Utshovঅধ্যায় 63
63.1
সংজয় উবাচ
বৃষসেনং হতং দৃষ্ট্বা শোকামর্ষসমন্বিতঃ
মুক্ত্বা শোকোদ্ভবং বারি নেত্রাভ্যাং সহসা বৃষঃ
63.2
রথেন কর্ণস্তেজস্বী জগামাভিমুখো রিপূন্
যুদ্ধায়ামর্ষতাম্রাক্ষঃ সমাহূয় ধনংজয়ম্
63.3
তৌ রথৌ সূর্যসংকাশৌ বৈয়াঘ্রপরিবারণৌ
সমেতৌ দদৃশুস্তত্র দ্বাবিবার্কৌ সমাগতৌ
63.4
শ্বেতাশ্বৌ পুরুষাদিত্যাবাস্থিতাবরিমর্দনৌ
শুশুভাতে মহাত্মানৌ চন্দ্রাদিত্যৌ যথা দিবি
63.5
তৌ দৃষ্ট্বা বিস্ময়ং জগ্মুঃ সর্বভূতানি মারিষ
ত্রৈলোক্যবিজয়ে যত্তাবিন্দ্রবৈরোচনাবিব
63.6
রথজ্যাতলনির্হ্রাদৈর্বাণশঙ্খরবৈরপি
তৌ রথাবভিধাবন্তৌ সমালোক্য মহীক্ষিতাম্
63.7
ধ্বজৌ চ দৃষ্ট্বা সংসক্তৌ বিস্ময়ঃ সমপদ্যত
হস্তিকক্ষ্যাং চ কর্ণস্য বানরং চ কিরীটিনঃ
63.8
তৌ রথৌ সংপ্রসক্তৌ চ দৃষ্ট্বা ভারত পার্থিবাঃ
সিংহনাদরবাংশ্চক্রুঃ সাধুবাদাংশ্চ পুষ্কলান্
63.9
শ্রুত্বা তু দ্বৈরথং তাভ্যাং তত্র যোধাঃ সমন্ততঃ
চক্রুর্বাহুবলং চৈব তথা চেলবলং মহৎ
63.10
আজগ্মুঃ কুরবস্তত্র বাদিত্রানুগতাস্তদা
কর্ণং প্রহর্ষয়ন্তশ্চ শঙ্খান্দধ্মুশ্চ পুষ্কলান্
63.11
তথৈব পাণ্ডবাঃ সর্বে হর্ষয়ন্তো ধনংজয়ম্
তূর্যশঙ্খনিনাদেন দিশঃ সর্বা ব্যনাদয়ন্
63.12
ক্ষ্বেডিতাস্ফোটিতোত্ক্রুষ্টৈস্তুমুলং সর্বতোঽভবৎ
বাহুঘোষাশ্চ বীরাণাং কর্ণার্জুনসমাগমে
63.13
তৌ দৃষ্ট্বা পুরুষব্যাঘ্রৌ রথস্থৌ রথিনাং বরৌ
প্রগৃহীতমহাচাপৌ শরশক্তিগদায়ুধৌ
63.14
বর্মিণৌ বদ্ধনিস্ত্রিংশৌ শ্বেতাশ্বৌ শঙ্খশোভিনৌ
তূণীরবরসংপন্নৌ দ্বাবপি স্ম সুদর্শনৌ
63.15
রক্তচন্দনদিগ্ধাঙ্গৌ সমদৌ বৃষভাবিব
আশীবিষসমপ্রখ্যৌ যমকালান্তকোপমৌ
63.16
ইন্দ্রবৃত্রাবিব ক্রুদ্ধৌ সূর্যাচন্দ্রমসপ্রভৌ
মহাগ্রহাবিব ক্রূরৌ যুগান্তে সমুপস্থিতৌ
63.17
দেবগর্ভৌ দেবসমৌ দেবতুল্যৌ চ রূপতঃ
সমেতৌ পুরুষব্যাঘ্রৌ প্রেক্ষ্য কর্ণধনংজয়ৌ
