Utshovঅধ্যায় 62
62.1
সংজয় উবাচ
দুঃশাসনে তু নিহতে পুত্রাস্তব মহারথাঃ
মহাক্রোধবিষা বীরাঃ সমরেষ্বপলায়িনঃ
দশ রাজন্মহাবীর্যো ভীমং প্রাচ্ছাদয়ঞ্শরৈঃ
62.2
কবচী নিষঙ্গী পাশী দণ্ডধারো ধনুর্ধরঃ
অলোলুপঃ শলঃ সংধো বাতবেগসুবর্চসৌ
62.3
এতে সমেত্য সহিতা ভ্রাতৃব্যসনকর্শিতাঃ
ভীমসেনং মহাবাহুং মার্গণৈঃ সমবারয়ন্
62.4
স বার্যমাণো বিশিখৈঃ সমন্তাত্তৈর্মহারথৈঃ
ভীমঃ ক্রোধাভিরক্তাক্ষঃ ক্রুদ্ধঃ কাল ইবাবভৌ
62.5
তাংস্তু ভল্লৈর্মহাবেগৈর্দশভির্দশভিঃ শিতৈঃ
রুক্মাঙ্গদো রুক্মপুঙ্খৈঃ পার্থো নিন্যে যমক্ষয়ম্
62.6
হতেষু তেষু বীরেষু প্রদুদ্রাব বলং তব
পশ্যতঃ সূতপুত্রস্য পাণ্ডবস্য ভয়ার্দিতম্
62.7
ততঃ কর্ণো মহারাজ প্রবিবেশ মহারণম্
দৃষ্ট্বা ভীমস্য বিক্রান্তমন্তকস্য প্রজাস্বিব
62.8
তস্য ত্বাকারভাবজ্ঞঃ শল্যঃ সমিতিশোভনঃ
উবাচ বচনং কর্ণং প্রাপ্তকালমরিংদম
মা ব্যথাং কুরু রাধেয় নৈতত্ত্বয্যুপপদ্যতে
62.9
এতে দ্রবন্তি রাজানো ভীমসেনভয়ার্দিতাঃ
দুর্যোধনশ্চ সংমূঢো ভ্রাতৃব্যসনদুঃখিতঃ
62.10
দুঃশাসনস্য রুধিরে পীয়মানে মহাত্মনা
ব্যাপন্নচেতসশ্চৈব শোকোপহতমন্যবঃ
62.11
দুর্যোধনমুপাসন্তে পরিবার্য সমন্ততঃ
কৃপপ্রভৃতয়ঃ কর্ণ হতশেষাশ্চ সোদরাঃ
62.12
পাণ্ডবা লব্ধলক্ষাশ্চ ধনংজয়পুরোগমাঃ
ত্বামেবাভিমুখাঃ শূরা যুদ্ধায় সমুপাস্থিতাঃ
62.13
স ত্বং পুরুষশার্দূল পৌরুষে মহতি স্থিতঃ
ক্ষত্রধর্মং পুরস্কৃত্য প্রত্যুদ্যাহি ধনংজয়ম্
62.14
ভারো হি ধার্তরাষ্ট্রেণ ত্বয়ি সর্বঃ সমর্পিতঃ
তমুদ্বহ মহাবাহো যথাশক্তি যথাবলম্
জয়ে স্যাদ্বিপুলা কীর্তির্ধ্রুবঃ স্বর্গঃ পরাজয়ে
62.15
বৃষসেনশ্চ রাধেয় সংক্রুদ্ধস্তনয়স্তব
ত্বয়ি মোহসমাপন্নে পাণ্ডবানভিধাবতি
62.16
এতচ্ছ্রুত্বা তু বচনং শল্যস্যামিততেজসঃ
হৃদি মানুষ্যকং ভাবং চক্রে যুদ্ধায় সুস্থিরম্
62.17
ততঃ ক্রুদ্ধো বৃষসেনোঽভ্যধাব;দাতস্থিবাংসং স্বরথং হতারিম্
বৃকোদরং কালমিবাত্তদণ্ডং; গদাহস্তং পোথমানং ত্বদীয়ান্
62.18
তমভ্যধাবন্নকুলঃ প্রবীরো; রোষাদমিত্রং প্রতুদন্পৃষত্কৈঃ
কর্ণস্য পুত্রং সমরে প্রহৃষ্টং; জিষ্ণুর্জিঘাংসুর্মঘবেব জম্ভম্
62.19
ততো ধ্বজং স্ফাটিকচিত্রকম্বুং; চিচ্ছেদ বীরো নকুলঃ ক্ষুরেণ
