Utshovঅধ্যায় 65
65.1
সংজয় উবাচ
তৌ শঙ্খভেরীনিনদে সমৃদ্ধে; সমীয়তুঃ শ্বেতহয়ৌ নরাগ্র্যৌ
বৈকর্তনঃ সূতপুত্রোঽর্জুনশ্চ; দুর্মন্ত্রিতে তব পুত্রস্য রাজন্
65.2
যথা গজৌ হৈমবতৌ প্রভিন্নৌ; প্রগৃহ্য দন্তাবিব বাশিতার্থে
তথা সমাজগ্মতুরুগ্রবেগৌ; ধনংজয়শ্চাধিরথিশ্চ বীরৌ
65.3
বলাহকেনেব যথা বলাহকো; যদৃচ্ছয়া বা গিরিণা গিরির্যথা
তথা ধনুর্জ্যাতলনেমিনিস্বনৌ; সমীয়তুস্তাবিষুবর্ষবর্ষিণৌ
65.4
প্রবৃদ্ধশৃঙ্গদ্রুমবীরুদোষধী; প্রবৃদ্ধনানাবিধপর্বতৌকসৌ
যথাচলৌ বা গলিতৌ মহাবলৌ; তথা মহাস্ত্রৈরিতরেতরং ঘ্নতঃ
65.5
স সংনিপাতস্তু তয়োর্মহানভূ;ত্সুরেশবৈরোচনয়োর্যথা পুরা
শরৈর্বিভুগ্নাঙ্গনিয়ন্তৃবাহনঃ; সুদুঃসহোঽন্যৈঃ পটুশোণিতোদকঃ
65.6
প্রভূতপদ্মোত্পলমত্স্যকচ্ছপৌ; মহাহ্রদৌ পক্ষিগণানুনাদিতৌ
সুসংনিকৃষ্টাবনিলোদ্ধতৌ যথা; তথা রথৌ তৌ ধ্বজিনৌ সমীয়তুঃ
65.7
উভৌ মহেন্দ্রস্য সমানবিক্রমা;বুভৌ মহেন্দ্রপ্রতিমৌ মহারথৌ
মহেন্দ্রবজ্রপ্রতিমৈশ্চ সায়কৈ;র্মহেন্দ্রবৃত্রাবিব সংপ্রজহ্রতুঃ
65.8
সনাগপত্ত্যশ্বরথে উভে বলে; বিচিত্রবর্ণাভরণাম্বরস্রজে
চকম্পতুশ্চোন্নমতঃ স্ম বিস্ময়া;দ্বিয়দ্গতাশ্চার্জুনকর্ণসংয়ুগে
65.9
ভুজাঃ সবজ্রাঙ্গুলয়ঃ সমুচ্ছ্রিতাঃ; সসিংহনাদা হৃষিতৈর্দিদৃক্ষুভিঃ
যদার্জুনং মত্তমিব দ্বিপো দ্বিপং; সমভ্যয়াদাধিরথির্জিঘাংসয়া
65.10
অভ্যক্রোশন্সোমকাস্তত্র পার্থং; ত্বরস্ব যাহ্যর্জুন বিধ্য কর্ণম্
ছিন্ধ্যস্য মূর্ধানমলং চিরেণ; শ্রদ্ধাং চ রাজ্যাদ্ধৃতরাষ্ট্রসূনোঃ
65.11
তথাস্মাকং বহবস্তত্র যোধাঃ; কর্ণং তদা যাহি যাহীত্যবোচন্
জহ্যর্জুনং কর্ণ ততঃ সচীরাঃ; পুনর্বনং যান্তু চিরায় পার্থাঃ
65.12
ততঃ কর্ণঃ প্রথমং তত্র পার্থং; মহেষুভির্দশভিঃ পর্যবিধ্যৎ
তমর্জুনঃ প্রত্যবিধ্যচ্ছিতাগ্রৈঃ; কক্ষান্তরে দশভিরতীব ক্রুদ্ধঃ
65.13
পরস্পরং তৌ বিশিখৈঃ সুতীক্ষ্ণৈ;স্ততক্ষতুঃ সূতপুত্রোঽর্জুনশ্চ
পরস্পরস্যান্তরেপ্সূ বিমর্দে; সুভীমমভ্যায়য়তুঃ প্রহৃষ্টৌ
65.14
অমৃষ্যমাণশ্চ মহাবিমর্দে; তত্রাক্রুধ্যদ্ভীমসেনো মহাত্মা
অথাব্রবীত্পাণিনা পাণিমাঘ্ন;ন্সংদষ্টৌষ্ঠো নৃত্যতি বাদয়ন্নিব
কথং নু ত্বাং সূতপুত্রঃ কিরীটি;ন্মহেষুভির্দশভিরবিধ্যদগ্রে
65.15
যয়া ধৃত্যা সর্বভূতান্যজৈষী;র্গ্রাসং দদদ্বহ্নয়ে খাণ্ডবে ত্বম্
তয়া ধৃত্যা সূতপুত্রং জহি ত্ব;মহং বৈনং গদয়া পোথয়িষ্যে
65.16
