Utshovঅধ্যায় 57
57.1
সংজয় উবাচ
অর্জুনস্তু মহারাজ কৃত্বা সৈন্যং পৃথগ্বিধম্
সূতপুত্রং সুসংরব্ধং দৃষ্ট্বা চৈব মহারণে
57.2
শোণিতোদাং মহীং কৃত্বা মাংসমজ্জাস্থিবাহিনীম্
বাসুদেবমিদং বাক্যমব্রবীত্পুরুষর্ষভ
57.3
এষ কেতূ রণে কৃষ্ণ সূতপুত্রস্য দৃশ্যতে
ভীমসেনাদয়শ্চৈতে যোধয়ন্তি মহারথান্
এতে দ্রবন্তি পাঞ্চালাঃ কর্ণাত্ত্রস্তা জনার্দন
57.4
এষ দুর্যোধনো রাজা শ্বেতচ্ছত্রেণ ভাস্বতা
কর্ণেন ভগ্নান্পাঞ্চালান্দ্রাবয়ন্বহু শোভতে
57.5
কৃপশ্চ কৃতবর্মা চ দ্রৌণিশ্চৈব মহাবলঃ
এতে রক্ষন্তি রাজানং সূতপুত্রেণ রক্ষিতাঃ
অবধ্যমানাস্তেঽস্মাভির্ঘাতয়িষ্যন্তি সোমকান্
57.6
এষ শল্যো রথোপস্থে রশ্মিসংচারকোবিদঃ
সূতপুত্ররথং কৃষ্ণ বাহয়ন্বহু শোভতে
57.7
তত্র মে বুদ্ধিরুত্পন্না বাহয়াত্র মহারথম্
নাহত্বা সমরে কর্ণং নিবর্তিষ্যে কথংচন
57.8
রাধেয়োঽপ্যন্যথা পার্থান্সৃঞ্জয়াংশ্চ মহারথান্
নিঃশেষান্সমরে কুর্যাত্পশ্যতোর্নৌ জনার্দন
57.9
ততঃ প্রায়াদ্রথেনাশু কেশবস্তব বাহিনীম্
কর্ণং প্রতি মহেষ্বাসং দ্বৈরথে সব্যসাচিনা
57.10
প্রয়াতশ্চ মহাবাহুঃ পাণ্ডবানুজ্ঞয়া হরিঃ
আশ্বাসয়ন্রথেনৈব পাণ্ডুসৈন্যানি সর্বশঃ
57.11
রথঘোষঃ স সংগ্রামে পাণ্ডবেয়স্য সংবভৌ
বাসবাশনিতুল্যস্য মহৌঘস্যেব মারিষ
57.12
মহতা রথঘোষেণ পাণ্ডবঃ সত্যবিক্রমঃ
অভ্যয়াদপ্রমেয়াত্মা বিজয়স্তব বাহিনীম্
57.13
তমায়ান্তং সমীক্ষ্যৈব শ্বেতাশ্বং কৃষ্ণসারথিম্
মদ্ররাজোঽব্রবীত্কর্ণং কেতুং দৃষ্ট্বা মহাত্মনঃ
57.14
অয়ং স রথ আয়াতি শ্বেতাশ্বঃ কৃষ্ণসারথিঃ
নিঘ্নন্নমিত্রান্সমরে যং কর্ণ পরিপৃচ্ছসি
57.15
এষ তিষ্ঠতি কৌন্তেয়ঃ সংস্পৃশন্গাণ্ডিবং ধনুঃ
তং হনিষ্যসি চেদদ্য তন্নঃ শ্রেয়ো ভবিষ্যতি
57.16
এষা বিদীর্যতে সেনা ধার্তরাষ্ট্রী সমন্ততঃ
অর্জুনস্য ভয়াত্তূর্ণং নিঘ্নতঃ শাত্রবান্বহূন্
57.17