63.18
উভৌ বরায়ুধধরাবুভৌ রণকৃতশ্রমৌ
উভৌ চ বাহুশব্দেন নাদয়ন্তৌ নভস্তলম্
63.19
উভৌ বিশ্রুতকর্মাণৌ পৌরুষেণ বলেন চ
উভৌ চ সদৃশৌ যুদ্ধে শম্বরামররাজয়োঃ
63.20
কার্তবীর্যসমৌ যুদ্ধে তথা দাশরথেঃ সমৌ
বিষ্ণুবীর্যসমৌ বীর্যে তথা ভবসমৌ যুধি
63.21
উভৌ শ্বেতহয়ৌ রাজন্রথপ্রবরবাহিনৌ
সারথী প্রবরৌ চৈব তয়োরাস্তাং মহাবলৌ
63.22
তৌ তু দৃষ্ট্বা মহারাজ রাজমানৌ মহারথৌ
সিদ্ধচারণসংঘানাং বিস্ময়ঃ সমপদ্যত
63.23
ধার্তরাষ্ট্রাস্ততঃ কর্ণং সবলা ভরতর্ষভ
পরিবব্রুর্মহাত্মানং ক্ষিপ্রমাহবশোভিনম্
63.24
তথৈব পাণ্ডবা হৃষ্টা ধৃষ্টদ্যুম্নপুরোগমাঃ
পরিবব্রুর্মহাত্মানং পার্থমপ্রতিমং যুধি
63.25
তাবকানাং রণে কর্ণো গ্লহ আসীদ্বিশাং পতে
তথৈব পাণ্ডবেয়ানাং গ্লহঃ পার্থোঽভবদ্যুধি
63.26
ত এব সভ্যাস্তত্রাসন্প্রেক্ষকাশ্চাভবন্স্ম তে
তত্রৈষাং গ্লহমানানাং ধ্রুবৌ জয়পরাজয়ৌ
63.27
তাভ্যাং দ্যূতং সমায়ত্তং বিজয়ায়েতরায় বা
অস্মাকং পাণ্ডবানাং চ স্থিতানাং রণমূর্ধনি
63.28
তৌ তু স্থিতৌ মহারাজ সমরে যুদ্ধশালিনৌ
অন্যোন্যং প্রতিসংরব্ধাবন্যোন্যস্য জয়ৈষিণৌ
63.29
তাবুভৌ প্রজিহীর্ষেতামিন্দ্রবৃত্রাবিবাভিতঃ
ভীমরূপধরাবাস্তাং মহাধূমাবিব গ্রহৌ
63.30
ততোঽন্তরিক্ষে সাক্ষেপা বিবাদা ভরতর্ষভ
মিথো ভেদাশ্চ ভূতানামাসন্কর্ণার্জুনান্তরে
ব্যাশ্রয়ন্ত দিশো ভিন্নাঃ সর্বলোকাশ্চ মারিষ
63.31
দেবদানবগন্ধর্বাঃ পিশাচোরগরাক্ষসাঃ
প্রতিপক্ষগ্রহং চক্রুঃ কর্ণার্জুনসমাগমে
63.32
দ্যৌরাসীত্কর্ণতো ব্যগ্রা সনক্ষত্রা বিশাং পতে
ভূমির্বিশালা পার্থস্য মাতা পুত্রস্য ভারত
63.33
সরিতঃ সাগরাশ্চৈব গিরয়শ্চ নরোত্তম
বৃক্ষাশ্চৌষধয়স্তত্র ব্যাশ্রয়ন্ত কিরীটিনম্
63.34
অসুরা যাতুধানাশ্চ গুহ্যকাশ্চ পরংতপ
কর্ণতঃ সমপদ্যন্ত খেচরাণি বয়াংসি চ
63.35
রত্নানি নিধয়ঃ সর্বে বেদাশ্চাখ্যানপঞ্চমাঃ