অথাব্রবীদ্বাসুদেবোঽপি পার্থং; দৃষ্ট্বা রথেষূন্প্রতিহন্যমানান্
অমীমৃদত্সর্বথা তেঽদ্য কর্ণো; হ্যস্ত্রৈরস্ত্রাণি কিমিদং কিরীটিন্
65.17
স বীর কিং মুহ্যসি নাবধীয়সে; নদন্ত্যেতে কুরবঃ সংপ্রহৃষ্টাঃ
কর্ণং পুরস্কৃত্য বিদুর্হি সর্বে; ত্বদস্ত্রমস্ত্রৈর্বিনিপাত্যমানম্
65.18
যয়া ধৃত্যা নিহতং তামসাস্ত্রং; যুগে যুগে রাক্ষসাশ্চাপি ঘোরাঃ
দম্ভোদ্ভবাশ্চাসুরাশ্চাহবেষু; তয়া ধৃত্যা ত্বং জহি সূতপুত্রম্
65.19
অনেন বাস্য ক্ষুরনেমিনাদ্য; সংছিন্দ্ধি মূর্ধানমরেঃ প্রসহ্য
ময়া নিসৃষ্টেন সুদর্শনেন; বজ্রেণ শক্রো নমুচেরিবারেঃ
65.20
কিরাতরূপী ভগবান্যয়া চ; ত্বয়া মহত্যা পরিতোষিতোঽভূৎ
তাং ত্বং ধৃতিং বীর পুনর্গৃহীত্বা; সহানুবন্ধং জহি সূতপুত্রম্
65.21
ততো মহীং সাগরমেখলাং ত্বং; সপত্তনাং গ্রামবতীং সমৃদ্ধাম্
প্রয়চ্ছ রাজ্ঞে নিহতারিসংঘাং; যশশ্চ পার্থাতুলমাপ্নুহি ত্বম্
65.22
সংচোদিতো ভীমজনার্দনাভ্যাং; স্মৃত্বা তদাত্মানমবেক্ষ্য সত্ত্বম্
মহাত্মনশ্চাগমনে বিদিত্বা; প্রয়োজনং কেশবমিত্যুবাচ
65.23
প্রাদুষ্করোম্যেষ মহাস্ত্রমুগ্রং; শিবায় লোকস্য বধায় সৌতেঃ
তন্মেঽনুজানাতু ভবান্সুরাশ্চ; ব্রহ্মা ভবো ব্রহ্মবিদশ্চ সর্বে
65.24
ইত্যূচিবান্ব্রাহ্মমসহ্যমস্ত্রং; প্রাদুশ্চক্রে মনসা সংবিধেয়ম্
ততো দিশশ্চ প্রদিশশ্চ সর্বাঃ; সমাবৃণোত্সায়কৈর্ভূরিতেজাঃ
সসর্জ বাণান্ভরতর্ষভোঽপি; শতংশতানেকবদাশুবেগান্
65.25
বৈকর্তনেনাপি তথাজিমধ্যে; সহস্রশো বাণগণা বিসৃষ্টাঃ
তে ঘোষিণঃ পাণ্ডবমভ্যুপেয়ুঃ; পর্জন্যমুক্তা ইব বারিধারাঃ
65.26
স ভীমসেনং চ জনার্দনং চ; কিরীটিনং চাপ্যমনুষ্যকর্মা
ত্রিভিস্ত্রিভির্ভীমবলো নিহত্য; ননাদ ঘোরং মহতা স্বরেণ
65.27
স কর্ণবাণাভিহতঃ কিরীটী; ভীমং তথা প্রেক্ষ্য জনার্দনং চ
অমৃষ্যমাণঃ পুনরেব পার্থঃ; শরান্দশাষ্টৌ চ সমুদ্ববর্হ
65.28
সুষেণমেকেন শরেণ বিদ্ধ্বা; শল্যং চতুর্ভিস্ত্রিভিরেব কর্ণম্
ততঃ সুমুক্তৈর্দশভির্জঘান; সভাপতিং কাঞ্চনবর্মনদ্ধম্
65.29
স রাজপুত্রো বিশিরা বিবাহু;র্বিবাজিসূতো বিধনুর্বিকেতুঃ
ততো রথাগ্রাদপতত্প্রভগ্নঃ; পরশ্বধৈঃ শাল ইবাভিকৃত্তঃ
65.30
পুনশ্চ কর্ণং ত্রিভিরষ্টভিশ্চ; দ্বাভ্যাং চতুর্ভির্দশভিশ্চ বিদ্ধ্বা
চতুঃশতান্দ্বিরদান্সায়ুধীয়া;ন্হত্বা রথানষ্টশতং জঘান
সহস্রমশ্বাংশ্চ পুনশ্চ সাদী;নষ্টৌ সহস্রাণি চ পত্তিবীরান্
65.31
