Utshovঅধ্যায় 59
59.1
সংজয় উবাচ
তং তু যান্তং মহাবেগৈরশ্বৈঃ কপিবরধ্বজম্
যুদ্ধায়াভ্যদ্রবন্বীরাঃ কুরূণাং নবতী রথাঃ
পরিবব্রুর্নরব্যাঘ্রা নরব্যাঘ্রং রণেঽর্জুনম্
59.2
কৃষ্ণঃ শ্বেতান্মহাবেগানশ্বান্কনকভূষণান্
মুক্তাজালপ্রতিচ্ছন্নান্প্রৈষীত্কর্ণরথং প্রতি
59.3
ততঃ কর্ণরথং যান্তমরীন্ঘ্নন্তং ধনংজয়ম্
বাণবর্ষৈরভিঘ্নন্তঃ সংশপ্তকরথা যয়ুঃ
59.4
ত্বরমাণাংস্তু তান্সর্বান্সসূতেষ্বসনধ্বজান্
জঘান নবতিং বীরানর্জুনো নিশিতৈঃ শরৈঃ
59.5
তেঽপতন্ত হতা বাণৈর্নানারূপৈঃ কিরীটিনা
সবিমানা যথা সিদ্ধাঃ স্বর্গাত্পুণ্যক্ষয়ে তথা
59.6
ততঃ সরথনাগাশ্বাঃ কুরবঃ কুরুসত্তম
নির্ভয়া ভরতশ্রেষ্ঠমভ্যবর্তন্ত ফল্গুনম্
59.7
তদায়স্তমমুক্তাস্ত্রমুদীর্ণবরবারণম্
পুত্রাণাং তে মহত্সৈন্যং সমরৌত্সীদ্ধনংজয়ঃ
59.8
শক্ত্যৃষ্টিতোমরপ্রাসৈর্গদানিস্ত্রিংশসায়কৈঃ
প্রাচ্ছাদয়ন্মহেষ্বাসাঃ কুরবঃ কুরুনন্দনম্
59.9
তাং কুরূণাং প্রবিততাং শস্ত্রবৃষ্টিং সমুদ্যতাম্
ব্যধমত্পাণ্ডবো বাণৈস্তমঃ সূর্য ইবাংশুভিঃ
59.10
ততো ম্লেচ্ছাঃ স্থিতৈর্মত্তৈস্ত্রয়োদশশতৈর্গজৈঃ
পার্শ্বতোঽভ্যহনন্পার্থং তব পুত্রস্য শাসনাৎ
59.11
কর্ণিনালীকনারাচৈস্তোমরৈঃ প্রাসশক্তিভিঃ
কম্পনৈর্ভিণ্ডিপালৈশ্চ রথস্থং পার্থমার্দয়ন্
59.12
তামস্ত্রবৃষ্টিং প্রহিতাং দ্বিপস্থৈর্যবনৈঃ স্ময়ন্
চিচ্ছেদ নিশিতৈর্ভল্লৈরর্ধচন্দ্রৈশ্চ ফল্গুনঃ
59.13
অথ তান্দ্বিরদান্সর্বান্নানালিঙ্গৈর্মহাশরৈঃ
সপতাকান্সহারোহান্গিরীন্বজ্রৈরিবাভিনৎ
59.14
তে হেমপুঙ্খৈরিষুভিরাচিতা হেমমালিনঃ
হতাঃ পেতুর্মহানাগাঃ সাগ্নিজ্বালা ইবাদ্রয়ঃ
59.15
ততো গাণ্ডীবনির্ঘোষো মহানাসীদ্বিশাং পতে
স্তনতাং কূজতাং চৈব মনুষ্যগজবাজিনাম্
59.16
কুঞ্জরাশ্চ হতা রাজন্প্রাদ্রবংস্তে সমন্ততঃ
অশ্বাশ্চ পর্যধাবন্ত হতারোহা দিশো দশ
59.17
রথা হীনা মহারাজ রথিভির্বাজিভিস্তথা
গন্ধর্বনগরাকারা দৃশ্যন্তে স্ম সহস্রশঃ
59.18
অশ্বারোহা মহারাজ ধাবমানাস্ততস্ততঃ
তত্র তত্রৈব দৃশ্যন্তে পতিতাঃ পার্থসায়কৈঃ
59.19
তস্মিন্ক্ষণে পাণ্ডবস্য বাহ্বোর্বলমদৃশ্যত
যত্সাদিনো বারণাংশ্চ রথাংশ্চৈকোঽজয়দ্যুধি
59.20
ততস্ত্র্যঙ্গেণ মহতা বলেন ভরতর্ষভ
দৃষ্ট্বা পরিবৃতং রাজন্ভীমসেনঃ কিরীটিনম্
59.21
হতাবশেষানুত্সৃজ্য ত্বদীয়ান্কতিচিদ্রথান্
জবেনাভ্যদ্রবদ্রাজন্ধনংজয়রথং প্রতি
59.22
ততস্তত্প্রাদ্রবত্সৈন্যং হতভূয়িষ্ঠমাতুরম্
দৃষ্ট্বা যদর্জুনং ভীমো জগাম ভ্রাতরং প্রতি
59.23