কর্ণাত্মজস্যেষ্বসনং চ চিত্রং; ভল্লেন জাম্বূনদপট্টনদ্ধম্
62.20
অথান্যদাদায় ধনুঃ সুশীঘ্রং; কর্ণাত্মজঃ পাণ্ডবমভ্যবিধ্যৎ
দিব্যৈর্মহাস্ত্রৈর্নকুলং মহাস্ত্রো; দুঃশাসনস্যাপচিতিং যিয়াসুঃ
62.21
ততঃ ক্রুদ্ধো নকুলস্তং মহাত্মা; শরৈর্মহোল্কাপ্রতিমৈরবিধ্যৎ
দিব্যৈরস্ত্রৈরভ্যবিধ্যচ্চ সোঽপি; কর্ণস্য পুত্রো নকুলং কৃতাস্ত্রঃ
62.22
কর্ণস্য পুত্রো নকুলস্য রাজ;ন্সর্বানশ্বানক্ষিণোদুত্তমাস্ত্রৈঃ
বনায়ুজান্সুকুমারস্য শুভ্রা;নলংকৃতাঞ্জাতরূপেণ শীঘ্রান্
62.23
ততো হতাশ্বাদবরুহ্য যানা;দাদায় চর্ম রুচিরং চাষ্টচন্দ্রম্
আকাশসংকাশমসিং গৃহীত্বা; পোপ্লূয়মানঃ খগবচ্চচার
62.24
ততোঽন্তরিক্ষে নৃবরাশ্বনাগাং;শ্চিচ্ছেদ মার্গান্বিচরন্বিচিত্রান্
তে প্রাপতন্নসিনা গাং বিশস্তা; যথাশ্বমেধে পশবঃ শমিত্রা
62.25
দ্বিসাহস্রা বিদিতা যুদ্ধশৌণ্ডা; নানাদেশ্যাঃ সুভৃতাঃ সত্যসংধাঃ
একেন শীঘ্রং নকুলেন কৃত্তাঃ; সারেপ্সুনেবোত্তমচন্দনাস্তে
62.26
তমাপতন্তং নকুলং সোঽভিপত্য; সমন্ততঃ সায়কৈরভ্যবিধ্যৎ
স তুদ্যমানো নকুলঃ পৃষত্কৈ;র্বিব্যাধ বীরং স চুকোপ বিদ্ধঃ
62.27
তং কর্ণপুত্রো বিধমন্তমেকং; নরাশ্বমাতঙ্গরথপ্রবেকান্
ক্রীডন্তমষ্টাদশভিঃ পৃষত্কৈ;র্বিব্যাধ বীরং স চুকোপ বিদ্ধঃ
62.28
ততোঽভ্যধাবত্সমরে জিঘাংসুঃ; কর্ণাত্মজং পাণ্ডুসুতো নৃবীরঃ
তস্যেষুভির্ব্যধমত্কর্ণপুত্রো; মহারণে চর্ম সহস্রতারম্
62.29
তস্যায়সং নিশিতং তীক্ষ্ণধার;মসিং বিকোশং গুরুভারসাহম্
দ্বিষচ্ছরীরাপহরং সুঘোর;মাধুন্বতঃ সর্পমিবোগ্ররূপম্
62.30
ক্ষিপ্রং শরৈঃ ষড্ভিরমিত্রসাহ;শ্চকর্ত খড্গং নিশিতৈঃ সুধারৈঃ
পুনশ্চ পীতৈর্নিশিতৈঃ পৃষত্কৈঃ; স্তনান্তরে গাঢমথাভ্যবিধ্যৎ
62.31
স ভীমসেনস্য রথং হতাশ্বো; মাদ্রীসুতঃ কর্ণসুতাভিতপ্তঃ
আপুপ্লুবে সিংহ ইবাচলাগ্রং; সংপ্রেক্ষমাণস্য ধনংজয়স্য
62.32
নকুলমথ বিদিত্বা ছিন্নবাণাসনাসিং; বিরথমরিশরার্তং কর্ণপুত্রাস্ত্রভগ্নম্
পবনধুতপতাকা হ্রাদিনো বল্গিতাশ্বা; বরপুরুষনিয়ত্তাস্তে রথাঃ শীঘ্রমীয়ুঃ
62.33
দ্রুপদসুতবরিষ্ঠাঃ পঞ্চ শৈনেয়ষষ্ঠা; দ্রুপদদুহিতৃপুত্রাঃ পঞ্চ চামিত্রসাহাঃ
দ্বিরদরথনরাশ্বান্সূদয়ন্তস্ত্বদীয়া;ন্ভুজগপতিনিকাশৈর্মার্গণৈরাত্তশস্ত্রাঃ
