Utshovঅধ্যায় 60
60.1
সংজয় উবাচ
ততঃ কর্ণঃ কুরুষু প্রদ্রুতেষু; বরূথিনা শ্বেতহয়েন রাজন্
পাঞ্চালপুত্রান্ব্যধমত্সূতপুত্রো; মহেষুভির্বাত ইবাভ্রসংঘান্
60.2
সূতং রথাদঞ্জলিকেন পাত্য; জঘান চাশ্বাঞ্জনমেজয়স্য
শতানীকং সুতসোমং চ ভল্লৈ;রবাকিরদ্ধনুষী চাপ্যকৃন্তৎ
60.3
ধৃষ্টদ্যুম্নং নির্বিভেদাথ ষড্ভি;র্জঘান চাশ্বং দক্ষিণং তস্য সংখ্যে
হত্বা চাশ্বান্সাত্যকেঃ সূতপুত্রঃ; কৈকেয়পুত্রং ন্যবধীদ্বিশোকম্
60.4
তমভ্যধাবন্নিহতে কুমারে; কৈকেয়সেনাপতিরুগ্রধন্বা
শরৈর্বিভিন্নং ভৃশমুগ্রবেগৈঃ; কর্ণাত্মজং সোঽভ্যহনত্সুষেণম্
60.5
তস্যার্ধচন্দ্রৈস্ত্রিভিরুচ্চকর্ত; প্রসহ্য বাহূ চ শিরশ্চ কর্ণঃ
স স্যন্দনাদ্গামপতদ্গতাসুঃ; পরশ্বধৈঃ শাল ইবাবরুগ্ণঃ
60.6
হতাশ্বমঞ্জোগতিভিঃ সুষেণঃ; শিনিপ্রবীরং নিশিতৈঃ পৃষত্কৈঃ
প্রচ্ছাদ্য নৃত্যন্নিব সৌতিপুত্রঃ; শৈনেয়বাণাভিহতঃ পপাত
60.7
পুত্রে হতে ক্রোধপরীতচেতাঃ; কর্ণঃ শিনীনামৃষভং জিঘাংসুঃ
হতোঽসি শৈনেয় ইতি ব্রুবন্স; ব্যবাসৃজদ্বাণমমিত্রসাহম্
60.8
স তস্য চিচ্ছেদ শরং শিখণ্ডী; ত্রিভিস্ত্রিভিশ্চ প্রতুতোদ কর্ণম্
শিখণ্ডিনঃ কার্মুকং স ধ্বজং চ; চ্ছিত্ত্বা শরাভ্যামহনত্সুজাতম্
60.9
শিখণ্ডিনং ষড্ভিরবিধ্যদুগ্রো; দান্তো ধার্ষ্টদ্যুম্নশিরশ্চকর্ত
অথাভিনত্সুতসোমং শরেণ; স সংশিতেনাধিরথির্মহাত্মা
60.10
অথাক্রন্দে তুমুলে বর্তমানে; ধার্ষ্টদ্যুম্নে নিহতে তত্র কৃষ্ণঃ
অপাঞ্চাল্যং ক্রিয়তে যাহি পার্থ; কর্ণং জহীত্যব্রবীদ্রাজসিংহ
60.11
ততঃ প্রহস্যাশু নরপ্রবীরো; রথং রথেনাধিরথের্জগাম
ভয়ে তেষাং ত্রাণমিচ্ছন্সুবাহু;রভ্যাহতানাং রথয়ূথপেন
60.12
বিস্ফার্য গাণ্ডীবমথোগ্রঘোষং; জ্যয়া সমাহত্য তলে ভৃশং চ
বাণান্ধকারং সহসৈব কৃত্বা; জঘান নাগাশ্বরথান্নরাংশ্চ
60.13
তং ভীমসেনোঽনু যয়ৌ রথেন; পৃষ্ঠে রক্ষন্পাণ্ডবমেকবীরম্
তৌ রাজপুত্রৌ ত্বরিতৌ রথাভ্যাং; কর্ণায় যাতাবরিভির্বিমুক্তৌ
60.14
অত্রান্তরে সুমহত্সূতপুত্র;শ্চক্রে যুদ্ধং সোমকান্সংপ্রমৃদ্নন্
রথাশ্বমাতঙ্গগণাঞ্জঘান; প্রচ্ছাদয়ামাস দিশঃ শরৈশ্চ
60.15
তমুত্তমৌজা জনমেজয়শ্চ; ক্রুদ্ধৌ যুধামন্যুশিখণ্ডিনৌ চ
কর্ণং বিনেদুঃ সহিতাঃ পৃষত্কৈঃ; সংমর্দমানাঃ সহ পার্ষতেন
60.16
তে পঞ্চ পাঞ্চালরথাঃ সুরূপৈ;র্বৈকর্তনং কর্ণমভিদ্রবন্তঃ
তস্মাদ্রথাচ্চ্যাবয়িতুং ন শেকু;র্ধৈর্যাত্কৃতাত্মানমিবেন্দ্রিয়াণি
60.17
তেষাং ধনূংষি ধ্বজবাজিসূতাং;স্তূণং পতাকাশ্চ নিকৃত্য বাণৈঃ
