UtshovChapter 57
57.1
संजय उवाच
अर्जुनस्तु महाराज कृत्वा सैन्यं पृथग्विधम्
सूतपुत्रं सुसंरब्धं दृष्ट्वा चैव महारणे
Sanjaya uvacha
Arjunastu maharaja kritva sainyam prithagvidham
Sutaputram susanrabdham drishtva chaiva maharane
57.2
शोणितोदां महीं कृत्वा मांसमज्जास्थिवाहिनीम्
वासुदेवमिदं वाक्यमब्रवीत्पुरुषर्षभ
Shonitodam mahim kritva mansamajjasthivahinim
Vasudevamidam vakyamabravitpurusharshabha
57.3
एष केतू रणे कृष्ण सूतपुत्रस्य दृश्यते
भीमसेनादयश्चैते योधयन्ति महारथान्
एते द्रवन्ति पाञ्चालाः कर्णात्त्रस्ता जनार्दन
Esha ketu rane krishna sutaputrasya drishyate
Bhimasenadayashchaite yodhayanti maharathan
Ete dravanti panchalah karnattrasta janardana
57.4
एष दुर्योधनो राजा श्वेतच्छत्रेण भास्वता
कर्णेन भग्नान्पाञ्चालान्द्रावयन्बहु शोभते
Esha duryodhano raja shvetachchhatrena bhasvata
Karnena bhagnanpanchalandravayanbahu shobhate
57.5
कृपश्च कृतवर्मा च द्रौणिश्चैव महाबलः
एते रक्षन्ति राजानं सूतपुत्रेण रक्षिताः
अवध्यमानास्तेऽस्माभिर्घातयिष्यन्ति सोमकान्
Kripashcha kritavarma cha draunishchaiva mahabalah
Ete rakshanti rajanam sutaputrena rakshitah
Avadhyamanastesmabhirghatayishyanti somakan
57.6
एष शल्यो रथोपस्थे रश्मिसंचारकोविदः
सूतपुत्ररथं कृष्ण वाहयन्बहु शोभते
Esha shalyo rathopasthe rashmisancharakovidah
Sutaputraratham krishna vahayanbahu shobhate
57.7
तत्र मे बुद्धिरुत्पन्ना वाहयात्र महारथम्
नाहत्वा समरे कर्णं निवर्तिष्ये कथंचन
Tatra me buddhirutpanna vahayatra maharatham
Nahatva samare karnam nivartishye kathanchana
57.8
राधेयोऽप्यन्यथा पार्थान्सृञ्जयांश्च महारथान्
निःशेषान्समरे कुर्यात्पश्यतोर्नौ जनार्दन
Radheyopyanyatha parthansrinjayanshcha maharathan
Nihsheshansamare kuryatpashyatornau janardana
57.9
ततः प्रायाद्रथेनाशु केशवस्तव वाहिनीम्
कर्णं प्रति महेष्वासं द्वैरथे सव्यसाचिना
Tatah prayadrathenashu keshavastava vahinim
Karnam prati maheshvasam dvairathe savyasachina
57.10
प्रयातश्च महाबाहुः पाण्डवानुज्ञया हरिः
आश्वासयन्रथेनैव पाण्डुसैन्यानि सर्वशः
Prayatashcha mahabahuh pandavanugyaya harih
Ashvasayanrathenaiva pandusainyani sarvashah
57.11
रथघोषः स संग्रामे पाण्डवेयस्य संबभौ
वासवाशनितुल्यस्य महौघस्येव मारिष
Rathaghoshah sa sangrame pandaveyasya sambabhau
Vasavashanitulyasya mahaughasyeva marisha
57.12
महता रथघोषेण पाण्डवः सत्यविक्रमः
अभ्ययादप्रमेयात्मा विजयस्तव वाहिनीम्
Mahata rathaghoshena pandavah satyavikramah
Abhyayadaprameyatma vijayastava vahinim
57.13
तमायान्तं समीक्ष्यैव श्वेताश्वं कृष्णसारथिम्
मद्रराजोऽब्रवीत्कर्णं केतुं दृष्ट्वा महात्मनः
Tamayantam samikshyaiva shvetashvam krishnasarathim
Madrarajobravitkarnam ketum drishtva mahatmanah
57.14
अयं स रथ आयाति श्वेताश्वः कृष्णसारथिः
निघ्नन्नमित्रान्समरे यं कर्ण परिपृच्छसि