62.34
অথ তব রথমুখ্যাস্তান্প্রতীয়ুস্ত্বরন্তো; হৃদিকসুতকৃপৌ চ দ্রৌণিদুর্যোধনৌ চ
শকুনিশুকবৃকাশ্চ ক্রাথদেবাবৃধৌ চ; দ্বিরদজলদঘোষৈঃ স্যন্দনৈঃ কার্মুকৈশ্চ
62.35
তব নরবরবর্যাস্তান্দশৈকং চ বীরা;ন্প্রবরশরবরাগ্র্যৈস্তাডয়ন্তোঽভ্যরুন্ধন্
নবজলদসবর্ণৈর্হস্তিভিস্তানুদীয়ু;র্গিরিশিখরনিকাশৈর্ভীমবেগৈঃ কুণিন্দাঃ
62.36
সুকল্পিতা হৈমবতা মদোত্কটা; রণাভিকামৈঃ কৃতিভিঃ সমাস্থিতাঃ
সুবর্ণজালাবততা বভুর্গজা;স্তথা যথা বৈ জলদাঃ সবিদ্যুতঃ
62.37
কুণিন্দপুত্রো দশভির্মহায়সৈঃ; কৃপং সসূতাশ্বমপীডয়দ্ভৃশম্
ততঃ শরদ্বত্সুতসায়কৈর্হতঃ; সহৈব নাগেন পপাত ভূতলে
62.38
কুণিন্দপুত্রাবরজস্তু তোমরৈ;র্দিবাকরাংশুপ্রতিমৈরয়স্ময়ৈঃ
রথং চ বিক্ষোভ্য ননাদ নর্দত;স্ততোঽস্য গান্ধারপতিঃ শিরোঽহরৎ
62.39
ততঃ কুণিন্দেষু হতেষু তেষ্বথ; প্রহৃষ্টরূপাস্তব তে মহারথাঃ
ভৃশং প্রদধ্মুর্লবণাম্বুসংভবা;ন্পরাংশ্চ বাণাসনপাণয়োঽভ্যয়ুঃ
62.40
অথাভবদ্যুদ্ধমতীব দারুণং; পুনঃ কুরূণাং সহ পাণ্ডুসৃঞ্জয়ৈঃ
শরাসিশক্ত্যৃষ্টিগদাপরশ্বধৈ;র্নরাশ্বনাগাসুহরং ভৃশাকুলম্
62.41
রথাশ্বমাতঙ্গপদাতিভিস্ততঃ; পরস্পরং বিপ্রহতাপতন্ক্ষিতৌ
যথা সবিদ্যুত্স্তনিতা বলাহকাঃ; সমাস্থিতা দিগ্ভ্য ইবোগ্রমারুতৈঃ
62.42
ততঃ শতানীকহতান্মহাগজাং;স্তথা রথান্পত্তিগণাংশ্চ তাবকান্
জঘান ভোজশ্চ হয়ানথাপত;ন্বিশস্ত্রকৃত্তাঃ কৃতবর্মণা দ্বিপাঃ
62.43
অথাপরে দ্রৌণিশরাহতা দ্বিপা;স্ত্রয়ঃ সসর্বায়ুধয়োধকেতবঃ
নিপেতুরুর্ব্যাং ব্যসবঃ প্রপাতিতা;স্তথা যথা বজ্রহতা মহাচলাঃ
62.44
কুণিন্দরাজাবরজাদনন্তরঃ; স্তনান্তরে পত্রিবরৈরতাডয়ৎ
তবাত্মজং তস্য তবাত্মজঃ শরৈঃ; শিতৈঃ শরীরং বিভিদে দ্বিপং চ তম্
62.45
স নাগরাজঃ সহ রাজসূনুনা; পপাত রক্তং বহু সর্বতঃ ক্ষরন্
শচীশবজ্রপ্রহতোঽম্বুদাগমে; যথা জলং গৈরিকপর্বতস্তথা
62.46
কুণিন্দপুত্রপ্রহিতোঽপরদ্বিপঃ; শুকং সসূতাশ্বরথং ব্যপোথয়ৎ
ততোঽপতত্ক্রাথশরাভিদারিতঃ; সহেশ্বরো বজ্রহতো যথা গিরিঃ
62.47
রথী দ্বিপস্থেন হতোঽপতচ্ছরৈঃ; ক্রাথাধিপঃ পর্বতজেন দুর্জয়ঃ
সবাজিসূতেষ্বসনস্তথাপত;দ্যথা মহাবাতহতো মহাদ্রুমঃ
62.48