তান্পঞ্চভিঃ স ত্বহনত্পৃষত্কৈঃ; কর্ণস্ততঃ সিংহ ইবোন্ননাদ
60.18
তস্যাস্যতস্তানভিনিঘ্নতশ্চ; জ্যাবাণহস্তস্য ধনুঃস্বনেন
সাদ্রিদ্রুমা স্যাত্পৃথিবী বিশীর্ণা; ইত্যেব মত্বা জনতা ব্যষীদৎ
60.19
স শক্রচাপপ্রতিমেন ধন্বনা; ভৃশাততেনাধিরথিঃ শরান্সৃজন্
বভৌ রণে দীপ্তমরীচিমণ্ডলো; যথাংশুমালী পরিবেষবাংস্তথা
60.20
শিখণ্ডিনং দ্বাদশভিঃ পরাভিন;চ্ছিতৈঃ শরৈঃ ষড্ভিরথোত্তমৌজসম্
ত্রিভির্যুধামন্যুমবিধ্যদাশুগৈ;স্ত্রিভিস্ত্রিভিঃ সোমকপার্ষতাত্মজৌ
60.21
পরাজিতাঃ পঞ্চ মহারথাস্তু তে; মহাহবে সূতসুতেন মারিষ
নিরুদ্যমাস্তস্থুরমিত্রমর্দনা; যথেন্দ্রিয়ার্থাত্মবতা পরাজিতাঃ
60.22
নিমজ্জতস্তানথ কর্ণসাগরে; বিপন্ননাবো বণিজো যথার্ণবে
উদ্দধ্রিরে নৌভিরিবার্ণবাদ্রথৈঃ; সুকল্পিতৈর্দ্রৌপদিজাঃ স্বমাতুলান্
60.23
ততঃ শিনীনামৃষভঃ শিতৈঃ শরৈ;র্নিকৃত্য কর্ণপ্রহিতানিষূন্বহূন্
বিদার্য কর্ণং নিশিতৈরয়স্ময়ৈ;স্তবাত্মজং জ্যেষ্ঠমবিধ্যদষ্টভিঃ
60.24
কৃপোঽথ ভোজশ্চ তবাত্মজস্তথা; স্বয়ং চ কর্ণো নিশিতৈরতাডয়ৎ
স তৈশ্চতুর্ভির্যুয়ুধে যদূত্তমো; দিগীশ্বরৈর্দৈত্যপতির্যথা তথা
60.25
সমানতেনেষ্বসনেন কূজতা; ভৃশাততেনামিতবাণবর্ষিণা
বভূব দুর্ধর্ষতরঃ স সাত্যকিঃ; শরন্নভোমধ্যগতো যথা রবিঃ
60.26
পুনঃ সমাসাদ্য রথান্সুদংশিতাঃ; শিনিপ্রবীরং জুগুপুঃ পরংতপাঃ
সমেত্য পাঞ্চালরথা মহারণে; মরুদ্গণাঃ শক্রমিবারিনিগ্রহে
60.27
ততোঽভবদ্যুদ্ধমতীব দারুণং; তবাহিতানাং তব সৈনিকৈঃ সহ
রথাশ্বমাতঙ্গবিনাশনং তথা; যথা সুরাণামসুরৈঃ পুরাভবৎ
60.28
রথদ্বিপা বাজিপদাতয়োঽপি বা; ভ্রমন্তি নানাবিধশস্ত্রবেষ্টিতাঃ
পরস্পরেণাভিহতাশ্চ চস্খলু;র্বিনেদুরার্তা ব্যসবোঽপতন্ত চ
60.29
তথা গতে ভীমমভীস্তবাত্মজঃ; সসার রাজাবরজঃ কিরঞ্শরৈঃ
তমভ্যধাবত্ত্বরিতো বৃকোদরো; মহারুরুং সিংহ ইবাভিপেতিবান্
60.30
ততস্তয়োর্যুদ্ধমতীতমানুষং; প্রদীব্যতোঃ প্রাণদুরোদরেঽভবৎ
পরস্পরেণাভিনিবিষ্টরোষয়ো;রুদগ্রয়োঃ শম্বরশক্রয়োর্যথা
60.31
শরৈঃ শরীরান্তকরৈঃ সুতেজনৈ;র্নিজঘ্নতুস্তাবিতরেতরং ভৃশম্
সকৃত্প্রভিন্নাবিব বাশিতান্তরে; মহাগজৌ মন্মথসক্তচেতসৌ
60.32
তবাত্মজস্যাথ বৃকোদরস্ত্বর;ন্ধনুঃ ক্ষুরাভ্যাং ধ্বজমেব চাচ্ছিনৎ
ললাটমপ্যস্য বিভেদ পত্রিণা; শিরশ্চ কায়াত্প্রজহার সারথেঃ
60.33
স রাজপুত্রোঽন্যদবাপ্য কার্মুকং; বৃকোদরং দ্বাদশভিঃ পরাভিনৎ
স্বয়ং নিয়চ্ছংস্তুরগানজিহ্মগৈঃ; শরৈশ্চ ভীমং পুনরভ্যবীবৃষৎ