সোপবেদোপনিষদঃ সরহস্যাঃ সসংগ্রহাঃ
63.36
বাসুকিশ্চিত্রসেনশ্চ তক্ষকশ্চোপতক্ষকঃ
পর্বতাশ্চ তথা সর্বে কাদ্রবেয়াশ্চ সান্বয়াঃ
বিষবন্তো মহারোষা নাগাশ্চার্জুনতোঽভবন্
63.37
ঐরাবতাঃ সৌরভেয়া বৈশালেয়াশ্চ ভোগিনঃ
এতেঽভবন্নর্জুনতঃ ক্ষুদ্রসর্পাস্তু কর্ণতঃ
63.38
ঈহামৃগা ব্যাডমৃগা মঙ্গল্যাশ্চ মৃগদ্বিজাঃ
পার্থস্য বিজয়ং রাজন্সর্ব এবাভিসংশ্রিতাঃ
63.39
বসবো মরুতঃ সাধ্যা রুদ্রা বিশ্বেঽশ্বিনৌ তথা
অগ্নিরিন্দ্রশ্চ সোমশ্চ পবনশ্চ দিশো দশ
ধনংজয়মুপাজগ্মুরাদিত্যাঃ কর্ণতোঽভবন্
63.40
দেবাস্তু পিতৃভিঃ সার্ধং সগণার্জুনতোঽভবন্
যমো বৈশ্রবণশ্চৈব বরুণশ্চ যতোঽর্জুনঃ
63.41
দেবব্রহ্মনৃপর্ষীণাং গণাঃ পাণ্ডবতোঽভবন্
তুম্বুরুপ্রমুখা রাজন্গন্ধর্বাশ্চ যতোঽর্জুনঃ
63.42
প্রাবেয়াঃ সহ মৌনেয়ৈর্গন্ধর্বাপ্সরসাং গণাঃ
ঈহামৃগব্যাডমৃগৈর্দ্বিপাশ্চ রথপত্তিভিঃ
63.43
উহ্যমানাস্তথা মেঘৈর্বায়ুনা চ মনীষিণঃ
দিদৃক্ষবঃ সমাজগ্মুঃ কর্ণার্জুনসমাগমম্
63.44
দেবদানবগন্ধর্বা নাগা যক্ষাঃ পতত্রিণঃ
মহর্ষয়ো বেদবিদঃ পিতরশ্চ স্বধাভুজঃ
63.45
তপো বিদ্যাস্তথৌষধ্যো নানারূপাম্বরত্বিষঃ
অন্তরিক্ষে মহারাজ বিনদন্তোঽবতস্থিরে
63.46
ব্রহ্মা ব্রহ্মর্ষিভিঃ সার্ধং প্রজাপতিভিরেব চ
ভবেনাবস্থিতো যানং দিব্যং তং দেশমভ্যয়াৎ
63.47
দৃষ্ট্বা প্রজাপতিং দেবাঃ স্বয়ংভুবমুপাগমন্
সমোঽস্তু দেব বিজয় এতয়োর্নরসিংহয়োঃ
63.48
তদুপশ্রুত্য মঘবা প্রণিপত্য পিতামহম্
কর্ণার্জুনবিনাশেন মা নশ্যত্বখিলং জগৎ
63.49
স্বয়ংভো ব্রূহি তদ্বাক্যং সমোঽস্তু বিজয়োঽনয়োঃ
তত্তথাস্তু নমস্তেঽস্তু প্রসীদ ভগবন্মম
63.50
ব্রহ্মেশানাবথো বাক্যমূচতুস্ত্রিদশেশ্বরম্
বিজয়ো ধ্রুব এবাস্তু বিজয়স্য মহাত্মনঃ
63.51
মনস্বী বলবাঞ্শূরঃ কৃতাস্ত্রশ্চ তপোধনঃ
বিভর্তি চ মহাতেজা ধনুর্বেদমশেষতঃ
63.52