বর্জয়ন্সর্বসৈন্যানি ত্বরতে হি ধনংজয়ঃ
ত্বদর্থমিতি মন্যেঽহং যথাস্যোদীর্যতে বপুঃ
57.18
ন হ্যবস্থাপ্যতে পার্থো যুয়ুত্সুঃ কেনচিত্সহ
ত্বামৃতে ক্রোধদীপ্তো হি পীড্যমানে বৃকোদরে
57.19
বিরথং ধর্মরাজং চ দৃষ্ট্বা সুদৃঢবিক্ষতম্
শিখণ্ডিনং সাত্যকিং চ ধৃষ্টদ্যুম্নং চ পার্ষতম্
57.20
দ্রৌপদেয়ান্যুধামন্যুমুত্তমৌজসমেব চ
নকুলং সহদেবং চ ভ্রাতরৌ দ্বৌ সমীক্ষ্য চ
57.21
সহসৈকরথঃ পার্থস্ত্বামভ্যেতি পরংতপ
ক্রোধরক্তেক্ষণঃ ক্রুদ্ধো জিঘাংসুঃ সর্বধন্বিনাম্
57.22
ত্বরিতোঽভিপতত্যস্মাংস্ত্যক্ত্বা সৈন্যান্যসংশয়ম্
ত্বং কর্ণ প্রতিয়াহ্যেনং নাস্ত্যন্যো হি ধনুর্ধরঃ
57.23
ন তং পশ্যামি লোকেঽস্মিংস্ত্বত্তোঽপ্যন্যং ধনুর্ধরম্
অর্জুনং সমরে ক্রুদ্ধং যো বেলামিব ধারয়েৎ
57.24
ন চাস্য রক্ষাং পশ্যামি পৃষ্ঠতো ন চ পার্শ্বতঃ
এক এবাভিয়াতি ত্বাং পশ্য সাফল্যমাত্মনঃ
57.25
ত্বং হি কৃষ্ণৌ রণে শক্তঃ সংসাধয়িতুমাহবে
তবৈষ ভারো রাধেয় প্রত্যুদ্যাহি ধনংজয়ম্
57.26
ত্বং কৃতো হ্যেব ভীষ্মেণ দ্রোণদ্রৌণিকৃপৈরপি
সব্যসাচিপ্রতিরথস্তং নিবর্তয় পাণ্ডবম্
57.27
লেলিহানং যথা সর্পং গর্জন্তমৃষভং যথা
লয়স্থিতং যথা ব্যাঘ্রং জহি কর্ণ ধনংজয়ম্
57.28
এতে দ্রবন্তি সমরে ধার্তরাষ্ট্রা মহারথাঃ
অর্জুনস্য ভয়াত্তূর্ণং নিরপেক্ষা জনাধিপাঃ
57.29
দ্রবতামথ তেষাং তু যুধি নান্যোঽস্তি মানবঃ
ভয়হা যো ভবেদ্বীর ত্বামৃতে সূতনন্দন
57.30
এতে ত্বাং কুরবঃ সর্বে দ্বীপমাসাদ্য সংয়ুগে
বিষ্ঠিতাঃ পুরুষব্যাঘ্র ত্বত্তঃ শরণকাঙ্ক্ষিণঃ
57.31
বৈদেহাম্বষ্ঠকাম্বোজাস্তথা নগ্নজিতস্ত্বয়া
গান্ধারাশ্চ যয়া ধৃত্যা জিতাঃ সংখ্যে সুদুর্জয়াঃ
57.32
তাং ধৃতিং কুরু রাধেয় ততঃ প্রত্যেহি পাণ্ডবম্
বাসুদেবং চ বার্ষ্ণেয়ং প্রীয়মাণং কিরীটিনা
57.33
কর্ণ উবাচ
প্রকৃতিস্থো হি মে শল্য ইদানীং সংমতস্তথা