হতাবশিষ্টাংস্তুরগানর্জুনেন মহাজবান্
ভীমো ব্যধমদভ্রান্তো গদাপাণির্মহাহবে
59.24
কালরাত্রিমিবাত্যুগ্রাং নরনাগাশ্বভোজনাম্
প্রাকারাট্টপুরদ্বারদারণীমতিদারুণাম্
59.25
ততো গদাং নৃনাগাশ্বেষ্বাশু ভীমো ব্যবাসৃজৎ
সা জঘান বহূনশ্বানশ্বারোহাংশ্চ মারিষ
59.26
কাংস্যায়সতনুত্রাংস্তান্নরানশ্বাংশ্চ পাণ্ডবঃ
পোথয়ামাস গদয়া সশব্দং তেঽপতন্হতাঃ
59.27
হত্বা তু তদ্গজানীকং ভীমসেনো মহাবলঃ
পুনঃ স্বরথমাস্থায় পৃষ্ঠতোঽর্জুনমন্বগাৎ
59.28
হতং পরাঙ্মুখপ্রায়ং নিরুত্সাহং পরং বলম্
ব্যালম্বত মহারাজ প্রায়শঃ শস্ত্রবেষ্টিতম্
59.29
বিলম্বমানং তত্সৈন্যমপ্রগল্ভমবস্থিতম্
দৃষ্ট্বা প্রাচ্ছাদয়দ্বাণৈরর্জুনঃ প্রাণতাপনৈঃ
59.30
ততঃ কুরূণামভবদার্তনাদো মহামৃধে
রথাশ্বনাগাসুহরৈর্বধ্যতামর্জুনেষুভিঃ
59.31
হাহাকৃতং ভৃশং তস্থৌ লীয়মানং পরস্পরম্
অলাতচক্রবত্সৈন্যং তদাভ্রমত তাবকম্
59.32
আদীপ্তং তব তত্সৈন্যং শরৈশ্ছিন্নতনুচ্ছদম্
আসীত্স্বশোণিতক্লিন্নং ফুল্লাশোকবনং যথা
59.33
তদ্দৃষ্ট্বা কুরবস্তত্র বিক্রান্তং সব্যসাচিনঃ
নিরাশাঃ সমপদ্যন্ত সর্বে কর্ণস্য জীবিতে
59.34
অবিষহ্যং তু পার্থস্য শরসংপাতমাহবে
মত্বা ন্যবর্তন্কুরবো জিতা গাণ্ডীবধন্বনা
59.35
তে হিত্বা সমরে পার্থং বধ্যমানাশ্চ সায়কৈঃ
প্রদুদ্রুবুর্দিশো ভীতাশ্চুক্রুশুশ্চাপি সূতজম্
59.36
অভ্যদ্রবত তান্পার্থঃ কিরঞ্শরশতান্বহূন্
হর্ষয়ন্পাণ্ডবান্যোধান্ভীমসেনপুরোগমান্
59.37
পুত্রাস্তু তে মহারাজ জগ্মুঃ কর্ণরথং প্রতি
অগাধে মজ্জতাং তেষাং দ্বীপঃ কর্ণোঽভবত্তদা
59.38
কুরবো হি মহারাজ নির্বিষাঃ পন্নগা ইব
কর্ণমেবোপলীয়ন্ত ভয়াদ্গাণ্ডীবধন্বনঃ
59.39
যথা সর্বাণি ভূতানি মৃত্যোর্ভীতানি ভারত
ধর্মমেবোপলীয়ন্তে কর্মবন্তি হি যানি চ
59.40
তথা কর্ণং মহেষ্বাসং পুত্রাস্তব নরাধিপ
উপালীয়ন্ত সংত্রাসাত্পাণ্ডবস্য মহাত্মনঃ
59.41
তাঞ্শোণিতপরিক্লিন্নান্বিষমস্থাঞ্শরাতুরান্
মা ভৈষ্টেত্যব্রবীত্কর্ণো হ্যভিতো মামিতেতি চ
59.42
সংভগ্নং হি বলং দৃষ্ট্বা বলাত্পার্থেন তাবকম্
ধনুর্বিস্ফারয়ন্কর্ণস্তস্থৌ শত্রুজিঘাংসয়া
পাঞ্চালান্পুনরাধাবত্পশ্যতঃ সব্যসাচিনঃ
59.43
ততঃ ক্ষণেন ক্ষিতিপাঃ ক্ষতজপ্রতিমেক্ষণাঃ
কর্ণং ববর্ষুর্বাণৌঘৈর্যথা মেঘা মহীধরম্
59.44
ততঃ শরসহস্রাণি কর্ণমুক্তানি মারিষ
ব্যয়োজয়ন্ত পাঞ্চালান্প্রাণৈঃ প্রাণভৃতাং বর
59.45
ততো রণো মহানাসীত্পাঞ্চালানাং বিশাং পতে
বধ্যতাং সূতপুত্রেণ মিত্রার্থেঽমিত্রঘাতিনাম্