Ayam sa ratha ayati shvetashvah krishnasarathih
Nighnannamitransamare yam karna pariprichchhasi
57.15
एष तिष्ठति कौन्तेयः संस्पृशन्गाण्डिवं धनुः
तं हनिष्यसि चेदद्य तन्नः श्रेयो भविष्यति
Esha tishthati kaunteyah sansprishangandivam dhanuh
Tam hanishyasi chedadya tannah shreyo bhavishyati
57.16
एषा विदीर्यते सेना धार्तराष्ट्री समन्ततः
अर्जुनस्य भयात्तूर्णं निघ्नतः शात्रवान्बहून्
Esha vidiryate sena dhartarashtri samantatah
Arjunasya bhayatturnam nighnatah shatravanbahun
57.17
वर्जयन्सर्वसैन्यानि त्वरते हि धनंजयः
त्वदर्थमिति मन्येऽहं यथास्योदीर्यते वपुः
Varjayansarvasainyani tvarate hi dhananjayah
Tvadarthamiti manyeham yathasyodiryate vapuh
57.18
न ह्यवस्थाप्यते पार्थो युयुत्सुः केनचित्सह
त्वामृते क्रोधदीप्तो हि पीड्यमाने वृकोदरे
Na hyavasthapyate partho yuyutsuh kenachitsaha
Tvamrite krodhadipto hi pidyamane vrikodare
57.19
विरथं धर्मराजं च दृष्ट्वा सुदृढविक्षतम्
शिखण्डिनं सात्यकिं च धृष्टद्युम्नं च पार्षतम्
Viratham dharmarajam cha drishtva sudridhavikshatam
Shikhandinam satyakim cha dhrishtadyumnam cha parshatam
57.20
द्रौपदेयान्युधामन्युमुत्तमौजसमेव च
नकुलं सहदेवं च भ्रातरौ द्वौ समीक्ष्य च
Draupadeyanyudhamanyumuttamaujasameva cha
Nakulam sahadevam cha bhratarau dvau samikshya cha
57.21
सहसैकरथः पार्थस्त्वामभ्येति परंतप
क्रोधरक्तेक्षणः क्रुद्धो जिघांसुः सर्वधन्विनाम्
Sahasaikarathah parthastvamabhyeti parantapa
Krodharaktekshanah kruddho jighansuh sarvadhanvinam
57.22
त्वरितोऽभिपतत्यस्मांस्त्यक्त्वा सैन्यान्यसंशयम्
त्वं कर्ण प्रतियाह्येनं नास्त्यन्यो हि धनुर्धरः
Tvaritobhipatatyasmanstyaktva sainyanyasanshayam
Tvam karna pratiyahyenam nastyanyo hi dhanurdharah
57.23
न तं पश्यामि लोकेऽस्मिंस्त्वत्तोऽप्यन्यं धनुर्धरम्
अर्जुनं समरे क्रुद्धं यो वेलामिव धारयेत्
Na tam pashyami lokesminstvattopyanyam dhanurdharam
Arjunam samare kruddham yo velamiva dharayet
57.24
न चास्य रक्षां पश्यामि पृष्ठतो न च पार्श्वतः
एक एवाभियाति त्वां पश्य साफल्यमात्मनः
Na chasya raksham pashyami prishthato na cha parshvatah
Eka evabhiyati tvam pashya saphalyamatmanah
57.25
त्वं हि कृष्णौ रणे शक्तः संसाधयितुमाहवे
तवैष भारो राधेय प्रत्युद्याहि धनंजयम्
Tvam hi krishnau rane shaktah sansadhayitumahave
Tavaisha bharo radheya pratyudyahi dhananjayam
57.26
त्वं कृतो ह्येव भीष्मेण द्रोणद्रौणिकृपैरपि
सव्यसाचिप्रतिरथस्तं निवर्तय पाण्डवम्
Tvam krito hyeva bhishmena dronadraunikripairapi
Savyasachipratirathastam nivartaya pandavam
57.27
लेलिहानं यथा सर्पं गर्जन्तमृषभं यथा
लयस्थितं यथा व्याघ्रं जहि कर्ण धनंजयम्
Lelihanam yatha sarpam garjantamrishabham yatha
Layasthitam yatha vyaghram jahi karna dhananjayam
57.28
एते द्रवन्ति समरे धार्तराष्ट्रा महारथाः
अर्जुनस्य भयात्तूर्णं निरपेक्षा जनाधिपाः
Ete dravanti samare dhartarashtra maharathah