বৃকো দ্বিপস্থং গিরিরাজবাসিনং; ভৃশং শরৈর্দ্বাদশভিঃ পরাভিনৎ
ততো বৃকং সাশ্বরথং মহাজবং; ত্বরংশ্চতুর্ভিশ্চরণে ব্যপোথয়ৎ
62.49
স নাগরাজঃ সনিয়ন্তৃকোঽপত;ত্পরাহতো বভ্রুসুতেষুভির্ভৃশম্
স চাপি দেবাবৃধসূনুরর্দিতঃ; পপাত নুন্নঃ সহদেবসূনুনা
62.50
বিষাণপোত্রাপরগাত্রঘাতিনা; গজেন হন্তুং শকুনেঃ কুণিন্দজঃ
জগাম বেগেন ভৃশার্দয়ংশ্চ তং; ততোঽস্য গান্ধারপতিঃ শিরোঽহরৎ
62.51
ততঃ শতানীকহতা মহাগজা; হয়া রথাঃ পত্তিগণাশ্চ তাবকাঃ
সুপর্ণবাতপ্রহতা যথা নগা;স্তথা গতা গামবশা বিচূর্ণিতাঃ
62.52
ততোঽভ্যবিধ্যদ্বহুভিঃ শিতৈঃ শরৈঃ; কুণিন্দপুত্রো নকুলাত্মজং স্ময়ন্
ততোঽস্য কায়ান্নিচকর্ত নাকুলিঃ; শিরঃ ক্ষুরেণাম্বুজসংনিভাননম্
62.53
ততঃ শতানীকমবিধ্যদাশুগৈ;স্ত্রিভিঃ শিতৈঃ কর্ণসুতোঽর্জুনং ত্রিভিঃ
ত্রিভিশ্চ ভীমং নকুলং চ সপ্তভি;র্জনার্দনং দ্বাদশভিশ্চ সায়কৈঃ
62.54
তদস্য কর্মাতিমনুষ্যকর্মণঃ; সমীক্ষ্য হৃষ্টাঃ কুরবোঽভ্যপূজয়ন্
পরাক্রমজ্ঞাস্তু ধনংজয়স্য তে; হুতোঽয়মগ্নাবিতি তং তু মেনিরে
62.55
ততঃ কিরীটী পরবীরঘাতী; হতাশ্বমালোক্য নরপ্রবীরম্
তমভ্যধাবদ্বৃষসেনমাহবে; স সূতজস্য প্রমুখে স্থিতং তদা
62.56
তমাপতন্তং নরবীরমুগ্রং; মহাহবে বাণসহস্রধারিণম্
অভ্যাপতত্কর্ণসুতো মহারথো; যথৈব চেন্দ্রং নমুচিঃ পুরাতনে
62.57
ততোঽদ্ভুতেনৈকশতেন পার্থং; শরৈর্বিদ্ধ্বা সূতপুত্রস্য পুত্রঃ
ননাদ নাদং সুমহানুভাবো; বিদ্ধ্বেব শক্রং নমুচিঃ পুরা বৈ
62.58
পুনঃ স পার্থং বৃষসেন উগ্রৈ;র্বাণৈরবিধ্যদ্ভুজমূলমধ্যে
তথৈব কৃষ্ণং নবভিঃ সমার্দয়;ত্পুনশ্চ পার্থং দশভিঃ শিতাগ্রৈঃ
62.59
ততঃ কিরীটী রণমূর্ধ্নি কোপা;ত্কৃত্বা ত্রিশাখাং ভ্রুকুটিং ললাটে
মুমোচ বাণান্বিশিখান্মহাত্মা; বধায় রাজন্সূতপুত্রস্য সংখ্যে
62.60
বিব্যাধ চৈনং দশভিঃ পৃষত্কৈ;র্মর্মস্বসক্তং প্রসভং কিরীটী
চিচ্ছেদ চাস্যেষ্বসনং ভুজৌ চ; ক্ষুরৈশ্চতুর্ভিঃ শির এব চোগ্রৈঃ
62.61
স পার্থবাণাভিহতঃ পপাত; রথাদ্বিবাহুর্বিশিরা ধরায়াম্
সুপুষ্পিতঃ পর্ণধরোঽতিকায়ো; বাতেরিতঃ শাল ইবাদ্রিশৃঙ্গাৎ
62.62
তং প্রেক্ষ্য বাণাভিহতং পতন্তং; রথাত্সুতং সূতজঃ ক্ষিপ্রকারী
রথং রথেনাশু জগাম বেগা;ত্কিরীটিনঃ পুত্রবধাভিতপ্তঃ