প্রতিভাসি মহাবাহো বিভীশ্চৈব ধনংজয়াৎ
57.34
পশ্য বাহ্বোর্বলং মেঽদ্য শিক্ষিতস্য চ পশ্য মে
একোঽদ্য নিহনিষ্যামি পাণ্ডবানাং মহাচমূম্
57.35
কৃষ্ণৌ চ পুরুষব্যাঘ্রৌ তচ্চ সত্যং ব্রবীমি তে
নাহত্বা যুধি তৌ বীরাবপয়াস্যে কথংচন
57.36
স্বপ্স্যে বা নিহতস্তাভ্যামসত্যো হি রণে জয়ঃ
কৃতার্থো বা ভবিষ্যামি হত্বা তাবথ বা হতঃ
57.37
নৈতাদৃশো জাতু বভূব লোকে; রথোত্তমো যাবদনুশ্রুতং নঃ
তমীদৃশং প্রতিয়োত্স্যামি পার্থং; মহাহবে পশ্য চ পৌরুষং মে
57.38
রথে চরত্যেষ রথপ্রবীরঃ; শীঘ্রৈর্হয়ৈঃ কৌরবরাজপুত্রঃ
স বাদ্য মাং নেষ্যতি কৃচ্ছ্রমেত;ত্কর্ণস্যান্তাদেতদন্তাঃ স্থ সর্বে
57.39
অস্বেদিনৌ রাজপুত্রস্য হস্তা;ববেপিনৌ জাতকিণৌ বৃহন্তৌ
দৃঢায়ুধঃ কৃতিমান্ক্ষিপ্রহস্তো; ন পাণ্ডবেয়েন সমোঽস্তি যোধঃ
57.40
গৃহ্ণাত্যনেকানপি কঙ্কপত্রা;নেকং যথা তান্ক্ষিতিপান্প্রমথ্য
তে ক্রোশমাত্রং নিপতন্ত্যমোঘাঃ; কস্তেন যোধোঽস্তি সমঃ পৃথিব্যাম্
57.41
অতোষয়ত্পাণ্ডবেয়ো হুতাশং; কৃষ্ণদ্বিতীয়োঽতিরথস্তরস্বী
লেভে চক্রং যত্র কৃষ্ণো মহাত্মা; ধনুর্গাণ্ডীবং পাণ্ডবঃ সব্যসাচী
57.42
শ্বেতাশ্বয়ুক্তং চ সুঘোষমগ্র্যং; রথং মহাবাহুরদীনসত্ত্বঃ
মহেষুধী চাক্ষয়ৌ দিব্যরূপৌ; শস্ত্রাণি দিব্যানি চ হব্যবাহাৎ
57.43
তথেন্দ্রলোকে নিজঘান দৈত্যা;নসংখ্যেয়ান্কালকেয়াংশ্চ সর্বান্
লেভে শঙ্খং দেবদত্তং স্ম তত্র; কো নাম তেনাভ্যধিকঃ পৃথিব্যাম্
57.44
মহাদেবং তোষয়ামাস চৈব; সাক্ষাত্সুয়ুদ্ধেন মহানুভাবঃ
লেভে ততঃ পাশুপতং সুঘোরং; ত্রৈলোক্যসংহারকরং মহাস্ত্রম্
57.45
পৃথক্পৃথগ্লোকপালাঃ সমেতা; দদুর্হ্যস্ত্রাণ্যপ্রমেয়াণি যস্য
যৈস্তাঞ্জঘানাশু রণে নৃসিংহা;ন্স কালখঞ্জানসুরান্সমেতান্
57.46
তথা বিরাটস্য পুরে সমেতা;ন্সর্বানস্মানেকরথেন জিত্বা
জহার তদ্গোধনমাজিমধ্যে; বস্ত্রাণি চাদত্ত মহারথেভ্যঃ
