Utshovঅধ্যায় 61
61.1
সংজয় উবাচ
তত্রাকরোদ্দুষ্করং রাজপুত্রো; দুঃশাসনস্তুমুলে যুধ্যমানঃ
চিচ্ছেদ ভীমস্য ধনুঃ ক্ষুরেণ; ষড্ভিঃ শরৈঃ সারথিমপ্যবিধ্যৎ
61.2
ততোঽভিনদ্বহুভিঃ ক্ষিপ্রমেব; বরেষুভির্ভীমসেনং মহাত্মা
স বিক্ষরন্নাগ ইব প্রভিন্নো; গদামস্মৈ তুমুলে প্রাহিণোদ্বৈ
61.3
তয়াহরদ্দশ ধন্বন্তরাণি; দুঃশাসনং ভীমসেনঃ প্রসহ্য
তয়া হতঃ পতিতো বেপমানো; দুঃশাসনো গদয়া বেগবত্যা
61.4
হয়াঃ সসূতাশ্চ হতা নরেন্দ্র; চূর্ণীকৃতশ্চাস্য রথঃ পতন্ত্যা
বিধ্বস্তবর্মাভরণাম্বরস্র;গ্বিচেষ্টমানো ভৃশবেদনার্তঃ
61.5
ততঃ স্মৃত্বা ভীমসেনস্তরস্বী; সাপত্নকং যত্প্রয়ুক্তং সুতৈস্তে
রথাদবপ্লুত্য গতঃ স ভূমৌ; যত্নেন তস্মিন্প্রণিধায় চক্ষুঃ
61.6
অসিং সমুদ্ধৃত্য শিতং সুধারং; কণ্ঠে সমাক্রম্য চ বেপমানম্
উত্কৃত্য বক্ষঃ পতিতস্য ভূমা;বথাপিবচ্ছোণিতমস্য কোষ্ণম্
আস্বাদ্য চাস্বাদ্য চ বীক্ষমাণঃ; ক্রুদ্ধোঽতিবেলং প্রজগাদ বাক্যম্
61.7
স্তন্যস্য মাতুর্মধুসর্পিষো বা; মাধ্বীকপানস্য চ সত্কৃতস্য
দিব্যস্য বা তোয়রসস্য পানা;ত্পয়োদধিভ্যাং মথিতাচ্চ মুখ্যাৎ
সর্বেভ্য এবাভ্যধিকো রসোঽয়ং; মতো মমাদ্যাহিতলোহিতস্য
61.8
এবং ব্রুবাণং পুনরাদ্রবন্ত;মাস্বাদ্য বল্গন্তমতিপ্রহৃষ্টম্
যে ভীমসেনং দদৃশুস্তদানীং; ভয়েন তেঽপি ব্যথিতা নিপেতুঃ
61.9
যে চাপি তত্রাপতিতা মনুষ্যা;স্তেষাং করেভ্যঃ পতিতং চ শস্ত্রম্
ভয়াচ্চ সংচুক্রুশুরুচ্চকৈস্তে; নিমীলিতাক্ষা দদৃশুশ্চ তন্ন
61.10
যে তত্র ভীমং দদৃশুঃ সমন্তা;দ্দৌঃশাসনং তদ্রুধিরং পিবন্তম্
সর্বে পলায়ন্ত ভয়াভিপন্না; নায়ং মনুষ্য ইতি ভাষমাণাঃ
61.11
শৃণ্বতাং লোকবীরাণামিদং বচনমব্রবীৎ
এষ তে রুধিরং কণ্ঠাত্পিবামি পুরুষাধম
ব্রূহীদানীং সুসংরব্ধঃ পুনর্গৌরিতি গৌরিতি
61.12
প্রমাণকোট্যাং শয়নং কালকূটস্য ভোজনম্
দশনং চাহিভিঃ কষ্টং দাহং চ জতুবেশ্মনি
61.13
দ্যূতেন রাজ্যহরণমরণ্যে বসতিশ্চ যা
ইষ্বস্ত্রাণি চ সংগ্রামেষ্বসুখানি চ বেশ্মনি
61.14
দুঃখান্যেতানি জানীমো ন সুখানি কদাচন
ধৃতরাষ্ট্রস্য দৌরাত্ম্যাত্সপুত্রস্য সদা বয়ম্
61.15
ইত্যুক্ত্বা বচনং রাজঞ্জয়ং প্রাপ্য বৃকোদরঃ
পুনরাহ মহারাজ স্ময়ংস্তৌ কেশবার্জুনৌ
61.16
দুঃশাসনে যদ্রণে সংশ্রুতং মে; তদ্বৈ সর্বং কৃতমদ্যেহ বীরৌ
অদ্যৈব দাস্যাম্যপরং দ্বিতীয়ং; দুর্যোধনং যজ্ঞপশুং বিশস্য
শিরো মৃদিত্বা চ পদা দুরাত্মনঃ; শান্তিং লপ্স্যে কৌরবাণাং সমক্ষম্
61.17
এতাবদুক্ত্বা বচনং প্রহৃষ্টো; ননাদ চোচ্চৈ রুধিরার্দ্রগাত্রঃ
ননর্ত চৈবাতিবলো মহাত্মা; বৃত্রং নিহত্যেব সহস্রনেত্রঃ