66.26
ততোঽর্জুনো দ্বাদশভির্বিমুক্তৈ;রাকর্ণমুক্তৈর্নিশিতৈঃ সমর্প্য
নারাচমাশীবিষতুল্যবেগ;মাকর্ণপূর্ণায়তমুত্সসর্জ
66.27
স চিত্রবর্মেষুবরো বিদার্য; প্রাণান্নিরস্যন্নিব সাধু মুক্তঃ
কর্ণস্য পীত্বা রুধিরং বিবেশ; বসুংধরাং শোণিতবাজদিগ্ধঃ
66.28
ততো বৃষো বাণনিপাতকোপিতো; মহোরগো দণ্ডবিঘট্টিতো যথা
তথাশুকারী ব্যসৃজচ্ছরোত্তমা;ন্মহাবিষঃ সর্প ইবোত্তমং বিষম্
66.29
জনার্দনং দ্বাদশভিঃ পরাভিন;ন্নবৈর্নবত্যা চ শরৈস্তথার্জুনম্
শরেণ ঘোরেণ পুনশ্চ পাণ্ডবং; বিভিদ্য কর্ণোঽভ্যনদজ্জহাস চ
66.30
তমস্য হর্ষং মমৃষে ন পাণ্ডবো; বিভেদ মর্মাণি ততোঽস্য মর্মবিৎ
পরং শরৈঃ পত্রিভিরিন্দ্রবিক্রম;স্তথা যথেন্দ্রো বলমোজসাহনৎ
66.31
ততঃ শরাণাং নবতীর্নবার্জুনঃ; সসর্জ কর্ণেঽন্তকদণ্ডসংনিভাঃ
শরৈর্ভৃশায়স্ততনুঃ প্রবিব্যথে; তথা যথা বজ্রবিদারিতোঽচলঃ
66.32
মণিপ্রবেকোত্তমবজ্রহাটকৈ;রলংকৃতং চাস্য বরাঙ্গভূষণম্
প্রবিদ্ধমুর্ব্যাং নিপপাত পত্রিভি;র্ধনংজয়েনোত্তমকুণ্ডলেঽপি চ
66.33
মহাধনং শিল্পিবরৈঃ প্রয়ত্নতঃ; কৃতং যদস্যোত্তমবর্ম ভাস্বরম্
সুদীর্ঘকালেন তদস্য পাণ্ডবঃ; ক্ষণেন বাণৈর্বহুধা ব্যশাতয়ৎ
66.34
স তং বিবর্মাণমথোত্তমেষুভিঃ; শরৈশ্চতুর্ভিঃ কুপিতঃ পরাভিনৎ
স বিব্যথেঽত্যর্থমরিপ্রহারিতো; যথাতুরঃ পিত্তকফানিলব্রণৈঃ
66.35
মহাধনুর্মণ্ডলনিঃসৃতৈঃ শিতৈঃ; ক্রিয়াপ্রয়ত্নপ্রহিতৈর্বলেন চ
ততক্ষ কর্ণং বহুভিঃ শরোত্তমৈ;র্বিভেদ মর্মস্বপি চার্জুনস্ত্বরন্
66.36
দৃঢাহতঃ পত্রিভিরুগ্রবেগৈঃ; পার্থেন কর্ণো বিবিধৈঃ শিতাগ্রৈঃ
বভৌ গিরির্গৈরিকধাতুরক্তঃ; ক্ষরন্প্রপাতৈরিব রক্তমম্ভঃ
66.37
সাশ্বং তু কর্ণং সরথং কিরীটী; সমাচিনোদ্ভারত বত্সদন্তৈঃ
প্রচ্ছাদয়ামাস দিশশ্চ বাণৈঃ; সর্বপ্রয়ত্নাত্তপনীয়পুঙ্খৈঃ
66.38
স বত্সদন্তৈঃ পৃথুপীনবক্ষাঃ; সমাচিতঃ স্মাধিরথির্বিভাতি
সুপুষ্পিতাশোকপলাশশাল্মলি;র্যথাচলঃ স্পন্দনচন্দনায়ুতঃ
66.39
শরৈঃ শরীরে বহুধা সমর্পিতৈ;র্বিভাতি কর্ণঃ সমরে বিশাং পতে
মহীরুহৈরাচিতসানুকন্দরো; যথা মহেন্দ্রঃ শুভকর্ণিকারবান্
66.40
স বাণসংঘান্ধনুষা ব্যবাসৃজ;ন্বিভাতি কর্ণঃ শরজালরশ্মিবান্
সলোহিতো রক্তগভস্তিমণ্ডলো; দিবাকরোঽস্তাভিমুখো যথা তথা
66.41
বাহ্বন্তরাদাধিরথের্বিমুক্তা;ন্বাণান্মহাহীনিব দীপ্যমানান্
ব্যধ্বংসয়ন্নর্জুনবাহুমুক্তাঃ; শরাঃ সমাসাদ্য দিশঃ শিতাগ্রাঃ
66.42
ততশ্চক্রমপতত্তস্য ভূমৌ; স বিহ্বলঃ সমরে সূতপুত্রঃ
ঘূর্ণে রথে ব্রাহ্মণস্যাভিশাপা;দ্রামাদুপাত্তেঽপ্রতিভাতি চাস্ত্রে
66.43
অমৃষ্যমাণো ব্যসনানি তানি; হস্তৌ বিধুন্বন্স বিগর্হমাণঃ
ধর্মপ্রধানানভিপাতি ধর্ম; ইত্যব্রুবন্ধর্মবিদঃ সদৈব