Arjunasya bhayatturnam nirapeksha janadhipah
57.29
द्रवतामथ तेषां तु युधि नान्योऽस्ति मानवः
भयहा यो भवेद्वीर त्वामृते सूतनन्दन
Dravatamatha tesham tu yudhi nanyosti manavah
Bhayaha yo bhavedvira tvamrite sutanandana
57.30
एते त्वां कुरवः सर्वे द्वीपमासाद्य संयुगे
विष्ठिताः पुरुषव्याघ्र त्वत्तः शरणकाङ्क्षिणः
Ete tvam kuravah sarve dvipamasadya sanyuge
Vishthitah purushavyaghra tvattah sharanakankshinah
57.31
वैदेहाम्बष्ठकाम्बोजास्तथा नग्नजितस्त्वया
गान्धाराश्च यया धृत्या जिताः संख्ये सुदुर्जयाः
Vaidehambashthakambojastatha nagnajitastvaya
Gandharashcha yaya dhritya jitah sankhye sudurjayah
57.32
तां धृतिं कुरु राधेय ततः प्रत्येहि पाण्डवम्
वासुदेवं च वार्ष्णेयं प्रीयमाणं किरीटिना
Tam dhritim kuru radheya tatah pratyehi pandavam
Vasudevam cha varshneyam priyamanam kiritina
57.33
कर्ण उवाच
प्रकृतिस्थो हि मे शल्य इदानीं संमतस्तथा
प्रतिभासि महाबाहो विभीश्चैव धनंजयात्
Karna uvacha
Prakritistho hi me shalya idanim sammatastatha
Pratibhasi mahabaho vibhishchaiva dhananjayat
57.34
पश्य बाह्वोर्बलं मेऽद्य शिक्षितस्य च पश्य मे
एकोऽद्य निहनिष्यामि पाण्डवानां महाचमूम्
Pashya bahvorbalam medya shikshitasya cha pashya me
Ekodya nihanishyami pandavanam mahachamum
57.35
कृष्णौ च पुरुषव्याघ्रौ तच्च सत्यं ब्रवीमि ते
नाहत्वा युधि तौ वीरावपयास्ये कथंचन
Krishnau cha purushavyaghrau tachcha satyam bravimi te
Nahatva yudhi tau viravapayasye kathanchana
57.36
स्वप्स्ये वा निहतस्ताभ्यामसत्यो हि रणे जयः
कृतार्थो वा भविष्यामि हत्वा तावथ वा हतः
Svapsye va nihatastabhyamasatyo hi rane jayah
Kritartho va bhavishyami hatva tavatha va hatah
57.37
नैतादृशो जातु बभूव लोके; रथोत्तमो यावदनुश्रुतं नः
तमीदृशं प्रतियोत्स्यामि पार्थं; महाहवे पश्य च पौरुषं मे
Naitadrisho jatu babhuva loke; rathottamo yavadanushrutam nah
Tamidrisham pratiyotsyami partham; mahahave pashya cha paurusham me
57.38
रथे चरत्येष रथप्रवीरः; शीघ्रैर्हयैः कौरवराजपुत्रः
स वाद्य मां नेष्यति कृच्छ्रमेत;त्कर्णस्यान्तादेतदन्ताः स्थ सर्वे
Rathe charatyesha rathapravirah; shighrairhayaih kauravarajaputrah
Sa vadya mam neshyati krichchhrameta;tkarnasyantadetadantah stha sarve
57.39
अस्वेदिनौ राजपुत्रस्य हस्ता;ववेपिनौ जातकिणौ बृहन्तौ
दृढायुधः कृतिमान्क्षिप्रहस्तो; न पाण्डवेयेन समोऽस्ति योधः
Asvedinau rajaputrasya hasta;vavepinau jatakinau brihantau
Dridhayudhah kritimankshiprahasto; na pandaveyena samosti yodhah
57.40
गृह्णात्यनेकानपि कङ्कपत्रा;नेकं यथा तान्क्षितिपान्प्रमथ्य
ते क्रोशमात्रं निपतन्त्यमोघाः; कस्तेन योधोऽस्ति समः पृथिव्याम्
Grihnatyanekanapi kankapatra;nekam yatha tankshitipanpramathya
Te kroshamatram nipatantyamoghah; kastena yodhosti samah prithivyam
57.41
अतोषयत्पाण्डवेयो हुताशं; कृष्णद्वितीयोऽतिरथस्तरस्वी