অতিক্রমেচ্চ মাহাত্ম্যাদ্দিষ্টমেতস্য পর্যয়াৎ
অতিক্রান্তে চ লোকানামভাবো নিয়তো ভবেৎ
63.53
ন বিদ্যতে ব্যবস্থানং কৃষ্ণয়োঃ ক্রুদ্ধয়োঃ ক্বচিৎ
স্রষ্টারৌ হ্যসতশ্চোভৌ সতশ্চ পুরুষর্ষভৌ
63.54
নরনারায়ণাবেতৌ পুরাণাবৃষিসত্তমৌ
অনিয়ত্তৌ নিয়ন্তারাবভীতৌ স্ম পরংতপৌ
63.55
কর্ণো লোকানয়ং মুখ্যান্প্রাপ্নোতু পুরুষর্ষভঃ
বীরো বৈকর্তনঃ শূরো বিজয়স্ত্বস্তু কৃষ্ণয়োঃ
63.56
বসূনাং চ সলোকত্বং মরুতাং বা সমাপ্নুয়াৎ
সহিতো দ্রোণভীষ্মাভ্যাং নাকলোকে মহীয়তাম্
63.57
ইত্যুক্তো দেবদেবাভ্যাং সহস্রাক্ষোঽব্রবীদ্বচঃ
আমন্ত্র্য সর্বভূতানি ব্রহ্মেশানানুশাসনাৎ
63.58
শ্রুতং ভবদ্ভির্যত্প্রোক্তং ভগবদ্ভ্যাং জগদ্ধিতম্
তত্তথা নান্যথা তদ্ধি তিষ্ঠধ্বং গতমন্যবঃ
63.59
ইতি শ্রুত্বেন্দ্রবচনং সর্বভূতানি মারিষ
বিস্মিতান্যভবন্রাজন্পূজয়াং চক্রিরে চ তৎ
63.60
ব্যসৃজংশ্চ সুগন্ধীনি নানারূপাণি খাত্তথা
পুষ্পবর্ষাণি বিবুধা দেবতূর্যাণ্যবাদয়ন্
63.61
দিদৃক্ষবশ্চাপ্রতিমং দ্বৈরথং নরসিংহয়োঃ
দেবদানবগন্ধর্বাঃ সর্ব এবাবতস্থিরে
রথৌ চ তৌ শ্বেতহয়ৌ যুক্তকেতূ মহাস্বনৌ
63.62
সমাগতা লোকবীরাঃ শঙ্খান্দধ্মুঃ পৃথক্পৃথক্
বাসুদেবার্জুনৌ বীরৌ কর্ণশল্যৌ চ ভারত
63.63
তদ্ভীরুসংত্রাসকরং যুদ্ধং সমভবত্তদা
অন্যোন্যস্পর্ধিনোর্বীর্যে শক্রশম্বরয়োরিব
63.64
তয়োর্ধ্বজৌ বীতমালৌ শুশুভাতে রথস্থিতৌ
পৃথগ্রূপৌ সমার্ছন্তৌ ক্রোধং যুদ্ধে পরস্পরম্
63.65
কর্ণস্যাশীবিষনিভা রত্নসারবতী দৃঢা
পুরংদরধনুঃপ্রখ্যা হস্তিকক্ষ্যা ব্যরাজত
63.66
কপিশ্রেষ্ঠস্তু পার্থস্য ব্যাদিতাস্যো ভয়ংকরঃ
ভীষয়ন্নেব দংষ্ট্রাভির্দুর্নিরীক্ষ্যো রবির্যথা
63.67
যুদ্ধাভিলাষুকো ভূত্বা ধ্বজো গাণ্ডীবধন্বনঃ
কর্ণধ্বজমুপাতিষ্ঠত্সোঽবদীদভিনর্দয়ন্
63.68
উত্পত্য চ মহাবেগঃ কক্ষ্যামভ্যহনত্কপিঃ
নখৈশ্চ দশনৈশ্চৈব গরুডঃ পন্নগং যথা