57.47
তমীদৃশং বীর্যগুণোপপন্নং; কৃষ্ণদ্বিতীয়ং বরয়ে রণায়
অনন্তবীর্যেণ চ কেশবেন; নারায়ণেনাপ্রতিমেন গুপ্তম্
57.48
বর্ষায়ুতৈর্যস্য গুণা ন শক্যা; বক্তুং সমেতৈরপি সর্বলোকৈঃ
মহাত্মনঃ শঙ্খচক্রাসিপাণে;র্বিষ্ণোর্জিষ্ণোর্বসুদেবাত্মজস্য
ভয়ং মে বৈ জায়তে সাধ্বসং চ; দৃষ্ট্বা কৃষ্ণাবেকরথে সমেতৌ
57.49
উভৌ হি শূরৌ কৃতিনৌ দৃঢাস্ত্রৌ; মহারথৌ সংহননোপপন্নৌ
এতাদৃশৌ ফল্গুনবাসুদেবৌ; কোঽন্যঃ প্রতীয়ান্মদৃতে নু শল্য
57.50
এতাবহং যুধি বা পাতয়িষ্যে; মাং বা কৃষ্ণৌ নিহনিষ্যতোঽদ্য
ইতি ব্রুবঞ্শল্যমমিত্রহন্তা; কর্ণো রণে মেঘ ইবোন্ননাদ
57.51
অভ্যেত্য পুত্রেণ তবাভিনন্দিতঃ; সমেত্য চোবাচ কুরুপ্রবীরান্
কৃপং চ ভোজং চ মহাভুজাবুভৌ; তথৈব গান্ধারনৃপং সহানুজম্
গুরোঃ সুতং চাবরজং তথাত্মনঃ; পদাতিনোঽথ দ্বিপসাদিনোঽন্যান্
57.52
নিরুন্ধতাভিদ্রবতাচ্যুতার্জুনৌ; শ্রমেণ সংয়োজয়তাশু সর্বতঃ
যথা ভবদ্ভির্ভৃশবিক্ষতাবুভৌ; সুখেন হন্যামহমদ্য ভূমিপাঃ
57.53
তথেতি চোক্ত্বা ত্বরিতাঃ স্ম তেঽর্জুনং; জিঘাংসবো বীরতমাঃ সমভ্যয়ুঃ
নদীনদান্ভূরিজলো মহার্ণবো; যথা তথা তান্সমরেঽর্জুনোঽগ্রসৎ
57.54
ন সংদধানো ন তথা শরোত্তমা;ন্প্রমুঞ্চমানো রিপুভিঃ প্রদৃশ্যতে
ধনংজয়স্তস্য শরৈশ্চ দারিতা; হতাশ্চ পেতুর্নরবাজিকুঞ্জরাঃ
57.55
শরার্চিষং গাণ্ডিবচারুমণ্ডলং; যুগান্তসূর্যপ্রতিমানতেজসম্
ন কৌরবাঃ শেকুরুদীক্ষিতুং জয়ং; যথা রবিং ব্যাধিতচক্ষুষো জনাঃ
57.56
তমভ্যধাবদ্বিসৃজঞ্শরান্কৃপ;স্তথৈব ভোজস্তব চাত্মজঃ স্বয়ম্
জিঘাংসুভিস্তান্কুশলৈঃ শরোত্তমা;ন্মহাহবে সংজবিতান্প্রয়ত্নতঃ
শরৈঃ প্রচিচ্ছেদ চ পাণ্ডবস্ত্বর;ন্পরাভিনদ্বক্ষসি চ ত্রিভিস্ত্রিভিঃ
57.57
স গাণ্ডিবাভ্যায়তপূর্ণমণ্ডল;স্তপন্রিপূনর্জুনভাস্করো বভৌ
শরোগ্ররশ্মিঃ শুচিশুক্রমধ্যগো; যথৈব সূর্যঃ পরিবেষগস্তথা
57.58