মমাপি নিম্নোঽদ্য ন পাতি ভক্তা;ন্মন্যে ন নিত্যং পরিপাতি ধর্মঃ
66.44
এবং ব্রুবন্প্রস্খলিতাশ্বসূতো; বিচাল্যমানোঽর্জুনশস্ত্রপাতৈঃ
মর্মাভিঘাতাচ্ছলিতঃ ক্রিয়াসু; পুনঃ পুনর্ধর্মমগর্হদাজৌ
66.45
ততঃ শরৈর্ভীমতরৈরবিধ্যত্ত্রিভিরাহবে
হস্তে কর্ণস্তদা পার্থমভ্যবিধ্যচ্চ সপ্তভিঃ
66.46
ততোঽর্জুনঃ সপ্তদশ তিগ্মতেজানজিহ্মগান্
ইন্দ্রাশনিসমান্ঘোরানসৃজত্পাবকোপমান্
66.47
নির্ভিদ্য তে ভীমবেগা ন্যপতন্পৃথিবীতলে
কম্পিতাত্মা তথা কর্ণঃ শক্ত্যা চেষ্টামদর্শয়ৎ
66.48
বলেনাথ স সংস্তভ্য ব্রহ্মাস্ত্রং সমুদৈরয়ৎ
ঐন্দ্রাস্ত্রমর্জুনশ্চাপি তদ্দৃষ্ট্বাভিন্যমন্ত্রয়ৎ
66.49
গাণ্ডীবং জ্যাং চ বাণাংশ্চ অনুমন্ত্র্য ধনংজয়ঃ
অসৃজচ্ছরবর্ষাণি বর্ষাণীব পুরংদরঃ
66.50
ততস্তেজোময়া বাণা রথাত্পার্থস্য নিঃসৃতাঃ
প্রাদুরাসন্মহাবীর্যাঃ কর্ণস্য রথমন্তিকাৎ
66.51
তান্কর্ণস্ত্বগ্রতোঽভ্যস্তান্মোঘাংশ্চক্রে মহারথঃ
ততোঽব্রবীদ্বৃষ্ণিবীরস্তস্মিন্নস্ত্রে বিনাশিতে
66.52
বিসৃজাস্ত্রং পরং পার্থ রাধেয়ো গ্রসতে শরান্
ব্রহ্মাস্ত্রমর্জুনশ্চাপি সংমন্ত্র্যাথ প্রয়োজয়ৎ
66.53
ছাদয়িত্বা ততো বাণৈঃ কর্ণং প্রভ্রাম্য চার্জুনঃ
তস্য কর্ণঃ শরৈঃ ক্রুদ্ধশ্চিচ্ছেদ জ্যাং সুতেজনৈঃ
66.54
ততো জ্যামবধায়ান্যামনুমৃজ্য চ পাণ্ডবঃ
শরৈরবাকিরত্কর্ণং দীপ্যমানৈঃ সহস্রশঃ
66.55
তস্য জ্যাচ্ছেদনং কর্ণো জ্যাবধানং চ সংয়ুগে
নান্ববুধ্যত শীঘ্রত্বাত্তদদ্ভুতমিবাভবৎ
66.56
অস্ত্রৈরস্ত্রাণি রাধেয়ঃ প্রত্যহন্সব্যসাচিনঃ
চক্রে চাভ্যধিকং পার্থাত্স্ববীর্যং প্রতিদর্শয়ন্
66.57
ততঃ কৃষ্ণোঽর্জুনং দৃষ্ট্বা কর্ণাস্ত্রেণাভিপীডিতম্
অভ্যস্যেত্যব্রবীত্পার্থমাতিষ্ঠাস্ত্রমনুত্তমম্
66.58
ততোঽন্যমগ্নিসদৃশং শরং সর্পবিষোপমম্
অশ্মসারময়ং দিব্যমনুমন্ত্র্য ধনংজয়ঃ
66.59
রৌদ্রমস্ত্রং সমাদায় ক্ষেপ্তুকামঃ কিরীটবান্
ততোঽগ্রসন্মহী চক্রং রাধেয়স্য মহামৃধে
66.60
গ্রস্তচক্রস্তু রাধেয়ঃ কোপাদশ্রূণ্যবর্তয়ৎ
সোঽব্রবীদর্জুনং চাপি মুহূর্তং ক্ষম পাণ্ডব
66.61
মধ্যে চক্রমবগ্রস্তং দৃষ্ট্বা দৈবাদিদং মম
পার্থ কাপুরুষাচীর্ণমভিসংধিং বিবর্জয়
66.62
প্রকীর্ণকেশে বিমুখে ব্রাহ্মণে চ কৃতাঞ্জলৌ
শরণাগতে ন্যস্তশস্ত্রে তথা ব্যসনগেঽর্জুন
66.63
অবাণে ভ্রষ্টকবচে ভ্রষ্টভগ্নায়ুধে তথা
ন শূরাঃ প্রহরন্ত্যাজৌ ন রাজ্ঞে পার্থিবাস্তথা
ত্বং চ শূরোঽসি কৌন্তেয় তস্মাত্ক্ষম মুহূর্তকম্
66.64
যাবচ্চক্রমিদং ভূমেরুদ্ধরামি ধনংজয়
ন মাং রথস্থো ভূমিষ্ঠমসজ্জং হন্তুমর্হসি
ন বাসুদেবাত্ত্বত্তো বা পাণ্ডবেয় বিভেম্যহম্
66.65
ত্বং হি ক্ষত্রিয়দায়াদো মহাকুলবিবর্ধনঃ
স্মৃত্বা ধর্মোপদেশং ত্বং মুহূর্তং ক্ষম পাণ্ডব