लेभे चक्रं यत्र कृष्णो महात्मा; धनुर्गाण्डीवं पाण्डवः सव्यसाची
Atoshayatpandaveyo hutasham; krishnadvitiyotirathastarasvi
Lebhe chakram yatra krishno mahatma; dhanurgandivam pandavah savyasachi
57.42
श्वेताश्वयुक्तं च सुघोषमग्र्यं; रथं महाबाहुरदीनसत्त्वः
महेषुधी चाक्षयौ दिव्यरूपौ; शस्त्राणि दिव्यानि च हव्यवाहात्
Shvetashvayuktam cha sughoshamagryam; ratham mahabahuradinasattvah
Maheshudhi chakshayau divyarupau; shastrani divyani cha havyavahat
57.43
तथेन्द्रलोके निजघान दैत्या;नसंख्येयान्कालकेयांश्च सर्वान्
लेभे शङ्खं देवदत्तं स्म तत्र; को नाम तेनाभ्यधिकः पृथिव्याम्
Tathendraloke nijaghana daitya;nasankhyeyankalakeyanshcha sarvan
Lebhe shankham devadattam sma tatra; ko nama tenabhyadhikah prithivyam
57.44
महादेवं तोषयामास चैव; साक्षात्सुयुद्धेन महानुभावः
लेभे ततः पाशुपतं सुघोरं; त्रैलोक्यसंहारकरं महास्त्रम्
Mahadevam toshayamasa chaiva; sakshatsuyuddhena mahanubhavah
Lebhe tatah pashupatam sughoram; trailokyasanharakaram mahastram
57.45
पृथक्पृथग्लोकपालाः समेता; ददुर्ह्यस्त्राण्यप्रमेयाणि यस्य
यैस्ताञ्जघानाशु रणे नृसिंहा;न्स कालखञ्जानसुरान्समेतान्
Prithakprithaglokapalah sameta; dadurhyastranyaprameyani yasya
Yaistanjaghanashu rane nrisinha;nsa kalakhanjanasuransametan
57.46
तथा विराटस्य पुरे समेता;न्सर्वानस्मानेकरथेन जित्वा
जहार तद्गोधनमाजिमध्ये; वस्त्राणि चादत्त महारथेभ्यः
Tatha viratasya pure sameta;nsarvanasmanekarathena jitva
Jahara tadgodhanamajimadhye; vastrani chadatta maharathebhyah
57.47
तमीदृशं वीर्यगुणोपपन्नं; कृष्णद्वितीयं वरये रणाय
अनन्तवीर्येण च केशवेन; नारायणेनाप्रतिमेन गुप्तम्
Tamidrisham viryagunopapannam; krishnadvitiyam varaye ranaya
Anantaviryena cha keshavena; narayanenapratimena guptam
57.48
वर्षायुतैर्यस्य गुणा न शक्या; वक्तुं समेतैरपि सर्वलोकैः
महात्मनः शङ्खचक्रासिपाणे;र्विष्णोर्जिष्णोर्वसुदेवात्मजस्य
भयं मे वै जायते साध्वसं च; दृष्ट्वा कृष्णावेकरथे समेतौ
Varshayutairyasya guna na shakya; vaktum sametairapi sarvalokaih
Mahatmanah shankhachakrasipane;rvishnorjishnorvasudevatmajasya
Bhayam me vai jayate sadhvasam cha; drishtva krishnavekarathe sametau
57.49
उभौ हि शूरौ कृतिनौ दृढास्त्रौ; महारथौ संहननोपपन्नौ
एतादृशौ फल्गुनवासुदेवौ; कोऽन्यः प्रतीयान्मदृते नु शल्य
Ubhau hi shurau kritinau dridhastrau; maharathau sanhananopapannau
Etadrishau phalgunavasudevau; konyah pratiyanmadrite nu shalya
57.50
एतावहं युधि वा पातयिष्ये; मां वा कृष्णौ निहनिष्यतोऽद्य
इति ब्रुवञ्शल्यममित्रहन्ता; कर्णो रणे मेघ इवोन्ननाद
Etavaham yudhi va patayishye; mam va krishnau nihanishyatodya
Iti bruvanshalyamamitrahanta; karno rane megha ivonnanada
57.51
अभ्येत्य पुत्रेण तवाभिनन्दितः; समेत्य चोवाच कुरुप्रवीरान्
कृपं च भोजं च महाभुजावुभौ; तथैव गान्धारनृपं सहानुजम्