63.69
সুকিঙ্কিণীকাভরণা কালপাশোপমায়সী
অভ্যদ্রবত্সুসংক্রুদ্ধা নাগকক্ষ্যা মহাকপিম্
63.70
উভয়োরুত্তমে যুদ্ধে দ্বৈরথে দ্যূত আহৃতে
প্রকুর্বাতে ধ্বজৌ যুদ্ধং প্রত্যহেষন্হয়ান্হয়াঃ
63.71
অবিধ্যত্পুণ্ডরীকাক্ষঃ শল্যং নয়নসায়কৈঃ
স চাপি পুণ্ডরীকাক্ষং তথৈবাভিসমৈক্ষত
63.72
তত্রাজয়দ্বাসুদেবঃ শল্যং নয়নসায়কৈঃ
কর্ণং চাপ্যজয়দ্দৃষ্ট্যা কুন্তীপুত্রো ধনংজয়ঃ
63.73
অথাব্রবীত্সূতপুত্রঃ শল্যমাভাষ্য সস্মিতম্
যদি পার্থো রণে হন্যাদদ্য মামিহ কর্হিচিৎ
কিমুত্তরং তদা তে স্যাত্সখে সত্যং ব্রবীহি মে
63.74
শল্য উবাচ
যদি কর্ণ রণে হন্যাদদ্য ত্বাং শ্বেতবাহনঃ
উভাবেকরথেনাহং হন্যাং মাধবপাণ্ডবৌ
63.75
সংজয় উবাচ
এবমেব তু গোবিংদমর্জুনঃ প্রত্যভাষত
তং প্রহস্যাব্রবীত্কৃষ্ণঃ পার্থং পরমিদং বচঃ
63.76
পতেদ্দিবাকরঃ স্থানাচ্ছীর্যেতানেকধা ক্ষিতিঃ
শৈত্যমগ্নিরিয়ান্ন ত্বা কর্ণো হন্যাদ্ধনংজয়ম্
63.77
যদি ত্বেবং কথংচিত্স্যাল্লোকপর্যসনং যথা
হন্যাং কর্ণং তথা শল্যং বাহুভ্যামেব সংয়ুগে
63.78
ইতি কৃষ্ণবচঃ শ্রুত্বা প্রহসন্কপিকেতনঃ
অর্জুনঃ প্রত্যুবাচেদং কৃষ্ণমক্লিষ্টকারিণম্
মমাপ্যেতাবপর্যাপ্তৌ কর্ণশল্যৌ জনার্দন
63.79
সপতাকাধ্বজং কর্ণং সশল্যরথবাজিনম্
সচ্ছত্রকবচং চৈব সশক্তিশরকার্মুকম্
63.80
দ্রষ্টাস্যদ্য শরৈঃ কর্ণং রণে কৃত্তমনেকধা
অদ্যৈনং সরথং সাশ্বং সশক্তিকবচায়ুধম্
ন হি মে শাম্যতে বৈরং কৃষ্ণাং যত্প্রাহসত্পুরা
63.81
অদ্য দ্রষ্টাসি গোবিন্দ কর্ণমুন্মথিতং ময়া
বারণেনেব মত্তেন পুষ্পিতং জগতীরুহম্
63.82
অদ্য তা মধুরা বাচঃ শ্রোতাসি মধুসূদন
অদ্যাভিমন্যুজননীমনৃণঃ সান্ত্বয়িষ্যসি
কুন্তীং পিতৃষ্বসারং চ সংপ্রহৃষ্টো জনার্দন
63.83
অদ্য বাষ্পমুখীং কৃষ্ণাং সান্ত্বয়িষ্যসি মাধব
বাগ্ভিশ্চামৃতকল্পাভির্ধর্মরাজং যুধিষ্ঠিরম্