অথাগ্র্যবাণৈর্দশভির্ধনংজয়ং; পরাভিনদ্দ্রোণসুতোঽচ্যুতং ত্রিভিঃ
চতুর্ভিরশ্বাংশ্চতুরঃ কপিং তথা; শরৈঃ স নারাচবরৈরবাকিরৎ
57.59
তথা তু তত্তত্স্ফুরদাত্তকার্মুকং; ত্রিভিঃ শরৈর্যন্তৃশিরঃ ক্ষুরেণ
হয়াংশ্চতুর্ভিশ্চতুরস্ত্রিভির্ধ্বজং; ধনংজয়ো দ্রৌণিরথান্ন্যপাতয়ৎ
57.60
স রোষপূর্ণোঽশনিবজ্রহাটকৈ;রলংকৃতং তক্ষকভোগবর্চসম্
সুবন্ধনং কার্মুকমন্যদাদদে; যথা মহাহিপ্রবরং গিরেস্তথা
57.61
স্বমায়ুধং চোপবিকীর্য ভূতলে; ধনুশ্চ কৃত্বা সগুণং গুণাধিকঃ
সমানয়ানাবজিতৌ নরোত্তমৌ; শরোত্তমৈর্দ্রৌণিরবিধ্যদন্তিকাৎ
57.62
কৃপশ্চ ভোজশ্চ তথাত্মজশ্চ তে; তমোনুদং বারিধরা ইবাপতন্
কৃপস্য পার্থঃ সশরং শরাসনং; হয়ান্ধ্বজং সারথিমেব পত্রিভিঃ
57.63
শরৈঃ প্রচিচ্ছেদ তবাত্মজস্য; ধ্বজং ধনুশ্চ প্রচকর্ত নর্দতঃ
জঘান চাশ্বান্কৃতবর্মণঃ শুভা;ন্ধ্বজং চ চিচ্ছেদ ততঃ প্রতাপবান্
57.64
সবাজিসূতেষ্বসনান্সকেতনা;ঞ্জঘান নাগাশ্বরথাংস্ত্বরংশ্চ সঃ
ততঃ প্রকীর্ণং সুমহদ্বলং তব; প্রদারিতং সেতুরিবাম্ভসা যথা
ততোঽর্জুনস্যাশু রথেন কেশব;শ্চকার শত্রূনপসব্যমাতুরান্
57.65
ততঃ প্রয়ান্তং ত্বরিতং ধনংজয়ং; শতক্রতুং বৃত্রনিজঘ্নুষং যথা
সমন্বধাবন্পুনরুচ্ছ্রিতৈর্ধ্বজৈ; রথৈঃ সুয়ুক্তৈরপরে যুয়ুত্সবঃ
57.66
অথাভিসৃত্য প্রতিবার্য তানরী;ন্ধনংজয়স্যাভি রথং মহারথাঃ
শিখণ্ডিশৈনেয়য়মাঃ শিতৈঃ শরৈ;র্বিদারয়ন্তো ব্যনদন্সুভৈরবম্
57.67
ততোঽভিজঘ্নুঃ কুপিতাঃ পরস্পরং; শরৈস্তদাঞ্জোগতিভিঃ সুতেজনৈঃ
কুরুপ্রবীরাঃ সহ সৃঞ্জয়ৈর্যথা;সুরাঃ পুরা দেববরৈরয়োধয়ন্
57.68
জয়েপ্সবঃ স্বর্গমনায় চোত্সুকাঃ; পতন্তি নাগাশ্বরথাঃ পরংতপ
জগর্জুরুচ্চৈর্বলবচ্চ বিব্যধুঃ; শরৈঃ সুমুক্তৈরিতরেতরং পৃথক্
57.69
শরান্ধকারে তু মহাত্মভিঃ কৃতে; মহামৃধে যোধবরৈঃ পরস্পরম্
বভুর্দশাশা ন দিবং চ পার্থিব; প্রভা চ সূর্যস্য তমোবৃতাভবৎ