गुरोः सुतं चावरजं तथात्मनः; पदातिनोऽथ द्विपसादिनोऽन्यान्
Abhyetya putrena tavabhinanditah; sametya chovacha kurupraviran
Kripam cha bhojam cha mahabhujavubhau; tathaiva gandharanripam sahanujam
Guroh sutam chavarajam tathatmanah; padatinotha dvipasadinonyan
57.52
निरुन्धताभिद्रवताच्युतार्जुनौ; श्रमेण संयोजयताशु सर्वतः
यथा भवद्भिर्भृशविक्षतावुभौ; सुखेन हन्यामहमद्य भूमिपाः
Nirundhatabhidravatachyutarjunau; shramena sanyojayatashu sarvatah
Yatha bhavadbhirbhrishavikshatavubhau; sukhena hanyamahamadya bhumipah
57.53
तथेति चोक्त्वा त्वरिताः स्म तेऽर्जुनं; जिघांसवो वीरतमाः समभ्ययुः
नदीनदान्भूरिजलो महार्णवो; यथा तथा तान्समरेऽर्जुनोऽग्रसत्
Tatheti choktva tvaritah sma terjunam; jighansavo viratamah samabhyayuh
Nadinadanbhurijalo maharnavo; yatha tatha tansamarerjunograsat
57.54
न संदधानो न तथा शरोत्तमा;न्प्रमुञ्चमानो रिपुभिः प्रदृश्यते
धनंजयस्तस्य शरैश्च दारिता; हताश्च पेतुर्नरवाजिकुञ्जराः
Na sandadhano na tatha sharottama;npramunchamano ripubhih pradrishyate
Dhananjayastasya sharaishcha darita; hatashcha peturnaravajikunjarah
57.55
शरार्चिषं गाण्डिवचारुमण्डलं; युगान्तसूर्यप्रतिमानतेजसम्
न कौरवाः शेकुरुदीक्षितुं जयं; यथा रविं व्याधितचक्षुषो जनाः
Shararchisham gandivacharumandalam; yugantasuryapratimanatejasam
Na kauravah shekurudikshitum jayam; yatha ravim vyadhitachakshusho janah
57.56
तमभ्यधावद्विसृजञ्शरान्कृप;स्तथैव भोजस्तव चात्मजः स्वयम्
जिघांसुभिस्तान्कुशलैः शरोत्तमा;न्महाहवे संजवितान्प्रयत्नतः
शरैः प्रचिच्छेद च पाण्डवस्त्वर;न्पराभिनद्वक्षसि च त्रिभिस्त्रिभिः
Tamabhyadhavadvisrijansharankripa;stathaiva bhojastava chatmajah svayam
Jighansubhistankushalaih sharottama;nmahahave sanjavitanprayatnatah
Sharaih prachichchheda cha pandavastvara;nparabhinadvakshasi cha tribhistribhih
57.57
स गाण्डिवाभ्यायतपूर्णमण्डल;स्तपन्रिपूनर्जुनभास्करो बभौ
शरोग्ररश्मिः शुचिशुक्रमध्यगो; यथैव सूर्यः परिवेषगस्तथा
Sa gandivabhyayatapurnamandala;stapanripunarjunabhaskaro babhau
Sharograrashmih shuchishukramadhyago; yathaiva suryah pariveshagastatha
57.58
अथाग्र्यबाणैर्दशभिर्धनंजयं; पराभिनद्द्रोणसुतोऽच्युतं त्रिभिः
चतुर्भिरश्वांश्चतुरः कपिं तथा; शरैः स नाराचवरैरवाकिरत्
Athagryabanairdashabhirdhananjayam; parabhinaddronasutochyutam tribhih
Chaturbhirashvanshchaturah kapim tatha; sharaih sa narachavarairavakirat
57.59
तथा तु तत्तत्स्फुरदात्तकार्मुकं; त्रिभिः शरैर्यन्तृशिरः क्षुरेण
हयांश्चतुर्भिश्चतुरस्त्रिभिर्ध्वजं; धनंजयो द्रौणिरथान्न्यपातयत्
Tatha tu tattatsphuradattakarmukam; tribhih sharairyantrishirah kshurena
Hayanshchaturbhishchaturastribhirdhvajam; dhananjayo draunirathannyapatayat
57.60
स रोषपूर्णोऽशनिवज्रहाटकै;रलंकृतं तक्षकभोगवर्चसम्
सुबन्धनं कार्मुकमन्यदाददे; यथा महाहिप्रवरं गिरेस्तथा
