Utshovঅধ্যায় 64
64.1
সংজয় উবাচ
তদ্দেবনাগাসুরসিদ্ধসংঘৈ;র্গন্ধর্বয়ক্ষাপ্সরসাং চ সংঘৈঃ
ব্রহ্মর্ষিরাজর্ষিসুপর্ণজুষ্টং; বভৌ বিয়দ্বিস্ময়নীয়রূপম্
64.2
নানদ্যমানং নিনদৈর্মনোজ্ঞৈ;র্বাদিত্রগীতস্তুতিভিশ্চ নৃত্তৈঃ
সর্বেঽন্তরিক্ষে দদৃশুর্মনুষ্যাঃ; খস্থাংশ্চ তান্বিস্ময়নীয়রূপান্
64.3
ততঃ প্রহৃষ্টাঃ কুরুপাণ্ডুয়োধা; বাদিত্রপত্রায়ুধসিংহনাদৈঃ
নিনাদয়ন্তো বসুধাং দিশশ্চ; স্বনেন সর্বে দ্বিষতো নিজঘ্নুঃ
64.4
নানাশ্বমাতঙ্গরথায়ুতাকুলং; বরাসিশক্ত্যৃষ্টিনিপাতদুঃসহম্
অভীরুজুষ্টং হতদেহসংকুলং; রণাজিরং লোহিতরক্তমাবভৌ
64.5
তথা প্রবৃত্তেঽস্ত্রভৃতাং পরাভবে; ধনংজয়শ্চাধিরথিশ্চ সায়কৈঃ
দিশশ্চ সৈন্যং চ শিতৈরজিহ্মগৈঃ; পরস্পরং প্রোর্ণুবতুঃ স্ম দংশিতৌ
64.6
ততস্ত্বদীয়াশ্চ পরে চ সায়কৈঃ; কৃতেঽন্ধকারে বিবিদুর্ন কিংচন
ভয়াত্তু তাবেব রথৌ সমাশ্রয়ং;স্তমোনুদৌ খে প্রসৃতা ইবাংশবঃ
64.7
ততোঽস্ত্রমস্ত্রেণ পরস্পরস্য তৌ; বিধূয় বাতাবিব পূর্বপশ্চিমৌ
ঘনান্ধকারে বিততে তমোনুদৌ; যথোদিতৌ তদ্বদতীব রেজতুঃ
64.8
ন চাভিমন্তব্যমিতি প্রচোদিতাঃ; পরে ত্বদীয়াশ্চ তদাবতস্থিরে
মহারথৌ তৌ পরিবার্য সর্বতঃ; সুরাসুরা বাসবশম্বরাবিব
64.9
মৃদঙ্গভেরীপণবানকস্বনৈ;র্নিনাদিতে ভারত শঙ্খনিস্বনৈঃ
সসিংহনাদৌ বভতুর্নরোত্তমৌ; শশাঙ্কসূর্যাবিব মেঘসংপ্লবে
64.10
মহাধনুর্মণ্ডলমধ্যগাবুভৌ; সুবর্চসৌ বাণসহস্ররশ্মিনৌ
দিধক্ষমাণৌ সচরাচরং জগ;দ্যুগাস্তসূর্যাবিব দুঃসহৌ রণে
64.11
উভাবজেয়াবহিতান্তকাবুভৌ; জিঘাংসতুস্তৌ কৃতিনৌ পরস্পরম্
মহাহবে বীরবরৌ সমীয়তু;র্যথেন্দ্রজম্ভাবিব কর্ণপাণ্ডবৌ
64.12
ততো মহাস্ত্রাণি মহাধনুর্ধরৌ; বিমুঞ্চমানাবিষুভির্ভয়ানকৈঃ
নরাশ্বনাগানমিতৌ নিজঘ্নতুঃ; পরস্পরং জঘ্নতুরুত্তমেষুভিঃ
64.13
ততো বিসস্রুঃ পুনরর্দিতাঃ শরৈ;র্নরোত্তমাভ্যাং কুরুপাণ্ডবাশ্রয়াঃ
সনাগপত্ত্যশ্বরথা দিশো গতা;স্তথা যথা সিংহভয়াদ্বনৌকসঃ
64.14
ততস্তু দুর্যোধনভোজসৌবলাঃ; কৃপশ্চ শারদ্বতসূনুনা সহ
মহারথাঃ পঞ্চ ধনংজয়াচ্যুতৌ; শরৈঃ শরীরান্তকরৈরতাডয়ন্
64.15
ধনূংষি তেষামিষুধীন্হয়ান্ধ্বজা;ন্রথাংশ্চ সূতাংশ্চ ধনংজয়ঃ শরৈঃ
সমং চ চিচ্ছেদ পরাভিনচ্চ তা;ঞ্শরোত্তমৈর্দ্বাদশভিশ্চ সূতজম্
64.16
অথাভ্যধাবংস্ত্বরিতাঃ শতং রথাঃ; শতং চ নাগার্জুনমাততায়িনঃ
শকাস্তুখারা যবনাশ্চ সাদিনঃ; সহৈব কাম্বোজবরৈর্জিঘাংসবঃ
64.17
বরায়ুধান্পাণিগতান্করৈঃ সহ; ক্ষুরৈর্ন্যকৃন্তংস্ত্বরিতাঃ শিরাংসি চ
