Utshovঅধ্যায় 58
58.1
সংজয় উবাচ
রাজন্কুরূণাং প্রবরৈর্বলৈর্ভীমমভিদ্রুতম্
মজ্জন্তমিব কৌন্তেয়মুজ্জিহীর্ষুর্ধনংজয়ঃ
58.2
বিমৃদ্য সূতপুত্রস্য সেনাং ভারত সায়কৈঃ
প্রাহিণোন্মৃত্যুলোকায় পরবীরান্ধনংজয়ঃ
58.3
ততোঽস্যাম্বরমাবৃত্য শরজালানি ভাগশঃ
অদৃশ্যন্ত তথান্যে চ নিঘ্নন্তস্তব বাহিনীম্
58.4
স পক্ষিসংঘাচরিতমাকাশং পূরয়ঞ্শরৈঃ
ধনংজয়ো মহারাজ কুরূণামন্তকোঽভবৎ
58.5
ততো ভল্লৈঃ ক্ষুরপ্রৈশ্চ নারাচৈর্নির্মলৈরপি
গাত্রাণি প্রাক্ষিণোত্পার্থঃ শিরাংসি চ চকর্ত হ
58.6
ছিন্নগাত্রৈর্বিকবচৈর্বিশিরস্কৈঃ সমন্ততঃ
পতিতৈশ্চ পতদ্ভিশ্চ যোধৈরাসীত্সমাবৃতম্
58.7
ধনংজয়শরাভ্যস্তৈঃ স্যন্দনাশ্বনরদ্বিপৈঃ
রণভূমিরভূদ্রাজন্মহাবৈতরণী যথা
58.8
ঈষাচক্রাক্ষভঙ্গৈশ্চ ব্যশ্বৈঃ সাশ্বৈশ্চ যুধ্যতাম্
সসূতৈর্হতসূতৈশ্চ রথৈঃ স্তীর্ণাভবন্মহী
58.9
সুবর্ণবর্মসংনাহৈর্যোধৈঃ কনকভূষণৈঃ
আস্থিতাঃ কৃতবর্মাণো ভদ্রা নিত্যমদা দ্বিপাঃ
ক্রুদ্ধাঃ ক্রুদ্ধৈর্মহামাত্রৈঃ প্রেষিতার্জুনমভ্যয়ুঃ
58.10
চতুঃশতাঃ শরবর্ষৈর্হতাঃ পেতুঃ কিরীটিনা
পর্যস্তানীব শৃঙ্গাণি সসত্ত্বানি মহাগিরেঃ
58.11
ধনংজয়শরাভ্যস্তৈঃ স্তীর্ণা ভূর্বরবারণৈঃ
অভিপেদেঽর্জুনরথো ঘনান্ভিন্দন্নিবাংশুমান্
58.12
হতৈর্গজমনুষ্যাশ্বৈর্ভগ্নৈশ্চ বহুধা রথৈঃ
বিশস্ত্রপত্রকবচৈর্যুদ্ধশৌণ্ডৈর্গতাসুভিঃ
অপবিদ্ধায়ুধৈর্মার্গঃ স্তীর্ণোঽভূত্ফল্গুনেন বৈ
58.13
ব্যস্ফূর্জয়চ্চ গাণ্ডীবং সুমহদ্ভৈরবস্বনম্
ঘোরো বজ্রবিনিষ্পেষঃ স্তনয়িত্নোরিবাম্বরে
58.14
ততঃ প্রাদীর্যত চমূর্ধনংজয়শরাহতা
মহাবাতসমাবিদ্ধা মহানৌরিব সাগরে
58.15
নানারূপাঃ প্রহরণাঃ শরা গাণ্ডীবচোদিতাঃ
অলাতোল্কাশনিপ্রখ্যাস্তব সৈন্যং বিনির্দহন্
58.16
মহাগিরৌ বেণুবনং নিশি প্রজ্বলিতং যথা
তথা তব মহত্সৈন্যং প্রাস্ফুরচ্ছরপীডিতম্
58.17
সংপিষ্টদগ্ধবিধ্বস্তং তব সৈন্যং কিরীটিনা
হতং প্রবিহতং বাণৈঃ সর্বতঃ প্রদ্রুতং দিশঃ
58.18
মহাবনে মৃগগণা দাবাগ্নিগ্রসিতা যথা
কুরবঃ পর্যবর্তন্ত নির্দগ্ধাঃ সব্যসাচিনা
58.19
উত্সৃজ্য হি মহাবাহুং ভীমসেনং তদা রণে
বলং কুরূণামুদ্বিগ্নং সর্বমাসীত্পরাঙ্মুখম্
58.20
ততঃ কুরুষু ভগ্নেষু বীভত্সুরপরাজিতঃ
ভীমসেনং সমাসাদ্য মুহূর্তং সোঽভ্যবর্তত
58.21
সমাগম্য স ভীমেন মন্ত্রয়িত্বা চ ফল্গুনঃ
বিশল্যমরুজং চাস্মৈ কথয়িত্বা যুধিষ্ঠিরম্
58.22
ভীমসেনাভ্যনুজ্ঞাতস্ততঃ প্রায়াদ্ধনংজয়ঃ
নাদয়ন্রথঘোষেণ পৃথিবীং দ্যাং চ ভারত
58.23
ততঃ পরিবৃতো ভীমৈর্দশভিঃ শত্রুপুংগবৈঃ
দুঃশাসনাদবরজৈস্তব পুত্রৈর্ধনংজয়ঃ
58.24
তে তমভ্যর্দয়ন্বাণৈরুল্কাভিরিব কুঞ্জরম্
আততেষ্বসনাঃ ক্রূরা নৃত্যন্ত ইব ভারত
58.25
অপসব্যাংস্তু তাংশ্চক্রে রথেন মধুসূদনঃ
ততস্তে প্রাদ্রবঞ্শূরাঃ পরাঙ্মুখরথেঽর্জুনে
58.26
তেষামাপততাং কেতূন্রথাংশ্চাপানি সায়কান্
নারাচৈরর্ধচন্দ্রৈশ্চ ক্ষিপ্রং পার্থো ন্যপাতয়ৎ
58.27
অথান্যৈর্দশভির্ভল্লৈঃ শিরাংস্যেষাং ন্যপাতয়ৎ
রোষসংরক্তনেত্রাণি সংদষ্টৌষ্ঠানি ভূতলে
তানি বক্ত্রাণি বিবভুর্ব্যোম্নি তারাগণা ইব
58.28
তাংস্তু ভল্লৈর্মহাবেগৈর্দশভির্দশ কৌরবান্
রুক্মাঙ্গদান্রুক্মপুঙ্খৈর্বিদ্ধ্বা প্রায়াদমিত্রহা