Sa roshapurnoshanivajrahatakai;ralankritam takshakabhogavarchasam
Subandhanam karmukamanyadadade; yatha mahahipravaram girestatha
57.61
स्वमायुधं चोपविकीर्य भूतले; धनुश्च कृत्वा सगुणं गुणाधिकः
समानयानावजितौ नरोत्तमौ; शरोत्तमैर्द्रौणिरविध्यदन्तिकात्
Svamayudham chopavikirya bhutale; dhanushcha kritva sagunam gunadhikah
Samanayanavajitau narottamau; sharottamairdrauniravidhyadantikat
57.62
कृपश्च भोजश्च तथात्मजश्च ते; तमोनुदं वारिधरा इवापतन्
कृपस्य पार्थः सशरं शरासनं; हयान्ध्वजं सारथिमेव पत्रिभिः
Kripashcha bhojashcha tathatmajashcha te; tamonudam varidhara ivapatan
Kripasya parthah sasharam sharasanam; hayandhvajam sarathimeva patribhih
57.63
शरैः प्रचिच्छेद तवात्मजस्य; ध्वजं धनुश्च प्रचकर्त नर्दतः
जघान चाश्वान्कृतवर्मणः शुभा;न्ध्वजं च चिच्छेद ततः प्रतापवान्
Sharaih prachichchheda tavatmajasya; dhvajam dhanushcha prachakarta nardatah
Jaghana chashvankritavarmanah shubha;ndhvajam cha chichchheda tatah pratapavan
57.64
सवाजिसूतेष्वसनान्सकेतना;ञ्जघान नागाश्वरथांस्त्वरंश्च सः
ततः प्रकीर्णं सुमहद्बलं तव; प्रदारितं सेतुरिवाम्भसा यथा
ततोऽर्जुनस्याशु रथेन केशव;श्चकार शत्रूनपसव्यमातुरान्
Savajisuteshvasanansaketana;njaghana nagashvarathanstvaranshcha sah
Tatah prakirnam sumahadbalam tava; pradaritam seturivambhasa yatha
Tatorjunasyashu rathena keshava;shchakara shatrunapasavyamaturan
57.65
ततः प्रयान्तं त्वरितं धनंजयं; शतक्रतुं वृत्रनिजघ्नुषं यथा
समन्वधावन्पुनरुच्छ्रितैर्ध्वजै; रथैः सुयुक्तैरपरे युयुत्सवः
Tatah prayantam tvaritam dhananjayam; shatakratum vritranijaghnusham yatha
Samanvadhavanpunaruchchhritairdhvajai; rathaih suyuktairapare yuyutsavah
57.66
अथाभिसृत्य प्रतिवार्य तानरी;न्धनंजयस्याभि रथं महारथाः
शिखण्डिशैनेययमाः शितैः शरै;र्विदारयन्तो व्यनदन्सुभैरवम्
Athabhisritya prativarya tanari;ndhananjayasyabhi ratham maharathah
Shikhandishaineyayamah shitaih sharai;rvidarayanto vyanadansubhairavam
57.67
ततोऽभिजघ्नुः कुपिताः परस्परं; शरैस्तदाञ्जोगतिभिः सुतेजनैः
कुरुप्रवीराः सह सृञ्जयैर्यथा;सुराः पुरा देववरैरयोधयन्
Tatobhijaghnuh kupitah parasparam; sharaistadanjogatibhih sutejanaih
Kurupravirah saha srinjayairyatha;surah pura devavarairayodhayan
57.68
जयेप्सवः स्वर्गमनाय चोत्सुकाः; पतन्ति नागाश्वरथाः परंतप
जगर्जुरुच्चैर्बलवच्च विव्यधुः; शरैः सुमुक्तैरितरेतरं पृथक्
Jayepsavah svargamanaya chotsukah; patanti nagashvarathah parantapa
Jagarjuruchchairbalavachcha vivyadhuh; sharaih sumuktairitaretaram prithak
57.69
शरान्धकारे तु महात्मभिः कृते; महामृधे योधवरैः परस्परम्
बभुर्दशाशा न दिवं च पार्थिव; प्रभा च सूर्यस्य तमोवृताभवत्
Sharandhakare tu mahatmabhih krite; mahamridhe yodhavaraih parasparam
Babhurdashasha na divam cha parthiva; prabha cha suryasya tamovritabhavat