হয়াংশ্চ নাগাংশ্চ রথাংশ্চ যুধ্যতাং; ধনংজয়ঃ শত্রুগণং তমক্ষিণোৎ
64.18
ততোঽন্তরিক্ষে সুরতূর্যনিস্বনাঃ; সসাধুবাদা হৃষিতৈঃ সমীরিতাঃ
নিপেতুরপ্যুত্তমপুষ্পবৃষ্টয়ঃ; সুরূপগন্ধাঃ পবনেরিতাঃ শিবাঃ
64.19
তদদ্ভুতং দেবমনুষ্যসাক্ষিকং; সমীক্ষ্য ভূতানি বিসিষ্মিয়ুর্নৃপ
তবাত্মজঃ সূতসুতশ্চ ন ব্যথাং; ন বিস্ময়ং জগ্মতুরেকনিশ্চয়ৌ
64.20
অথাব্রবীদ্দ্রোণসুতস্তবাত্মজং; করং করেণ প্রতিপীড্য সান্ত্বয়ন্
প্রসীদ দুর্যোধন শাম্য পাণ্ডবৈ;রলং বিরোধেন ধিগস্তু বিগ্রহম্
64.21
হতো গুরুর্ব্রহ্মসমো মহাস্ত্রবি;ত্তথৈব ভীষ্মপ্রমুখা নরর্ষভাঃ
অহং ত্ববধ্যো মম চাপি মাতুলঃ; প্রশাধি রাজ্যং সহ পাণ্ডবৈশ্চিরম্
64.22
ধনংজয়ঃ স্থাস্যতি বারিতো ময়া; জনার্দনো নৈব বিরোধমিচ্ছতি
যুধিষ্ঠিরো ভূতহিতে সদা রতো; বৃকোদরস্তদ্বশগস্তথা যমৌ
64.23
ত্বয়া চ পার্থৈশ্চ পরস্পরেণ; প্রজাঃ শিবং প্রাপ্নুয়ুরিচ্ছতি ত্বয়ি
ব্রজন্তু শেষাঃ স্বপুরাণি পার্থিবা; নিবৃত্তবৈরাশ্চ ভবন্তু সৈনিকাঃ
64.24
ন চেদ্বচঃ শ্রোষ্যসি মে নরাধিপ; ধ্রুবং প্রতপ্তাসি হতোঽরিভির্যুধি
ইদং চ দৃষ্টং জগতা সহ ত্বয়া; কৃতং যদেকেন কিরীটমালিনা
যথা ন কুর্যাদ্বলভিন্ন চান্তকো; ন চ প্রচেতা ভগবান্ন যক্ষরাট্
64.25
অতোঽপি ভূয়াংশ্চ গুণৈর্ধনংজয়ঃ; স চাভিপত্স্যত্যখিলং বচো মম
তবানুয়াত্রাং চ তথা করিষ্যতি; প্রসীদ রাজঞ্জগতঃ শমায় বৈ
64.26
মমাপি মানঃ পরমঃ সদা ত্বয়ি; ব্রবীম্যতস্ত্বাং পরমাচ্চ সৌহৃদাৎ
নিবারয়িষ্যামি হি কর্ণমপ্যহং; যদা ভবান্সপ্রণয়ো ভবিষ্যতি
64.27
বদন্তি মিত্রং সহজং বিচক্ষণা;স্তথৈব সাম্না চ ধনেন চার্জিতম্
প্রতাপতশ্চোপনতং চতুর্বিধং; তদস্তি সর্বং ত্বয়ি পাণ্ডবেষু চ
64.28
নিসর্গতস্তে তব বীর বান্ধবাঃ; পুনশ্চ সাম্না চ সমাপ্নুহি স্থিরম্
ত্বয়ি প্রসন্নে যদি মিত্রতামিয়ু;র্ধ্রুবং নরেন্দ্রেন্দ্র তথা ত্বমাচর
64.29
স এবমুক্তঃ সুহৃদা বচো হিতং; বিচিন্ত্য নিঃশ্বস্য চ দুর্মনাব্রবীৎ
যথা ভবানাহ সখে তথৈব ত;ন্মমাপি চ জ্ঞাপয়তো বচঃ শৃণু
64.30
নিহত্য দুঃশাসনমুক্তবান্বহু; প্রসহ্য শার্দূলবদেষ দুর্মতিঃ
বৃকোদরস্তদ্ধৃদয়ে মম স্থিতং; ন তত্পরোক্ষং ভবতঃ কুতঃ শমঃ
64.31
ন চাপি কর্ণং গুরুপুত্র সংস্তবা;দুপারমেত্যর্হসি বক্তুমচ্যুত
শ্রমেণ যুক্তো মহতাদ্য ফল্গুন;স্তমেষ কর্ণঃ প্রসভং হনিষ্যতি
64.32
তমেবমুক্ত্বাভ্যনুনীয় চাসকৃ;ত্তবাত্মজঃ স্বাননুশাস্তি সৈনিকান্
সমাঘ্নতাভিদ্রবতাহিতানিমা;ন্সবাণশব্দান্কিমু জোষমাস্যতে