দৃষ্ট্বাজিমুখ্যাবথ যুধ্যমানৌ; দিদৃক্ষবঃ শূরবরাবরিঘ্নৌ
কর্ণং চ পার্থং চ নিয়ম্য বাহা;ন্খস্থা মহীস্থাশ্চ জনাবতস্থুঃ
65.32
ততো ধনুর্জ্যা সহসাতিকৃষ্টা; সুঘোষমাচ্ছিদ্যত পাণ্ডবস্য
তস্মিন্ক্ষণে সূতপুত্রস্তু পার্থং; সমাচিনোত্ক্ষুদ্রকাণাং শতেন
65.33
নির্মুক্তসর্পপ্রতিমৈশ্চ তীক্ষ্ণৈ;স্তৈলপ্রধৌতৈঃ খগপত্রবাজৈঃ
ষষ্ট্যা নারাচৈর্বাসুদেবং বিভেদ; তদন্তরং সোমকাঃ প্রাদ্রবন্ত
65.34
ততো ধনুর্জ্যামবধম্য শীঘ্রং; শরানস্তানাধিরথের্বিধম্য
সুসংরব্ধঃ কর্ণশরক্ষতাঙ্গো; রণে পার্থঃ সোমকান্প্রত্যগৃহ্ণাৎ
ন পক্ষিণঃ সংপতন্ত্যন্তরিক্ষে; ক্ষেপীয়সাস্ত্রেণ কৃতেঽন্ধকারে
65.35
শল্যং চ পার্থো দশভিঃ পৃষত্কৈ;র্ভৃশং তনুত্রে প্রহসন্নবিধ্যৎ
ততঃ কর্ণং দ্বাদশভিঃ সুমুক্তৈ;র্বিদ্ধ্বা পুনঃ সপ্তভিরভ্যবিধ্যৎ
65.36
স পার্থবাণাসনবেগনুন্নৈ;র্দৃঢাহতঃ পত্রিভিরুগ্রবেগৈঃ
বিভিন্নগাত্রঃ ক্ষতজোক্ষিতাঙ্গঃ; কর্ণো বভৌ রুদ্র ইবাততেষুঃ
65.37
ততস্ত্রিভিশ্চ ত্রিদশাধিপোপমং; শরৈর্বিভেদাধিরথির্ধনংজয়ম্
শরাংস্তু পঞ্চ জ্বলিতানিবোরগা;ন্প্রবীরয়ামাস জিঘাংসুরচ্যুতে
65.38
তে বর্ম ভিত্ত্বা পুরুষোত্তমস্য; সুবর্ণচিত্রং ন্যপতন্সুমুক্তাঃ
বেগেন গামাবিবিশুঃ সুবেগাঃ; স্নাত্বা চ কর্ণাভিমুখাঃ প্রতীয়ুঃ
65.39
তান্পঞ্চভল্লৈস্ত্বরিতৈঃ সুমুক্তৈ;স্ত্রিধা ত্রিধৈকৈকমথোচ্চকর্ত
ধনংজয়স্তে ন্যপতন্পৃথিব্যাং; মহাহয়স্তক্ষকপুত্রপক্ষাঃ
65.40
ততঃ প্রজজ্বাল কিরীটমালী; ক্রোধেন কক্ষং প্রদহন্নিবাগ্নিঃ
স কর্ণমাকর্ণবিকৃষ্টসৃষ্টৈঃ; শরৈঃ শরীরান্তকরৈর্জ্বলদ্ভিঃ
মর্মস্ববিধ্যত্স চচাল দুঃখা;দ্ধৈর্যাত্তু তস্থাবতিমাত্রধৈর্যঃ
65.41
ততঃ শরৌঘৈঃ প্রদিশো দিশশ্চ; রবিপ্রভা কর্ণরথশ্চ রাজন্
অদৃশ্য আসীত্কুপিতে ধনংজয়ে; তুষারনীহারবৃতং যথা নভঃ
65.42
স চক্ররক্ষানথ পাদরক্ষা;ন্পুরঃসরান্পৃষ্ঠগোপাংশ্চ সর্বান্
দুর্যোধনেনানুমতানরিঘ্না;ন্সমুচ্চিতান্সুরথান্সারভূতান্
65.43
দ্বিসাহস্রান্সমরে সব্যসাচী; কুরুপ্রবীরানৃষভঃ কুরূণাম্
ক্ষণেন সর্বান্সরথাশ্বসূতা;ন্নিনায় রাজন্ক্ষয়মেকবীরঃ
65.44
অথাপলায়ন্ত বিহায় কর্ণং; তবাত্মজাঃ কুরবশ্চাবশিষ্টাঃ
হতানবাকীর্য শরক্ষতাংশ্চ; লালপ্যমানাংস্তনয়ান্পিতৄংশ্চ
65.45
স সর্বতঃ প্রেক্ষ্য দিশো বিশূন্যা; ভয়াবদীর্ণৈঃ কুরুভির্বিহীনঃ
ন বিব্যথে ভারত তত্র কর্ণঃ; প্রতীপমেবার্জুনমভ্যধাবৎ